Ang Dios sang “Daan nga Testamento”—Isa Bala Sia ka Dios sang Gugma?

“ANG Dios sang Daan nga Testamento, nga amo si Yah­weh sang Judaismo, isa ka dios sang pagpakamalaut, dios sang kaakig, dios sang kaimon, kag indi ako makapalapit sa iya.” Amo sina ang ginsiling ni You­ji Inoue, isa ka Hapon nga Katolikong pari, sa artikulo nga natig-ulohan “Ang Hapones kag ang Cristianismo” sa isa sang pangunang pamantalaan sang Japan, ang Asahi Shimbun. Apang, dugang niya, ini nga Dios sang ulihi “nagbag-o kag nagbalhin sa isa ka Dios sang Bag-o nga Testamento, nga amo, ang Dios nga gintudlo ni Jesus.”

Sa katunayan, indi lamang ang klerigo nga si Inoue ang may amo sina nga pagpati. Apang nagaugyon ka bala sa iya? Nagabatyag ka bala nga ang Dios sang “Daan nga Testamento,” ukon sang Hebreong Kasulatan, isa ka mapintas kag matimaluson nga Dios kon ipaanggid sa Dios sang “Bag-o nga Testamento,” ukon sang Cristianong Griegong Kasulatan?

Sa mga tawo, ang personalidad nagabag-o. Halimbawa, ang Biblia nagalaygay sa mga nagahigugma sa Dios nga “isuklob ang bag-ong personalidad nga gintuga suno sa kabubut-on sang Dios sa matuod nga pagkamatarong kag katutom.” (Efeso 4:24) Paagi sa pagtuon sang Biblia kag pag-aplikar kon ano ang ila naton-an, madamo sang maimon anay, may kaakig, kag iban pa, ang naghimo sing daku nga pagbalhin, amo kon ngaa nga sa karon ginapadayag nila sa ila matag-adlaw nga pagkabuhi ang bunga sang espiritu sang Dios—“gugma, kalipay, paghidait, pagbatas, kalulo, kaayo, pagtuo, kalum-ok, pagpugong sa kaugalingon.”—Galacia 5:22, 23.

Apang amo man bala sina ang masiling tuhoy sa Manunuga, si Jehova nga Dios? “Nagbag-o kag nagbalhin” bala sia gikan sa “dios sang kaakig” pakadto sa Cristianong Dios sang gugma, subong sang pagtawag sa iya sang iban?

Si Jehova—Pirme Dios sang Gugma

“Ang Dios gugma,” sulat ni apostol Juan. (1 Juan 4:8) Ginhambal niya diri ang dayon nga kamatuoran: Ang Manunuga, si Jehova, isa anay, isa karon, kag pirme mangin isa ka Dios sang wala nagabalhin nga gugma. Kag kutob sa ginsugoran tubtob sa katapusan, ang rekord sang Biblia nagasakdag sina nga pinamulong.

Sang gintuga ni Jehova ang duta, mahigugmaon nga ginhimo niya ini nga mangin halandumon nga puluy-an sang tawo. (Isaias 45:18) Sang ulihi, sang gintuga niya ang nahaunang lalaki kag babayi, si Adan kag si Eva, ginhimo niya sila sa “larawan niya,” kon sayoron, ginhatagan niya sila sing diosnon nga mga kinaiya subong sang gugma, katarungan, kaalam, kag gahom. Ginbutang man niya sa atubangan nila ang paglaum nga makatigayon sing anak, nagahimo sa bug-os nga duta nga paraiso, kag magkabuhi sa sini sing dayon. (Genesis 1:27, 28) Indi bala nga ini tanan pamatuod sang isa ka Dios sang gugma?

Sang ang nahaunang tawhanon nga mag-asawa nasulay ni Satanas paagi sa man-ug, nadula nila ang dayon nga pagpakamaayo indi lamang para sa ila kaugalingon kundi sa ila wala pa mabun-ag nga mga anak. Sa sining ital-ital nga tion, ginsiling ni Jehova ang nahaunang tagna nga narekord sa Biblia, nga amo, nga ang ginsaad nga ‘binhi sang babayi’ magadugmok sa ulo sang man-ug. (Genesis 3:15) Indi bala ini nga saad sang paglaum kag kahilwayan isa pa ka talalupangdon nga ekspresyon sang gugma sang Dios?

Mga 2,000 ka tuig sang ulihi, si Jehova nagsaad sa iya matutom nga alagad nga si Abraham: “Paagi sa imo binhi ang tanan nga pungsod sa duta pakamaayuhon,” sa amo nagapahayag nga ‘ang binhi sang babayi’ magakari paagi sa linya sang panimalay ni Abraham. (Genesis 22:18) Ini nga saad naglig-on sa paglaum nga kahilwayan kag nagpakita nga ang gugma ni Jehova sa katawhan wala magdiutay sa pagligad sang tion. Ginhunahuna niya ang ginpakamaayo nga palaabuton para sa katawhan sang ginsaad niya ini. Isa gid sia ka Dios sang gugma!

Ang Gugma sang Dios sa Israel

Dugang pa, ginhilway ni Jehova nga Dios ang mga Israelinhon gikan sa kahiolipnan sa Egipto sang 1513 B.C.E. kag naghimo sing katipan sang Kasugoan upod sa ila paagi kay Moises. Sa ikaduha sang Napulo ka Sugo, si Jehova nagsiling: “Kay ako, si Yah­weh nga imo Dios, maimon nga Dios [Dios nga nagapangayo sing eksklusibo nga debosyon, New World Translation] kag isilot ko ang sala sang amay sa mga anak, sa mga apo, kag sa mga apo sa tuhod sadtong nagadumot sa akon; apang ipakita ko ang kalulo sa linibolibo nga nagahigugma sa akon kag nagatuman sang akon mga sugo.”—Exodo 20:5, 6, The Jerusalem Bible.

Subong Soberano kag katulad-bana nga tag-iya, si Jehova may kinamatarong sa pagpangayo sing eksklusibo nga debosyon sa iya ginpakigkatipanan nga katawhan, ang Israel. (Isaias 54:5; Jeremias 3:14) Sang ang iya katawhan nangin dimatutom kag nagliso sa dimatuod nga mga dios sa liwat kag liwat, indi bala makatarunganon nga si Jehova, tungod sang iya gugma sa ila, magadisiplina sa ila, nagapabutyag sang iya dikahamuot kag pagtagudili sa ila balingag nga dalanon?

Sa madamong beses, ginpakita ni Jehova ang tudok nga pag-ulikid sa iya katawhan kag nag-apelar sa ila nga magbalik sa iya. (Isaias 55:7) Bisan pa ginsilotan niya sila bangod sang ila mga sala, sang ulihi nagtugot nga ang ila pungsod malaglag kag mabihag sila sa dumuluong nga duta, sa gintalana nga tion ginpapauli niya sila sa ila tumandok nga duta. Ano ang ginapakita sini tanan nahanungod kay Jehova? Isa bala sia ka maimon, madinumtanon, kag matimaluson nga Dios? Indi! Sa baylo, nagapakita ini nga isa sia ka “Dios nga maluluy-on kag mainawaon, makuli sa pagpangakig kag bugana sa dibagay nga kaluoy kag kamatuoran.”—Exodo 34:6; Nehemias 9:17; Joel 2:13; Nahum 1:2, 3.

Ang Gugma Ginpabutyag Paagi sa Iya Anak

Sa sulod sang siniglo, si Jehova nga Dios naghatag sing dugang nga mga detalye nahanungod sa ‘binhi sang babayi’ kag sang ‘binhi ni Abraham,’ kag paagi sa Iya mga manalagna gintagna Niya ang pagkari sang Mesias. Sang ang gintalana nga tion nag-abot, ginpakita sang Dios ang iya gugma sa dimatupongan nga paagi—paagi sa pagpadala sa iya bugtong nga Anak sa duta sa pag-aman sang halad-gawad.

Tuhoy sa iya makatilingala nga aman, si apostol Juan nagsulat: “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Bangod kay ang gugma sang Dios paagi sa iya Anak, si Jesucristo, daku katama, ang iban naghinakop sing sayop nga ayhan indi man sia ang Dios nga ginahambalan sa Hebreong Kasulatan subong ang Isa nga nagasilot kag nagahukom.

Apang ang Dios bala nga gintudlo ni Jesus tuhay gikan sa Dios nga ginlarawan sa Hebreong Kasulatan? Ukon ginpakamaayo bala sang tawo ang paghangop nga luyag nila ihangop? Indi bala nga inang bantog nga teksto, ang Juan 3:16, maathag nga nagapakita nga kon ang isa indi ‘magtuo’ sa Anak, ina sia “mawala”? Dugang pa, si Juan padayon nga nagsiling: “Ang wala nagatuman sa Anak indi makakita sing kabuhi, apang ang kasingkal sang Dios magapabilin sa iya.” (Juan 3:36) Kon wala ini nagabuhin sa pagkadaku sang gugma sang Dios, ti ngaa ang iya ekspresyon sang pagkadikahamuot batok sa dimatutom nga mga Israelinhon kag sa iban pa sa Hebreong Kasulatan wala nagahimo sa iya nga Dios sang gugma?

Ang Mahigugmaon nga Katuyoan sang Dios Para sa Imo

Paagi sa iya manalagna nga si Malaquias, ang Dios nagsiling: “Ako si Jehova; wala ako magbalhin.” (Malaquias 3:6) Indi lamang nga nagpabilin sia nga wala magbalhin subong Dios sang gugma kundi ang iya mahigugmaon nga katuyoan nahanungod sa katawhan kag sa duta nagpabilin man nga wala magbalhin. Subong nga ginbutang ni Jehova sa atubangan ni Adan kag ni Eva ang paglaum nga mabuhi sa walay katapusan sa paraiso sa duta, ining Dios sang gugma maluyag man nga mangin isa ikaw sadtong magakabuhi sing dayon sing malipayon sa sinang Paraiso. (Lucas 23:43; 2 Pedro 3:13; Bugna 21:4) Apang ano ang ginakinahanglan? Si Jesus nagsiling: “Nagakahulugan ini sing kabuhi nga walay katapusan, ang pagkuha nila sing ihibalo nahanungod sa imo, ang lamang matuod nga Dios, kag nahanungod sa isa nga ginpadala mo, si Jesucristo.” (Juan 17:3) Ang mga Saksi ni Jehova malipay sa pagbulig sa imo nga mahibal-an ang nahanungod kay Jehova, ang Dios sang wala nagabalhin nga gugma.