Ang “Balaan nga Paghidait” Distrito nga Kombension—Amo Gid ang Kinahanglan Naton!

“NALAB-OT ang mga tagipusuon kag naapektohan ang mga panimuot.” “Si Jehova naghiwat sing sinalusalo sang madamong manamit nga mga pagkaon.” “Ang mga pamulongpulong prangka kag espesipiko.” “Amo gid ang kinahanglan naton KARON!” “Amo gid ini ang kinahanglan naton!”

Amo inang tipiko sa madamong ekspresyon sang apresasyon ang nabatian para sa 1986 “Balaan nga Paghidait” Distrito nga Kombension sang mga Saksi ni Jehova. Ina tanan nga mga ekspresyon nagapakita nga ang mga nagtambong nagpamati sa matahom nga laygay nga ginhatag sang tsirman kag sang nagabukas nga pamulongpulong: “Mamati kag Hangpa Ini.”

Sanglit ang tema nga paghidait nagalutaw gid sa Pulong sang Dios, ang tinaga makita sing 300 ka beses sa Biblia, nagakaigo gid nga himuon ini nga tema sang aton 1986 distrito nga mga kombension. Sa katunayan, 18 sang inspirado nga mga sulat kutob sa Roma tubtob Bugna ang nagasugod sa mga pinamulong subong sang, “Kabay nga ang dibagay nga kalulo kag paghidait magauswag sa imo.” Talupangda nga sa Hebreong Kasulatan ang tinaga nga ginbadbad “paghidait” amo ang sha·lohmʹ, nga wala lamang nagakahulugan sing pagkawala sing inaway kag pinuyas kundi nagakahulugan man sing kapagros, kabuganaan, kag kaayohan.—1 Pedro 1:2.

Ang paghidait ginapadaku liwat kag liwat sa bug-os nga programa. Subong sang ginpadaku sang humalambal sa key­note, si Jehova amo “ang Dios sang paghidait” kag “ang Dios nga nagahatag sing paghidait.” Ang Iya Anak, ang “Prinsipe sang Paghidait,” nagsaad sa iya mga sumulunod sing paghidait. (Filipos 4:9; Roma 16:20; Isaias 9:6; Juan 14:27; 16:33) Ang humalambal sa key­note nagpakita nga ang paghidait nga ginaagom naton nga mga Saksi pinasahi sa bagay nga wala ini nagasandig sa naguwa nga mga kahimtangan. Nasandig ini sa aton pagtahod sa awtoridad, nga amo ang kabangdanan kon ngaa ang kalibutan wala sing paghidait—wala ini sing pagtahod sa labing daku nga Awtoridad, si Jehova nga Dios. Amo sini ang ginsiling ni Isaias: “O kabay kuntani nga nagpamati ka sa akon mga sugo! Nian ang imo paghidait nangin subong kuntani sang suba.”—Isaias 48:18.

Ang isa sa mabuligon nga mga panugda nga ginhatag agod maagom naton sing labi pa ang balaan nga paghidait amo nga dapat kita manikasog nga magkuha sa tagsa ka pamulongpulong sing isa ka praktikal nga punto sang laygay nga mapangabudlayan. Ini nga miting nagpakita nga agod mangin mga nagahimo sing paghidait indi lamang bastante para sa aton ang mangin mahidaiton; kundi dapat kita mangabudlay para sa paghidait, nga handa magpaubos sa interes sang paghidait.

Nasukluban ang mga Tiil sang Pangaman sang Maayong Balita sang Paghidait

Ang aton mensahe ginatawag nga “maayong balita sang paghidait.” (Efeso 6:15) Nagabaton kita sing madamong matahom nga laygay kon paano isugid sa iban ining maayong balita sang paghidait. Ang tatlo-sing-bahin nga sym­po­sium sa aton ministeryo mabuligon gid katama sa sining katuyoan. Ang nahaunang humalambal nagpakita kon paano ang aton pamalaybalay nga ministeryo nangin marka (trade­mark) sang mga Saksi ni Jehova. Sanglit ini nga hilikuton indi mahapos, ginapamatod-an naton ang aton gugma sa Dios kag sa tawo paagi sa pagpakigbahin sa sini. Agod mangin epektibo katama, dapat kita mangin mahunahunaon kag mataktika, nagahupot sing sibu nga mga rekord kag nagaduaw sa lainlain nga tion agod malab-ot ang tanan.

Ang ikaduha nga humalambal nagpaathag nga agod makahimo kita sing mga disipulo dapat naton pirme duawon liwat ang mga interesado, nagahimo sini upod ang positibo nga panimuot. Dapat kita personal nga mangin interesado sa mga ginaduaw naton, nga nagatanda kon ano ang nagpainteres sa tagbalay sa nahauna nga pagduaw. Siguraduha nga ang tagbalay may bag-o nga butang nga naton-an sa tagsa ka pagduaw liwat.

Ang ikatlo nga humalambal nagpakita nga ang aton mga estudyante sa Biblia mabuligan nga mangin mga Saksi kon lab-uton naton ang ila mga tagipusuon paagi sa mga pamangkot nga nagapahulag sa ila nga mangatarungan. Luyag naton ipakita ang matuod nga interes sa ila paagi sa pagtuytuy sa ila sa organisasyon sang Dios, nagabulig sa ila nga makatambong sa mga miting, nagaduaw sa ila sa iban nga mga tion, kag nagaagda pa gani sa ila sa aton mga puluy-an. Sang nagligad nga 35 ka tuig, ang pagtuon sa Biblia nagdugang sing napulo ka pilo.

Pagkatapos sang sym­po­sium, ginpadaku sa aton ang kinahanglanon nga ipadayag ang kalangkag sa pagpaambit sang maayong balita sang paghidait bisan diin nga posible kag sa idalom sang tanan nga mga sirkunstansia. Ang edad indi isa ka sablag. Ang mga kabataan kag yadtong nagaedad na sing mga 90 padayon nga nagabantala. Ang iban mga payunir, ukon bug-os tion nga mga manugbantala, bisan pa bulag. Ang iban nagapayunir bisan bungol, ang iban naman na-wheel­chair. Ang isa ka payunir nga mag-asawa may anum ka kabataan nga nagaupod sa ila sa pag-alagad sa latagon.

Nagakaigo gid amo ang laygay nga “Himoa ang Imo Bug-os nga Masarangan Paagi sa Pagpakigbahin sa Bug-os Tion nga Ministeryo.” Ang bug-os tion nga pag-alagad amo ang labing makaalayaw, labing makapaladya, nga dalanon sang kabuhi. Kay nagsugod na, ang mga payunir ginlaygayan nga himuon ang ila bug-os nga masarangan agod magpabilin sa bug-os tion nga pag-alagad.

Sadtong nagligad nga mga kombension, nabatian naton ang madugay na nga mga manugbantala sang maayong balita, ang iban nag-alagad na sing kutob 30 tubtob 70 ka tuig. Ginsugid nila ang ila kalipay sa pagbantala sang maayong balita. Makapalig-on gid ang magpamati kon paano nila nalandas ang mga upang agod magpadayon sa ministeryo. Halimbawa, ang isa ka utod wala gid makapalya sa pagpakigbahin sa pag-alagad sa latagon sing isa ka bulan sa 43 ka tuig nga pag-alagad.

Laygay sa mga Katapo sang Panimalay

Ang maayong laygay para sa mga katapo sang panimalay kinahanglanon gid tungod sa katalagman nga ginahatag sang malaut nga sistema sang mga butang sa mga yara sa Cristianong panimalay. Ang mga pamatan-on ginpamangkot, “Kamo Bala Mainuswagon sa Espirituwal?” Karon madamo ang nagaalagad sing bug-os tion subong mga payunir sa mga puluy-an Bethel. Apang madamo pa bala ang makahimo sina? Ang mangin mainuswagon sa espirituwal nagakahulugan nga unahon ang kabubut-on sang Dios sa aton kabuhi. Nagakahulugan man ini sang pagtigayon sing maayong batasan sa pagtuon kag pagpakigbahin sing regular sa mga hilikuton sang kongregasyon kag sa pag-alagad sa latagon, subong man sang pagtigayon sing maayong kaangtanan upod sa mga tigulang. Kag nagakahulugan ini sang indi pagpangalipay sa bisan ano nga butang nga ginadumilian sang Pulong sang Dios.

Ang isa pa tatlo-sing-bahin nga sym­po­sium nagsugod paagi sa makapahunahuna nga pamangkot, “Ang Imo Bala Puluy-an Isa ka Duog sang Kalinong kag Paghidait?” Ang sadsaran sa sini amo ang pagpili subong tiayon sang isa ka saksi ni Jehova nga nagauna sang mga intereses sang Ginharian kag nagapadayag sang mga bunga sang espiritu sang Dios. Agod ang isa ka puluy-an mangin isa ka duog sang kalinong kag paghidait, ang bana dapat magpanguna sa espirituwal nga mga butang, kag dapat niya higugmaon ang iya asawa subong sang iya kaugalingon nga lawas. Ang asawa dapat mangin masinakdagon kag may tudok nga pagtahod sa iya bana. Kinahanglan man nga mangamuyo sing tingob kag indi paghatagan sing lugar ang Yawa. Ang mga kabataan makaamot sa paghimo sa puluy-an nga isa ka duog sang paghidait kag kalinong paagi sa pagkamapinasakupon kag pagkamabinuligon. Ang higut sang pamilya mapabakud kon ang mga pamilya nagatuon sang Biblia kag literatura sa Biblia sing tingob.—Salmo 34:11.

Kinahanglan sing daku amo ang pamulongpulong nga nagsunod, “Ang Pagbulagay Bala Amo ang Paagi Para sa Paghidait sa Pag-asawahay?” Ang sabat? Ayhan para sa mga kalibutanon apang indi para sa mga Saksi! Para sa ila, ang pagbulagay indi mahapos nga paagi paguwa sa magamo nga pag-asawahay. Ang bug-os nga kahulugan sang laygay sang Dios sa pag-asawahay amo nga ang mag-asawa magpabilin nga nahiusa. Ang pagbulagay halos pirme may makahalalit nga epekto sa mga kabataan nga nadalahig, kag may iban pa malain nga bunga. Sing prangka, ang pagbulagay pagbaton nga ang isa ka tiayon ukon ang duha sa ila wala nagapadayag sang bunga sang espiritu.—Galacia 5:22, 23.

Ang maayong laygay ginhatag sa diminyo nga mga Cristiano sa pamulongpulong “Dapat Bala Magbatyag ang Diminyo nga Tawo nga Indi Kompleto?” Indi dapat! Sanglit ang ministeryo amo ang sentro sang aton kabuhi, mahimo kita mangin kompleto diminyo man ukon minyo. Sa katunayan, subong sang ginapakita ni Pablo, ang diminyo nga mga Cristiano may pila ka bentaha. Paagi sa pagpalambo sing pagkakontento, sarang sila magkasadya sa dulot sang pagkadiminyo kag bug-os nga makahimulos sa sini.—1 Corinto 7:32-34.

Kinahanglanon nga Laygay sa Matinlo nga Pagkabuhi

Ang nagalain nga kahimtangan sa moral sining kalibutan nagresulta sa pagsabdong ukon pag-disfellowship pa gani sa madamong mga Saksi, bangod sang malain nga paggawi. Gani daw ano gid ka nagakaigo ang prangka nga laygay nga ginhatag nahanungod sa paggawi! Agod maagom ang balaan nga paghidait, dapat naton bantayan ang aton paggawi sa tanan nga tion. Gin-athag ini, halimbawa, sa pamulongpulong “Likawi ang mga Siod sang Sosyal nga Kalingawan.” Ang mga par­ty mahimo nga makalilipay, apang kon indi kita maghalong, madali ini nga magaupang sa teokratikong mga hilikuton kag magadul-ong sa pagkadimatinlo. Ang dihimpit tawhanon nga tagipusuon malimbungon kag handa sa paghingalit sa bisan ano nga kahigayunan sa paghampang sa imoralidad. Ang dalagku nga mga par­ty masami na nga nagahatag sing serioso nga mga katalagman, kag amo man ang malaw-ay nga musika.—1 Corinto 15:33.

Agod matipigan ang balaan nga paghidait, dapat naton “Likawan ang Makamamatay nga ‘Hangin’ Sining Kalibutan.” Kaangay sang hangin nga aton ginahaklo, ining makagud kag dimatinumanon nga espiritu sang kalibutan yara sa palibot naton tanan. Ang pamulongpulong naghinun-anon sa siam ka pagpadayag sining makamamatay nga hangin, ang iban sini amo ang paghampang sa imoralidad, sobra nga pamayo kag pamustora, indi haganhagan nga pagkaon kag pag-inum, pagkayanggaw sa mga hampang, kag palumba. Padayon nga hakloa ining hangin kag patyon ka sini sa espirituwal.

Ini nga bagay ginpaathag sing dugang pa sa pamulongpulong “Nagapabilin Ka Bala nga Matinlo sa Tanan nga Bahin?” Ang pagpatumbaya nagahimo sa aton nga nakasala sing pagkasalimpapaw. Agod matigayon ang maayo nga konsiensia, dapat kita magpabilin nga matinlo sa pisikal, hunahuna, moral, kag sa espirituwal. Bangod sina dapat naton ‘dumtan ang malain,’ ‘kangil-aran ang malaut.’ Nagalakip ini sang pagkangil-ad sa apostata nga propaganda.—Salmo 97:10; Roma 12:9.

Ang matahom nga pamulongpulong nga “Ang Disiplina ni Jehova Nagapatubas sing Mahidaiton nga Bunga” may kahilabtanan sa sini. Si Jehova amo ang Daku nga Manugdisiplina, kag ginadisiplina niya kita bangod ginahigugma niya kita. Wala sing isa sa aton ang wala nagakinahanglan sing disiplina. Bisan ang Anak sang Dios nagakinahanglan sini! (Hebreo 5:8) Huo, ang disiplina sadsaran nga nagakahulugan sing paghanas, indi pirme pagsaway, kag agod makabenepisyo gikan sa madamong paagi nga ginahimo ini sang Dios, dapat kita mangin bunayag sa aton kaugalingon—kag magpabilin nga mapainubuson!

Ang pamulongpulong “Magpalig-onay Kamo sa Isa kag Isa” nagahatag sing maayong laygay tuhoy sa aton panghambal. Daw ano ka daku nga halit ang nahimo naton bangod sang dimahunahunaon, mamulayon, ukon nagayamo nga hambal! Sa pagkamatuod, ang dila mabudlay punggan. Sing nagakaigo, ginapahanumdum kita nga dapat kita “dili maghambal sing malaut batok sa isa kag isa.” (Santiago 4:11) Ang utudnon nga gugma magahimo sa aton nga maghalong. Kag sa wala pa kita makahambal, magatiklod ini sa aton sa pagpamangkot: “Matuod gid bala ini?” “Dapat ko bala ini ihambal?” “Makapalig-on bala ini?”

Pagkuha sa mga Tagna

Ang pila ka mga pamulongpulong nagkuha sang mga pahanumdum kag paandam gikan sa inspirado nga mga tagna. Sa amo, sa pamulongpulong “Ang mga Paghukom sang Dios—Wala Ginakahamut-i sang Kalibutan,” ang humalambal nagapadaku nga indi lamang maayong balita nahanungod sa paraiso ang aton ginabantala kundi subong man, kaangay ni Jeremias, mga pahayag nga ginahatag nahanungod sa nagapakari nga mga paghukom sang Dios. (Jeremias, kapitulo 6 kag 7) Subong nga masidla nga ginbuyagyag ni Jeremias ang butig nga mga panudlo kag malaut nga mga buhat sang relihioso nga mga lider sang iya adlaw, kita man ginalaygayan nga himuon ina.

Ang pamulongpulong “Ang Tion sa Pagtilaw kag Pag-ayag” nagapakita sang modernong aplikasyon sang Malaquias 3:1-3. Sa pagkamatuod, ang katawhan ni Jehova natinloan gikan sa butig Babilonianhon nga mga panudlo kag mga buhat. Ang pag-organisar sang teokratikong kahimusan kag ang paghibalo nga ang pamalaybalay nga pag-alagad panguna nga importante amo ang pila sa positibo nga mga punto nga ginpaguwa sang humalambal.

Nabatian man naton ang matahom nga pamulongpulong diin ginhambalan sang humalambal ang mga kapitulo 11 kag 12 sang Daniel. Ginatig-ulohan ini “Ang Balaan nga Tinago nga Wala Pa Mabuksi Nagahatag sing Sigurado nga Paglaum sang Paghidait.” Ang pagribalay sa ulot sang hari sang aminhan kag sang hari sang bagatnan nagabutang sa kalibutan sa kagamo. Gikan sa tagna ni Daniel, nakita naton nga ining mga hari indi gid makalubad sa ila mga kasaba. Si Miguel lamang ang makapaluntad sang mapinadayunon nga paghidait.

Ang isa pa ka pamulongpulong nga nagkuha gikan sa inspirado nga mga tagna amo ang “Kalig-onan sa Bug-os nga Kalibutan sa Idalom sang ‘Prinsipe sang Paghidait.’” Nagahinun-anon ini sa Isaias 9:6, 7 kag sa konteksto sining mga bersikulo, nagapakita kon paano ina nga tagna nagakaigo nga naaplikar kay Jesucristo. Ang humalambal nagsiling sa iya konklusion nga si Miguel “magapurongpurong sang iya nagabadlak nga karera sing kadalag-an sa Armagedon nga nagapalanog nga wala gid nagakapug-is tubtob sa tion nga walay katapusan . . . Gani, nian, abante padulong sa mas daku pa nga kabantogan sa kalibutan sang sa nagligad, kamo tanan nga mga saksi ni Jehova, upod ang bug-os nga pagsalig sa inyo Dios kag sa iya nagagahom nga Hari, ang ‘Prinsipe sang Paghidait’! Ipakita ang pagkawalay kahadlok sa paghimbon sang karon nga kalibutan . . . Kamo tanan mangin mga tanda kag mga milagro sa kadungganan ni Jehova!” Amo gid ini ang isa sa makapulukaw nga pamulongpulong sa kombension.

Apresyaha ang mga Nagapanguna

Ang duha-sing-bahin nga sym­po­sium nga ginatig-ulohan “Mga Manugtatap nga Nagaalagad sa Intereses sang Paghidait” magabulig gid sa aton sa pag-apresyar sa mga nagapanguna. Ang nahaunang humalambal nagbinagbinag sa papel sang nagalakbay nga mga manugtatap kag nagpakita nga sila, sa pagkamatuod, takus sang pilo nga kadungganan bangod sang ila madamong katungdanan. Nagalakip ini sang paghatag sing mga pamulongpulong, pagbulig sa mga palaligban, paghanas sa mga kauturan sa pagpanaksi, kag pagduaw sa mga nagabalatian sa pisikal ukon espirituwal. Sa pagkamatuod, ang tanan nga nagalakbay nga mga manugtatap nagakabagay sang aton bug-os nga kooperasyon kag katulad kay Lidia nga pagkamaabiabihon.—Binuhatan 16:15.

Ang ikaduha nga humalambal naghatag sang mga katungdanan sang mga gulang kag sang ila papel sa pagpauswag sang paghidait sa kongregasyon. Sarang nila ini mahimo paagi sa paghanda kag paghiwat sing mga miting, paghimo sing shepherd­ing nga pagduaw, pag-uyat sa hudisyal nga mga bagay, pagpanguna sa pag-alagad sa latagon, kag pagpahamtang sing maayo nga halimbawa sa paggawi kag pagkabuhi sa pamilya. Sa pagkamatuod, kita tanan dapat magpakita sing apresasyon sa gintangdo nga mga gulang paagi sa pagkamatinumanon kag pagkamapinasakupon, subong sang ginalaygay sa aton sa Hebreo 13:17.

“Paglab-ot kag Pagtigayon sing Maayong Tindog” amo ang pamulongpulong nga nagpakita sang pagkakinahanglanon para sa kalipikado nga mga gulang bangod sang daku nga pag-uswag sa mga Saksi. Ginpakita sini sa tanan nga dedikado mga kauturan nga indi mga gulang kon paano nila malab-ot ang mas dalagku nga mga pribilehiyo. Ginapalig-on labi na sang pamulongpulong yadtong mga kalipikado apang wala makakita sang kinahanglanon nga mag-alagad sa mas daku nga kasangkaron nga pamangkuton ang ila kaugalingon, Ngaa nagaisol ako?

Iban Pa Espirituwal nga mga Aman

Gin-apresyar sing daku amo ang pamulongpulong “Naayawan Ka Bala sa mga Aman ni Jehova?” Nabatian naton ang mga halimbawa sa Biblia sadtong nag-apresyar sa espirituwal nga mga aman nga ginahatag sang Dios kag sadtong wala. Kon tubtob diin nga nabalaka kita sa aton espirituwal nga kinahanglanon, maayawan kita sa mga aman ni Jehova kag magapakita sini. Paano? Paagi sa pagbakal sing tion para sa personal nga pagtuon sang Biblia kag paagi sa pagdisiplina sang aton kaugalingon samtang yara sa mga miting agod matigayon ang labi gikan sa sini.

Ang ginasiling nga mahimo makahatag sing isa pa ka hangkat sa aton espirituwalidad amo ang ginsambit sa pamulongpulong “Daw Ano ka Makahulugan ang Imo mga Pangamuyo?” Ginapanugda nga pamangkuton naton ang aton kaugalingon: Gintugutan ko bala ang akon mga pangamuyo nga mangin sulit-sulit, palareho lamang, ukon dali-dali, subong bala nga tuman ako kasaku sa akon pagpakigsugilanon sa Dios? Sa pangamuyo, nagapalapit kita sa pinakadaku nga Personahe sa uniberso. Agod ang aton mga pangamuyo mangin makahulugan, ang Dios dapat nga matuod gid sa aton. Dapat ini maghalin sa tagipusuon kag mangin espesipiko, kag dapat naton ini hunahunaon.

Ang isa pa ka aman amo ang pamulongpulong sa bawtismo, “Pagtigayon sing Paghidait Upod sa Dios Paagi sa Dedikasyon kag Bawtismo.” Ang humalambal nagpakita nga ang aton bawtismo amo ang isa kag amo gihapon ang pinakaserioso kag pinakamalipayon nga okasyon. Paagi sa sini, natigayon naton ang paghidait upod sa Dios kag nangin ordinado nga mga ministro sang mga Saksi ni Jehova. Kag ang aton dedikasyon indi lamang panaad, kay may yara kita kag nagatatap sa madamong mga panaad sa amo man nga tion. Sa baylo, ang mangin dedikado nagakahulugan para sa aton nga mangin debotado sing eksklusibo sa Isa nga Balaan, si Jehova nga Dios.

Ang duha ka drama sa Biblia amo ang pila sa pinakapopular nga bahin sang kombension. Pagtipig sang Kabuhi sa Panahon sang Tiggulutom nagahinun-anon tuhoy sa makatalandog nga sugilanon nahanungod kay Jose kag sa iya mga utud, nga nagpahibi sa madamo. Ang pagkamaalwan kag pagkamapinatawaron ni Jose amo ang matahom nga halimbawa para sa aton tanan nga ilugon. Ang kasaysayan may matagnaon man nga importansia. Ang ikaduha nga drama, Pangitaa ang Pagkamatarong sang Dios Agod Maluwas, naghatag sing makusog kag dramatiko nga laygay nahanungod sa mga palaligban sang aton mga pamatan-on. Ginpadaku sini ang pagkakinahanglanon nga bantayan ang aton paggawi, pag-una anay sa mga intereses sang Ginharian, kag indi magmaabtik sa paghukom sa motibo sang iban.

Nahisuno sa tema sang kombension amo ang pamulongpulong publiko, “Paghidait sa Katapusan!—Kon Dios ang Maghambal.” Una, nabatian naton nga ginbuyagyag ang kabuangan sang tanan nga mga paghanda nuklear kag ang pagkawalay paglaum sang kahimtangan sang kalibutan gikan sa bisan anong tawhanon nga pagtamod. Ang Ginharian sang Dios lamang ang nagahatag sing matuod nga paglaum. Ano ang kahulugan sang pagpamati kon ang Dios nagapamulong? Nagakahulugan ini nga indi lamang naton pamatian sing maayo kag hangpon ang ginasiling sang Dios kundi nga dapat kita may himuon tuhoy sa ginasiling niya. Nian indi kita madaya sang malimbungon nga singgit nga “Paghidait kag kalig-onan!”

Ang katapusan nga pamulongpulong, “Na­sang­ka­pan sang Paghidait sang Dios sa Paghimo sang Iya Kabubut-on,” nagpapauli sa tanan nga mga kombensionista nga malipayon ang tagipusuon bangod sang tanan nga espirituwal nga sinalusalo nga naagom nila sa sulod sang apat ka adlaw. Sa wala pa gid matabo sang nagligad, ang kombension tunay nga nagsangkap sa aton para himuon ang kabubut-on sang Dios. Gani “mag-abante kita nga nakapamat-od sing bug-os sa paghimo sing ano? Sa pag-abante sa dakung hilikuton sang pagbantala sang Ginharian, nga nagaapresyar gid sa aton balaan nga paghidait kag sang tanan nga kahulugan sini sa aton!”

Sa Estados Unidos, may 135 ka kombension ang ginhiwat sa 65 ka lainlain nga lugar kag sa 11 ka hambal. Ang kataason sang tumalambong amo ang 1,276,578, upod ang 12,603 ka nabawtismohan. Ang tatlo ka kombension sa Yan­kee Sta­dium sa Siudad sang Nueva York may kataason sang tumalambong nga 95,091, nga may 1,110 ka nabawtismohan.

[Kahon sa pahina 30]

Mga Ginpaguwa sa “Balaan nga Paghidait” nga Kombension

Ang una nga ginpaguwa amo ang rebisado sang polyeto nga “Toloka! Ginahimo Ko nga Bag-o ang Tanan nga Butang,” sa konklusion sang pamulongpulong sa sina nga topiko. Isa ini karon ka apat sing duag nga brosyur, nga gin-imprinta sa dalagku nga letra kag nagaunod sang dugang nga impormasyon. Maayo ini gamiton sa pagsugod sing pagtuon sang Biblia sa balay.

Ang Mga Saksi ni Jehova—Nahiusa nga Nagahimo sang Kabubut-on sang Dios sa Bug-os nga Kalibutan, isa ka apat sing duag nga brosyur nga pareho kadaku sa magasin, amo ang ikaduha nga ginpaguwa. Isa ini ka matahom nga instrumento agod mahibaloan sang iban ang aton nanuhaytuhay nga mga hilikuton kag nagahatag sing madamong maragtason nga impormasyon nahanungod sa mga Saksi ni Jehova.

Ang ikatlo nga ginpaguwa amo ang 192-pahina nga bulig sa pagtuon sang Biblia para gamiton una sa aton Pagtinuon sang Kongregasyon sa Libro. Ginatig-ulohan ini Worldwide Security Under the “Prince of ­Peace.”

Ang Kingdom Melodies No. 7 amo ang ikap-at nga ginpaguwa, ang ex­cerpt nga nagpahalipay sa tanan nga mga kombensionista.

Sang nagapamati sa katapusan nga komento, ang tanan nalipay sa pagpamati nga ang Watch Tower Publications Index para sa 1930-1985 matigayon sa Septiembre 1. Daw ano nga pagpakamaayo sa tanan nga hanuot nga mga estudyante sang Biblia!

[Mga Laragway sa pahina 31]

1. Si Jose ginbaligya sang iya mga utod sa drama sa isa ka kombension sang Koreano nga mga Saksi sa Estados Unidos

2. Ang presidente sang Watch Tower Society, nga si F. W. Franz, nga nagapamulongpulong sa tumalambong sa kombension

3. Bahin sang nagapamati sing maayo nga tumalambong sa Yankee Stadium, New York City

4. Linibo ang ginbawtismohan bilang simbulo sang ila dedikasyon kay Jehova nga Dios