Mga Pamangkot Gikan sa mga Bumalasa

◼ Nagakaigo bala nga maghambal tuhoy sa nagapakari nga “bag-ong kalibutan”?

Nagakaigo nga ipamangkot ining pamangkot, bangod ang Griegong tinaga nga masami ginabadbad nga “kalibutan,” koʹsmos, sadsaran nga nagakahulugan sing katawhan, kag ang Dios indi magahimo sing bag-o nga kaliwatan sang katawhan. Dugang pa, indi kita makakita sa Biblia sing ekspresyon nga kai·nosʹ koʹsmos (sing literal, “bag-ong kalibutan”).

Apang ang paggamit sang Biblia sa koʹsmos nagatugot sa isa ka Cristiano sa paghambal sing “bag-ong kalibutan” kon nagapatuhoy sa nagapakari nga Paraiso nga ipasag-uli sa duta. Ang The New International Dictionary of New Testament Theology nagapaathag: ‘Ang nombre nga koʹsmos orihinal nga nagkahulugan sing tinukod, apang sing kapin ka pinasahi nagakahulugan ini sing kahimusan.’ Ining diksionaryo nagadugang nga ang tinaga may yara man espisipiko nga mga kahulugan, subong sang “dekorasyon kag puni,” “ang regulasyon sang kabuhi sa tawhanon nga katilingban,” kag “ang mga pumuluyo sang duta, ang katawhan.”

Sa Cristianong Griegong Kasulatan, ang koʹsmos masami nga ginagamit sa kahulugan sang bug-os nga tawhanon nga pamilya. Sa amo mabasa naton nga “ang tanan nakasala [kon sayoron, ang tanan nga dihimpit nga mga kaliwat ni Adan] kag nawad-an sang himaya sang Dios.” (Roma 3:19, 23) Sa pihak nga bahin, “Ginhigugma gid sang Dios ang kalibutan [koʹsmos] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya mahimo . . . makatigayon sing kabuhi nga walay katapusan.” (Juan 3:16) Huo, ang halad ni Cristo bukas sa tanan sa pamilya sang tawo nga nagatuo.

Kon amo lamang ina ang paggamit sang Biblia sa koʹsmos, indi husto ang maghambal tuhoy sa nagahilapit nga “bag-ong kalibutan.” Ngaa? Bangod ang iban sa katawhan makalampuwas sa nagapakari nga dakung kapipit-an. Ini sila makatigayon sing kahigayunan nga mabuhi sa napasag-uli nga Paraiso. Gani ang Dios indi magatuga sing bag-o nga kaliwatan sang mga tawo, isa ka bag-o nga katawhan, bag-o nga kalibutan sang katawhan. Apang, ang Biblia wala nagagamit sing koʹsmos agod magkahulugan lamang sing tanan nga katawhan.

Halimbawa, kon kaisa ang Griegong tinaga nagakahulugan sing tanan nga tawo nga nahamulag sa Dios. Ang Hebreo 11:7 nagasiling nga “bangod sa pagtuo si Noe . . . nagpakamalaut sa kalibutan [koʹsmos].” Maathag nga wala niya pagpakamalauta ang tanan nga tawo, ang bug-os nga katawhan; si Noe kag ang pito sa iya pamilya naluwas sa Anaw. Sing kaanggid, si Jesus nagpangamuyo: “Ako wala nagapangamuyo tungod sa kalibutan [koʹsmos], kundi tungod sa mga nahatag mo sa akon . . . Ang kalibutan nagdumot sa ila, bangod nga indi sila bahin sang kalibutan, subong nga ako indi bahin sang kalibutan.”—Juan 17:9, 14; ipaanggid ang 2 Pedro 2:5; 3:6.

Apang, usisaon naton ang isa pa ka kahulugan nga sa amo ginagamit sang Biblia ang koʹsmos. Ginapahangop sini ang balayan, kahimusan, ukon kahimtangan sang tawhanon nga kabuhi.a Masumalang naton ini nga paggamit sa komento ni Jesus: “Kay ano bala ang mapulos sang tawo kon maangkon niya ang bug-os nga kalibutan [koʹsmos] apang madula ang iya kalag?” (Mateo 16:26) Maathag nga si Cristo wala nagapatuhoy sa ‘pag-angkon [sang isa ka tawo] sa bug-os nga kalibutan sang katawhan,’ ukon sa ‘bug-os nga kalibutan sang katawhan nga nahamulag sa Dios.’ Indi ang katawhan ang maangkon sang isa ka materyalistiko nga tawo, kundi amo ang ginapanag-iya, ginahimo, ukon ginahimos sang katawhan. Matuod man ini sa mga napanilagan ni apostol Pablo nahanungod sa ‘pagkabalaka [sang minyo nga mga tawo] sa mga butang sang kalibutan.’ Subong man, indi dapat ‘paggamiton [sang Cristiano] ang kalibutan sing bug-os.’—1 Corinto 7:31-33.

Sa sini nga kahulugan, ang koʹsmos may kahulugan nga kaanggid sa kahulugan sang Griegong tinaga nga ai·onʹ, nga sarang mabadbad subong “sistema sang mga butang” ukon “dag-on.” (Tan-awa ang Aid to Bible Understanding, pahina 1671-4.) Masapwan naton sa pila ka kaso nga ang duha ka tinaga sarang mabaylo sa isa kag isa. Binagbinaga ang duha ka halimbawa sang pagkaanggid sang koʹsmos kag ai·onʹ: (1)) Nagsulat si Pablo nga ginbiyaan sia ni Demas, nga “naghigugma sa karon nga sistema sang mga butang [ai·onʹ].” Apang si apostol Juan naglaygay batok sa ‘paghigugma sa kalibutan [koʹsmos],’ nga gikan sa sini naghalin “ang kailigbon sang unod kag ang kailigbon sang mga mata kag ang bugal sang kabuhi.” (2 Timoteo 4:10; 1 Juan 2:15-17) (2) Ang Juan 12:31 nagahambal tuhoy sa “manuggahom sining kalibutan [koʹsmos],” nga ginapakilala sa 2 Corinto 4:4 subong “ang dios sining sistema sang mga butang [ai·onʹ].”

Busa, ang koʹsmos, ukon “kalibutan,” sarang magamit nga nagapatuhoy sa tanan nga katawhan subong man sa balayan sang tawhanon nga kahimtangan. Bangod sini, nagakaigo kag husto pareho nga makahambal kita tuhoy sa nagapakari nga “bag-ong sistema sang mga butang” ukon isa ka “bag-ong kalibutan.” Mangin isa ini ka bag-o nga balayan, kahimusan sang kalibutan, ukon kahimtangan sang tawhanon nga kabuhi. Ang kalabanan sang mabuhi sa ipasag-uli nga dutan-on nga Paraiso nabuhi sa daan nga sistema sang mga butang. Apang naluwas sila sa sini ukon nabanhaw. Gani mangin pareho gihapon sila nga katawhan. Apang, bangod wala na ang kalibutan sang katawhan nga nahamulag sa Dios, kag bangod sang bag-ong kahimusan, ukon kahimtangan, nga napasad sa ginpahayag nga kabubut-on sang Dios, ang napasag-uli nga Paraiso mangin isa ka bag-ong kalibutan.

[Footnote]

[Laragway sa pahina 31]

Ang matarong nga katawhan magapasag-uli sang Paraiso sa bag-ong kalibutan