‘Paghimulos sang Tion’ sa Italya

‘HIMUSLI ang nagakaigo nga tion,’ makaduha nga ginlaygay ni apostol Pablo sa mga masigka Cristiano samtang yadto sia sa Roma, Italya. (Efeso 5:15, 16; Colosas 4:5) Ang iya mga bumalasa sang nahaunang siglo naghulag sing maayo. Ginhimuslan nila ang nagakaigo nga tion nga ipalapnag ang “maayong balita” kag ginbuligan ang iban nga mangin mga sumilimba sang matuod nga Dios.—Mateo 24:14.

Ang modernong-adlaw nga mga alagad ni Jehova sa Italya, diin ginsulat ni Pablo ina nga mga sulat, nagahulag gihapon sing maayo sa iya laygay. Kaangay sang dumaan nga mga Cristiano, nagapangita sila sing mga paagi nga pauswagon ang ila bahin sa hilikuton nga pagbantala sang Ginharian. Paano sila nakasapo sing “nagakaigo nga tion”?

Mga Benepisyo sang Identipikasyon

Ginadumdom ni Giu­sep­pe, isa ka tigulang nga bug-os tion nga ministro sang mga Saksi ni Jehova sa Roma, ang tion nga may sekular sia nga palamugnan. Ginpat-od niya nga ang tanan niya nga kaupdanan nakahibalo nga isa sia ka Saksi ni Jehova. Ini nga pagkilala nagdul-ong sa “nagakaigo” nga tion agod ipaambit ang mga kamatuoran sang Biblia. Isa ka adlaw gin-asayn sia nga hanason ang isa ka lalaki nga nagahingalan kay Gian­ni. Sa gilayon ginsilingan sang iban nga mga trabahador si Gian­ni nga ang magatudlo sa iya isa ka Saksi ni Jehova. Sang sila na lamang nga duha ni Giu­sep­pe, ginsilingan niya si Giu­sep­pe: “Karon mahambalan naton ang aton trabaho, apang sa tigpalanyaga luyag ko nga makatuon nahanungod kay Jehova.”

Kon tigpalanyaga nagahambalanay sila. Gintudluan ni Giu­sep­pe si Gian­ni nga ang Dios may ngalan, si Jehova. Ginpaathag man niya ang katuyuan sang Dios para sa duta. Apang, ano ang natabo sang matapos na ang paghanas? “Ginhatag ko sa iya ang akon numero sa telepono kag ang pila ka literatura sa Biblia,” siling ni Giu­sep­pe. “Ginbaton niya ang literatura apang nagsiling: ‘Kon may nakita ako sa sining publikasyon nga wala nahisuno sa kamatuoran sang Biblia, magabalik ako diri kag pamatud-an ka nga nagsayop sa atubangan sang tanan mo nga kaupdanan.’”

Nagligad ang binulan. Wala sing balita kay Gian­ni. “Apang sang ulihi,” sugilanon ni Giu­sep­pe, “isa ka adlaw gintawgan niya ako kag ginsilingan niya ako nga luyag niya makigkita sa akon. Nagkit-anay kami, kag may listahan sia sang mga pamangkot. Napulo ka oras kami nga naghambalanay! Ginbaton niya ang akon tanyag nga magtuon sing regular sang Biblia.” Ano ang resulta? Si Giu­sep­pe nagasiling: “Ang maayong mga pagbag-o nga ginhimo niya nagpahamuot gid sa iya asawa kag sa iya iloy amo kon ngaa nga sila man nagpakita sing interes sa pagtuon sa Biblia. Sa karon si Gian­ni, ang iya asawa, kag ang iya iloy matutom nga mga alagad ni Jehova.”

Napilitan sa Pagsunog sang Iya Biblia

Ang maayong Cristianong paggawi nagahatag man sing ‘nagakaigo nga tion’ nga ipaambit ang kamatuoran sang Biblia sa iban. Subong sang ginasiling ni apostol Pablo, ang maayong paggawi sarang ‘makapuni sa panudlo sang Dios nga aton Manluluwas sa tanan nga butang.’—Tito 2:10.

Si Pietro, nga isa na karon ka Saksi nga nagaedad sing mga 27 ukon 28 anyos, naganyat sa sina nga “panudlo” paagi sa Cristianong paggawi sang isa ka kabutho. “Yara ako sadto sa ikalima nga grado,” panugiron ni Pietro, “apang madumduman ko pa gihapon ang paggawi sang bata. Sia lamang ang nagdumili sa pagpabilin sa klase kon tion sang instruksion sa relihion.”

Isa ka adlaw ginpamangkot sia ni Pietro kon ngaa pirme sia nagaguwa. Ginpaathag sang bata nga wala sia malakip sa klase bangod isa sia ka Saksi ni Jehova. Napukaw ang interes ni Pietro. Ginpangabay niya ang bata nga dalhan sia sang Biblia. Sang mabasa ang pila ka bahin sang Biblia, “nahangpan ko nga kamatuoran ang ginaunod sini,” siling ni Pietro. “Namat-od ako nga luyag ko ini sundon kutob sadto. Gindala ko ang Biblia sa eskwelahan kag ginsugiran ang iban nga isa ako ka Saksi ni Jehova. Dies anyos pa lamang ako sadto.”

Nagsugod ang problema. Si Pietro nagpadayon: “Ang pari nga nagahiwat sang relihioso nga klase sa eskwelahan nanugid sa akon mga ginikanan nga ginagamit ko ang Biblia sa eskwelahan, kag ginsilingan niya sila nga sunugon ini. Sang magpauli ako, gin-agaw sang akon iloy ang akon Biblia, apang gin-uyatan ko ini sing maayo sa masarangan ko. Nian ginsumbag ako ni Nanay kag ginkuha ini sa akon kamut. Pagkatapos sina ginpilit niya ako sa pagsunog sang akon kaugalingon nga Biblia.” Nadula ni Pietro ang iya Biblia apang indi ang iya pagtuo. Nagsiling sia: ‘Pagdaku ko, mabakal ako sang bag-o nga Biblia kag magakadto sa iban agod ipaambit ang mensahe sini.’

Duha ka tuig ang nagligad. Nian nahibal-an ni Pietro nga ginahiwat ang isa ka pagtuon sang Biblia sa balay sang iya isa ka abyan. Tago sia nga nagtambong sa pagtuon. “Isa ka adlaw,” siling ni Pietro, “ginsugiran ko ang akon mga ginikanan, ‘Namat-od ako nga mangin isa ka Saksi ni Jehova. Sini nga tion wala sing butang nga makabag-o sang akon hunahuna!’” Sang makita ang determinasyon sang ila 12-anyos nga bata, nagpasugot ang mga ginikanan. Si Pietro nagsugod sa pagtambong sa gilayon sa mga miting sa Kingdom Hall. Apat ka tuig sang ulihi ginbawtismuhan sia subong isa ka Saksi ni Jehova. Karon, 18 ka tuig sa tapos niya maton-an sing primero ang kamatuoran gikan sa Biblia bangod sang matutom nga paggawi sang iya kabutho, si Pietro “nagahimulos sang nagakaigo nga tion” paagi sa pag-alagad subong bug-os tion nga ministro sa Italya.

Makugi sa Edad nga 70 Anyos

Si Mafalda, nga isa ka Cristianong babayi gikan sa Livorno, isa pa sa kapin sa 22,000 ka makugi nga mga payunir, ukon bug-os tion nga mga ministro, sa Italya. Nagsugod sia sa pagpayunir sa edad nga 56. “Ang pagpayunir,” paathag niya, “nagakinahanglan nga sa dimagkubos 1,000 ka oras kada tuig ang ihugod sa pagbantala nga hilikuton. Kag bangod importante ini nga mensahe, naghinguyang ako sing 2,000 ka oras kada tuig subong payunir.” Si Mafalda 70 anyos na karon. Ano ang iya mga plano? “Sa tunga sang nahaunang-siglo nga mga Cristiano, yara ang mapisan nga mga asawa nga nagapakigbahin sa pag-alagad,” siling niya. “Kaangay nila luyag ko padayunon ang pagbantala sang Ginharian sang Dios. Amo sina ang tulumuron sa akon kabuhi.”

Sa pagkamatuod, kutob sa natabunan sing yelo nga putukputukan sang bukid nga al­pine sa naaminhan tubtob sa Mediterraneo nga pulo sang Sicily sa bagatnan, ang modernong-adlaw nga mga saksi ni Jehova sa Italya nagapakita sang kakugi sang ila nahaunang-siglo nga katumbas. Kada adlaw sang tuig nagahinguyang sila, sa promedyo, sing kapin sa 100,000 ka oras sa hilikuton nga pagbantala sang Ginharian. Ang resulta? Sang nagligad nga tuig lamang, halos 12,000 ka tawo ang ginbawtismuhan kag nangin ordenado nga mga ministro ni Jehova. Karon sila, kaupod sa 131,000 ka iban pa nga saksi ni Jehova, “nagahimulos sang nagakaigo nga tion” sa Italya.