Pagkalipay Upod sa Ika-82 nga Klase sang Gilead

“INDI kita mga Cristiano sa maayo lamang nga panahon. Malipayon gid kita nga yari kita diri.” Paagi sa sining mga pulong ginbuksan sang tsirman ang isa ka pinasahi bug-os adlaw nga miting sa As­sem­bly Hall of Je­ho­vah’s Wit­nesses sa Siudad sang Jersey sang Domingo, una nga adlaw sang Marso. Sa guwa, nagaulan sing mabunok. Sa sulod, adlaw sang gradwasyon sang 24 ka estudyante sang ika-82 nga klase sang Gil­ead. Nagatulok sa malipayon nga mga nawong sang mga estudyante, ang tsirman nga si Theo­dore ­Jaracz sang Nagadumala nga Hubon nagpadayon sa pagsiling: “Maathag nga nalangkag sila kag malipayon sa ila kaladtuan. Sanglit ang Biblia nagasiling ‘magkasadya upod sa katawhan nga nagakasadya,’ napat-od ko nga amo sini ang ginabatyag naton tanan!” Ang palakpak sa sining komento nagpamatuod nga ang tanan nga 4,557 nga nagtambong nag-ugyon.

Ang una nga humalambal sa programa amo si John Barr, isa man ka katapo sang Nagadumala nga Hubon. Nagbalikwat gikan sa Salmo 104, ginpakita niya nga wala lamang gintuga ni Jehova ang tanan nga butang, buhi kag wala sing kabuhi, kundi nagtuga man sia sing duog nga mapuy-an sang tagsa ka tinuga. Nagpadayon sia sa pagsiling: “Karon, sa inyo pagkadto sa inyo asay­ment, hunahunaa ninyo: ‘Ginbutang ako diri ni Jehova.’ Indi gid pagkalimti ina.”

Ang masunod nga naghambal amo ang katapo sang Watch­tow­er ­Farms Com­mit­tee, si John Stue­floten. Ginpahanumdom niya ang mga estudyante: “Ang hulubaton nagasiling sa aton: ‘Hatagi ang maalam nga tawo kag magaalam pa sia.’” (Hulubaton 9:9) Sa sulod sang lima ka bulan ginhatagan ang mga estudyante sing bugana espirituwal nga kalan-on. Wala sing duhaduha, sa sining adlaw sang gradwasyon nagabatyag sila nga busog sa espirituwal. “Apang,” siling sang humalambal, “bag-o pa lang kamo magsugod!” Ginpalig-on niya ang mga estudyante nga magpadayon sa pagtubo sa kaalam kag sa kaluoy agod makabulig sing kapin sa iban.—Hulubaton 3:27.

Si George Gangas sang Nagadumala nga Hubon nagsunod nga may pinili sing maayo nga mga tinaga nahanungod sa kalipay. Ginpahanumdom niya ang mga gradwado nga nagaalagad sila sa “malipayon nga Dios” kag nagsiling: “Makasapo kamo sing kalipay sa inyo asay­ment sa iban nga pungsod.” Ngaa? “Bangod ginapadala kamo ni Jehova sa pagluwas sa katawhan gikan sa pagkaulipon.”

Si George Couch sang Brook­lyn Beth­el Com­mit­tee naghambal nahanungod sa kabalaka. Ginbaton niya nga ang mga estudyante indi mga dumuluong sa kabalaka. Ang mga hangkat sang pagkadto sa Gil­ead, pagpuyo sa Brook­lyn Beth­el, kag pagbantala sa Siudad sang Nueva York nagtuga tanan sing kabalaka. Ang mga estudyante nagakabalaka nahanungod sa ila asay­ment subong mga misyonero. Apang ang makatarunganon nga kabalaka indi kaaway. “Ang kabalaka makabulig sa pagpapagsik sa aton nga himuon ang aton labing maayo,” paathag niya, kag ginpalig-on niya ang mga estudyante nga magsalig kay Jehova kag himuon ang ila labing masarangan sa ila mga asay­ment.

Ang instruktor sang ­School nga si Jack Red­ford amo ang masunod nga nagkadto sa po­di­um. Nagpaandam sia batok sa indi makatarunganon nga pagmulay. Nagasambit sing mga halimbawa sa Biblia nahanungod sa padasudaso nga mga paghukom nga nagtuga sing mga problema sang ulihi, ginbalikwat niya ang mga pulong ni Jesus: “Dili kamo maghukom agod indi kamo paghukman.” (Mateo 7:1) Ang ika-82 nga klase nagtiglawas sa Dios sang gugma. Ang mga estudyante ipadala sa ila mga asay­ment agod magpatugsiling, indi magmulay.

Ginbalikwat sang instruktor sa Gil­ead nga si Ulys­ses ­Glass ang hulubaton sa Biblia: “Ang palumba indi sa madasig, ukon ang inaway sa makusog.” (Manugwali 9:11) Ang resulta sang isa ka butang wala pirme nasandig sa aton kinaugali nga mga ikasarang. Sa hilikuton sang misyonero, masami nga ini isa ka butang sang pagtuo kag kahanda sa pagbaton sa hangkat. Gindayaw sang humalambal ang ika-82 nga klase bangod sang ila kalig-on, pagkamasaligan, kag pagkawalay pagbag-o. Ina nga mga kalidad isa ka bentaha para sa ila.

Ang katapusan nga humalambal sang aga, si presidente Fred­e­rick ­Franz sang Watch Tower Society, nagsiling nga ang gradwasyon sang ika-82 nga klase nagbindikar sang pagtuo sadtong nag-umpisa sang eskwelahan sang madulom nga mga adlaw sang Inaway Kalibutanon II. Ginpaathag niya ang ngalan nga Gil­ead, nga nagasiling nga ini isa ka tinaga sa Biblia nga nagakahulugan sing “Tumpok sang Saksi.” (Ipaanggid ang Genesis 31:43-53.) Ang mga misyonero sang Gil­ead nga nagpabilin sing matutom sa ila mga asay­ment isa ka tumpok sang saksi. Isa sila ka buhi nga pamatuod sa kamatuoran.

Nian ginbaton sang mga estudyante ang ila mga diploma, kag ang aga ginhinakpan sing pagbasa sing isa ka sulat sang pasalamat gikan sa ika-82 nga klase. Ginpatalupangod sang mga estudyante nga ‘ang pagpakamaayo ni Jehova amo ang nagapamanggaranon sa isa.’ Bangod sina, sila nagsiling, “Ginpabatyag kami ni Jehova nga kami nga 24 daw amo ang pinakamanggaranon nga mga tawo sa duta!”—Hulubaton 10:22.

Sang hapon, pagkatapos sang ginpalip-ot nga Pagtinuon sa Lalantawan, ang mga estudyante nagpresentar sing isa ka makalilipay nga programa. Naghinakop ini paagi sa mga pulong sang tinagipusuon nga apresasyon sa ila mga ginikanan, nga bangod sang ila pagkadimakagod kag pagsakdag gintugutan nila ang ila kabataan nga maglakat kag mangin mga misyonero.

Ang programa sang mga estudyante ginsundan sang pagpakita sing isa ka sibu sa tion nga drama, kag sa tapos sini, ang tsirman nga si Theo­dore ­Jaracz, naghatag sang katapusan nga mga komento. Kag daw ano nga sorpresa ang gintigana sang Sosiedad sa sining nagahingapos nga mga tinion! Ginpahibalo sang humalambal nga sa dili madugay ang Sosiedad magabukas sing isa ka bag-o nga eskwelahan, ang Min­is­te­rial Train­ing ­School, para sa paghanas una sa soltero nga mga gulang kag mga ministeryal nga alagad. Namati gid ang tanan sang ginpahibalo sang tsirman ang isa sang mga kinahanglanon sa pag-eskwela sa bag-o nga eskwelahan: ang kahanda “sa pag-alagad sa kon diin may pagkinahanglan sa bug-os kalibutan nga latagon.”

Mabaskog nga ginpalakpakan ang balita nahanungod sining bag-o nga eskwelahan. (Dugang nga mga detalye tuhoy sini ang ginahatag sa masunod nga artikulo.) Nian naghinakop ang programa paagi sa ambahanon kag pangamuyo sang pasalamat kay Jehova. Nian ang tanan nagguwa padulong sa magal-um nga gab-i sang New Jer­sey. Nagapanalithi diutay, apang wala ini pagsapaka sang kalabanan. Ang tanan nga tagipusuon nagakasadya gihapon sa ika-82 nga klase sang Gilead nga naggradwar.

[Laragway sa pahina 26]

Mga Gradwado sang Ika-82 nga Klase sang Watchtower Bible School of Gilead

Sa listahan sa ubos, ang mga kubay ginnumerohan gikan sa atubangan pa likod, kag ang mga ngalan ginlista gikan sa wala pa tuo sa tagsa ka kubay.

(1) Gish, L.; Evans, E.; Dean, S.; Hanson, R.; Suomalainen, A.; DuBose, D.

(2) Wallenberg, P.; Wallenberg, M.; Bauer, O.; Suomalainen, H.; Taylor, B.; DiStefano, G.

(3) Scott, K.; Evans, M.; Taylor, A., Jr.; Lindby, J.; Hanson, C.; Holmkvist, M.

(4) Sampson, T.; Gish, T.; Ball, D.; DuBose, J.; Dean, T.; Scott, D.