Bag-o nga Eskwelahan nga Magabukas!

Ining artikulo nagaunod sing impormasyon sang nagahinakop nga pamulongpulong sang tsirman sa gradwasyon sang ika-82 nga klase sang Gilead.

KUTOB sang umpisa sini sang Pebrero 1943, ang Watch­tow­er Bi­ble ­School of Gil­ead nakahanas sing kapin sa 6,000 ka dedikado nga mga ministro sang mga Saksi ni Jehova para sa pagmisyonero. Sa sulod sang kapin sa 40 ka tuig nga ining mga misyonero ginpadala, madamo nga kadutaan ang nagbukas agod magbaton sing maid-id nga panaksi nahanungod sa Ginharian. Sa pagbalikid sa nahimuan ni Jehova, nagakalipay gid ang katawhan sang Dios nga makita ang katumanan sang isa ka talalupangdon nga tagna.

Sa Isaias kapitulo 49, bersikulo 9-12, gintagna sang manalagna ang kahilwayan sang matarong nga mga tawo nga ginbihag subong relihioso nga mga bilanggo sa “Babilonia nga Daku.” Paagi sa iya hinaplas nga alagad nga klase sa duta, ang sugo nga panawag ni Jehova naglanog: “Isiling sa mga binilanggo, ‘Guwa kamo!’ sa mga yara sa kadudulman, ‘Pakita kamo!’ Magakaon sila sa mga dalanon . . . Indi sila paggutumon, ukon pag-uhawon, ang init ukon ang adlaw indi magasakit sa ila. Kay ang Isa nga nagakaluoy sa ila magatuytoy sa ila, kag bisan sa ubay sang mga tuburan sang tubig ubayan niya sila . . . Yari karon! Ini sila magaabot gikan sa malayo.” May nagsabat bala? Sa pagkamatuod may nagsabat! Ang mga bunayag sing tagipusuon nagaabot nga ginatosgatos ka libo, gikan sa tanan nga direksion, nagapakita sang ila kaugalingon nga nauhaw sa kamatuoran, nagahandum nga pakaunon kag masanagan sang Pulong sang Dios, nagatinguha nga mahilway sa espirituwal gikan sa “Babilonia nga Daku.” (Bugna 17:5) Yara sila karon sa sulod sang dutan-on nga bahin sang organisasyon sang iya Ginharian, nga nagakaon sing bugana nga espirituwal nga kalan-on.

Talalupangdon nga Pag-uswag

Sang tungatunga sang katuigan 1940, ang kadutaan sa Latin nga Amerika kag sa Car­ib­be­an lakip sa una nga nakabenepisyo gikan sa mga misyonero sang Gil­ead. Diutay lamang ang mga manugbantala sa sining mga duog, nga nangin isa ka mabudlay nga hangkat sa paghatag sing maid-id nga panaksi sa Ginharian. Halimbawa, ang Puerto Rico may 25 lamang ka manugbantala sang 1944. Ang Costa Rica may 181. Ang Mex­i­co may 2,431 ka manugbantala sang 1944 sang mag-abot ang una nga mga gradwado sang Gil­ead. Apang samtang ang gutom sa kamatuoran nga mga indibiduwal nagguwa sa relihioso nga kadudulman kag nagpakita sang ila kaugalingon subong nagapangita sa Ginharian sang Dios, makugihon sila nga nagbantala, kag ang iban nagpalista sa payunir nga serbisyo. Gintinguhaan sang mga lalaki ang salabton. Ang mga resulta? Sa karon, ang Puerto Rico nagreport sing 21,943 ka aktibo nga ministro, labaw sing apat ka pilo sa kadamuon sang aktibo sa 12 ka kadutaan nga nagreport sa Car­ib­be­an sang 1947. Ang Costa Rica may kapin nga manugbantala karon sang sa bug-os nga Sentral nga Amerika sang nagligad nga 40 ka tuig. Sang Enero sini nga tuig, ang Mex­i­co nagreport sing bag-ong kataason nga kapin sa 206,000 ka manugbantala, nga halos pareho sa kadamuon sang mga manugbantala sa bug-os nga kalibutan sang nagligad nga 40 ka tuig.

Amo man sini sa Bagatnan nga Amerika. Sang ang misyonero una nga ginpadala sa Argentina sang 1947, may yara 790 ka manugbantala. Sa karon may yara 63,613 ka aktibo nga ministro, 26 ka pilo sang kadamuon sang nagabantala sa 12 ka nanuhaytuhay nga pungsod sa Bagatnan nga Amerika sang nagligad nga 40 ka tuig. Kag kamusta naman ang Brazil? Sang ginpadala didto ang una nga mga misyonero sang 1945, 394 lamang ka manugbantala ang nagapanaksi. Apang nagbatas sila, kag nalampasan karon sang Brazil ang 200,000 ka manugbantala. Labaw ina sing 80 ka pilo sa kadamuon sang aktibo sa bug-os nga Bagatnan nga Amerika sang 1947. Ang iban nga mga pungsod sa sina nga kontinente may talalupangdon man nga mga pag-uswag.

Sa Malayo nga Sidlangan naman, makakita kita liwat sing daku nga pamatuod sang pagpakamaayo ni Jehova samtang ang makahilway nga mensahe sang kamatuoran sang Ginharian nagabulig sa linibolibo sa pagguwa gikan sa kadudulman. Sang gin-asayn ang una nga mga misyonero sa Hapon sang 1949, walo lamang ka manugbantala ang nagareport. Sa walo ka kadutaan sa Asia nga nagareport sing naalagdan sang nagligad nga 40 ka tuig, may kabilugan nga 475 ka aktibo nga ministro. Sa karon, may yara 116,272 sa Hapon lamang.

Sa Bagatnan nga Pasipiko may duha lamang ka sanga tubtob sang 1959. Sa bulig sang mga manugbantala gikan sa Aus­tral­ia nga nagsaylo agod mag-alagad sa kon diin daku ang kinahanglanon, kag sa panikasog sang iban nga mga manugbantala sang kongregasyon kag sang pila ka misyonero, linibolibo ka katawhan ang nadalhan sing maayong balita sa nanuhaytuhay nga teritoryo sang isla. May yara na karon anum ka dugang nga sanga sa sadto nga bahin sang latagon.

Makakulunyag man ang maragtas sang pag-uswag sang Aprika. Ang 17 ka pungsod nga nagareport sang 1947 may kabilugan nga 24,896 ka manugbantala. Apang bangod sang mga misyonero nga nagbulig sa pagpalapnag sang maayong balita sing madasig, ginatosgatos ka libo ang wala madugay nagpakita sang ila kaugalingon subong nagapangita kay Jehova kag sa iya pagkamatarong. Sa karon, sa Ni­geria lamang, mga 130,000 ka Saksi ang makugi nga nagawali sing mensahe sang Ginharian.

Indi maduhaduhaan nga ang makahilway nga Pulong sang kamatuoran ni Jehova nagahimo sang iya nahamut-an. Madinalag-on nga ginahimo sini ang butang nga para sa sini ginpadala ini. (Isaias 55:10, 11) Karon nga ginatipon ang daku nga ani, ina gihapon nga Pulong nagapasalig sa aton nga si Jehova magabangon sing dugang pa nga nahanas nga mga manugbantay. (Ipaanggid ang Jeremias 23:4.) Nahibaluan sang Nagadumala nga Hubon ang nagadaku nga pagkinahanglan sing sangkol nga mga lalaki sa pag-atipan sang mga salabton sa latagon subong man sa nanuhaytuhay nga mga sanga sang Sosiedad. Nahimo na ang mga tikang sa pagbulig nga mahatag ining kinahanglanon.

Ang “Ministerial Training School”

Kamo nga mga gradwado sang ika-82 nga klase sang Gil­ead, subong man ang tanan nga nagtambong sa sining makapalig-on gid nga okasyon, malipay sa paghibalo nga sa tigragas sang 1987 magabukas ang bag-o nga eskwelahan. Ining Min­is­te­rial Train­ing ­School, subong amo ang itawag sa sini, mangin bahin sang Watch­tow­er Bi­ble ­School of Gil­e­ad, sa amo makabulig sa iban nga kauturan gikan sa iban nga pungsod sa pag-eskwela. Ang una nga klase ginapaabot nga magasugod sa mga Oktubre 1 sini nga tuig sa siudad sang Pitts­burgh, Penn­syl­vania, E.U.A., ang una nga sentro sang una nga pag-uswag sang Sosiedad. Sa tapos sang una nga klase, ang iban nga mga klase himuon sa regular nga lang-at-lang-at sa nanuhaytuhay nga mga bahin sang Estados Unidos.

Ang ispisipiko nga Makasulatanhon nga mga kinahanglanon dapat malab-ot sang mga paeskwelahon. Ang paghanas una nga ihatag sa soltero nga mga gulang kag soltero nga mga ministeryal nga alagad nga may mapagros nga lawas. Kon ang iban mga payunir, mas maayo. Ang mga agdahon sa eskwelahan dapat mangin handa sa pag-alagad, sa tapos sang ila paghanas, sa kon diin may pagkinahanglan sa bug-os kalibutan nga latagon. Kinahanglan ang espiritu ni Isaias, nga kinabubut-on nga nagtanyag sang iya kaugalingon, nga nagasiling: “Yari ako! Ipadala ako.” (Isaias 6:8) Kamo nga mga gradwado sining ika-82 nga klase, lakip ang mga misyonero nga nagaalagad na sa kapin sa isa ka gatos ka kadutaan, makaapabot nga sa sibu nga tion may magabuylog sa inyo nga iban pa nga nahanas nga kauturan nga lalaki.

Bag-o gid nga cur­ri­culum ang ginhanda para sa Min­is­te­rial Train­ing ­School. Gintukod ang eskwelahan sa katuyuan nga maghanas sing sangkol nga mga utod nga lalaki nga may eksperiensia sa organisasyon subong mga gulang ukon mga ministeryal nga alagad sa kongregasyon.

Kinahanglan ang Pag-uswag

Sa tapos sang piesta sang adlaw sang Pentecostes sang 33 C.E., ang Cristianong kongregasyon aktibo gid sa pagpalapnag sing maayong balita sa Jerusalem, sa bug-os nga Judea kag sa Samaria, kag sang ulihi, sa malayo nga mga bahin sang duta. (Binuhatan 1:8) Sang mga tuig 60 C.E, si apostol Pablo, nga nanguna sa pag-ebanghelyo sa tunga sang mga pungsod, nagsulat sa mga taga-Colosas, nga nagasiling: “Ining paglaum nga nabatian ninyo anay paagi sa pagsugid sing kamatuoran sinang maayong balita nga nag-abot sa inyo, subong nga sa pagkamatuod sa bug-os nga kalibutan ini nagapamunga kag nagatubo.” Nian, gindugang niya nga yadtong mga masigkasumilimba ‘indi dapat magihit sa paglaum sa maayong balita nga inyo nabatian, nga ginwali sa bug-os nga tinuga sa idalom sang langit.’—Colosas 1:5, 6, 23.

Sa malip-ot nga tion, ginpalapnag sang unang mga Cristiano ang maayong balita. Ginhatag ni Jehova ang pag-uswag, kag ang kadamuon sang mga disipulo nagmuad sing tama gid. Nagkinahanglan ini sing dugang pa nga sangkol nga mga lalaki sa pagtudlo sa kongregasyon kag sa pagbantay sa panong. Ang isa sang bataon nga mga manugbantala nga gintugyanan sadto nga salabton amo si Timoteo. Ano ang ginlaygay ni apostol Pablo nga himuon ni Timoteo? Indi sia dapat mag-untat sa paghanas: “Paagi sa paghatag sining mga laygay sa mga kauturan mangin maayo ka nga ministro ni Cristo Jesus, nga ginsagod sa mga pulong sang pagtuo kag sang maayong pagtolon-an nga nasunod mo . . . Hanasa ang imo kaugalingon nga ginatumod ang diosnon nga debosyon.” (1 Timoteo 4:6-8) Mas importante ini sa pagkonsentrar sa personal nga interes ukon paninguha, lakip ang lawasnon nga ehersisyo kag paghanas. Agod matuman ang iya ministeryo sing bug-os, dapat bantayan ni Timoteo ang iya kaugalingon kag ang iya panudlo.

Kamo nga mga gradwado sining klase sang Gil­ead nakabaton sing paghanas para sa pagmisyonero. Ginpaalinton sa inyo sang mga manugtatap nga kalipikado sa pagtudlo ang maayong espirituwal nga mga dulot. Ginahanda karon ang dugang pa nga programa sa pagpanudlo sing maayo para sa kalipikado nga mga lalaki nga may eksperiensia sa pag-atipan sang mga salabton sa kongregasyon. Hanason sila nga ginatumod ang diosnon nga debosyon, nga magabulig sa ila sa paghupot sing husto nga motibo kag magasangkap sa ila sa pagsentro sa dugang pa nga ginsulat ni Pablo kay Timoteo: “Dili pagpatamaya ang bisan sin-o sang imo pagkapamatan-on. Kundi, mangin huwaran ka sa mga matutom sa pulong, sa paggawi, sa gugma, sa pagtuo, sa kaputli. . . . Mag-ukod ka sa pagbasa sa dayag, sa paglaygay, sa pagpanudlo. Binagbinaga ining mga butang; himua sila, agod nga ang imo pag-uswag makita sang tanan.”—1 Timoteo 4:12, 13, 15.

Subong sa bahin ni Timoteo, ang mga utod nga lalaki nga ginhatagan sing salabton sa kongregasyon karon, lakip ang bataon nga mga lalaki, dapat makarealisar nga ang tion karon isa ka nagakaigo kag hilingagawon nga tion sa pagpakita sang ila pag-uswag. Paagi sa paghimo sini, magahatag sila sing pamatuod sa isa ka tinagipusuon nga paagi nga nalab-ot nila ang balaan nga mga talaksan kag may yara sila matuod nga disposisyon sa pag-atipan sang espirituwal nga mga kaayuhan, sa amo kalipikado sila para sa dugang pa nga mga pribilehiyo sang pag-alagad.—Filipos 2:20, 21.

Bangod sang kinahanglanon nga nagaluntad sa sini nga hugna sa pagkatuman sang balaan nga katuyuan, isa ka pribilehiyo nga gamiton ni Jehova bisan diin sa sulod sang iya organisasyon. Ginapasalamatan gid naton sia subong aton Dakung Manugbantay kag ang Maayong Manugbantay, si Jesucristo, bangod sining bag-o, sibu sa tion nga aman sang organisasyon, ang Min­is­te­rial Train­ing ­School!