“Amo Ini ang Adlaw sang Tanan nga mga Adlaw”
“Paagi sa inspirasyon yara ako sa adlaw sang Ginuo.”—BUGNA 1:10.
1. Anong “adlaw” ang ginapuy-an naton, kag ngaa makalilipay ini nga katunayan?
“AMO ini ang adlaw sang tanan nga mga adlaw. Toloka, ang Hari nagagahom!” Ining dramatiko nga mga pulong nga ginbungat sang ikaduha nga presidente sang Watch Tower Bible and Tract Society sadto anay sang 1922 nagapakunyag gihapon sa aton. Padayon ini nga nagapahanumdom sa aton nga nagakabuhi kita sa labing makakulunyag nga tion sa bug-os nga maragtas, ang tion nga ginatawag sa Biblia nga “ang adlaw sang Ginuo.” (Bugna 1:10) Sa pagkamatuod amo ini “ang adlaw sang tanan nga mga adlaw,” kay amo ini ang tion nga si Jehova, paagi sa Ginharian ni Cristo, magatuman sang tanan Niyang matahom nga mga katuyuan kag magapakabalaan sang Iya balaan nga ngalan sa atubangan sang tanan nga tinuga.
2, 3. (a) Ano ang kalawigon sang adlaw sang Ginuo? (b) Diin naton masapwan ang nahanungod sining adlaw?
2 Ining adlaw nagsugod sang 1914 sang si Jesus naglingkod subong Hari sang Ginharian sang Dios. Kag magapadayon ini tubtob sa katapusan sang Isa ka Libo ka Tuig nga Paggahom, kon ‘itugyan [ni Cristo] ang ginharian sa iya Dios kag Amay.’ (1 Corinto 15:24) Ang matutom nga mga Cristiano nagahulat sa adlaw sang Ginuo sa sulod sang madamong siglo. Karon, sa ulihi yari na ini! Ano ang kahulugan sining “adlaw sang tanan nga mga adlaw” para sa katawhan sang Dios kag para sa kalibutan sa kabilugan?
3 Ang tolon-an sang Biblia nga madamo sing masugid sa aton nahanungod sa adlaw sang Ginuo amo ang Bugna. Kalabanan sang tanan nga mga tagna sining tolon-an natuman sa adlaw sang Ginuo. Apang ang Bugna amo lamang ang putukputukan sang mga serye sang matagnaon nga mga tolon-an nga nagasugid sa aton nahanungod sina nga adlaw. Ang Isaias, Jeremias, Ezequiel, kag Daniel, sa tunga sang iban pa, nagasugid man sa aton nahanungod sini. Sing masami, ang ginasiling sini nagabulig sa aton sa paghangop sing maayo pa sa mga tagna sang Bugna. Tan-awon naton kon paano ang tolon-an ni Ezequiel labi na nagahatag sing kapawa sa katumanan sang Bugna sa adlaw sang Ginuo.
Ang Apat ka Manugkabayo
4. Suno sa Bugna kapitulo 6, ano ang natabo sang nagsugod ang adlaw sang Ginuo?
4 Halimbawa, sa ikaanum nga kapitulo sang Bugna, ginalaragway ni apostol Juan ang isa ka dramatiko nga palanan-awon: “Nakita ko, kag, yari karon! ang kabayo nga maputi; kag ang nagasakay sa iya may pana; kag ginhatagan sia sing purongpurong, kag naglakat sia nga nagapangdaug kag sa pagdaug.” (Bugna 6:2) Sin-o ining madinalag-on nga manugkabayo? Wala sing liwan kundi si Jesucristo, ang ginpalingkod nga Hari sang Ginharian sang Dios kag nagasakay sa pagpangdaug sa iya mga kaaway. (Salmo 45:3-6; 110:2) Ang madinalag-on nga pagsakay ni Jesus nagsugod sang 1914, sa pamuno mismo sang adlaw sang Ginuo. (Salmo 2:6) Ang iya unauna gid nga pagpangdaug amo ang pagtagbong kay Satanas kag sa iya mga demonyo sa duta. Ang resulta para sa katawhan? “Kailo sa duta kag sa dagat.”—Bugna 12:7-12.
5. Anong masubo nga mga karakter ang nagasunod sa Nagasakay sa kabayo nga maputi, kag ano ang awtoridad sang tagsa ka karakter?
5 Nagasunod didto sa palanan-awon ang tatlo ka makahaladlok nga karakter: ang kabayo nga pula nga luto nga nagalaragway sa inaway, ang kabayo nga maitom nga nagalaragway sa tiggulutom, kag ang kabayo nga maluspad nga ang nagasakay sa sini nagahingalan kay “Kamatayon.” Tuhoy sining ikaapat nga kabayo, aton mabasa: “Nakita ko, kay yari karon! ang kabayo nga maluspad; kag ang nagasakay sa sini ginahingalanan Kamatayon. Kag ang Hades nagasunod sa iya. Kag ginhatagan sila sing pagbulut-an sa ikap-at nga bahin sang duta, sa pagpamatay sa espada kag sa tiggulutom kag sa kamatay kag paagi sa mga sapat nga mapintas sang duta.”—Bugna 6:3-8; Mateo 24:3, 7, 8; Lucas 21:10, 11.
6. Ano ang nangin epekto sa duta sining tatlo ka makahaladlok nga mga kabayo kag mga nagasakay?
6 Suno gid sa tagna, ang katawhan nag-antos sing grabe gikan sa inaway, tiggulutom, kag balatian kutob sang 1914. Apang ang ikaapat nga manugkabayo nagapatay man paagi sa “mga sapat nga mapintas sang duta.” Isa bala ini ka talalupangdon nga bahin kutob sang 1914? Ang pagbinagbinag sa kaanggid nga tagna ni Ezequiel nagabulig sa pagbutang sining bahin sang tagna sa danyag.
7. (a) Ano nga tagna ang ginbungat ni Ezequiel nahanungod sa Jerusalem? (b) Paano natuman ining tagna?
7 Nagasulat ayhan lima ka tuig antes ginlaglag ang Jerusalem sang 607 B.C.E., si Ezequiel nagtagna sing terible nga silot para sa mga Judiyo bangod sang ila pagkadimatutom. Nagsulat sia sa idalom sang inspirasyon: “Daw ano pa kon ipadala ko ang akon apat ka mangitngit nga paghukom sa Jerusalem—ang espada kag ang tiggulutom kag ang malaut nga mga sapat kag ang kamatay—sa pag-utod sa iya sang tawo kag sapat.” (Ezequiel 14:21; 5:17) Natuman bala ini sing literal sadto anay? Sing walay duhaduha ang Jerusalem nag-antos sing tiggulutom kag inaway samtang nagahilapit ang katapusan sini. Kag ang tiggulutom masunson nga nagatuga sing mga balatian. (2 Cronica 36:1-3, 6, 13, 17-21; Jeremias 52:4-7; Panalabiton 4:9, 10) May literal man bala nga kalalat-an sang mga sapat nga mapintas sadto anay? Mahimo nga may hitabo tuhoy sa mga tawo nga ginguyod ukon ayhan ginpatay sang mga sapat, sanglit gintagna man ini ni Jeremias.—Levitico 26:22-33; Jeremias 15:2, 3.
8. Ano ang bahin sang mga sapat nga mapintas sa adlaw sang Ginuo tubtob sa karon?
8 Kamusta naman karon? Sa nagatin-ad nga mga pungsod, ang ilahas nga mga sapat indi makatalagam nga palaligban subong sang sa nagligad. Apang, sa iban nga mga pungsod, ang ilahas nga mga sapat padayon nga nagapatay, labi na kon ilakip naton ang mga man-ug kag mga buaya sa “mga sapat nga mapintas sang duta.” Inang masubo nga mga kamatayon kis-a lang ginareport sa internasyonal nga prensa, apang talalupangdon ini. Ang libro nga Planet Earth—Flood nagahambal tuhoy sa madamo sa India kag Pakistan nga “napatay sa kasakit bangod sang kagat sang dalitan nga mga man-ug” samtang nagatinguha sa pagpalagyo gikan sa mga baha. Ang India Today nagreport nahanungod sa isa ka minuro sa Nakatundan nga Bengal diin ang ginabantabanta nga 60 ka babayi namatyan sing mga bana bangod sang pagsalakay sang tigre. Inang mga trahedya mangin labi pa gid nga kinaandan sa palaabuton kon ang tawhanon nga katilingban magakalusod kag kon ang tiggulutom magadugang.
9. Anong iban pa nga sahi sang “sapat” ang nagtuga sing kagamo kag pag-antos sa tunga sang katawhan sa sining siglo?
9 Apang si Ezequiel nagsambit sang isa pa ka sahi sang “sapat” sang magsiling sia: “May puhon sang mga manalagna sa tunga niya, kaangay sang leon nga nagangurob, nga nagatukob sang tulukbon. Naghalunhon sila sing mga kalag . . . Ang iya mga prinsipe sa tunga nila kaangay sang mga lobo nga nagatukob sang tulukbon.” (Ezequiel 22:25, 27) Gani ang mga tawo nagahulag man kaangay sang mga sapat, kag daku gid ang pag-antos sang katawhan gikan sinang mga nagapanukob sa aton siglo! Madamo ang napatay sa mga kamot sang sapatsapaton nga mga kriminal kag mga terorista. Huo, sa kapin sa isa ka paagi ang kamatayon nakatigayon sing daku nga alanyon sang mga biktima gikan sa “mga sapat nga mapintas sang duta.”
10. Ano ang ginabulig sang paglista ni Juan sa inaway, tiggulutom, balatian, kag mapintas nga mga sapat subong nagatuga sing kamatayon nga mahangpan naton?
10 Ang paglista sa inaway, tiggulutom, balatian, kag mga sapat nga mapintas sa palanan-awon ni Juan nagabulig sa aton sa paghangop nga ang mga kasakit nga ginbatas sang Jerusalem sang 607 B.C.E. matupungan sa madamong okasyon sa aton adlaw. Busa ang adlaw sang Ginuo nagkahulugan na sing pag-antos para sa kalibutan, labi na bangod ang mga gumalahom sang katawhan nagdumili sa pagpasakop sa sinang una nga Manugkabayo, ang ginpalingkod nga Hari, si Jesucristo. (Salmo 2:1-3) Apang, kamusta ang katawhan sang Dios? Ano ang kahulugan sang adlaw sang Ginuo para sa ila?
Pagtakus sa Templo
11. Sa Bugna 11:1, ano ang ginsugo kay Juan nga himuon, kag may kahilabtanan ini sa diin nga templo?
11 Sa Bugna 11:1, si apostol Juan nagasiling: “Ginhatagan ako sing tabun-ak nga kaangay sa sungkud kag ginsilingan ako: ‘Tindog kag taksa ang santuario sang Dios kag ang halaran kag ang mga nagasimba didto.’ ” Ining pagtakus sa templo sa palanan-awon makahulugan katama para sa katawhan sang Dios. Diin nga santuario sang templo ang gintakus ni Juan? Indi ang literal nga Judiyong templo diin nagsimba si Juan antes sia mangin Cristiano. Ina nga templo ginsikway ni Jehova, kag ginlaglag ini sang 70 C.E. (Mateo 23:37–24:2) Sa baylo, amo ini ang kahimusan sang dakung espirituwal nga templo ni Jehova. Sa sining malaragwayon nga templo, ang hinaplas nga mga Cristiano nagaalagad subong mga kabulig nga saserdote sa dutan-on nga luwang.—Hebreo 9:11, 12, 24; 10:19-22; Bugna 5:10.
12. San-o nagluntad ina nga templo, kag anong mga hitabo ang natabo nahanungod sini sang unang siglo?
12 Ina nga templo nagluntad sang 29 C.E. sang ginhaplasan si Jesus subong mataas nga saserdote. (Hebreo 3:1; 10:5) May 144,000 ini ka mga kabulig nga saserdote, kag sang unang siglo madamo sa ila ang ginpili, ginpat-inan, kag nian napatay nga matutom. (Bugna 7:4; 14:1) Apang sang mapatay yadtong unang-siglo nga mga Cristiano, nagtulog sila sa lulubngan, wala sa gilayon ginbanhaw pa langit. (1 Tesalonica 4:15) Dugang pa, pagligad sang unang siglo nagsulod ang dakung apostasya, kag ang saserdotenhon nga hinaplas nga mga Cristiano ginpalibotan sang nagatubo nga “hilamon,” mga apostata. (Mateo 13:24-30) Sa sulod sang mga siglo kutob sadto, mahimo nga mamangkot: ‘Mapat-inan gid bala ang tanan nga 144,000 ka kabulig nga mga saserdote?’ ‘Mabanhaw gid bala ang mga napatay nga matutom sa pag-alagad sa langitnon nga santuario?’ Ang pagtakus sa templo sa palanan-awon nagpakita nga ang sabat sa tagsa sining mga pamangkot amo ang huo. Ngaa?
13. Ano ang ginagarantiya sang pagtakus ni Juan sa santuario sang templo, kag ano ang natabo sang temprano sang adlaw sang Ginuo?
13 Bangod kay sa tagna sa Biblia ang pagtakus sa pila ka butang masami nagapakita nga ang katuyuan ni Jehova para sa sina nga butang pat-od nga matuman. (2 Hari 21:13; Jeremias 31:39; Panalabiton 2:8) Busa, ang pagtakus sa santuario sang templo sa palanan-awon ni Juan isa ka garantiya nga sa adlaw sang Ginuo, ang tanan nga katuyuan ni Jehova nahanungod sa templo matuman. Nahisanto sa sini kag nahisuno sa tanan nga ebidensia, yadtong mga hinaplas nga napatay na sing matutom ginsugdan nga banhawon pakadto sa ila ginsaad nga lugar sa langitnon nga santuario sugod sang 1918. (1 Tesalonica 4:16; Bugna 6:9-11) Apang kamusta ang iban pa sa 144,000?
14. Ano ang natabo sa hinaplas nga mga Cristiano sa wala pa kag sa tion sang unang kalibutanon nga inaway?
14 Bisan sang wala pa magsugod ang adlaw sang Ginuo, ang hinaplas nga mga Cristiano nga nagguwa sa apostata nga Cristiandad ginsugdan nga tipunon pasulod sa isa ka tuhay nga organisasyon. Naghimo sila sing matahom nga rekord sang katutom nga nagapahibalo sang importansia sang tuig 1914, apang sa sinang mapinamat-uron nga tuig, sang ang unang inaway kalibutanon nagdabdab, nagsugod sila sa pag-antos sing pagpigos, ‘pagtapak.’ Naglab-ot ini sa putukputukan sang 1918 sang ang mga direktor sang Watch Tower Society ginbilanggo, kag ang organisado nga pagbantala nga hilikuton halos nag-untat. Sadto nga tion, halos ‘patay’ sila. (Bugna 11:2-7) Ano ang kahulugan sang pagtakus sa santuario sang templo para sa sadtong mga Cristiano?
15. Ano ang kahulugan sang pagtakus sa templo sa palanan-awon para sa katawhan sang Dios sang adlaw ni Ezequiel?
15 Sang tuig 593 B.C.E., 14 ka tuig sa tapos nalaglag ang templo ni Jehova sa Jerusalem, nakita ni Ezequiel sa palanan-awon ang balay ni Jehova. Ginlibot sia sing maid-id sa sining templo kag nagtan-aw samtang gintakus sing maayo ang tagsa ka bahin sini. (Ezequiel, kapitulo 40–42) Ano ang kahulugan sini? Si Jehova mismo nagpaathag: Ang pagtakus sa templo nagkahulugan sing pagtilaw para sa katawhan ni Ezequiel. Kon paubson nila ang ila kaugalingon, hinulsulan ang ila mga sala, kag magpahisuno sa mga kasuguan ni Jehova, sugiran sila sang mga takus sang templo. Maathag nga magapalig-on ini sa ila sa paglaum nga sa pila ka adlaw ang katawhan ni Jehova hilwayon gikan sa Babilonia kag sa liwat simbahon si Jehova sa iya literal nga templo.—Ezequiel 43:10, 11.
16. (a) Ano ang ginapasalig sang pagtakus ni Juan sa santuario sang templo sa katawhan sang Dios sadto anay sang 1918? (b) Paano ini natuman?
16 Sing kaanggid, kon ang ginluyahan sing buot nga mga Cristiano sadtong 1918 magpaubos sang ila kaugalingon kag maghinulsol sa mga sala nga nahimo nila, hilwayon sila agod matigayon ang pagpakamaayo ni Jehova kag makigbahin sing bug-os sa kahimusan sang iya templo. Kag amo sini ang natabo. Suno sa Bugna 11:11, ‘nagtindog’ sila, ukon malaragwayon nga ginbanhaw. Ang may kahilabtanan nga palanan-awon sa pagkabanhaw sa Ezequiel naglandong sa pagpasag-uli sa mga Judiyo sa ila kaugalingon nga pungsod. (Ezequiel 37:1-14) Ining modernong ‘pagkabanhaw’ amo ang pagpasag-uli sa katawhan sang Dios gikan sa ila nagluya sing buot, halos diaktibo nga kahimtangan, pakadto sa buhi, mapagsik nga kahimtangan diin makapakigbahin sila sing bug-os sa pag-alagad kay Jehova. Ina nga ‘pagkabanhaw’ natabo sang 1919.
Ang Diutay nga Tolon-an nga Linukot
17. (a) Ilaragway ang palanan-awon ni Juan sa Bugna 10:1. (b) Sin-o ang anghel nga nakita ni Juan, kag sa anong adlaw gintangdo nga matuman ang palanan-awon?
17 Sa Bugna 10:1, nakita ni Juan ang “makusog nga anghel nga nagakunsad gikan sa langit, nga napanaptan sing panganud, nga may balangaw sa iya ulo kag ang iya nawong subong sang adlaw, kag ang iya mga tiil subong sang mga haligi nga kalayo.” Kaanggid ini diutay sa mga palanan-awon tuhoy kay Jehova nga nakita anay ni Ezequiel kag ni Juan mismo. (Ezequiel 8:2; Bugna 4:3) Apang nakita diri ni Juan ang isa ka anghel, indi si Jehova. Busa, mahimo nga amo ini ang dakung angheliko nga Anak ni Jehova, si Jesucristo, nga “amo ang larawan sang dimakita nga Dios.” (Colosas 1:15) Dugang pa, ang Bugna 10:2 nagalaragway kay Jesus subong nagatindog sa isa ka posisyon nga may dakung awtoridad, kag “gintapak niya ang iya tiil nga tuo sa dagat, kag ang wala sa duta.” Gani ang anghel nagarepresentar kay Jesus sa adlaw sang Ginuo.—Tan-awa ang Salmo 8:4-8; Hebreo 2:5-9.
18. (a) Ano ang ginsugo kay Juan nga kaunon? (b) Sa kaanggid nga palanan-awon, ano ang ginsugo kay Ezequiel nga kaunon, kag upod ang anong epekto?
18 Si Jesus, sa sining halangdon nga dagway sa palanan-awon, may diutay nga tolon-an nga linukot sa iya kamot, kag ginsugo si Juan nga kuhaon ang linukot kag kaunon ini. (Bugna 10:8, 9) Sa sining paagi, naeksperiensiahan ni Juan ang pareho gid sa naeksperiensiahan ni Ezequiel, nga ginsugo man sa pagkaon sa linukot sa palanan-awon. Sa bahin ni Ezequiel, si Jehova mismo ang nagdaho sang linukot sa manalagna, kag nakita ni Ezequiel nga “may nasulat sa sini nga mga panalabiton kag paglalaw kag pagkakailo.” (Ezequiel 2:8-10) Si Ezequiel nagareport: “Nian ginkaon ko ini; kag nangin subong ini sang dugos katam-is sa akon baba.” (Ezequiel 3:3) Ano ang kahulugan sang pagkaon sa linukot para kay Ezequiel?
19. (a) Ano ang ginarepresentar sang pagkaon ni Ezequiel sa linukot? (b) Sin-o ang magabaton sa mapait nga mga mensahe nga ginsugo kay Ezequiel nga ibantala?
19 Sing maathag, ang linukot nag-unod sang inspiradong matagnaon nga impormasyon. Sang ginkaon ni Ezequiel ang linukot, ginbaton niya ang komisyon nga ibantala ining impormasyon tubtob nga mangin bahin niya ini. (Ipaanggid ang Jeremias 15:16.) Apang ang mga kaundan sang linukot indi matam-is para sa iban. Ang linukot puno sing “mga panalabiton kag paglalaw kag pagkakailo.” Para kay sin-o ining mapait nga mensahe? Una sa tanan, si Ezequiel ginsugo: “Anak sang tawo, lakat, kadto ka sa panimalay sang Israel, kag magpamulong sa ila sang akon mga pulong.” (Ezequiel 3:4) Sang ulihi, ang mensahe ni Ezequiel nagsangkad tubtob naglakip sa paganong mga pungsod sa palibot.—Ezequiel, mga kapitulo 25–32.
20. Ano ang natabo sang ginkaon ni Juan ang diutay nga tolon-an nga linukot, kag ano ang resulta bangod sang pagkaon niya sini?
20 Sa bahin ni Juan, ang mga resulta sang iya pagkaon sa linukot magkaanggid. Sia nagareport: “Ginkuha ko ang diutay nga tolon-an nga linukot sa kamot sang anghel kag ginkaon ini, kag matam-is ini sa akon baba subong sang dugos; apang sang nakaon ko ini, nagpait ang akon tiyan.” (Bugna 10:10) Ang pagkaon sa linukot matam-is man para kay Juan. Makalilipay nga ang pulong ni Jehova mangin bahin niya. Apang ang mensahe may mapait nga bahin. Mapait para kay sin-o? Si Juan ginsilingan: “Dapat ka magpanagna liwat nahanungod sa madamong katawhan kag pungsod kag hambal kag hari.”—Bugna 10:11.
21. (a) Ano ang ginhimo sang hinaplas nga mga Cristiano sang 1919 nga katumbas sa pagkaon ni Juan sa diutay nga tolon-an nga linukot, kag upod ang anong epekto? (b) Ano ang resulta para sa Cristiandad kag sa kalibutan sa kabilugan?
21 Paano ini tanan natuman sa adlaw sang Ginuo? Suno sa maragtason nga mga katunayan, sadto anay sang 1919 ang matutom nga mga Cristiano nagbaton sang pribilehiyo nga alagaron sing bug-os si Jehova sa bagay nga nangin bahin nila ini, kag matam-is gid ini. Apang ang ila pagpakamaayo kag pribilehiyo mapait sa iban—labi na sa klero sang Cristiandad. Ngaa? Bangod ining matutom nga hinaplas nga mga Cristiano maisog nga nagbantala sang tanan nga mensahe ni Jehova para sa katawhan. Wala lamang nila ginbantala ang “maayong balita sang ginharian” kundi ginbuyagyag man nila ang patay sa espirituwal nga kahimtangan sang Cristiandad kag sang kalibutan sa kabilugan.—Mateo 24:14; Bugna 8:1–9:21; 16:1-21.
22. (a) Sa anong dakung paagi ang hinaplas gingamit ni Jehova sa adlaw sang Ginuo tubtob sa karon? (b) Ano ang kahulugan sang adlaw sang Ginuo para sa kalibutan ni Satanas kag para sa katawhan sa kabilugan?
22 Ining matutom nga hubon sang mga Cristiano gingamit ni Jehova sa pagtipon sa katapusan nga bahin sang 144,000 para pat-inan, kag ginpadayon nila ang pagtipon sa dakung kadam-an, nga may paglaum sa duta. (Bugna 7:1-4, 9, 10) Ining dakung kadam-an may yara importante nga bahin sa mga katuyuan ni Jehova sa sining duta, kag ang pagluntad sini naghatag sing daku nga kasadya sa langit kag sa duta. (Bugna 7:11-17; Ezequiel 9:1-7) Busa, ining “adlaw sang tanan nga mga adlaw” nagkahulugan na sing pag-antos para sa kalibutan ni Satanas apang sing bugana nga mga pagpakamaayo para sa katawhan ni Jehova. Tan-awon naton, karon, kon paano ini padayon nga matuod samtang ang adlaw sang Ginuo nagapadayon.
Mapaathag Mo Bala?
◻ Ano ang adlaw sang Ginuo?
◻ Ano ang malaglagon nga bahin sang “mga sapat nga mapintas sang duta” sa adlaw sang Ginuo?
◻ Anong pasalig ang ginhatag ni Jehova paagi sa pagtakus ni Juan sa santuario sang templo?
◻ Ano ang kahulugan sang pagkaon ni Juan sang diutay nga tolon-an nga linukot para sa hinaplas nga nagkalabilin sang 1919?
◻ Sa karon, ano ang kahulugan sang adlaw sang Ginuo para sa katawhan sang Dios kag para sa kalibutan sa kabilugan?
[Laragway sa pahina 13]
Ang pagtakus ni Juan sa templo naghatag sing malig-on nga mga garantiya sa mga hinaplas sa adlaw sang Ginuo