Babilonia—Sentro sang Dimatuod nga Pagsimba

“NAPUKAN sia! Napukan ang Babilonia, kag ang tanan nga larawan nga tinigban sang iya mga dios nagkalautod sa duta!” Ano nga sahi sang siudad ang Babilonia nga gintagna ni Isaias? Importante ina nga ideya sa aton paghangop sa kahulugan sang modernong Babilonia nga Daku.​—⁠Isaias 21:⁠9.

Ang dumaan nga Babilonia kilala sa iya pagsimba sa pagano nga mga dios kag mga diosa. Sa iya libro nga Babylonian and Assyrian Religion, si Propesor S. H. Hooke nagsiling: “Ang Babilonia isa ka siudad anay nga sa diin si Marduk amo ang nagapanguna sa tunga sang iban pa nga mga dios nga ginasimba didto. . . . Sa Babilonia anay sang tion ni Nabokodonosor II indi magkubos sa kalim-an kag walo ka templo ang iya sang espesipiko nga mga dios, wala labot ang madamo pa nga templo nga wala sing tag-iya. Busa sarang makita kon daw ano ka daku ang papel sang mga pari sa kabuhi sang daku nga siudad.” Ginasiling nga ang templo ni Marduk sa Babilonia may 55 ka kapelya sa kilid. Pareho gid sa madamo nga templo, mga simbahan, kag mga katedral karon nga may mga kapelya sa kilid para sa diutay nga mga dios, mga santos, kag mga Madonna!

Ang Babilonia sentro anay sang idolatriya sa kulto sang mga dios. Ang isa ka kasaysayan nagasiling nga ang mga pari kag mga matutom “nagapatuhoy sing sobra nga igtalupangod sa ila balaan nga mga imahen, nga ginakabig ang mga estatwa subong mga manugpatunga sa mga dios. Ang mga estatwa napanaptan sing malahalon nga mga panapton, napunihan sing mga kulintas, mga pulseras, kag mga singsing; nagapahuway sila sa matahom nga mga katre kag ginapas-an kon magprosesyon sa duta kag tubig, ginasakay sa mga karo kag pribado nga mga sakayan.”⁠a Daw ano ka kaanggid ini sa pagsimba nga ginahalad sa mga dios, mga santos, kag mga Madonna sa modernong Hinduismo, Budhismo, kag Katolisismo, nga sa diin ila man ginaparada ang ila mga imahen sa mga kalye kag sa mga suba kag dagat!

Subong dugang pa nga halimbawa sang pagkaanggid sang dumaan nga Babilonia kag sang modernong relihion, binagbinaga ang masunod nga paglaragway nga ginkuha gikan sa amo gihapon nga insiklopedia: “Pinakamatahom gid nga mga ngalan ang ginatawag sa iya sang iya matutom nga mga tumuluo: Indi lamang sia isa ka diosa kag babayi kundi isa man ka maluluy-on nga iloy, nagapamati sia sa mga pangamuyo, nagapatunga sia . . . ginhatag niya ang iya kabuhi sa uniberso kag sa katawhan.” Ipaanggid ina sa masunod nga pangamuyo gikan sa El Santo Rosario (Ang Balaan nga Rosaryo): “Ginapasalamatan namon ikaw, Soberanong Prinsesa, sa pabor nga amon ginabaton adlaw-adlaw gikan sa imo maalwan nga kamot; kaluy-i kami, Ginang, agod nga mangin sa idalom kami sang imo pag-amlig kag pag-apin sa karon kag tubtob sa walay katubtuban.”

Sin-o ang ginapatuhuyan sining paglaragway kag pangamuyo? Madamo ang magahinakop sa gilayon, si “Birhen Maria.” Katunga lang ang husto sa sina nga sabat. Ang pangamuyo ginahalad kay Maria. Apang, suno sa ginasugid sa aton sang Las Grandes Religiones Ilustradas, ang nahauna nga binalikwat isa ka paglaragway kay Ishtar, ang “Ginang sang Gugma,” ang Babilonianhon nga diosa sang pertilidad, gugma, kag inaway. Kon kaisa ginapakita sia sa mga imahen “subong isa ka iloy nga nagapasoso sa iya bata nga lalaki.”⁠b Apang isa pa ini ka halimbawa kon paano ang modernong relihion indi gid malayo gikan sa dumaan nga Babilonia!

Makakita man kita sing pagkaanggid sa ulot sang dumaan nga Babilonia tuhoy sa mga pagpati sini sa kalag sang tawo kag sa trinidad nga mga dios sini kag, sa karon, sang kaanggid nga mga pagpati tuhoy sa dimamalatyon nga kalag kag trinidad sang modernong relihion. Ang pamatuod nagapalig-on sang aton paghangop nga ang “Babilonia nga Daku” isa ka nagakaigo nga simbulo sang bug-os kalibutan nga emperyo sang dimatuod nga relihion ni Satanas.

Babilonia​—⁠Bugalon nga Kaaway sang Matuod nga Pagsimba

Ang Babilonia amo man ang bugalon nga kaaway anay sang dumaan nga katawhan ni Jehova, ang Israel, kag manugtamay sa ila matuod nga pagsimba. Ginlaglag sang Babilonia ang templo sa Jerusalem sang 607 B.⁠C.⁠E., gindala ang tanan nga bilidhon nga mga kasangkapan sang pagsimba kay Jehova, kag gintamay ining mga suludlan sa sinalusalo ni Belsasar.​—⁠Daniel 5:​3, 4.

Subong man, sa modernong mga tion ang Babilonia nga Daku isa ka kasumpong sang matuod nga pagsimba. Sa kalabanan nga hitabo nga sa diin ginhingabot ang mga Saksi ni Jehova, ginsakdag ini sang mga klero, sa masami paagi sa ila pagpakig-alyansa sa politikal nga mga manuggahom.

Ang isa ka maathag nga halimbawa sang ginsugyot sang mga klero nga pagpamatok amo ang natabo sang 1917, kag ining sulundan makapila nga ginsulit. Sadto nga tuig ang In­ter­na­tion­al Bi­ble Stu­dents, subong amo ang pagkakilala sadto sa mga Saksi, nagbalhag sing libro nga The Finished Mystery. Ang pila ka bahin sining libro ginhangop nga subersibo sang mga klero sa Canada kag E.U., nga ang ila pungsod nadalahig sa Inaway Kalibutanon I. Ginpahibalo nila dayon ang ila politikal nga mga kahagugma tuhoy sining publikasyon. Ang resulta? Suno kay Propesor Martin Mar­ty, sa iya libro nga Modern American Religion​—⁠The Irony of It All: “Ginpamatukan sang mga klero ang mga Rus­selites [mga Saksi] kag nalipay sang mabatian nila ang duha ka pulo ka tuig nga pamatbat [bangod kono sa sedisyon] batok sa mga lider sang mga Saksi ni Jehova.”

Apang ano ang reaksion sang mga klero sang pila ka bulan sang ulihi napamatud-an nga wala sing sala yadtong mga lider sa mga panumbungon sa ila? “Wala malipay ang mga katapo sang ortodokso nga iglesia.” Ang mga Saksi lamang ang nagpabilin sa mga prinsipio sang Biblia “tubtob sa punto nga ang pederal nga pangulohan nagpamatok sa ila relihion.” Ang mga Saksi wala kag indi gid magsunodsunod sa politikal nga mga manuggahom, wala bisan sa idalom sang paggahom sang mga Nazi sa Alemanya ukon sa idalom sang paggahom sang Pasista sa Italya, Espanya, kag Portugal.

Ang Babilonia Ginpakamalaut kag Ginpakahuy-an

Daw ano, nian, ka nagakaigo ang ginasiling sang Bugna nga ang Babilonia nga Daku “nahubog sa dugo sang mga balaan kag sa dugo sang mga saksi ni Jesus” kag “nasapwan sa iya ang dugo sang mga manalagna kag sang mga balaan kag sang tanan nga ginpamatay sa duta.” Ang sala sa dugo sang relihion sang kalibutan bangod sang pagpakigbahin ukon pagtugot sa mga inaway kag paghingabot sa matuod nga mga Cristiano mausoy sa nagligad nga mga siglo.​—⁠Bugna 17:​6; 18:⁠24.

Ang Babilonia nga Daku, ang bug-os kalibutan nga emperyo sang dimatuod nga relihion, nakatigayon sing luho kag gahom sa bug-os nga maragtas. Apang nagpaandam ang anghel kay Juan nga ang adlaw sang dakung makihilawason magaabot. Ang rekord nagasugid sa aton: “Kag nagsinggit sia sa mabaskog nga tingog, nga nagasiling: ‘Napukan sia! Napukan ang Babilonia nga Daku, kag nangin puluy-an sia sang mga demonyo kag salabuyan sang tagsa ka espiritu nga mahigko kag sang tagsa ka pispis nga mahigko kag makangilil-ad!’ ”​—⁠Bugna 18:⁠2.

San-o mapukan ang Babilonia? Ukon napukan na bala sia? Sa anong paagi mapukan sia? Kag paano ina nagaapektar sa imo? Ini kag ang may kaangtanan nga mga pamangkot pagasabton sa amon masunod nga guwa sang Ang Lalantawan.

[Mga footnote]

[Piktyur sa pahina 8, 9]

Ang Babilonia nga Daku naghalin sa relihion sang dumaan nga Babilonia