Mga Pamangkot Gikan sa mga Bumalasa

◼ Ngaa ginpakita sa Ang Lalantawan sang Septiembre 15, 1988, nga ang Protestantismo nagdagta sang iya kaugalingon sing kapin sa Romano Katolisismo?

Ginsiling ini bangod nagasibu ini sa tagna kag sa mga kamatuoran. Sa tolon-an sang Ezequiel kapitulo 23, ang malaragwayon nga si Ohola kag si Oholiba ginlaragway subong imoral nga mag-utod. Ang napulo ka tribo nga ginharian sang Israel ginlaragway ni Ohola, samtang si Oholiba naglaragway sa duha ka tribo nga ginharian sang Juda. Sa pagpaathag sining simbuliko nga mga babayi, Ang Lalantawan sang Septiembre 15, 1988, nagsiling sa pahina 21:

“Bangod sang paghimo sang mas makasasala nga dalanon sang sa utod niya [Ohola, ukon Israel], si Oholiba (Juda) nag-antos sing pungsodnon nga kapahamakan sa mga kamot sang Babilonianhon sang 607 B.⁠C.⁠E. Ang iya kabataan nahulog sa espada ukon gindala nga bihag, kag ginpakahuy-an sia sa tunga sang mga pungsod. Kaangay nanday Ohola kag Oholiba, ang Cristiandad naghimo sing espirituwal nga panglahi, isa ka sala sa itololok sang Dios nga ginaangkon niya nga ginasimba. Ang Protestantismo, upod sang iya madamong denominasyon, nagpadagta sang iya kaugalingon sa komersial kag politikal nga mga kagamhanan sang kalibutan sing labi pa sa iya magulang nga utod, ang Romanong Katolisismo. Busa, siguraduhon gid ni Jehova nga ang tanan nga Cristiandad malaglag.”

Sugod sa Konsilyo sang Nicaea sang 325 C.⁠E., gintingob ni Emperador Constantino ang paganong kulto sang estado sang Roma sa apostata nga Cristianismo kag nangin pangulo sang bag-o nga Iglesia Katolika. Sa amo sarang mausoy sang Iglesia Romana Katolika ang iya pagluntad sa ikap-at nga siglo sang aton Kumon nga Dag-on. Ang Protestantismo nagsugod sang Repormasyon sang ika-16 nga siglo. Busa, subong nga si Ohola (Israel) magulang kay Oholiba (Juda), nagakaigo nga gintawag sang Ang Lalantawan ang Romanong Katolisismo subong ang magulang nga utod sang Protestantismo.

Apang, ngaa masiling nga ang “Protestantismo . . . nagpadagta sang iya kaugalingon sa komersial kag politikal nga mga kagamhanan sang kalibutan sing labi pa sa iya magulang nga utod, ang Romanong Katolisismo”? Bangod ang mga kamatuoran nagabagay sa tagna, nga nagasiling: “Sang makita ini sang iya utod nga si Oholiba, ginpakita niya ang iya kailigbon sing kapin ka mahaliton sang sa iya, kag ang iya pagpakighilawas sing kapin sa pagpakighilawas sang iya utod.”​—⁠Ezequiel 23:⁠11.

Subong mga bahin sang Babilonia nga Daku, ang bug-os kalibutan nga emperyo sang dimatuod nga relihion, ang Katolisismo kag Protestantismo nadalahig gid sa komersial kag politikal nga mga elemento sining kalibutan. (Bugna 17:​1-6; 18:​1-19) Matuod, ang indibiduwal nga Protestante nga denominasyon mahimo nga may diutay nga impluwensia sang sa gamhanan nga Iglesia Katolika Romana. Apang kon tingbon ang madamo nga iglesia sang Protestante, labaw ini sa Iglesia Katolika sa gahom kag impluwensia. Halimbawa, ang Protestantismo may daku nga impluwensia sa pila ka kilala nga industriyal nga mga pungsod, kag ang pila ka Protestante nga mga klerigo nagatinguha sang mataas nga palangakuan sa politika. Gani isa ini ka paagi nga ang Protestantismo, upod ang madamo nga denominasyon sini, nagdagta sang iya kaugalingon sing kapin sa Katolisismo.

Apang, sa isa pa ka paagi, ang Protestantismo “nagpakita sang iya kailigbon sing kapin ka mahaliton” kag kapin ka salawayon sang sa Katolisismo. Paano? Ti, ang Repormasyon naghatag sa Protestantismo sa dimagkubos sing paglaum kag pagpaabot sa daku pa nga espirituwal nga kasanagan. Sa kamatuoran, ang pila ka repormador naghimo sing sinsero kag talalupangdon nga mga hublag sa sining bahin. Apang sa tapos mahambal kag mahimo ang tanan, ang dimakasulatanhon nga mga doktrina subong sang Trinidad, pagkadimamalatyon sang tawhanon nga kalag, kag ang kalayuhon nga impierno nagpabilin sa tunga sang mga Protestante. Kaangay sang mga Katoliko, nakasala man sila sing pagsimba sa tinuga kag sang pagtal-us sa mga tradisyon sang mga tawo sa kamatuoran sang Biblia.​—⁠Mateo 15:​1-9; 23:​9, 10.

Ang makawiwili sa sining bahin amo ang ginsambit sa Vindication, Tolon-an Uno, sang tuig 1931. Sa pahina 309, ining publikasyon sang Watch Tower (indi na matigayon karon) nagsiling tuhoy sa Ezequiel 23:​11-13: “Nakita sang Protestante nga ‘organisadong relihion’ kon paano gindagtaan sang Romanong Katolisismo ang iya kaugalingon upod sa komersial kag politikal nga mga kagamhanan sining kalibutan, kag nagsiling batok sa mga Katoliko bangod sini; apang nian nagpadayon ang Protestantismo kag amo man ang ginhimo, kag mas malain pa. . . . Pareho nga dalanon ang ginpili nila nga duha; apang ang Protestantismo may kapin nga kasanagan sang sa Romanismo, kag busa kapin ka salawayon.”

[Piktyur sa pahina 30]

Gintingob ni Constantino ang apostata nga Cristianismo kag ang paganong kulto sang estado sang Roma, sa amo nangin pangulo sang bag-ong Iglesia Katolika

[Credit Line]

The Metropolitan Museum of Art, Bequest of Mrs. F. F. Thompson, 1926. (26.229)