Mga Pamangkot Gikan sa mga Bumalasa

◼ Nagakaigo bala para sa isa ka Cristiano nga mangayam ukon mangisda?

Ang lainlain nga reaksion sa pagpangayam masunson nga nagadalahig sang nasulod nga balatyagon. Gani labing maayo para sa mga Cristiano nga panikasugan hangpon kag iaplikar ang panghunahuna ni Jehova nga Dios nahanungod sini subong sang makita sa Biblia.

Ginhatag sang Dios sa tawo ang paggahom sa “maila” kag “mahagop” nga mga sapat. Primero, ang tawo wala ginatugutan sang Dios, ukon ayhan may pisikal nga kinahanglanon, nga patyon ang mga sapat para kaunon. (Genesis 1:​24, 29, 30) Pagkatapos lamang sang Anaw nga ginhatagan sang Dios ang tawo sing kinamatarong nga kaunon ang unod sang sapat nga ginpatulo sing maayo ang “iya kalag​—⁠ang iya dugo.” (Genesis 9:​3, 4) Mahimo nga karne ina gikan sa mahagop ukon maila nga mga sapat.

Ang mga Israelinhon nagasagod sing mga sapat, subong sang mga karnero kag mga baka, nga mahimo ihawon para kaunon kon nahidlaw sila sa karne. Nangayam kag nangisda man sila para makakuha sing kalan-on. (Deuteronomio 12:​20-24; 14:​4-20) Nahisanto ini sa malaragwayon nga hulubaton sang Dios nga ‘ipadala niya ang madamong mangingisda sa pagpangisda sang iya ­katawhan kag ang madamong mangangayam sa pag-ayam sa ila.’ (Jeremias 16:16) Sang ulihi, ginlakip ni Jesus ang mga mangingisda sa tunga sang iya mga apostoles kag ginsugo ang aktuwal nga pagpangisda.​—⁠Mateo 4:​18-22; 17:​27; Lucas 5:​2-6; Juan 21:​4-7.

Sang ang tigulang nga si patriarka Isaac nangabay sing manamit nga pagkaon nga karne, ang iya anak nga si Jacob handa sa pagpatay sa duha ka tinday nga kanding agod makaluto sing pagkaon para sa iya. Apang, si Esau nag-ayam sing maila nga sapat agod makakuha sing karne sang usa para sa iya amay. Talupangda nga bisan pa matigayon ang karne gikan sa mahagop nga mga sapat, si Isaac nangabay sing karne gikan sa alayamon nga sapat. Talupangda, man, nga ang duha ka anak nagpatay sing mga sapat agod mangin pagkaon, indi para sa ila kaugalingon, kundi para sa iban.​—⁠Genesis 27:​1-19.

Ang mga sapat mahimo patyon tungod sa mga rason luwas sa ila karne. Ang ila mga panit mahimo himuon nga panapton. (2 Hari 1:​8; Marcos 1:​6; Hebreo 11:37) Ang pangamlig nga mga taklap kag mga gamit ginhimo man halin sa panit sang sapat, bisan sang mga sapat nga mahigko kaunon kag wala ginakaon sang mga Israelinhon.​—⁠Exodo 39:​33, 34; Numeros 24:​7; Hukom 4:​19; Salmo 56:⁠8.

Ang sugo sang Dios nga iula ang dugo sang patay nga mga sapat dapat magapanumdom sa mga mangangayam nga ang sapat naghalin sa iya kag nagakaigo tratuhon sing matinahuron, indi nga wala sing kaluoy. (Levitico 17:13) Si Nimrod nagpatay sing mga sapat kag ayhan nagpabugal sang iya ikasarang sa pagpangayam, sang kadakuon ukon kadamuon sang iya napatay, ukon sang mga tropeo nga nahimo niya gikan sini. Sia ang “gamhanan nga mangangayam nga nagapamatok kay Jehova.”​—⁠Genesis 10:⁠9.

Ina nga kalipay sa pagpangayam ukon pagpatay sa mga sapat, ukon pagbunit sing isda, mahimo nga magtubo sa Cristiano. Madamong mangangayam ukon mangingisda nga nag-usisa sang iya tagipusuon ang nakatukib nga nalatnan sia sang ‘kalipay sa pagpatay.’ Ina nga kakunyag ginaupdan sang wala sing rason nga dipagtahod sa kabuhi sang sapat. Gani bisan pa indi malain ang pagpangayam ukon pagpangisda (kon ang napatay ukon nadakpan ginagamit sang isa para kaunon ukon sa nagakaigo nga katuyuan), mangin indi nagakaigo ini himuon kon ang isa ka Cristiano may espiritu nga nagapahanumdom kay Nimrod. Apang may mga katalagman pa luwas sa pagtigayon sing kalipay sa paglagas, pagpatay, ukon sa tropeo.

Ang The Watchtower sang Hulyo 15, 1983, nagahinun-anon kon ngaa ang matuod nga mga Cristiano wala nagabitbit ukon nagatago sing pusil para gamiton batok sa mga tawo ukon proteksion gikan sa ila. (Pahina 23-6) Ang pagpamalandong sa sina nga laygay nagtuytoy sa iban nga mga Saksi nga hunahunaon bisan ang pagtigayon sing mga pusil sa pag-ayam. Madamo ang nagpakamaayo nga dulaon ini ukon likawan nga idispley ini kag mahapos makuha. Busa ining mga Cristiano indi magahatag sing impresyon nga ginapabugal nila ang mga armas ukon nagasalig sa sini. Dugang pa, ang indi pagtigayon sing pusil sa pagpangayam, ukon ang indi pagbutang sa lugar nga mahapos makuha, nagapahilayo sa trahedya. Ang makapatay nga mga armas indi makakadto sa kamot sang mga bata nga ayhan aksidente nga makasamad ukon makapatay sa iban, ukon indi gilayon makuha ang pusil kon ang isa nahadlok ukon napung-awan sing sobra.​—⁠Ipaanggid ang Hulubaton 22:⁠3.

Ang iban nga mga Cristiano mahimo nga nanamitan sa pila ka hayop ukon isda, kag ang pinakapraktikal nga paagi agod matigayon ina nga pagkaon amo ang paagi sa pagpangayam ukon pagpangisda. Ang iban nanamian sa hangin kag ehersisyo nga nalakip sa pagpangayam sa kagulangan, ukon nakasapo nga ang malinong nga mga oras sa pagpamunit makaparelaks. Ang Biblia wala sing ginahambal batok sini, gani indi kinahanglan hukman ang iban sa kon bala nanamian sila sa sinang mga butang ukon wala. Kag ang halimbawa ni Isaac kag sang iya mga anak nga lalaki nagapakita nga indi kinahanglan himuon nga isyu ang kon sin-o ang magakaon sang sapat ukon isda.​—⁠Mateo 7:​1-5; Roma 14:⁠4.

Si apostol Pedro maathag nga nanamian gid sa pagpangisda. May mga isda sa tupad, ginbuligan sia sang ginbanhaw nga si Jesus sa pag-analisar sang iya kaugalingon nga balatyagon nahanungod sa isa ukon sa negosyo sa pag-isda. Si Jesus namangkot: “Simon nga anak ni Juan, ginahigugma mo bala ako sing labi sini sa ila?”​—⁠Juan 21:​1-3, 9-15; tan-awa Ang Lalantawan, Nobiembre 1, 1988, pahina 31.

Sing kaanggid, ang isa ka Cristiano nga may maayong konsiensia nga nagapakamaayo sa pagpangayam ukon sa pagpangisda dapat magahimos sang iya mga prioridad. Halimbawa, kon ang tion sa pagpangayam ukon pagpangisda bukas sa tion nga naiskedyul ang mga miting sa kongregasyon, ano ang himuon niya? Ukon ang iya sugilanon nagapakita bala nga ginapadayaw niya ang iya ikasarang sa pagpangayam ukon pagpangisda? Daw ano kaayo nga kon ang isa ka hamtong nga Cristiano nga, kon kaisa, nagapakamaayo sa pagpangayam ukon pagpangisda makasiling nga may kombiksion: “Huo, Ginuo, ikaw nakahibalo nga ako nagahigugma sa imo [labaw pa sa sining mga kalingawan].”​—⁠Juan 21:⁠16.