Pamatan-on nga mga Alagad sang Panahon sang Biblia

NAGASUGID ang Biblia tuhoy sa madamo sang maayong mga pamatan-on nga serioso nga nagtamod sang ila pag-alagad sa Dios kag ginpakamaayo sila sing bugana bangod sini. Bata man kita ukon tigulang kag ubanon na, ining maayo nga mga huwaran sa Biblia makahatag sa aton sing daku nga pagpalig-on.

Si Jose 17 anyos lamang sang ginbaligya sia sa pagkaulipon sa Egipto. Didto, malayo sa iya pamilya kag indi makita sang mga nakakilala sa iya, ginpamatud-an ni Jose ang iya integridad. Sang ginhaylo sang asawa ni Potipar si Jose, sia nagsiling: “Paano ako makahimo sining daku nga kalautan kag magpakasala batok sa Dios?” Bisan sa atubangan sang gamhanan nga Paraon, ang labing gamhanan nga hari sang adlaw niya, ginhimuslan ni Jose ang kahigayunan nga ihatag ang kadungganan sa Dios sa pagpatpat niya sang mga damgo ni Paraon. Ginpakamaayo sia sing bugana. Gingamit sia sang Dios sa pagluwas sa mga Egiptohanon kag sa iya pamilya gikan sa kamatayon bangod sa gutom kag sa pagdala sang iya amay, nga si Jacob, kag sang iya panimalay sa Egipto.​—⁠Genesis 37:​2; 39:​7-9; 41:​15, 16, 32.

Si Moises kag ang Iban Pa nga Matutom sa Pagkapamatan-on

Ginkuha sang anak nga babayi ni Paraon si Moises kag ginkabig sia nga iya kaugalingon nga anak, apang natudluan si Moises sang iya amay kag iloy nahanungod sa matuod nga Dios. Ang Biblia nagasiling nga sang daku na sia, si Moises “nagdumili nga pagtawgon nga anak sang babayi nga anak ni Paraon, nga nagapasulabi sa pag-ambit sang pagpintas kaupod sa katawhan sang Dios sang sa pag-agom sang umalagi nga mga pagpangalipay sang sala.” Gingamit sang Dios si Moises agod paguwaon ang iya katawhan sa Egipto, agod batunon ang Kasuguan sa Sinai, kag isulat ang daku nga bahin sang Biblia. Pila man ang edad mo, ginapauswag mo bala ang determinasyon sa pag-alagad sa Dios subong sang ginhimo ni Moises?​—⁠Hebreo 11:23-29; Exodo 2:​1-10.

Ang Kasulatan nagasugid sa aton tuhoy sa “mga magamay” nga nagpamati upod sa nabilin nga bahin sang pungsod sang ang Kasuguan sang Dios ginabasa sa Israel. (Deuteronomio 31:​10-13) “Ang tanan nga makahangop sa pagpamati” nagtindog “kutob sa pamanagbanag tubtob sa udto” agod mabatian ang Kasuguan sang mga adlaw ni Nehemias. (Nehemias 8:​1-8) Bisan pa wala mahangpi sang mga magamay ang tanan nga butang, nahangpan nila nga dapat nila higugmaon, simbahon, kag tumanon si Jehova nga Dios. Pila man ang edad mo, nagapamati ka bala sa mga kombension kag mga asambleya nga sa diin ginahambalan ang Pulong sang Dios? Natun-an mo bala ang pagkaimportante sang pagtuman sa iya, subong sang ginhimo sadtong pamatan-on nga mga Israelinhon?

Sanday David, Josias, kag Jeremias

Ginpili sang Dios si David, ang kamanghuran sa walo ka mag-utod nga lalaki, para sa pinasahi nga pag-alagad kag nagsiling tuhoy sa iya: “Nasapwan ko si David nga anak ni Jesse, nga isa ka tawo nga kalahamut-an sa akon tagipusuon, nga magahimo sang tanan nga butang nga ginahandum ko.” Ginpili sia sang Dios nga mangin “manugbantay” sang iya katawhan, kag ginhimo ina ni David, samtang ginapamatud-an ang iya gugma kay Jehova sa sulod sang madamo nga tuig. Nagsulat sia sing kapin sa 70 sang Salmo kag nangin katigulangan ni Jesucristo. Bata man ukon tigulang, ginaapresyar mo bala ang mga dalanon sang Dios kag ginahimo mo bala ang mga butang nga luyag niya, subong sang ginhimo ni David?​—⁠Binuhatan 13:​22; Salmo 78:​70, 71; 1 Samuel 16:​10, 11; Lucas 3:​23, 31.

Si Josias nangin hari sang otso anyos lamang sia. Sang 15 na sia, “sang bataon pa sia, nagsugod sia sa pagpangita sa Dios ni David nga iya amay.” Sa wala pa sia mag-20, ginsugdan ni Josias ang kampanya batok sa dimatuod nga pagsimba. Sang ulihi, ginpakay-o niya ang templo, kag ginpasag-uli niya ang putli nga pagsimba sa duta. Aton mabasa: “Sa tanan niya nga adlaw wala sila magbiya sa pagsunod kay Jehova nga Dios sang ila mga ginikanan.” Kita tanan indi mahimo nga mangin hari kaangay ni Josias, apang makaalagad kita sa Dios kag maka­tindog sing malig-on batok sa dimatuod nga pagsimba, pila man ang edad naton.​—⁠2 Cronica 34:​3, 8, 33.

Ginsingganan sang labing gamhanan nga Dios si Jeremias: “Sa wala ko pa ikaw mahuman sa tiyan nakilala ko ikaw, kag sa wala pa ikaw magguwa sa tiyan ginpakabalaan ko ikaw. Gintangdo ko ikaw nga manalagna sa mga pungsod.” Nagprotesta si Jeremias nga bata pa sia kaayo agod mangin manalagna: “Ah, O Soberanong Ginuong Jehova! Yari karon indi ako makahibalo maghambal, kay bata ako.” Nagsabat si Jehova: “Dili ka magsiling, ‘Bata ako.’ Kundi sa bisan kay sin-o nga ipadala ko ikaw, magkadto ka; kag bisan ano ang isugo ko sa imo, ipamulong mo.” Ginhimo ina ni Jeremias sa kapin sa 40 ka tuig, kag bisan sang luyag niya magdulog, indi niya mahimo. Ang pulong sang Dios nangin “subong sang kalayo nga nagadabdab nga natakpan sa [iya] mga tul-an.” Dapat sia maghambal! Pila man ang edad mo, ginapalambo mo bala ang sahi sang pagtuo nga iya ni Jeremias, nga nagauswag sa pag-alagad sa Dios subong sang ginhimo niya?​—⁠Jeremias 1:​4-8; 20:⁠9.

Sanday Daniel, Jesus, kag Timoteo

Wala ka bala makabati tuhoy kay Daniel? Mahimo nga wala pa sia mag-20 anyos sang gindala sia upod sa iban nga “kabataan” subong mga bihag sa palasyo sang gamhanan nga si Nabokodonosor, nga hari sang Babilonia. Walay sapayan nga pamatan-on pa lang si Daniel, determinado sia sa pagtuman sa Dios. Si Daniel kag ang iya mga kaupod nagdumili nga higkuan ang ila kaugalingon paagi sa mga pagkaon nga mahimo supak sa Kasuguan sang Dios ukon nahigkuan sang pagano nga mga rito. Sa kapin sa 80 ka tuig, si Daniel wala gid mationg, nga nagahupot sang iya integridad tubtob sa punto nga nagdumili sia sa pag-untat sa pagpangamuyo sa Dios, bisan pa magaresulta ini sa paghaboy sa iya sa mga leon. Ginakabig mo bala ang imo pag-alagad sa Dios kag ang imo pangamuyo nga subong sina ka serioso? Dapat gid.​—⁠Daniel 1:​3, 4, 8; 6:​10, 16, 22.

Sa edad nga 12, si Jesus nakit-an nga nagapungko sa tunga sang relihioso nga mga manunudlo sa templo sa Jerusalem, “nga nagapamati sa ila kag nagapamangkot sa ila. Apang ang tanan nga nakabati sa [pamatan-on nga si Jesus] natingala sa iya paghangop kag sa iya mga sabat.” Nangin interesado ka ayhan sa Makasulatanhon nga paghambalanay sang mga gulang sa templo subong sang ginhimo ni Jesus? Matingala man bala ang iban sa imo paghangop kag sa imo mga sabat? Sa karon, madamo sang pamatan-on nga mga Saksi nga nagatuo, nagapamati sing maayo, kag nagapakigbahin sa Cristianong mga miting ang may Makasulatanhon nga ihibalo nga nagapakibot sa mga may edad na.​—⁠Lucas 2:​42, 46, 47.

Kaangay ka bala ni Timoteo, nga sang bata pa sia gintudluan sing “balaan nga mga sinulatan”? Sang bata pa sia, ‘maayo ang report sang kauturan’ sa dimagkubos sa duha ka kongregasyon tuhoy kay Timoteo. Ginpili ni apostol Pablo si Timoteo nga maglakbay upod sa iya, indi subong kargador lamang, kundi agod magbulig kay Pablo sa pagpanudlo sa iban. Napilian ka ayhan para sa sini nga mga pribilehiyo? Ang imo bala binuhatan ‘ginareport sing maayo,’ indi lamang sa inyo kongregasyon kundi sa iban?​—⁠2 Timoteo 3:​15; Binuhatan 16:​1-4.

Ano nga Sahi sang Palaabuton ang Luyag Mo?

Posible bala para sa mga pamatan-on karon nga mangin matutom subong nanday Jose, Moises, David, kag iban pa? Huo, posible. Matuod, madamo nga pamatan-on ang interesado lamang sa paglipaylipay. Apang ginagamit sang iban ang ila pagkapamatan-on sing maalamon, ginakilala ang Dios kag ang iya kabubut-on para sa ila. Ginatuman nila ang tagna sang Biblia: “Ang imo katawhan magahalad sang ila kaugalingon sing kinabubut-on sa adlaw sang imo gahom. . . . May yara ka hubon sang mga pamatan-on nga lalaki subong sang tun-og.”​—⁠Salmo 110:⁠3.

Ining maayong mga pamatan-on nagapakita sing kaalam walay sapayan sang ila edad, kay ang Dios makabulig sa ila agod magmadinalag-on sa ila kabuhi karon subong man nagahatag sa ila sing mahimayaon nga palaabuton sa nagapakari nga bag-ong kalibutan. (1 Timoteo 4:8) Apang, paano ang isa ka pamatan-on karon makapalambo sing pagtuo nga kaangay sang pagtuo sang mga pamatan-on nga ginsambit sa Biblia? Kon luyag mo mahibaluan, ginaagda namon kamo nga basahon ang artikulo nga ­“Malipayon nga mga Pamatan-on sa Pag-ala­gad kay Jehova,” sugod sa pahina 10 sining magasin.

[Mga piktyur sa pahina 5]

Ang pamatan-on nga si Moises wala mahaylo sang manggad sang Egipto

Ang pamatan-on nga si David nangin kalahamut-an sa tagipusuon ni Jehova

[Mga piktyur sa pahina 6]

Bisan pa ginbatyag ni Jeremias nga “bata lamang sia,” maisugon nga ginbantala niya ang indi popular nga mensahe

Sa edad nga 12 anyos, natingala kay Jesus ang mga may edad sa iya bangod sang iya paghangop sa Pulong sang Dios

[Piktyur sa pahina 7]

Sa Israel bisan ang mga magamay namati sang ginbasa ang Kasuguan sang Dios. Ikaw man bala?