Report sang mga Manugbantala sang Ginharian

Maayong Balita Gikan sa Norway

ANG sobra sa 9,500 ka manugbantala sang maayong balita sang Ginharian sa Norway may madamong matahom nga mga eksperiensia. Ginabaton sang mga bunayag sing tagipusuon ang mensahe sa Biblia nga ginabantala sang mga Saksi ni Jehova subong kamatuoran kag sabat sa ila mga pangamuyo, subong sang makita sa masunod nga mga eksperiensia.

◻ Isa ka lamharon nga mag-asawa ang nangamuyo sa Dios nga buligan sila nga makasapo sing katuyuan sa kabuhi. Isa ka semana sang ulihi ang mga Saksi ni Jehova nagduaw, kag ginpasulod sila sang asawa. Ang bana ginpaandaman na batok sa mga Saksi, gani nagguwa sia sa balay agod tinluan ang iya awto. Ang iya asawa natawo sa Lebanon kag may problema sa hambal, gani ginpakita sa iya sang Saksi ang ngalan ni Jehova sa iya Arabiko nga Biblia. Duha ka semana sang ulihi ang mga Saksi nagbalik, kag ang bana nagguwa liwat agod tinluan ang iya awto. Ginpangabay sang Saksi ang asawa kon bala mahimo nga yara ang iya bana sa masunod nga tion nga magakari sila agod sia ang magabadbad, kag nanaad ang asawa nga pangabayon niya ang iya bana.

Sa ikatlo nga pagduaw, ang awto matinlo katama sa bagay nga indi na ini magamit sang bana nga balibad agod makaguwa, gani nagpabilin sia kag nagpakiana sing madamong pamangkot agod hibaluon ang kinatuhayan sa ulot sang mga Saksi kag sang iglesia sang Estado. Ang pagduaw nagdugay sing tatlo ka oras, kag isa ka brosyur ang napahamtang sa mag-asawa. Sang naghalin ang mga Saksi, ang asawa nagtulog na apang ginsugdan nga basahon sang bana ang brosyur, kag gintan-aw ang tanan nga teksto. Sang tungang-gab-i ginpukaw niya ang iya asawa kag nagsiling: “Dapat mo ini basahon.” Nagbangon sia, kag nagbasa sila tubtob alas singko sang aga. Sang narealisar nila nga nakita nila ang kamatuoran, naghibi sila sa kalipay kag nangamuyo kay Jehova, nga nagagamit sang iya ngalan. Isa ka regular nga pagtuon sa Biblia ang ginsugdan upod sa ila, kag nagsugod sila sa pagtambong sa mga miting. Ginbayaan niya ang iya obra sa militar, kag naghalin sila sa simbahan kag nag-untat sa pagpanigarilyo. Bawtismado na sila karon kag malipayon nga nagaalagad kay Jehova upod sa ila mga kauturan nga lalaki kag babayi sa bug-os nga kalibutan.

◻ Duha ka utod nga babayi nga nagapamalaybalay sa Norway ang nakasugilanon sa isa ka babayi nga nagpakita sing interes. Ginpabalik niya sila kag namangkot kon bala mahimo niya maagda ang iban nga mga babayi. Sang masunod nga pagduaw, apat pa ka babayi ang nagtambong. Ang isa sa ila aktibo katama sa simbahan. Nagsiling sia nga kutob sang bata pa sia, luyag niya tumanon ang sugo ni Jesus nga maghimo sing mga disipulo. Nagdala ini sa iya sa Aprika upod sa iya bana sa isa ka bulig-halin-sa luwas nga proyekto. Ang tanan nga mga babayi madamo sing pamangkot, kag ginhimos nga ang mga utod nga babayi magaduaw sa ila kada duha ka semana. Gin-agda ang bag-ong mga kaingod, kag ang iban nagpadayon sa pagkadto samtang ang iban nag-untat sa pagtambong, apang gin-apresyar sang aktibo nga miembro sang simbahan nga ginatun-an niya ang kamatuoran. Isa ka adlaw, sang ang ministro sang iya relihion nagsiling nga supurtahan niya ang inaway kag nagapati sia sa doktrina sang Trinidad, naghalin ini nga babayi sa simbahan. Nagsugod sia sa pagtambong sa mga miting sang mga Saksi ni Jehova kag indi madugay nagsugod sia sa pagpakigbahin sa pagbantala nga hilikuton. Wala madugay pagkatapos sadto ginbawtismuhan sia. Sa karon, pagligad sang 30 ka tuig, nalipay sia sa pagtuman sing matuod sa sugo ni Jesus nga maghimo sing mga disipulo.​—⁠Mateo 28:⁠19.

Ginapakamaayo ni Jehova ang mga kauturan sa Norway sa ila balaan nga pag-alagad kag subong man ang mga nagapamati sa maayong balita!