Kahulugan sang Balita
Ganhaan sa Nagligad nga Kabuhi?
Sang nagligad nga pila ka bulan tatlo ka elementarya kag dyunyor hayskul nga mga babayi ang nasapwan nga wala sing pangalibotan sa isa ka dalan sa Tokushima, Japan, nga resulta sang paninguha nga maghikog. Ano ang nagtiklod sa ila nga himuon ina? Ang Asahi Shimbun nagreport: “Nagpati sila nga mga reinkarnasyon sila sang mga prinsesa anay kag naghaylo sang ila kaugalingon nga makapasiplat sila sa ila nagligad nga pagkabuhi kon malab-ot nila ang punto nga halos mapatay na.” Sa likod sini nga insidente, siling sang pamantalaan, amo “ang huyog sa tunga sang mga kabataan nga magliso sa okulto nga kalibutan, [nga] naglapnag sing maarang-arang sang nagligad nga mga tuig.” Ang mga babayi makugi nga mga bumalasa sang mga komiks nga nagasaysay sing reinkarnasyon.
Apang, ang pagbaton sa ideya sang reinkarnasyon wala sing pulos subong sang pagdalangdalang sa desyerto. Ginapakita sang Biblia nga sa kamatayon ‘ang tawo nagabalik sa duta, kag sa amo nga adlaw nagakawala ang iya mga hunahuna.’ (Salmo 146:4) Ini nga kamatuoran nahanungod sa kamatayon gintabunan sang malimbungon nga panudlo nga ang kalag nagapadayon nga buhi kon mapatay ang isa ka tawo. Sa baylo sang pagtudlo nga ang mga tawo may dimamalatyon nga kalag, ang Biblia nagasiling nga ang kalag nagakapatay. (Ezequiel 18:4) Apang para sa mga yara sa handumanan sang Dios, may matahom nga paglaum sang pagkabanhaw. (Juan 5:28, 29) Ginabuyagyag man sang Biblia ang pangunang manugsugyot sang dimamalatyon nga kalag kag reinkarnasyon nga mga doktrina; sia amo si Satanas nga Yawa, “ang amay sang kabutigan.”—Juan 8:44; ipaanggid ang Genesis 3:4.
Ang mga Katoliko kag ang Aborsion
Halos isa ka dekada na ang nagligad kutub sang reperendum sa aborsion sa Italya nga sa sini napierde ang Iglesia Katolika. Apang, sa isa ka dokumento nga ginpananaug sining karon lang sang Italyano nga mga obispo, ginapakita sa liwat sang Katoliko nga hirarkiya nga “ang pagdumili nga himuon ang aborsion ukon bisan ang pagkooperar lamang sa sini isa ka mabug-at nga obligasyon sa moral, nanggamut sa kasuguan nga ginsulat sa tagipusuon sang kada tawo kag ginlig-on sang simbahan sa iya lehislasyon, nga nagasilot sing ekskomunikasyon sa mga Cristiano nga nagabuhat sing aborsion ukon nagakooperar sa sini.”
Ano ang panghunahuna sang mga Italyano nahanungod sa aborsion? Ang isa ka surbey sining karon lang sa 2,040 ka tawo nagpakita nga supak sa mga dikta sang simbahan, ang mga Italyano ugyon sa aborsion sa apat ka sitwasyon. (1) Kon ang pagmabdos nagabutang sa katalagman sang kabuhi sang iloy, 83 porsiento ang pabor sa aborsion. (2) Kon may risgo nga madisporma ang kiring, 76.3 porsiento ang pabor sa pagtapos sang pagmabdos. (3) Kon ang kapagros sang babayi yara sa katalagman, 71.1 porsiento ang pabor sa aborsion. (4) Kon ang pagmabdos resulta sang paglugos, 55.2 porsiento ang ugyon nga ang aborsion dapat tugutan. Kapin sa 1 ka Italyano sa 4 ang pabor sa aborsion “sa tanan nga mga sitwasyon kon diin luyag sang babayi,” report sang La Repubblica. Ginabantabanta nga 300,000 ka legal kag indi legal nga mga aborsion ang ginahimo kada tuig sa Italya.
Maathag nga sa sinang pamilyar nga butang, ang Katoliko nga hirarkiya wala makahatag sa iya matuod nga mga sumilimba sing bastante nga panudlo sa Kasulatan agod pangabayon ang ila pagtuman. Apang, ang matuod nga mga Cristiano gintudluan kon ano ang ginasiling sang Kasulatan sa sining importante nga butang. Bangod sang pagtahod sa mataas nga talaksan sa moral sang Biblia, wala nila ginahimo ang aborsion sa bisan diin sa apat ka sitwasyon nga ginlaragway sa ibabaw.—Exodo 21:22-25; tan-awa man ang Salmo 139:14-17; Jeremias 1:5.