Magpabilin nga Malig-on sa Pagtuo!
Mga Pangunang Punto Gikan sa Nahaunang Pedro
ANG mga Saksi ni Jehova nagaatubang sing lainlain nga mga pagtilaw sa ila pagtuo. Sa iban nga kadutaan, ang ila pagbantala sang Ginharian nga hilikuton ginahimo sa atubang sang dakung paghingabot. Sa likod sini kag sang iban pa nga mga panikasog nga gub-on ang ila kaangtanan sa Dios amo si Satanas nga Yawa. Apang indi sia magamadinalag-on, kay si Jehova nagalig-on sang iya mga alagad—huo, malig-on sa pagtuo.
Si apostol Pedro may pribilehiyo sa ‘pagpabakud sa iya mga kauturan’ nga ‘nagaantos sang mga sarisari nga pagtilaw.’ (Lucas 22:32; 1 Pedro 1:6, 7) Ginhimo niya ini sa iya nahaunang sulat, ginsulat sang mga 62-64 C.E. halin sa Babilonia. Naglaygay diri si Pedro, naglugpay, kag nagpalig-on sa Judiyo kag Gentil nga mga Cristiano, nagbulig sa ila nga mabatas ang mga pagsalakay ni Satanas kag magpabilin nga “malig-on sa pagtuo.” (1 Pedro 1:1, 2; 5:8, 9) Karon nga malip-ot na lang ang tion sang Yawa kag ang iya mga pagsalakay tuman kalain, pat-od gid nga ang katawhan ni Jehova makabenepisyo gikan sa ginbugna nga mga pulong ni Pedro.
Paggawi nga Napasad sa Diosnon nga mga Prinsipio
Langitnon man ukon dutan-on ang aton paglaum, dapat ini magbulig sa aton nga mabatas ang mga pagtilaw kag magpanghikot sa diosnon nga paagi. (1:1–2:12) Ang paglaum sa langitnon nga palanublion nagapahulag sa mga hinaplas nga magkasadya sa atubangan sang mga pagtilaw, nga aktuwal nga nagadalisay sang ila pagtuo. Subong espirituwal nga balay nga natukod sa sadsaran ni Cristo, nagadulot sila sing espirituwal nga mga halad nga kalahamut-an sa Dios kag nagagawi sang ila kaugalingon sa maayong paagi nga nagahimaya sa iya.
Ang aton pagpakig-angot sa aton mga isigkatawo dapat nga ginagahuman sang diosnon nga mga prinsipio. (2:13–3:12) Ginpakita ni Pedro nga dapat kita mangin mapasakupon sa tawhanon nga mga gumalahom. Ang mga ulipon sa balay dapat mangin mapasakupon sa ila mga amo, kag ang mga asawa sa ila mga bana. Ang diosnon nga paggawi sang isa ka Cristianong asawa mahimo nga makadaug sa iya ditumuluo nga bana pasulod sa matuod nga pagtuo. Kag ang tumuluo nga bana dapat ‘magpadungog sa iya asawa subong sang isa ka maluya nga suludlan.’ Ang tanan nga mga Cristiano dapat magpakita sing patugsiling, utudnon nga gugma, maghimo sing maayo, kag maghimud-os sang paghidait.
Ang Pagbatas Nagadala sing mga Pagpakamaayo
Ang matutom nga pagbatas sang matuod nga mga Cristiano sa pag-antos magaresulta sa mga pagpakamaayo. (3:13–4:19) Kon kita magaantos tungod sa pagkamatarong, dapat kita magmalipayon. Dugang pa, bangod si Cristo nag-antos sa unod agod tuytuyan kita sa Dios, indi kita dapat magkabuhi suno sa undanon nga mga kailigbon. Kon kita nagabatas sing matutom, magapakig-ambit kita sa dakung pagkasadya sa pagpahayag ni Jesus. Ang pagdala sang pasipala tungod sa ngalan ni Cristo, ukon subong mga disipulo niya, dapat magpahalipay sa aton bangod nagapamatuod ini nga kita may espiritu ni Jehova. Gani samtang nagaantos kita nahisuno sa kabubut-on sang Dios, itugyan naton ang aton kaugalingon sa iya kag padayon nga maghimo sing maayo.
Subong mga Cristiano, dapat naton himuon ang aton mga katungdanan sing matutom kag magpaubos sang aton kaugalingon sa gamhanan nga kamot sang Dios. (5:1-14) Ang mga gulang dapat magbantay sang panong sang Dios sing kinabubut-on, kag kita tanan dapat magtugyan sang aton paghimud-os kay Jehova, nakahibalo nga sia tunay nga nagaulikid sa aton. Dapat man kita magtindog batok sa Yawa kag wala gid nagaluya, kay ang aton mga kauturan nagaantos man sing subong naton. Dumduma pirme nga si Jehova nga Dios magalig-on sa aton kag magapaposible nga kita magpabilin nga malig-on sa pagtuo.
[Kahon/Laragway sa pahina 30]
Pagpamuni sang Babayi: Sa paglaygay sa Cristianong mga babayi, si Pedro nagsiling: “Ang inyo pagpamuni dili manginsa guwa sa pagpanalapid sang buhok kag sa puni nga bulawan ukon sa mga panapton, kundi manginsa tinago nga tawo sang tagipusuon nga may dimadinulunton nga huluyason sang mapainubuson kag mahim-ong nga espiritu, nga bilidhon gid sa itololok sang Dios.” (1 Pedro 3:3, 4) Sadtong nahaunang siglo C.E., ang paganong mga babayi masunson nga may masibud nga koypyur, nagasalapid sang ila malaba nga buhok sa magarbo nga mga desinyo kag nagapuni sing bulawan sa panalapid. Mahimo nga ginhimo ini sang madamo sa pagpakitakita—butang nga dimaayo sa mga Cristiano. (1 Timoteo 2:9, 10) Apang, indi tanan nga pagpuni malain, kay si Pedro nagalakip sang “mga panapton”—maathag gid nga kinahanglan. Ang mga alahas gingamit man sang mga alagad sang Dios sadtong una nga panahon. (Genesis 24:53; Exodo 3:22; 2 Samuel 1:24; Jeremias 2:32; Lucas 15:22) Apang, ang Cristianong babayi maalamon nga nagalikaw sang malaw-ay nga mga puni kag pikit nga panapton kag dapat maghalong sa paggamit sang mga kosmetiko nga maayo. Ang punto sang laygay sang apostol amo nga dapat niya ipadaku, indi ang naguwa, kundi ang nasulod nga pamuni. Agod mangin tunay nga makagalanyat, dapat sia magpanapot sing maugdang kag may disposisyon sang isa nga nagakahadlok sa Dios.—Hulubaton 31:30; Miqueas 6:8.
[Ginkuhaan]
Israel Department of Antiquities and Museums; Israel Museum/David Harris