Ano ang Ginasiling sang Biblia Parte sa Pagpang-makeup kag Paggamit sing mga Alahas?

Ang sabat sang Biblia

Wala ginsambit sing detalyado sa Biblia ang parte sa sini nga topiko. Pero wala ginapakalain sang Biblia ang pagpang-makeup, pagpang-alahas, ukon iban pa nga pangpatahom. Wala man nagapokus ang Biblia sa pisikal nga katahom, kundi nagapokus ini sa “pagsuksok sang indi madinulunton nga bayo, ang malinong kag malulo nga espiritu.”​—1 Pedro 3:​3, 4.

Wala ginapakalain ang pisikal nga pangpatahom

• Ang matutom nga mga babayi sa Biblia nagpatahom sa ila kaugalingon. Si Rebeca nga ginpangasawa ni Isaac nga anak ni Abraham, nagsuksok sing bulawan nga singsing, bulawan nga mga pulseras, kag sing iban pa nga malahalon nga alahas nga ginregalo sa iya sang iya mangin ugangan nga lalaki. (Genesis 24:22, 30, 53) Si Ester nagpasugot man sa “pagsulundan sa pagpatahom” para ihanda sia sa posibilidad nga mangin rayna sang Emperyo sang Persia. (Ester 2:​7, 9, 12) Mahimo nalakip sa sini nga pagpatahom ang paggamit sang mga “kosmetiko,” ukon “sarisari nga klase sang makeup.”​—New International Version; Easy-to-Read Version.

• Ang pila ka ilustrasyon sa Biblia naggamit sing alahas para sa pagkumparar. Halimbawa, ang tawo nga nagahatag sing maayo nga laygay ginkumparar sa “bulawan nga aritos . . . sa dulunggan sang tawo nga nagapamati sa sini.” (Hulubaton 25:12) Ginkumparar man sang Dios ang iya pagpakig-angot sa pungsod sang Israel sa isa ka bana nga nagapatahom sa iya asawa paagi sa pagpasuksok sini sing pulseras, kulintas, kag mga aritos. “Nangin matahom gid” ang pungsod bangod sini nga pangpatahom.​—Ezequiel 16:11-​13.

Sayop nga mga pagpati parte sa pagpang-makeup kag pagpang-alahas

Sayop nga pagpati: Ang malain nga Rayna nga si Jezebel nagbutang sing “itom nga kolorete” sa iya mga mata. Ebidensia ini nga malain ang pagpang-makeup.​—2 Hari 9:​30.

Ang matuod: Ginhukman si Jezebel bangod naghimo sia sing binabaylan kag nagpamatay, indi bangod sa iya hitsura.​—2 Hari 9:​7, 22, 36, 37.