Malayo Pa Bala Ini sa Banta Ninyo?

TATLO ka adlaw antes sang iya kamatayon, masako gid ang adlaw ni Jesus sa Jerusalem, isa ka adlaw nga nangin amo ang labing importante para sa mga Cristiano nga nagakabuhi karon. Nagtudlo sia sa templo, kag ginbalik niya ang madamo sang paniplang nga mga pamangkot sang Judiyong relihiosong mga lider sa pagsiod sa iya. Sang ulihi, matigdas nga ginpakamalaut niya ang mga escriba kag mga Fariseo nga nagpakilala sa ila subong mga salimpapaw kag mga man-ug nga nagapadulong sa Gehenna.​—⁠Mateo, kapitulo 22, 23.

Sang manugguwa na sia sa templo, ang isa sang iya mga disipulo nagsiling sa iya: “Manunudlo, tan-awa! daw ano nga mga bato kag daw ano nga mga balay!” Si Jesus, nga wala magdayaw, nagsiling sa iya: “Nakita mo bala ining dalagku nga mga balay? Wala sing mabilin diri nga isa ka bato sa ibabaw sang isa, nga indi malumpag.” (Marcos 13:​1, 2) Nian naghalin si Jesus sa templo sa katapusan nga tion, nanaug sa Nalupyakan sang Kidron, nagtabok, kag ­nagtaklad sa bungyod sang Bukid sang mga Olivo.

Samtang nagapungko sia sa initan sang kahapunanon na didto sa bukid, nga lantawon ang Bukid sang Moria sa tabok sang nalupyakan, nagpalapit sa iya sanday Pedro, Santiago, Juan, kag Andres. Indi sila mapahamtang sa ginsiling niya nga ang templo malumpag. Sila namangkot: “Sugiri kami, San-o bala mahanabo ini, kag ano bala ang tanda sang imo presensia kag sang katapusan sang sistema sang mga butang?” (Mateo 24:​3; Marcos 13:​3, 4) Importante gid sa aton ang ginsabat niya sa ila pamangkot sadto nga hapon sa Bukid sang mga Olivo. Makabulig ini sa aton nga indi maghulat sing tuman kadugay antes maghunahuna nahanungod sa “katapusan sang sistema sang mga butang.”

Ang ila pamangkot may duha ka bahin. Ang isa ka bahin nahanungod sa katapusan sang templo kag sang Judiyong sistema; ang isa pa nahanungod sa palaabuton nga presensia ni Jesus subong Hari kag sa katapusan sining karon nga sistema sang mga butang. Ining duha ka pamangkot lunsay natuptupan sa sabat ni Jesus, nga nahatag sa Mateo 24 kag 25, Marcos 13, kag Lucas 21. (Tan-awa man ang Bugna 6:​1-8.) Tuhoy sa katapusan sining karon nga kalibutan, ukon sistema sang mga butang, ginlaragway ni Jesus ang pila ka bahin nga, kon tingubon, mangin isa ka grupo nga tanda nga nagapakilala sang katapusan nga mga adlaw. Nagakatuman bala inang grupo nga tanda? Ginabutang bala kita sini sa katapusan nga mga adlaw nga ginsambit sa Biblia? Ang katumanan bala sini nagapaandam sa aton nga malapit na ini sang sa ginabanta naton?

Ang isa ka bahin sang grupo nga tanda ni Jesus amo: “Ang pungsod magatindog batok sa pungsod kag ang ginharian batok sa ginharian.” (Mateo 24:7) Sang 1914, ang Inaway Kalibutanon I nagsugod. Ang mga Saksi ni Jehova sadto nga dekada nagbantay sa gilayon. Kag ngaa? Sang Disiembre 1879, mga 35 ka tuig sa wala pa, ang magasin nga Watch Tower nagsiling, pasad sa kronolohiya sang Biblia, nga ang 1914 mangin isa ka importante nga tuig sa maragtas sang tawo. Mahimo bala nga ining inaway, ang nahauna nga inaway nga naglapnag sa bug-os nga kalibutan, nga sa diin 28 ka pungsod ang nadalahig sang ulihi kag 14 milyones ka tawo ang napatay, amo ang pamuno sang mga hitabo nga nagatuman sang grupo nga tanda ni Jesus tuhoy sa katapusan? Magasunod bala ang iban pa nga mga bahin sang tanda?

Sa “bugna ni Jesucristo,” gintagna man ini nga pagpamatay. Sa sini ang mapula nga kabayo kag ang nagasakay sa sini ‘nagkuha sang paghidait sa duta.’ (Bugna 1:​1; 6:4) Natabo gid ina sang 1914 tubtob 1918. Kag ang Inaway Kalibutanon I pamuno lamang. Sang 1939, nagsunod ang Inaway Kalibutanon II. Kalim-an kag siam ka pungsod ang nahigop sa sadto nga inaway, kag mga 50 milyones ka tawo ang napatay. Sa sulod sang 45 ka tuig sa tapos sang Inaway Kalibutanon II, kapin sa 125 ka inaway ang natabo, nga nagpatay sing kapin sa 20 milyones ka tawo.

Ang isa pa ka bahin sang tanda amo: “May kakulang sing mga kalan-on.” (Mateo 24:7) May lapnag nga tiggulutom sa tion kag sa tapos sang Inaway Kalibutanon I. Ang isa ka report naglista sing kapin sa 60 ka dalagku nga tiggulutom sugod sang 1914, nga nagkutol sing minilyon ka kabuhi. Dugang pa, bisan sa karon 40,000 ka kabataan ang nagakapatay kada adlaw bangod sa malnutrisyon kag sarang mapunggan nga mga balatian.

“May mabaskog nga mga linog.” (Lucas 21:11) Gintay-og nila ang duta sa tapos magsugod ang Inaway Kalibutanon I. Sang 1915 ang linog nagkutol sing 32,610 ka kabuhi sa Italya; sang 1920 ang isa pa nagpatay sing 200,000 sa Tsina; sang 1923 sa Hapon, 99,300 ang napatay; sang 1935 sa ginatawag karon nga Pakistan, 25,000 ang napatay; sang 1939 sa Turkiya, 32,700 ang napatay; sang 1970 sa Peru, 66,800 ang napatay; sang 1976 sa Tsina, 240,000 (ang iban nagasiling 800,000) ang napatay; sang 1988 sa Armenia, 25,000 ang nadulaan sang ila kabuhi. Sa pagkamatuod, may mabaskog nga mga linog kutob sang 1914!

“Mga piste sa nagakalainlain nga mga duog.” (Lucas 21:11) Sang 1918 kag 1919, mga 1,000,000,000 ka tawo ang nagmasakit sing trangkaso Espanyola, kag kapin sa 20,000,000 ang napatay. Apang pamuno lamang yadto. Sa nagauswag nga kalibutan, ang malaria, ­snail ­fever, ­river blind­ness, grabe nga lupot, kag ang iban pa nga mga balatian padayon sa paghalit kag sa pagpatay sa minilyon. Dugang pa, ang balatian sa tagipusuon kag ang kanser nagakutol sing minilyon pa ka kabuhi. Ang mga balatian nga ginapalaton paagi sa sekso nagahapay sa katawhan. Ang nagapahadlok karon amo ang makamamatay nga kalalat-an sang AIDS, ginabanta nga nagakuha sing bag-o nga biktima kada minuto, kag wala sing bulong nga ginapanan-aw.

“Ang kalautan magabuad.” (Mateo 24:12) Ang pagkamalinapason indi mapunggan sugod sang 1914, kag karon grabe gid ini. Mga pagpatay, mga panglugos, mga kawatay, mga pag-inaway sang mga gang​—⁠mga ulong-balita ini sang mga pamantalaan kag mga balita sa radyo kag telebisyon. Indi mapunggan ang kasingki. Sa Estados Unidos, ginpaarakan sing riple sang isa ka tawo ang kadam-an sang mga bata nga nagaeskwela​—⁠5 ang napatay, 29 ang napilasan. Sa Inglaterra 16 ka tawo ang napatay sang isa ka buang nga tawo paagi sa AK-47 nga riple. Sa Canada ang isa ka lalaki nga akig sa mga tawo nagkadto sa Montreal University kag ginpatay ang 14 sa ila. Ina nga mga tawo daw subong sang mga lobo, mga leon, mga sapat nga mapintas, wala sing buot nga mga sapat nga dalakpon kag palatyon.​—⁠Ipaanggid ang Ezequiel 22:​27; Sofonias 3:​3; 2 Pedro 2:⁠12.

“Ang mga tawo magakalipong sa kahadlok kag sa paghulat sa magaabot sa napuy-an nga duta.” (Lucas 21:26) Wala madugay sa tapos ginpalupok ang nahauna nga bomba atomika, ang sientipiko sa atomiko nga si Harold C. Urey nagsiling tuhoy sa palaabuton: “Magakaon kita sing kahadlok, matulog sa kahadlok, magakabuhi sa kahadlok kag mapatay sa kahadlok.” Dugang sa kahadlok sa inaway nukleyar amo ang kahadlok sa krimen, tiggulutom, wala sing kalig-unan nga ekonomiya, pagkalusod sang moralidad, pagkapukan sang pamilya, paghigko sa duta. Sa kamatuoran, ang malain nga mga tion nga ginapakita sa aton sang adlaw-adlaw nga mga pamantalaan kag mga balita sa telebisyon nagapalapta sing kahadlok bisan diin.

Nagsulat si apostol Pablo tuhoy sa mga kahimtangan nga magaluntad sa katapusan nga mga adlaw sining sistema sang mga butang. Ang pagbasa sang iya mga pulong daw subong sang pagbasa sang mga balita karon. “Apang hibalua ini,” sulat niya, “nga sa katapusan nga mga adlaw magaabot ang makahalanguyos nga mga tion. Kay ang mga tawo mangin mahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing kinaugali nga gugma, indi tampad sa kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahom sini; likawi ang subong nga mga tawo.”​—⁠2 Timoteo 3:​1-5.

Amo Gihapon ang Kahimtangan sang mga Butang “Kutob sa Ginsuguran sang Pagtuga”?

Si apostol Pedro nagtagna sing isa pa ka bahin sang katapusan nga mga adlaw: “Sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ang ginsaad nga presensia niya? Kay kutob sang pagtulog sang aton mga ginikanan sa kamatayon, amo man gihapon ang kahimtangan sang tanan nga mga butang kutob sa ginsuguran sang pagtuga.’ ”​—⁠2 Pedro 3:3, 4.

Sa karon, kon hambalan ang tema tuhoy sa katapusan nga mga adlaw, madamo nga tawo ang nagatuman sang matagnaon nga mga pulong ni Pedro paagi sa pagyubit kag pagsiling: ‘Abaw, natabo na ina tanan nga mga butang sang una. Isa lamang ini ka maragtas nga nagasulit sang iya kaugalingon.’ Gani ginasikway nila ang paandam kag padayon sa ‘pagsunod sang ila kaugalingon nga mga kailigbon.’ “Nahisuno sa ila handum,” wala nila ginasapak ang katumanan sang mga tagna nga maathag gid nga nagapakilala sang katapusan nga mga adlaw.​—⁠2 Pedro 3:⁠5.

Walay sapayan, ang nanuhaytuhay nga mga bahin sang grupo nga tanda nga gintagna ni Jesus karon pa lang natuman sing tingob sa sulod sang malip-ot lamang nga tion nga may daku nga kabaskugon kag lapnag nga mga resulta. (Repasuha, halimbawa, ang Mateo 24:​3-12; Marcos 13:​3-8; Lucas 21:​10, 11, 25, 26.) Kag luyag namon ipatalupangod sa inyo labi na ang isa pa ka gintagna nga bahin sang katapusan nga mga adlaw, nga ginlaragway sa Bugna.

Buksan naton ang Bugna 11:⁠18. Nagasiling ini nga kon maghari na si Cristo sa Ginharian kag maakig ang mga pungsod kag magaabot ang tion sang paghukom, nian ‘laglagon [ni Jehova] ang mga nagalaglag sang duta.’ Wala bala karon ginalaglag sang polusyon ang palibot? Matuod, halin sang una ginhingalitan na sang tawo ang mga manggad sang duta agod magpamanggad. Apang sa paghimo sini, wala gid sila makadangat sa punto nga may ikasarang sila sa paglaglag sini subong isa ka puluy-an nga planeta. Sa karon, bangod sang sientipiko nga teknolohiya nga natukiban kutob sang 1914, ang tawo may yara na sina nga gahom, kag paagi sa makagod nga pagtinguha sa manggad, ginalaglag gid nila ang duta, ginahigkuan ang palibot kag ginabutang sa katalagman ang ikasarang sang duta sa pagsakdag sang kabuhi.

Ginhimo ini karon sang sakon sa manggad kag materyalistiko nga katilingban sa isa ka makahaladlok nga kadasigon. Yari ang pila sang malain nga resulta: asido nga ulan, pag-init sang bug-os nga globo, mga buho sa ozone layer, nagaawas nga basura, makahililo nga mga basura, makatalagam nga mga herbisidio kag mga pestisidio, basura nuklyear, pagkaula sang langis, hilaw nga mga basura, posible nga pagkaubos sang pila ka espisyi, patay nga mga linaw, mahigko nga tubig sa idalom sang duta, nalaglag nga mga kagulangan, mahigko nga duta, pagkaab-ab sang naibabaw nga bahin sang duta, kag aso kag alisngaw nga nagahalit sang mga kahoy kag mga tanom kag subong man sa lawas sang tawo.

Si Propesor Barry Commoner nagsiling: “Nagapati ako nga ang padayon nga paghigko sa duta, kon indi matapna, magalaglag sa ulihi sang pagkanagakabagay sining planeta subong isa ka puluy-an para sa mga tawo. . . . Ang problema wala sa pagkawalay hinalung-ong sang mga sientipiko, kundi sa hungod nga kakagod.” Ang libro nga State of the World 1987 nagsiling sa pahina 5: “Ang pagkamapuy-an sang duta nabutang sa katalagman bangod sang kasangkaron sang ginahimo sang tawo.” Ang isa ka daku nga mga serye para sa publiko nga telebisyon nga ginpaguwa sa Estados Unidos sang 1990 gintig-uluhan sing “Palumbaanay sa Pagluwas sa Planeta.”

Indi gid magdulog ang tawo sa paghigko; padulugon ini sang Dios kon laglagon na niya ang mga nagalaglag sang duta. Himuon ini sang Dios kag sang iya langitnon nga Mariskal de Kampo, nga si Cristo Jesus paagi sa paghukom sa materyalistiko nga mga pungsod sa katapusan nga inaway sang Armagedon.​—⁠Bugna 16:​14, 16; 19:​11-21.

Bilang katapusan, talupangda ang masunod nga talalupangdon nga bahin sang tagna ni Jesus nahanungod sa katapusan nga mga adlaw: “Iwali ining maayong balita sang ginharian sa bug-os napuy-an nga duta.” (Mateo 24:14) Ining maayong balita nagasugid nga ang Ginharian sang Dios nagagahom na karon sa mga langit kag sa indi madugay laglagon sini ining malaut nga sistema kag ipasag-uli ang Paraiso sa duta. Ang ebanghelyo nabantala na sang una apang indi sa bug-os napuy-an nga duta. Kutob sang 1914, nahimo ina sang mga Saksi ni Jehova, walay sapayan sang paghingabot nga gintagna ni Jesus​—⁠mga pagdumili sang gobierno, kasingki sang akig nga mga grupo, mga pagbilanggo, pagpaantos, kag madamo nga kamatayon.

Sang 1919 4,000 ka Saksi ni Jehova ang nagbantala sining maayong balita. Padayon sila nga nagadamo, amo kon ngaa sang nagligad nga tuig kapin sa 4,000,000 ang nagbantala sa 212 ka kadutaan, sa mga 200 ka hambal, nga nagapahamtang sing minilyon ka Biblia, libro, kag magasin, nagadumala sing minilyon ka pagtuon sa Biblia sa mga puluy-an sang mga tawo, kag nagahiwat sing mga kombension sa dalagku nga mga istadyum sa tanan nga bahin sang kalibutan. Indi gid mahimo ining masangkad nga pagbantala sang ebanghelyo antes sang 1914. Ang paghimo sini sa karon nga kasangkaron nagkinahanglan sing moderno kag madasig nga mga makina sa pag-imprinta, mga pasilidad sa paglakbay, mga kompyuter, mga fax machine, kag subong man sing mga pasilidad sa pagpadala kag komunikasyon nga matigayon sa aton lamang tion.

Ang Jerusalem sang adlaw ni Jeremias ginpaandaman tuhoy sa nagapakari nga kalaglagan sini; nangyubit lamang ang mga pumuluyo sini, apang malapit gali yadto sang sa ginbanta nila. Sa karon, ang mas daku nga paandam tuhoy sa paglaglag sang Armagedon ginapaandam, nga ginasakdag sang madamo gid nga ebidensia. (Bugna 14:​6, 7, 17-20) Minilyon ang nagapabungol. Apang ang tion nagakaubos na; malapit na ini sang sa ginabanta nila. Malayo pa bala ini sa banta ninyo?

[Laragway sa pahina 7]

Sang adlaw ni Jeremias malapit na gali yadto sang sa ginbanta nila