Karon Na ang Tion nga Pangitaon si Jehova
“Tuhoy kay Jehova, nagtamod sia gikan sa langit sa mga anak sang mga tawo, sa pagtan-aw kon may dira nga nakahangop, nga nagapangita kay Jehova.”—SALMO 14:2.
1, 2. (a) Paano ginatamod sang madamo ang matuod nga Dios, nga si Jehova? (b) Paano naton nahibaluan nga nahibaluan ni Jehova ang indi pagsapak sang katawhan?
SA KARON, ang matuod nga Dios, nga si Jehova, ginasikway sang mga ateista, mga agnostiko, mga nagasimba sa butig nga mga dios, kag sang minilyon nga nagapangangkon nga nagatuo sa Dios apang nagapanghiwala sa iya paagi sa ila mga buhat. (Tito 1:16) Madamo ang nagapati subong sang ika-19 siglo nga Aleman nga pilosopo nga si Neitzsche nga ang “Dios patay.” Nahibaluan bala ni Jehova ining binuang nga indi pagsapak sa iya? Huo, kay gin-inspirar niya si David sa pagsulat: “Ang buangbuang nagsiling sa iya tagipusuon: ‘Wala sing Jehova.’ Naghikot sila sing malaglagon, naghimo sila sing mga buhat nga makangilil-ad. Wala sing bisan isa nga nagahimo sing maayo.”—Salmo 14:1.
2 Si David nagpadayon: “Tuhoy kay Jehova, nagtamod sia gikan sa langit sa mga anak sang mga tawo, sa pagtan-aw kon may dira nga nakahangop, nga nagapangita kay Jehova.” Huo, nahibaluan sang Soberanong Ginuo ang mga nagatinguha sa pagkilala kag sa pag-alagad sa iya. Sa amo, importante gid karon ang aton hanuot nga pagpangita sa iya. Magakahulugan ini sing kabuhi nga wala sing katapusan ukon kalaglagan nga wala sing katapusan.—Salmo 14:2; Mateo 25:41, 46; Hebreo 11:6.
3. Ano ang posibilidad sa palaabuton?
3 Busa, mahangpan naton kon ngaa importante gid nga buligan naton ang iban sa pagpangita kay Jehova karon. Minilyon pa nga mga tawo ang wala pa gid makakita sa isa sang mga Saksi ni Jehova ukon makabati sang “maayong balita sang ginharian.” Wala naton nahibaluan kon daw mangin ano kadamo ang “dakung kadam-an” antes sang “dakung kapipit-an.” Apang may yara gid posibilidad nga madamo pa ang magapangita kag makakita kay Jehova nga Dios sa malapit nga palaabuton antes mangin ulihi ang tanan. Ang pamangkot karon amo, Ano ang mahimo naton agod mabuligan ang minilyon sa pagpangita sa Dios?—Mateo 24:14; Bugna 7:9, 14.
4, 5. Sa ila pagpangita sa isa ka dios, ano ang ginapasulabi sang madamo?
4 Madamo nga tawo karon sa kalibutan ang nagapangita, apang nagapangita sing ano? Diutay lamang ang nagapangita sa isa ka matuod nga Dios, nga si Jehova. Ginapasulabi sang madamo ang isa ka dios nga nagahisanto sa ila kaugalingon nga mga handum kag mga opinyon. Subong sang ginsiling sang manugsurbe sang E.U. nga si George Gallup, Jr.: “Indi mo gid makita ang daku nga kinatuhayan sa ulot sang palasimba kag sang indi kon tuhoy sa pagpangdaya, paglikaw sa buhis, kag pagpangawat, bangod kadamo gid sing sosyal nga relihion.” Nagdugang pa sia nga “madamo ang nagapili lamang sang kon ano ang naluyagan nila gikan sa lainlain nga mga relihion nga masulhay para sa ila kag nagapakunyag sa ila . . . Gintawag ini sang isa ka tawo nga pinili nga relihion.”
5 Ang iban magasiling, “Tuman na ang akon relihion para sa akon.” Sa pagkamatuod, ang pamangkot dapat amo sini, “Tuman na bala ang akon relihion para sa Dios? Matuod, ang kalabanan sa Cristiandad kag sa Hinduismo kontento na sa pagsimba sa ila mga imahen kag mga idolo. Ang kalabanan sang ginatawag nga mga Cristiano nagapati nga ang wala sing ngalan nga Trinitaryo nga dios tuman na para sa ila. Kag kapin sa 900 milyones ka Muslim ang nagatuo kay Allah. Sa pihak nga bahin, minilyon ka ateista ang nagasiling nga wala sing Dios.
Ang mga Nagakinahanglan sing Bulig
6. Ano ang natukiban sang madamo nga bumalasa sang Ang Lalantawan?
6 Apang kamusta kita nga regular nga nagabasa sining magasin? Ginpangita naton ang matuod nga Dios kag nakita naton sia. Napamatud-an naton nga matuod ang ginasiling sang Santiago 4:8: “Magpalapit sa Dios kag sia magapalapit sa inyo.” Paagi sa aktibo nga pagpakig-upod sa Cristianong kongregasyon, nagpalapit kita sa Dios, kag naeksperiensiahan naton kon paano si Jehova nagpalapit sa aton.—Juan 6:44, 65.
7. Paano naton nahibaluan nga madamo pa nga tawo ang interesado gihapon nga mangin aktibo sa kamatuoran?
7 Apang, nahibaluan naton nga madamo pa ang nalipay makig-upod kon kaisa sa katawhan ni Jehova apang wala pa sa karon makahimo sing positibo nga aksion sa pagpalapit kay Jehova paagi sa pagdedikar kag pagpabawtismo. Paano naton nahibaluan ini? Sang 1990 halos napulo ka milyon ka tawo ang nagtambong sa Memoryal sang kamatayon ni Jesus. Apang pila ang aktibo nga nagabantala sing maayong balita sang Ginharian? Kapin lamang sa apat ka milyon. Nagakahulugan ina nga mga anom ka milyon ang mainabyanon sa kamatuoran kag kon kaisa nagapakig-upod sa aton apang wala pa sila makasugod sa pagrekomendar sang putli nga hambal sang kamatuoran paagi sa pagbantala sing maayong balita sang Ginharian. Sa wala sing duhaduha, madamo sa insidental nga mga okasyon ang nakahambal para kay Jehova kag sa paggahom sang iya Ginharian. Apang, wala pa sila makapakilala sing maathag subong mga Saksi ni Jehova. Luyag man naton buligan ini sila.—Sofonias 3:9; Marcos 13:10.
8, 9. (a) Ano ang ginapalig-on sa aton ni Jehova nga himuon? (b) Ngaa indi maalamon nga patumbayaan ang laygay ni Jehova?
8 Luyag naton palig-unon ini sila nga mangin malipayon kag aktibo nga mga Saksi ni Jehova sa hingapusan nga bahin sang dakung hilikuton nga ginahimo karon sa bug-os nga kalibutan. Talupangda palihog ang mahigugmaon nga imbitasyon ni Jehova sa Hulubaton 1:23: “Liso kamo sa akon pagsabdong. Nian iula ko sa inyo ang akon espiritu; ipakilala ko sa inyo ang akon mga pulong.” (Ipaanggid ang Juan 4:14.) Daw ano ka makapalig-on mahibaluan nga si Jehova magasabat sa aton paghimo sing positibo nga mga tikang sa pagpakilala sang aton kaugalingon upod sa iya ngalan kag pagsimba! Sa pagkamatuod, indi naton luyag nga malakip sa mga ginlaragway sa Hulubaton 1:24, 25: “Nagpanawag ako kag kamo nagdumili, gin-untay ko ang akon kamot kag wala sing tawo nga nagsapak, kag ginpakawala sing pulos ninyo ang tanan ko nga laygay, kag wala ninyo ginbaton ang akon pagsabdong.”
9 Masapwan sang mga tawo nga nagapakawala sing pulos sa laygay ni Jehova nga pangitaon sia samtang makita pa sia kag nagapaatrasar sang ila desisyon tubtob nga aktuwal nga makita nila nga nagsugod na ang dakung kapipit-an nga nagpadugay sila sa paghulat. Ina nga pagtuo nagapakita sing kakulang sing pagtuo kag kaalam kag isa ka pagtamay sa dibagay nga kaluoy ni Jehova.—2 Corinto 6:1, 2.
10. Ngaa makatalagam ang indi pagkabalaka kag indi pagsapak?
10 Sa pag-ilustrar sang kinahanglanon nga maghulag sa gilayon, sundon mo bala ang laygay sang doktor kon may pulmonya na ang imo duha ka baga? Ukon, sa baylo, kon mamutikan mo ang una nga mga simtona sang balatian? Nian ngaa nagapadugay ka pa sa pagpain sang imo kaugalingon gikan sa nagabalatian nga kalibutan ni Satanas kag magdampig kay Jehova kag sa iya mga Saksi? Ang resulta sang indi pagkabalaka, indi pagsapak, kag pagpatumbaya maathag nga ginpakita sa Hulubaton 1:26-29: “Ako man magakadlaw sa adlaw sang inyo kalalat-an, magauligyat ako kon mag-abot ang inyo kahadlok . . . Sa sina nga tion tawgon nila ako, apang indi ako magsabat; pangitaon nila ako sing makugi apang indi nila ako makita, tungod nga gindumtan nila ang ihibalo, kag wala magpili sang kahadlok kay Jehova.” Kabay nga indi kita masapwan nga ‘nagapangita kay Jehova’ kon atrasado na!
11. Ano nga bulig ang matigayon sang mga nagatinguha sa pag-alagad sa Dios?
11 Ang iban nga nagabasa sining magasin mahimo nga nagapangita pa sa matuod nga Dios. Nalipay kami nga nagapadayon kamo sa inyo pagpangita. Ginapangamuyo namon nga ang inyo ihibalo sa Biblia magapahulag sa inyo sa paghimo sing dugang pa nga positibo nga aksion sa pagtindog sing malig-on para sa kamatuoran. Saligi nga ang tagsa ka kongregasyon sang mga Saksi ni Jehova handa sa pagbulig sa inyo sa pagpangita ninyo.—Filipos 2:1-4.
Tion Para sa Kakugi kag Aksion
12, 13. Ngaa dapat kita maghikot tuhoy sa matuod nga pagsimba?
12 Ngaa kinahanglanon nga maghulag kita tanan sa pagpakilala sang aton kaugalingon upod kay Jehova nga Dios kag sa iya matuod nga pagsimba? Bangod ang mga hitabo sa kalibutan nagapadulong sa talipuspusan. Ang mga pahina sang maragtas mas madasig nga nagabukas sang sa mabasa sang tawo. Indi karon ang tion sa pag-alang-alang ukon mangin alabaab. Si Jesus maathag nga nagsiling: “Ang wala nagaupod sa akon batok sa akon, kag ang wala nagapanipon upod sa akon nagapaaplaag.” Nagsiling man sia: “Kay ang bisan sin-o nga magkahuya sa akon kag sang akon mga pulong, magakahuya sa iya ang Anak sang tawo kon magkari sia sa iya kaugalingon nga himaya kag sa himaya sang Amay kag sang balaan nga mga anghel.”—Mateo 12:30; Lucas 9:26.
13 Karon na ang tion para sa kakugi kag aksion! Nahibaluan naton kon sa diin nagapakadto ang mga hitabo sa kalibutan, kag ang Armagedon yara na sa gintaipan. Busa, ang panawag karon amo nga pangitaon si Jehova sa wala pa ang ‘adlaw sang iya kaakig,’ samtang makita pa sia. Sa dakung kapipit-an, mangin atrasado na ini.—Sofonias 2:2, 3; Roma 13:11, 12; Bugna 16:14, 16.
14. Ano ang aton mga rason nga dapat naton pangitaon ang Dios?
14 Sa pagkamatuod, dapat tinguhaan na karon sang tanan nga katawhan ang kahamuot sang Dios. Nagakaigo nga ginpabutyag ini ni apostol Pablo sa Binuhatan 17:26-28: “Kag sa isa ginhimo niya [Dios] ang tagsa ka pungsod sang mga tawo sa pagpuyo sa bug-os nga nawong sang duta, kag nagtangdo sia sing mga panag-on kag mga dulunan sang ila puluy-an, agod nga magpangita sila sa Dios, sa paglaum nga mahikapan nila sia kag makita sia, bisan pa, sa kamatuoran, indi sia malayo sa tagsatagsa sa aton. Kay sa iya nagakabuhi kita kag nagahulag kag nagaluntad.” Inang katapusan nga ekspresyon nga, “kay sa iya nagakabuhi kita kag nagahulag kag nagaluntad,” nagahatag sa aton sing tuman na nga rason sa pagpangita sa Dios. Bangod sa dibagay nga kaluoy ni Jehova, nagaluntad kita sa makitid apang importante nga bahin sining diutay nga duta. Indi bala kita dapat magpasalamat sa Soberanong Ginuo sang uniberso? Kag indi bala dapat ipakita naton ang aton pagpasalamat sa iya sa praktikal nga mga paagi?—Binuhatan 4:24.
15. (a) Ano ang ginpatihan sang istoryador nga si Arnold Toynbee subong amo ang katuyuan sang mas mataas nga relihion? (b) Ano ang dapat naton himuon agod mahimaya ang Dios?
15 Ang istoryador nga si Arnold Toynbee nagsulat anay: “Ang matuod nga katuyuan sang mas mataas nga relihion amo ang pagpasilak sing espirituwal nga mga laygay kag mga kamatuoran nga amo ang mga kinaiya sini sa pinakamadamo nga kalag nga malab-ot sini, agod nga ang tagsatagsa sining mga kalag mabuligan sa pagtuman sang matuod nga katuyuan sang Tawo. Ang matuod nga katuyuan sang tawo amo ang paghimaya sa Dios kag pagdayaw sa Iya sing dayon.” (An Historian’s Approach to Religion, pahina 268-9) Agod mahimaya ang Dios, dapat naton anay sia pangitaon kag magkuha sing sibu nga ihibalo tuhoy sa iya kag sa iya mga katuyuan. Gani, nagakaigo gid ang panawag ni Isaias: “Pangitaa ninyo si Jehova samtang nga makita pa sia. Tawga ninyo sia samtang nga malapit pa sia. Magbiya ang malauton sang iya dalanon, kag ang dimatarong nga tawo sang iya mga painoino; kag magbalik sia kay Jehova, nga magakaluoy sa iya, kag sa aton Dios, kay sia magapatawad sing bugana.”—Isaias 55:6, 7.
Anong Praktikal nga Bulig ang Matanyag Naton?
16. (a) Ano nga hangkat ang nagaatubang sa Cristianong kongregasyon? (b) Sa anong praktikal nga paagi mabuligan naton ang iban sa pag-alagad kay Jehova?
16 Ang minilyon ka interesado nga mga tawo nga indi pa aktibo nga mga manugbantala isa ka hangkat sa aton tanan. Ano ang aton ginahimo sa praktikal nga paagi subong mga gulang, mga ministeryal nga mga alagad, mga payunir, kag mga manugbantala sa pagbulig sa mga tawo nga mainabyanon sa kamatuoran agod mangin aktibo nga mga umalambit sila sa matuod nga pagsimba kaupod naton? Ang isa ka paagi sa pagtanyag sing praktikal nga bulig kon kinahanglanon amo ang pagduaw sa ila mga puluy-an kag paupdon sila sa mga miting sa Kingdom Hall agod nga sila man makaagom sang mga benepisyo sang espiritu ni Jehova sing regular. Ang laygay ni Pablo sa mga Hebreo, sa kapitulo 10, bersikulo 24 kag 25, madagmit man karon subong sadto anay: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban, kundi nagalinaygayay ang isa kag isa, kag labi pa gid sa ginatan-aw ninyo nga nagapalapit ang adlaw.” Ginapalig-on namon ang tanan nga luyag makaeksperiensia sang maayong kabubut-on ni Jehova nga makig-upod sa mga Saksi ni Jehova sing regular sa ila lokal nga Kingdom Hall.
17. Agod mabuligan naton ang mga estudyante sang Biblia nga mag-uswag sa ila pagpangita kay Jehova, ano nga mga pamangkot ang dapat sabton?
17 Kon nagatuon kita sang Biblia upod sa isa ka tawo nga regular nga nagatambong sa mga miting, mabuligan bala naton sia agod makalipikar subong manugbantala sing maayong balita? (Tan-awa ang Organized to Accomplish Our Ministry, pahina 97-9.) Kag sa tion nga sia mangin isa ka indi bawtismado nga manugbantala, ginaagda bala sia nga mag-upod sa aton sing regular sa dayag nga hilikuton sa pagbantala kag sa pila sang aton mga pagtuon kag mga pagduaw liwat? (Tan-awa ang Disiembre 1, 1989, nga guwa sang Ang Lalantawan, pahina 31.) Sa iban nga mga pulong, kon kalipikado na inang mga bag-uhan, ginapalig-on bala naton sila paagi sa pagtugot sa ila nga makita nila mismo ang pila sang positibo nga mga resulta sang aton pagbantala nga hilikuton?—Mateo 28:19, 20.
Takus Pangitaon si Jehova
18. Paano si Jehova nagpakita sing kaluoy sa katawhan?
18 Bangod sang halad nga gawad ni Cristo Jesus, wala ginaisip ni Jehova ang aton mga sala kag pagpatumbaya sang nagligad batok sa aton kon maghinulsol kita kag magpakita sing pagtuo. Talupangda ang ginsiling ni David: “Wala sia maghisayo sa aton suno sa aton mga sala; ukon nagbalos sa aton suno sa aton mga kalautan. Kay subong nga ang mga langit mataas labaw sa duta, amo kadaku ang iya mahigugmaon nga kaluoy ayon sa mga nagakahadlok sa iya. Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis. Kaangay sang amay nga nagakaawa sa iya mga anak, sa amo si Jehova nagakaawa sa mga nagakahadlok sa iya. Kay nakilala niya ang aton kahimtangan, nagadumdom sia nga kita yab-ok.”—Salmo 103:10-14; Hebreo 10:10, 12-14.
19. Ano ang pagpalig-on para sa mga nagpalayo sa kamatuoran?
19 Si Jehova amo gid ang mabinuligon kag maluluy-on nga Dios. Kon magpalapit kita sa iya sing mapainubuson kag mahinulsulon, nagapatawad sia kag ginakalimtan ang aton nagligad. Wala sia nagadumot sing dayon kag ang resulta amo ang wala sing katapusan nga pag-antos sa kalayuhon nga impierno. Indi, subong sang ginsiling ni Jehova: “Ako—ako gid amo Sia nga nagapanas sang imo mga paglalis tungod sa akon, kag indi na ako magdumdom sang imo mga sala.” Daw ano nga pagpalig-on ina para sa bisan kay sin-o nga nagpalayo sa kamatuoran kag nagpatumbaya sang ila kaangtanan kay Jehova! Sila man ginapalig-on nga pangitaon si Jehova karon kag manumbalik sa aktibo nga pagpakig-upod sa katawhan nga ginatawag sa iya ngalan.—Isaias 43:25.
20, 21. (a) Ano ang aton makapalig-on nga halimbawa sa dumaan nga Juda? (b) Ano ang ginkinahanglan nga himuon sang mga pumuluyo sang duta agod matigayon ang pagpakamaayo ni Jehova?
20 Sa sini nga bahin may yara makapalig-on nga halimbawa kay Hari Asa sa dumaan nga Juda. Ginkuha niya ang butig nga pagsimba gikan sa iya ginharian, apang nagpabilin gihapon ang mga agi sang pagano nga pagsimba. Ang rekord sa 2 Cronica 15, bersikulo 2 tubtob 4, nagasugid sa aton sang ginsiling ni manalagna Azarias kay Asa subong pahanumdom: “Si Jehova nagaupod sa inyo samtang kamo nagaupod sa iya; kag kon pangitaon ninyo sia, makita sia ninyo, apang kon bayaan ninyo sia, sia magabiya sa inyo. Sa malawig nga panag-on ang Israel wala sing matuod nga Dios . . . Apang sang sila sa kalisdanan nagbalik kay Jehova nga Dios sang Israel, kag nagpangita sa iya, nakita nila sia.”
21 Wala magpanago si Jehova gikan kay Hari Asa kundi ‘nagpakita sia.’ Ano ang ginhimo sang hari sa sining mensahe? Sa amo gihapon nga kapitulo, ang bersikulo 8 kag 12 nagasabat: “Sang nabatian ni Asa ining mga pulong . . . , nagpakaisog sia kag ginkuha niya ang mga kangil-aran sa bug-os nga duta . . . kag ginkaayo niya ang halaran ni Jehova nga yara sa atubangan sang portico ni Jehova. Dugang pa, [ang Juda] nagpakigkatipan sa pagpangita kay Jehova nga Dios sang ila mga ginikanan sa bug-os nila nga tagipusuon kag sa bug-os nila nga kalag.” Huo, ginpangita nila sing hanuot si Jehova “sa bug-os nila nga tagipusuon kag sa bug-os nila nga kalag.” Ano ang nangin resulta para sa pungsod? Ang bersikulo 15 nagasugid sa aton: “Kag ang bug-os nga Juda nagkasadya sa sumpa; kay sa bug-os nila nga tagipusuon nagsumpa sila kag sa bug-os nila nga handum ginpangita nila sia, kag nakit-an sia nila; kag ginhatagan sila ni Jehova sing kapahuwayan sa palibot.”
22. Ano ang nagapalig-on sa aton nga mangin aktibo karon sa pag-alagad kay Jehova?
22 Karon, indi bala pagpalig-on sa aton tanan nga maghimo sing positibo nga aksion tuhoy sa putli nga pagsimba ni Jehova? Nahibaluan naton nga minilyon pa ang posible nga magadayaw kay Jehova. Sa wala sing duhaduha madamo sini sa ila ang nagahimo sing mga pagbalhin sa ila kabuhi agod malab-ot nila ang Makasulatanhon nga mga kahimusan para sa pag-alagad kay Jehova. Ang iban nagauswag sa paghantop kag sa pagtuo, nagapangita kay Jehova, kag sa indi madugay mapahulag sa pagpaambit sang putli nga hambal sa iban paagi sa pagpaalinton sa ila sang maid-id nga paghangop sa kamatuoran nahanungod kay Jehova kag sa iya Ginharian. Kag ngaa importante gid nga pangitaon naton tanan si Jehova karon samtang makita pa sia? Bangod malapit na ang iya ginsaad nga bag-ong kalibutan!—Isaias 65:17-25; Lucas 21:29-33; Roma 10:13-15.
Nadumduman Mo Bala?
◻ Sin-o ang wala nagasapak sa matuod nga Dios, nga si Jehova?
◻ Tubtob sa anong kasangkaron ang relihion masami nga nagaapektar sa paggawi?
◻ Ano ang posible nga pag-uswag tuhoy sa aktibo nga mga Saksi?
◻ Ngaa karon na ang tion para sa kakugi kag aksion?
◻ Ngaa takus pangitaon si Jehova?
[Laragway sa pahina 10]
Nagtambong sa 1990 nga Memoryal:9,950,058.
Madamo nga mga abyan sang mga Saksi ni Jehova nga nagtambong sa Memoryal ang posible nga mangin mga alagad sang Dios
Pinakamataas nga manugbantala sang 1990:4,017,213
Sang adlaw ni Hari Asa, ang pungsod nagliso kay Jehova