Ang Hangkat sang Pagbantala sa Isa sang Labing Daku nga Pantalan sa Kalibutan

ANG Rotterdam, nahamtang sa kon diin ang Rhine, ang labing masako nga suba sang Europa, nagasulod sa Aminhan nga Dagat, ginakilala subong isa sang labing daku nga pantalan sa kalibutan. Bangod sang 500 ka kompaniya sang barko nga nagadungka diri, ang Rotterdam may direkta nga kaangtanan sa kapin sa 800 ka destinasyon sa bug-os nga kalibutan. Isa gid ini ka internasyonal nga pantalan.

Apang, ining 650-anyos nga pantalan sang Olandes labaw pa sa talabukan sang mga barko. Talabuan man ini sang mga tawo. Madamong marinero ang nagaabot kada adlaw kag gab-i halin sa tanan nga bahin sang kalibutan. Ining mga marinero wala makalikaw sa igtalupangod sang mga Saksi ni Jehova sa Netherlands. Kaangay sang mga Saksi bisan diin, nagapangita sila sing mga paagi agod ibantala ang labing maayo nga balita sa kalibutan—nga sa ulihi himuon sang Ginharian sang Dios ang duta nga isa ka Paraiso—sa tanan nga sahi sang mga tawo, lakip sa mga marinero.—Daniel 2:44; Lucas 23:43; 1 Timoteo 4:10.

“Baliskad nga Hilikuton sang mga Misyonero”

Sang nagligad nga mga tinuig, ang Watch Tower Society sa Netherlands nagpangabay sa anum ka bug-os tion nga manugbantala, ukon payunir, sa pagpanghikot sa mga barko sa bug-os nga pantalan sang Rotterdam. Malangkagon nga ginhimuslan sang mga payunir ang kahigayunan. Nagkuha sila sing impormasyon gikan sa awtoridad sang pantalan, nagsurbe sa mga pantalan, kag narealisar nila sang ulihi nga makahalangkat ang ila asaynment.

“Kaangay ini sang baliskad nga hilikuton sang mga misyonero,” siling ni Meinard, nga nagahituhog sang pagbantala sa pantalan. Ano ang buot niya silingon? “Sa kinaandan ang isa ka misyonero nagalakbay sing malawig sa pagduaw sa mga tawo, apang sa amon bahin ang mga tawo ang nagalakbay sing malawig sa pagkadto sa amon.” Dugang niya, “ang amon teritoryo nga bantalaan internasyonal.” Ang tuigan nga libro sang Rotterdam Europoort sang 1985 nagsiling nga sang 1983, ang tuig nga ang mga payunir nagsugod sining pinasahi nga hilikuton, ang pantalan sang Rotterdam nakabaton sing 30,820 ka barko halin sa 71 ka lainlain nga pungsod. Internasyonal gid ina!

Sing nagakaigo, ang “mga misyonero sa pantalan”—subong sang pagtawag sang mga marinero sa mga payunir sang ulihi—nagapakita man sing internasyonal nga lalim. Sanday Geert, Peter, kag ang iya asawa, nga si Karin, mga Olandes; sanday Daniël kag Meinard mga taga-Indonesia; kag si Solomon taga-Etiopia. Ang ila Europeanhon, Asiano, kag Aprikano nga ginhalinan nagalakip sang walo ka sablag sa hambal, apang agod magmadinalag-on sa sining hilikuton, may iban pa nga mga sablag nga dapat nila atubangon.

“Ang Nagabisikleta nga Iglesia”

“Indi mahimo nga magalakat ka lang sa mulye, magasaka sa andamyo, kag magasakay sa barko,” siling sang 32-anyos nga si Peter, isa anay ka marinero. “Kinahanglan mo ang permiso sa lugar.” Nagakahulugan ina sang mga permiso sa pagsulod sa mga pantalan kag mga permiso sa pagsaka sa mga barko. “Isa ini ka masibud nga paagi,” panugiron ni Peter, “apang sang nakakuha kami sing walo ka permiso, nga kompleto sang amon retrato kag opisyal nga selyo, naghanda kami sa pagguwa.” Ginbahinbahin nila ang 37 kilometros ka mulye sang pantalan sa tatlo ka bahin, ang kada isa ginaatipan sang duha ka payunir.

Apang, ano ang himuon mo sa madamong hambal nga ginapamulong sang mga marinero halin sa madamong pungsod? Bisan pa ang mga payunir nagaistak sing literatura nga pasad sa Biblia sa 30 ka hambal kag nagakarga sing madamo nga masarangan nila sa ila mga bisikleta, daw kulang gihapon ini. “Indi mo mapat-od kon anong mga hambal ang imo kinahanglan,” panugiron sang 30-anyos nga si Solomon nga nagayuhum. “Masunson matabo nga ang luyag sang mga marinero amo ang mga libro sa hambal nga wala mo madala, kag nian magasiling sila sa imo nga magalarga ang ila barko sa sulod sang tatlo ka oras ukon kapin pa.” Indi luyag nga mapaslaw ang mga marinero, ang isa sa mga payunir magadalidali sa paglakat, magakuha sang kinahanglanon nga mga libro, magadalidali sa pagbalik, kag magadaho sini sa malangkagon nga mga marinero. “Kon magautwas ang amo man nga problema samtang nagabantala kami sa mga bahin sang pantalan nga tatlo ka oras kalayo paagi sa pagbisikleta,” siling ni Peter, “maathag nga ginakinahanglan namon ang lain nga paagi sa paglubad sa problema.”

Isa ka adlaw ginsorpresa sang pila ka Saksi nga nagaistar malapit sa pantalan ang mga payunir paagi sa duha ka kariton nga mahimo matakod sa bisikleta, ang kada isa daw batiya kadaku. Ginpuno sang mga payunir ang mga kariton sing literatura sang tanan nga hambal nga matigayon, gintabid ini sa ila bisikleta, kag nagkadto sa pantalan. Sang ulihi ang mga kariton nangin kinaandan nga talan-awon. “Sila ang nangin mga call­ing card namon,” siling sang isa ka payunir. “Kon makita sang bantay nga nagapakari kami, ginabuksan niya ang gawang, ginasenyasan kami sa pagsulod, kag nagasinggit: ‘Yari na ang nagabisikleta nga iglesia!’ ” Kon kaisa, kon makita sang bantay nga nagapakari ang “nagabisikleta nga iglesia,” ginabuksan niya ang gawang kag nagasinggit: “May duha ka Polaco kag isa ka Intsik nga barko nga nagdungka!” Nakabulig ina sa mga payunir agod magasaka sila nga dala ang literatura sa nagakaigo nga hambal. Apang dapat man sila magkadto sa nagakaigo nga oras. Ngaa?

Suno sa Tion nga Pagduaw Upod ang Suno sa Tion nga Mensahe

Sarang lamang masugilanon sang mga payunir ang mga tripulante sa tion sang ila merienda sa aga kag hapon ukon sa oras sang ila panyaga. Apang, ang kusinero may lain nga oras sa pagtrabaho, kag ang kapitan kag ang iban pa nga opisyal sarang makita sa bug-os nga adlaw. Isa pa, nahibaluan sang mga payunir nga ang Britaniko nga mga barko nga nagadungka sa Rotterdam nagasunod sang oras sang Britanya, amo kon ngaa ang ila mga tripulante nagakadto sa hulot-kalan-an kon ang indi taga-Britanya nga mga tripulante nagabalik sa trabaho. Sing maathag, para sa isa ka payunir sa pantalan, ang isa ka masaligan nga relo kinahanglanon.

Apang, maluyag bala ang mga marinero sa paggamit sang ila tion nga inugpahuway sa pagpakigsugilanon sa Biblia? “Sa kabilugan, nakita ko sila nga bukas ang hunahuna sa mensahe sang Ginharian,” siling sang 31-anyos nga si Geert. “Ayhan bangod kay nakita gid nila ang kapaslawan sang mga gobierno sang tawo.” Halimbawa, ang iban nga mga marinero nagsugid kay Geert nga ang mga tinumpok sang uyas nga ginpapanaug nila para sa ginagutom nga mga taga-Etiopia yara gihapon sa pantalan sang nagbalik sila liwat pagligad sang mga binulan, sini nga tion ang mga uyas nagkaladunot na kag ginakaon sang mga ilaga. “Indi katingalahan nga ang mga marinero nadulaan sing paglaum sa politika,” siling ni Geert. “Gani ang saad sang Biblia tuhoy sa isa ka panguluhan para sa tanan nga katawhan nagaganyat sa ila.”

Nagaugyon si Peter. “Ang isa ka Aleman nga kapitan nagsiling nga sang napulo ka tuig nga nagligad ang iya tripulante nagapalayas sa akon sa barko, apang ang nagabalhin karon nga kahimtangan sa kalibutan nagpukaw sang ila interes sa suno sa tion nga mensahe sang Biblia.” Ang isa ka kusinero sang Koreano nga barko nagsugid nga sadtong inaway sa Iran kag Iraq, ang super­tank­er nga gintrabahuan niya anay naigo sang isa ka raket kag nasunog sa Gulpo sang Persia. Nangako sia nga kon mabuhi sia, pangitaon niya ang Dios. Nabuhi matuod sia. Sang nakilala sia sang ulihi sang mga payunir sa Rotterdam, ginkuha niya ang tanan nga Koreano nga literatura nga gindala nila sa iya.

Ang kalabanan nga mga barko nagatener sa pantalan sa mga pila ka adlaw. Nagatugot ini sa mga payunir sa pagbalik sing makaduha, makatlo, ukon kapin pa ka beses agod padayunon ang ila pagsugilanunay sa Biblia pagkatapos sang trabaho. Apang, kon may diperensya ang makina sang barko, nagatener ini sing tatlo ka semana. “Indi ini maayo para sa kompaniya,” siling sang isa ka nagayuhum nga payunir, “apang maayo para sa amon hilikuton.” Nian, luwas nga mapadayon ang pagsugilanon sa Biblia, mahimos man sang mga payunir nga mapasalida ang isa sang mga programa sa slides sang Sosiedad, “Ang Biblia—Isa ka Libro Para sa Sining Kaliwatan” sa hulot-kalan-an. Ang iban nga mga marinero nagatambong man sa mga miting sang madamong dumuluong sing hambal nga grupo sang mga Saksi ni Jehova sa Rotterdam. Nagalawig ini tubtob makay-o ang makina. Nian ang mga Biblia ginasiraduhan. Ang mga lubid nga nagahigot sang barko sa mulye ginahubad, kag ang barko nagahalin sa pantalan—apang indi sa hunahuna sang mga payunir.

Makapalig-on nga mga Sugilanon sang mga Marinero

Paagi sa mga listahan sa pamantalaan ukon sa publiko nga sistema sang kompyuter sang administrasyon sang pantalan, mahibaluan sang mga payunir sa pantalan ang pag-abot kag paglakat sang mga barko nga ginduaw nila. Sa gilayon nga ang isa sa ila magaabot liwat, ang mga payunir nalangkag sa pagduaw sa mga marinero agod hibaluon kon ano ang natabo kutob sang nagligad nga pagduaw. Daw ano ka makapalig-on nga mga sugilanon ang masugid sang mga marinero!

Ang isa ka marinero naghatag sang mga kopya sang libro nga Mahimu Ka Mabuhi sing Dayon sa Paraiso sa Duta sa lima niya ka kaupod sa barko sang ang iya barko didto na sa dagat, kag nagtuon sila nga anum sa Biblia. Ginrekord man niya ang kapitulo nahanungod sa pagkabuhi sang pamilya sa isa ka audio­cas­ette kag ginpatokar ini sa hulot-kalan-an para sa kaayuhan sang bug-os nga tripulante. Sa isa pa ka barko, ang isa ka marinero nga nakakadto sa Kingdom Hall sa malapit nga pulo sang Antwerp nagbutang sa dingding sang hulot-kalan-an sang isa ka karatula nga mabasa “Kingdom Hall of Jehovah’s Witnesses” sa dalagku nga letra. Nian gin-agda niya ang mga tripulante sa pagkadto didto kon magadumala sia sing isa ka miting sa Biblia. Antes kuhaon ang karatula, ginaagda niya ang tripulante para sa masunod nga miting. Pagkadason nga semana, makita liwat sa sini nga lugar ang karatula kag ang mga tripulante.

Natukiban man sang mga payunir nga wala ginhaboy sang iban nga mga tripulante ang ila mga libro. “Sang nagsulod kami sa kamarote ni Isaac, isa ka taga-Nakatundan nga Aprika nga opisyal sa radyo, halos indi kami makakita sing pulungkuan,” panugiron ni Meinard. “Ang mga magasin, mga libro, kag mga konkordanse sang Sosiedad yara bisan diin—kag bukas.” May listahan man si Isaac sang nakahanda nga mga pamangkot sa Biblia, kay ginahulat niya ang pagduaw liwat sang mga payunir.

Apang, ang iban nga mga marinero wala nagahulat nga duawon sila sang mga payunir. Isa ka gab-i ang telepono ni Geert nagtunog pagligad nga natulugan na sia.

“Sin-o ayhan ini?” kumud ni Geert samtang ginakapkap ang telepono.

“Hello, amigo mo ini!” siling sang isa ka masinadyahon nga tingog.

Gintinguhaan ni Geert nga dumdumon kon sin-o sia.

“Ang imo amigo sa barko,” siling liwat sang tingog.

“Alas tres na sang aga!” siling ni Geert.

“Huo, apang ginsilingan mo ako nga tawgan ko ikaw dayon pag-abot namon liwat sa Rotterdam. Ti, yari na ako!” Wala madugay sang ulihi, si Geert naglakat agod makigkita sa iya abyan nga interesado sa Pulong sang Dios.

“Ihaboy ang Imo Tinapay”

Ang apresasyon sa literarura pasad sa Biblia ginpabutyag man sa mga sulat sang mga marinero sa mga payunir. Ang masunod amo ang iban sini:

‘Ginsugdan ko ang pagbasa sang libro nga Mahimu Ka Mabuhi sing Dayon sa Paraiso sa Duta . . . Nahangpan ko karon ang madamong butang nga wala ko anay mahangpi. Ginalauman ko nga ang amon barko magabalik sa Rotterdam.’—Angelo.

‘Nabasa ko ang libro, kag ginapadala ko sa imo ang mga pamangkot agod masabat mo ini sa imo mga sulat.’—Alberta.

‘Ginabasa ko na karon ang Biblia kada adlaw. Nalipay ako nga mangin abyan mo. Ang makakita sing mga abyan nga magatuytoy sa akon sa Dios amo ang pinakamaayo nga butang nga natabo sa akon kabuhi.’—Nickey.

Inang makalilipay nga mga sulat nagapahanumdom sa mga payunir sang kon ano ang ginasiling sang Biblia sa Manugwali 11:1: “Ihaboy ang imo tinapay sa mga tubig, kay makita mo ini sa tapos ang madamo nga adlaw.” Labi sila nga nagakalipay kon mabalitaan nila nga ang iban nga mga marinero naghimo sang ila tindog para kay Jehova.

Ang Polaco nga marinero nga si Stanislav, halimbawa, nalipay sa kon ano ang natun-an niya gikan sa mga libro sang Sosiedad. Gilayon sia nga nakatigayon sing isa ka diutay nga librarya sang literatura sa Biblia kag, samtang sa dagat, ginatun-an niya ang kada isa sini. “Sang makabalita kami liwat halin sa iya,” siling ni Meinard, “nagsulat sia nga nabawtismuhan na sia.”

Si Folkert, kapitan sang barko nga nagabiyahe sa sulod lamang sang kanal ukon suba, nakabati primero sang mensahe sang Ginharian sa Rotterdam. Kada duha ka bulan nagabalik sia sa pantalan sa isa ka semana kag nagatuon sang Biblia sa bug-os nga pito ka adlaw. Nian, antes sia maglakat para sa isa pa ka duha-ka-bulan nga paglakbay, ginhatag sa iya sang mga payunir ang listahan sang mga direksion sang Kingdom Hall sa mga lugar nga makadtuan nila. Si Folkert nagduaw sa mga tilipunan kag napahulag bangod sang mainit nga pag-abiabi nga nabaton niya. Wala magdugay, ining kapitan nabawtismuhan kag nagaalagad karon sing mapisan kay Jehova.

Si Mike, isa ka British Navy nga opisyal, may komunikasyon anay sa mga Saksi kag nagatuon sang Biblia samtang sa dagat. Kis-a, sang ang barko nga ginaubrahan niya nagdungka sa Rotterdam, gingamit niya ang iya ginapilupilo nga bisikleta sa pagkadto sa Kingdom Hall. Nahamuot sia sa gugma kag paghiusa nga nakita niya kag ginsugiran niya ang iya mga abyan nga namat-od na sia sa paghalin sa iya obra. Bisan pa apat ka tuig na lamang kag makabaton sia sing dakudaku nga pensiyon, human na ang iya desisyon kag sang ulihi nabawtismuhan sia.

Siling ni Meinard: “Ang kalangkag nanday Mike, Stanislav, Folkert, kag sang iban pa sa pag-alagad kay Jehova nagapahulag sa amon nga magpadayon sa pagpangita sa pantalan sang mga marinero nga kaangay nila.”

Makapakigbahin Ka Bala?

Nagahunahuna sang halos isa ka dekada sang pagbantala sa isa sang pinakadaku nga pantalan sa kalibutan, ang anum ka “misyonero sa pantalan” bug-os tagipusuon nga nagaugyon—ang asaynment makahalangkat apang makapaladya. “Pagkatapos sang tagsa ka adlaw nga pagbantala,” pagsumaryo ni Meinard, “nagabisikleta kami pauli upod ang balatyagon nga ang iban sadtong mga marinero nagahulat sa amon pagduaw.”

May mga marinero bala nga nagahulat sang pagduaw sa isa ka pantalan sa inyo lugar? Ayhan ang mga gulang sa inyo kongregasyon sarang makahimo sing mga kahimusan agod makapakigbahin kamo sa sining makahalangkat apang makapaladya nga hilikuton.

[Kahon sa pahina 20]

Paglab-ot sang mga Teritoryo Diin Ginadumili ang Aton Hilikuton

Sadtong isa sining ulihi nga tuig, kapin sa 2,500 ka barko halin sa mga pungsod diin ang mga hilikuton sang mga Saksi ni Jehova ginadumilian ang nagdungka sa Rotterdam. Kag nakita ina sang mga payunir sa pantalan subong isa ka kahigayunan nga malab-ot ining mga teritoryo sang mensahe sa Biblia.

Sa isa sang nahaunang Asiano nga barko nga ginduaw nila, ang mga payunir nakapahamtang sang bug-os nila nga suplay nga 23 ka libro, nagbilin nga akig sang iban nga mga tripulante bangod wala sila makakuha sing libro. Isa ka bata nga lalaki nga nagaobra sa kusina sa isa ka barko sa Asia ang labi ka mainandamon. Sang nabaton niya ang libro sa payunir, ginbalik niya ini nga naputos sa papel kag may direksion nga nasulat sa sini. Nahangpan ini sang payunir. Makatalagam para sa bata nga dal-on niya ang libro. Sina man nga adlaw ginpadala ini sang payunir sa Malayong Sidlangan.

Sakay sang isa ka barko halin sa Aprika isa ka marinero ang may listahan sang mga libro nga luyag sang mga Saksi sa ila lugar. Kutob sadto, kada magpauli ang marinero, ginapuno niya ang iya maleta sing literatura. Ang isa ka marinero halin sa isa pa ka pungsod sa Aprika nasubuan katama sang ang payunir nga nagatuon sa iya nagtanyag lamang sing tatlo ka kopya sang libro nga Making Your Family Life Happy. “Kulang ina!” siling sang marinero, nagakumpas sang iya kamot bangod sang kapaslawan. “Ang mga kauturan didto sa amon nagakinahanglan sing 1,000 ka libro!” Para sa iya kaugalingon nga kaayuhan, ang mga payunir naglaygay sa iya nga magdala lamang sing 20 ka kopya sa isa ka tion.

Ayhan ang labing makatalandog gid amo ang tion sang nabalitaan sang mga payunir nga ang isa ka barko naghalin sa pungsod diin ang mga Saksi ginahingabot bangod sang ila mga pagtuluuhan, kag madamo ang nadulaan sing trabaho kag propiedad. Sang nahibaluan nila nga ang serbidor sa barko isa ka Saksi, ginkadtuan nila ang kapitan kag nangayo sing permiso nga magpadala sing bulig sakay sa iya barko. Ang kapitan nagpasugot, kag mga pila ka adlaw sang ulihi, isa ka gatos ka daku nga sako sang mga panapton, mga sapatos, kag iban pa nga mga butang ang ginpadala sa mga Saksi sa sadto nga pungsod.

[Kahon sa pahina 21]

PAGBANTALA SA MGA BARKO—PAGTAMOD SANG ISA KA BABAYI

“Sang primero, nangalag-ag ako sa pag-upod kay Peter,” panugiron ni Karin, ang lamang nga babayi sa mga payunir, “bangod nakabati ako sing mga sugilanon nga ang mga marinero masami nga walay batasan kag hubog. Apang, natukiban ko nga ang kalabanan matinahuron gali. Sa masami, kon mahibaluan sang isa ka marinero nga mag-asawa kami, ginakuha niya ang retrato sang iya asawa kag mga anak kag nagasugod sa pagsugilanon nahanungod sa iya pamilya. Sa sina nga paagi, nakapahamtang kami sing madamo nga kopya sang libro nga Making Your Family Life Happy.”

Ang pagduaw sa mga barko subong bana kag asawa nagapahapos man nga masugilanon ang mga asawa sang mga tripulante kag ang iban nga mga babayi nga nagaobra kon kaisa subong mga nars. “Masunson sila nga mahuluy-on sa mga estranghero,” siling ni Karin, “apang kon makita nila ako, nagapakigsugilanon sila dayon.”

Ano ang labing daku nga hangkat sa iya asaynment? “Ang mga kalat nga hagdan,” sabat ni Karin. “Nahadlok ako sa sini.” Nalandas bala niya ang iya kahadlok? “Huo. Kis-a sang nagaalang-alang ako sa pagsaka, isa ka grupo sang mga marinero halin sa Paraguay ang nagtan-aw kag nagsinggit: ‘Masarangan mo ina. Magsalig ka lang sa Dios.’ Siempre pa,” siling ni Karin nga nagakadlaw, “pagkatapos sina nga hambal, wala ako sing mahimo kundi ang magsaka.” Siling sang iya nagadayaw nga bana: “Pagligad sang apat ka tuig kag madamong kalat nga hagdan, ginasaka niya ini karon kaangay sang isa ka marinero.”

Si Karin kag ang iya bana, si Peter, nag-eskwela sa ika-89 nga klase sang Watchtower Bible School of Gilead sa Estados Unidos. Sang Septiembre 28, 1990, nagkadto sila sa ila bag-ong asaynment, sa Ecuador, isa ka pungsod nga may pantalan. Magabatyag sila nga daw yara lamang sa ila lugar.

[Kahon sa pahina 22]

MARINERO KA BALA?

Luyag mo bala magtambong sa Ingles sing hambal nga miting sang mga Saksi ni Jehova samtang ang imo barko nagadungka sa isa sang dalagku nga mga pantalan sa kalibutan? Nian tagua ining listahan sang karon nga mga direksion sang Kingdom Hall kag mga oras sang miting:

Hamburg, Schellingstr. 7-9; Sabado, 4:00 s.h.; telepono: 040-4208413

Hong Kong, 26 Leighton Road; Domingo, 9:00 s.a.; telepono: 5774159

Marseilles, 5 Bis, rue Antoine Maille; Domingo, 10:00s.a.; telepono: 91 79 27 89

Naples, Castel Volturno, (40 km aminhan sang Naples), Via Napoli, corner of Via Salerno, Parco Campania;Domingo, 2:45 s.h., telepono: 081/5097292

New York, 512 W. 20 Street; Domingo, 10:00 s.a.; telepono: 212 627-2873

Rotterdam, Putsestraat 20; Domingo, 10:00 s.a.; telepono: 010-41 65 653

Tokyo, 5-5-8 Mita, Minato-ku; Domingo, 4:00 s.h.; telepono: 03-3453-0404

Vancouver, 1526 Robson Street; Domingo, 10:00 s.a.; telepono: 604-689-9796