Diosnon nga Pagpasakop—Ngaa kag ni Sin-o?
“O Jehova, nahibaluan ko nga ang dalanon sang tawo wala sa iya kaugalingon. Wala sa tawo nga nagalakat ang pagmando sang iya mga tikang.”—JEREMIAS 10:23.
1. Ano nga mga porma sang independensia ang lapnag nga ginpabilihan?
LAKIP sa pinakabantog nga mga dokumento sang tawo amo ang Deklarasyon sang Independensia, diin 13 ka Britaniko nga mga koloniya sa Aminhan nga Amerika sang ika-18 nga siglo ang nagdeklarar sang ila independensia gikan sa ila iloy nga pungsod, ang Britanya. Luyag nila sing kahilwayan, kag ang independensia gikan sa pagkontrol sang iban nga pungsod kag ang kahilwayan magkaupod. Ang politikanhon kag ekonomiko nga independensia may daku nga bentaha. Kasan-o lang ang mga pungsod sa Sidlangan nga Europa naghulag padulong sa politikanhon nga independensia. Apang, dapat batunon nga ina nga independensia sa sadtong mga pungsod nagdala upod sa sini sing madamo nga mabug-at nga mga problema.
2, 3. (a) Ano nga porma sang independensia ang indi halandumon? (b) Paano ginpadaku ini nga kamatuoran sa ginsuguran?
2 Bisan pa mahimo halandumon ang nanuhaytuhay nga porma sang independensia, may isa ka porma sang independensia nga indi halandumon. Ano ina? Amo ang independensia gikan sa Magbubuhat sang tawo, si Jehova nga Dios. Indi ina pagpakamaayo kundi pagpakamalaut. Ngaa? Bangod wala gid gintuyo nga ang tawo maghulag nga independiente sa iya Magbubuhat, subong ginapakita gid sang mga pulong ni manalagna Jeremias nga ginbalikwat sa ibabaw. Kon sa aton pa, ang tawo gintuyo nga mangin mapinasakupon sa iya Magbubuhat. Ang pagpasakop sa aton Manunuga nagakahulugan sing pagtuman sa iya.
3 Ina nga kamatuoran ginpadaku sa unang mag-asawa paagi sa sugo sa ila ni Jehova nga narekord sa Genesis 2:16, 17: “Gikan sa tagsa kahoy sang hardin makakaon ka sa kaayawan. Apang gikan sa kahoy sang pagkilala sa maayo kag malaut dili ka magkaon sa iya, kay sa adlaw nga magkaon ka sa iya mapatay ka nga totoo.” Ang indi pagpasakop sa iya Magbubuhat nagdala kay Adan kag sa iya mga kaliwat sing sala, pag-antos, kag kamatayon.—Genesis 3:19; Roma 5:12.
4, 5. (a) Ano ang nangin resulta sang indi pagpasakop sang tawo sa Dios? (b) Anong moral nga kasuguan ang indi malikawan?
4 Ang indi pagpasakop sang tawo sa Dios indi maalamon subong man indi matarong. Sa kalibutan nagresulta ini sa lapnag nga pagkamalinapason, krimen, kasingki, kag seksuwal nga imoralidad upod ang mga bunga sini nga mga balatian nga ginapaliton sang seksuwal nga relasyon. Luwas pa, indi bala nga ang kabangdanan sang madamo nga krimen karon sang mga pamatan-on amo ang ila indi pagpasakop kay Jehova, subong man sa ila mga ginikanan kag sa kasuguan sang pungsod? Ining espiritu sang independensia makita sa makahalam-ot kag mahigko nga pagpamayo sang madamo nga tawo kag sa ila malaw-ay nga panghambal.
5 Apang wala sing bisan sin-o ang makalikaw sa indi mabag-o nga kasuguan sa moral sang Manunuga: “Dili kamo magtalang: ang Dios indi tiliawtiawan. Kay bisan ano ang ginasab-ug sang tawo, ina man ang iya anihon; kay ang nagasab-ug sa iya kaugalingon nga unod magaani sing kaduluntan gikan sa unod.”—Galacia 6:7, 8.
6, 7. Ano ang gamot nga kabangdanan sang indi pagpasakop, subong makita sa anong mga halimbawa?
6 Ano ang gamot nga kabangdanan sining tanan nga pagpangindi sa pagpasakop? Sa simple nga hambal, amo ang kakagod kag bugal. Amo kon ngaa si Eva, ang una nga babayi, nagtugot sa iya kaugalingon nga malimbungan sang man-ug kag nagkaon sang gindumilian nga bunga. Kon mapainubuson lamang sia kuntani, ang pagsulay nga mangin kaangay sang Dios—nagapamat-od para sa iya kaugalingon kon ano ang maayo kag malaut—wala magganyat sa iya. Kag kon sia kuntani indi makagod, wala niya ginhilabtan ang butang nga gindumili sang iya Magbubuhat, si Jehova nga Dios—Genesis 2:16, 17.
7 Wala madugay sa tapos mapukan si Adan kag si Eva, ginpatay ni Cain ang iya utod nga si Abel bangod sang iya bugal kag kakagod. Subong man, bangod sang kakagod ang mga anghel naghikot sing independiente kag nagbiya sang ila orihinal nga posisyon kag nagmateryalisar agod mangalipay sa unod. Ang bugal kag kakagod nagpahulag kay Nimrod kag nangin amo ang kinaiya sang kalabanan nga manuggahom sugod sang iya tion.—Genesis 3:6, 7; 4:6-8; 1 Juan 3:12; Judas 6.
Kon Ngaa Dapat Kita Magpasakop kay Jehova nga Dios
8-11. Ano ang apat ka mabaskog nga rason nga magpasakop kita sa Dios?
8 Ngaa dapat kita magpasakop sa aton Magbubuhat, si Jehova nga Dios? Una sa tanan bangod sia ang Bug-os Uniberso nga Soberano. Iya ang tanan nga awtoridad. Sia ang aton Hukom, Taghatag sing kasuguan, kag Hari. (Isaias 33:22) Tuhoy sa iya, ini nagakaigo nga ginsulat: “Ang tanan nga butang hublas kag dayag sa mga mata niya nga hatagan ta sing husay.”—Hebreo 4:13.
9 Dugang pa, sanglit ang aton Magbubuhat labing gamhanan, wala sing bisan sin-o ang makapamatok sa iya sing madinalag-on; wala sing bisan sin-o ang makasikway sang iya obligasyon nga magpasakop sa Iya. Sa indi madugay, ang mga nagapangindi pagalaglagon subong sang natabo kay Paraon sang una kag matabo pa kay Satanas nga Yawa sa sibu nga tion sang Dios.—Salmo 136:1, 11-15; Bugna 11:17; 20:10, 14.
10 Ang pagpasakop isa ka obligasyon sang tanan nga intelihente nga tinuga bangod nagakabuhi sila para sa katuyuan nga alagdon ang ila Magbubuhat. Ang Bugna 4:11 nagasiling: “Takus ka, Jehova, nga Dios namon, sa pagbaton sing himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nagluntad sila kag gintuga.” Sia ang Dakung Maninihon, kag nagahimo sia sing tawhanon nga mga suludlan sa pag-alagad sa iya katuyuan.—Isaias 29:16; 64:8.
11 Indi naton dapat kalipatan ang katunayan nga ang aton Magbubuhat labing maalam, gani nahibaluan niya kon ano ang labing maayo para sa aton. (Roma 11:33) Ang iya kasuguan ‘para sa aton kaayuhan.’ (Deuteronomio 10:12, 13) Labaw sa tanan, ang “Dios gugma,” gani ginahandum lamang niya kon ano ang labing maayo para sa aton. Daw ano kadamo nga rason ang nagatiklod sa aton nga magpasakop sa aton Magbubuhat, si Jehova nga Dios!—1 Juan 4:8.
Si Jesucristo, ang Himpit nga Huwaran sang Diosnon nga Pagpasakop
12, 13. (a) Paano si Jesucristo nagpakita sing diosnon nga pagpasakop? (b) Anong mga pulong ni Jesus ang nagapakita sang iya mapinasakupon nga panimuot?
12 Sa pagkamatuod, ang bugtong nga Anak ni Jehova, si Jesucristo, naghatag sa aton sing himpit nga huwaran sang diosnon nga pagpasakop. Ginapakita ini ni apostol Pablo sa Filipos 2:6-8: “Si Jesus, bisan sa dagway sia sang Dios, wala niya pagbilanga ang pagpakigtupong sa Dios nga butang nga pag-agawon. Wala, kundi gin-ula niya ang iya kaugalingon kag nangin dagway sang ulipon kag nangin kaangay sang mga tawo. Kapin pa sa sina, sang nakita niya ang iya kaugalingon sa bayhon sang tawo, nagpaubos [pa] sia sang iya kaugalingon kag nangin matinumanon tubtob sa kamatayon, huo, kamatayon sa usok sang pag-antos.” Sang sa duta, makapila nagsiling si Jesus nga wala sia sing ginhimo sa iya kaugalingon nga pagbuot; wala sia maghikot sing independiente, kundi nagpasakop sia sa iya langitnon nga Amay sa tanan nga tion.
13 Aton mabasa sa Juan 5:19, 30: “Si Jesus nagsiling sa ila: ‘Sa pagkamatuod nagasiling ako sa inyo, Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay. Kay ang bisan ano nga ginahimo Niya, ini ginahimo man sang Anak sa amo nga bagay. Ako sa akon kaugalingon indi makahimo sing bisan ano; suno sa ginapamatian ko, nagahukom ako; kag ang akon paghukom matarong, bangod nga wala ako nagatinguha sang akon kaugalingon nga kabubut-on kundi sang kabubut-on sang nagpadala sa akon.’ ” Subong man, makapila sia nangamuyo sang gab-i nga ginluiban sia, “Indi suno sa buot ko, kundi sa buot mo.”—Mateo 26:39, 42, 44; tan-awa man ang Juan 7:28; 8:28, 42.
Dumaan nga mga Huwaran sang Diosnon nga Pagpasakop
14. Sa anong mga paagi nagpakita si Noe sing diosnon nga pagpasakop?
14 Lakip sa tawhanon nga mga huwaran sang diosnon nga pagpasakop sang una amo si Noe. Ginpakita niya ang iya pagpasakop sa tatlo ka paagi. Una, subong matarong nga tawo, walay sala sa tunga sang iya mga katubotubo, nagalakat upod sa matuod nga Dios. (Genesis 6:9) Ikaduha, paagi sa pagtukod sing arka. “Ginhimo [niya] suno sa tanan nga ginsugo sang Dios sa iya. Amo ang ginhimo niya.” (Genesis 6:22) Ikatlo, paagi sa paghatag sing paandam tuhoy sa nagapakari sadto nga Anaw subong “manugbantala sing pagkamatarong.”—2 Pedro 2:5.
15, 16. (a) Anong maayong huwaran ang ginpakita ni Abraham sa diosnon nga pagpasakop? (b) Paano si Sara nagpakita sing pagpasakop?
15 Si Abraham isa pa ka talalupangdon nga huwaran sang diosnon nga pagpasakop. Nagpasakop sia paagi sa pagtuman sang sugo sang Dios: “Halin ka sa imo duta.” (Genesis 12:1) Nagkahulugan ina nga biyaan niya ang iya komportable nga mga palibot sa Ur agod mangayaw sa iban nga pungsod sa isa ka gatos ka tuig. Nagpakita si Abraham sing diosnon nga pagpasakop ilabi na sang malandas niya ang pagtilaw nga ihalad ang iya anak nga si Isaac.—Genesis 22:1-12.
16 Ang asawa ni Abraham nga si Sara isa pa ka maayong huwaran sang diosnon nga pagpasakop. Wala sing duhaduha nga ang pagpangayaw sa iban nga pungsod nagdala sing madamo nga kabudlayan, apang wala gid kita sing mabasa nga nagreklamo sia. Nagpakita sia sing maayong huwaran sang diosnon nga pagpasakop sa duha ka hitabo sang ginpakilala sia ni Abraham subong iya utod sa atubangan sang pagano nga mga manuggahom. Nagkooperar sia sa sining duha ka tion, bisan pa diutayan lang sia mangin katapo sang ila harem (balay para sa babayi nga mga katapo sang pamilya sang hari). Ang nagapamatuod sa iya diosnon nga pagpasakop amo ang pagtawag niya sa iya bana, nga si Abraham, subong “ginuo ko,” nagapakita nga amo ini ang matuod nga panimuot sang iya tagipusuon.—Genesis 12:11-20; 18:12; 20:2-18; 1 Pedro 3:6.
17. Ngaa masiling nga si Isaac nagpakita sing diosnon nga pagpasakop?
17 Indi naton dapat kalipatan ang huwaran sang diosnon nga pagpasakop sang anak ni Abraham nga si Isaac. Ginapakita sang Judiyong tradisyon nga si Isaac 25 anyos sang ginsugo ni Jehova ang iya amay, si Abraham, nga ihalad sia. Kon luyag ni Isaac, madali niya kuntani mapamatukan ang iya amay, nga isa ka gatos ka tuig ang kagulangon sangsa iya. Apang indi. Bisan pa natingala si Isaac nga wala sing sapat nga inughalad, mapainubuson nga nagpasakop sia sang ginplastar sia sang iya amay sa halaran kag ginhigtan ang iya kamot kag tiil agod punggan ukon kontrolon ang bisan anong indi hungod nga mga reaksion nga mahimo matabo kon gingamit ang kutsilyo sa pagpatay.—Genesis 22:7-9.
18. Paano si Moises nagpakita sing huwaran nga diosnon nga pagpasakop?
18 Mga tinuig sang ulihi, si Moises nagpakita sing maayong huwaran sa aton sa diosnon nga pagpasakop. Ginapakita ina sa pagkamatuod sang paglaragway sa iya subong “tama gid ka mapainubuson, labi pa sa tanan nga tawo nga yara sa kadaygan sang duta.” (Numeros 12:3) Ang iya matinumanon nga pagtuman sa sugo ni Jehova sa sulod sang 40 ka tuig sa kahanayakan, bisan pa gindumalahan niya ang rebelyuso nga katawhan nga duha pa tatlo ka milyon ang kadamuon, nagapamatuod sing dugang pa sa iya diosnon nga pagpasakop. Sa amo ang rekord nagasiling nga “amo ini ang ginhimo ni Moises suno sa tanan nga ginsugo sa iya ni Jehova. Amo ini ang iya ginhimo.”—Exodo 40:16.
19. Paagi sa anong mga pulong ginpakita ni Job ang iya pagpasakop kay Jehova?
19 Si Job isa pa ka talalupangdon nga tawo nga naghatag sa aton sing maayo gid nga huwaran sa diosnon nga pagpasakop. Sa tapos gintugutan ni Jehova si Satanas nga laglagon ang tanan nga pagkabutang ni Job, patyon ang iya mga anak, kag dayon patubuan sia sing “tama nga hubag kutob sa dapadapa sang iya tiil tubtob sa iya alimpudwan,” ang asawa ni Job nagsiling sa iya: “Ginahuptan pa bala nimo sing malig-on ang imo integridad? Sikwaya ang Dios kag panginmatay!” Walay sapayan, ginpakita ni Job ang iya diosnon nga pagpasakop paagi sa pagsiling sa iya: “Nagapamulong ka subong sang pagpamulong sang isa sang mga babayi nga kulangkulang. Batunon bala naton ang maayo sa kamot sang matuod nga Dios kag indi naton pagbatunon ang malaut?” (Job 2:7-10) Ang nagapakita sang pareho man nga panghunahuna amo ang iya ginpamulong nga narekord sa Job 13:15: “Bisan pa kon patyon niya ako, indi bala ako maghulat?” Bisan pa si Job, sa kamatuoran, nabalaka sing daku sa pagpakamatarong sang iya kaugalingon, indi naton dapat kalipatan nga sang ulihi si Jehova nagsiling sa isa sang iya salimpapaw nga mga manuglugpay: “Ang akon kasingkal nagadabdab batok sa imo kag batok sa imo duha ka abyan, kay wala kamo makapamulong nahanungod sa akon sang butang nga matarong subong sa akon alagad nga si Job.” Si Job indi maduhaduhaan nga naghatag sa aton sing maayong huwaran sang diosnon nga pagpasakop.—Job 42:7.
20. Sa anong mga paagi ginpakita ni David ang diosnon nga pagpasakop?
20 Sa pagsambit sing isa pa ka huwaran gikan sa Hebreong Kasulatan, yara si David. Sang ginlaut ni Hari Saul si David subong nga daw isa ka sapat, may duha ka kahigayunan si David agod madula ang iya problema paagi sa pagpatay kay Saul. Apang, ang diosnon nga pagpasakop ni David nagpugong sa iya sa paghimo sini. Narekord ang iya ginsiling sa 1 Samuel 24:6: “Indi mahimo, sa bahin ko, gikan sa pagtamod ni Jehova, nga himuon ko ining butang sa akon ginuo, nga hinaplas ni Jehova, paagi sa pag-untay sang akon kamot batok sa iya, kay hinaplas sia ni Jehova.” (Tan-awa man ang 1 Samuel 26:9-11.) Ginpakita man niya ang iya diosnon nga pagpasakop paagi sa pagbaton sang sabdong sang makahimo sia sing mga sayop ukon nakasala.—2 Samuel 12:13; 24:17; 1 Cronica 15:13.
Ang Huwaran ni Pablo sa Pagpasakop
21-23. Sa anong nanuhaytuhay nga mga hitabo nagpakita si apostol Pablo sing diosnon nga pagpasakop?
21 Sa Cristianong Griegong Kasulatan, si apostol Pablo isa ka talalupangdon nga huwaran sang diosnon nga pagpasakop para sa aton. Gin-ilog niya ang iya Agalon, si Jesucristo, sa sini subong sang ginhimo niya sa tanan nga iban pa nga bahin sang iya apostoliko nga ministeryo. (1 Corinto 11:1) Bisan pa gingamit sia ni Jehova nga Dios sing lakas sangsa iban nga mga apostoles, si Pablo wala gid maghikot sing independiente. Si Lucas nagasugid sa aton nga sang mag-utwas ang hulusayon kon bala ang Gentil nga mga kombertido dapat magpasirkunsidar, “si Pablo kag si Bernabe kag pila pa sa ila gintangduan nga magtaklad sa Jerusalem sa mga apostoles kag mga tigulang nahanungod sining kasuayon.”—Binuhatan 15:2.
22 Tuhoy sa pagmisyonero ni Pablo, ginasugiran kita sa Galacia 2:9: “Si Santiago kag si Cefas kag si Juan, sila nga ginbantog nga mga haligi, sang nahantop nila ang dibagay nga kaluoy nga ginhatag sa akon, naghatag sa akon kag kay Bernabe sang tuo nga kamot sang pagpakig-ambit, agod nga magkadto kami sa mga Gentil kag sila sa mga sirkunsidado.” Nangayo si Pablo sing tuytoy sa baylo nga maghikot sing independiente.
23 Subong man, sang katapusan nga tion nga si Pablo didto sa Jerusalem, ginbaton niya ang laygay sang mga gulang may kaangtanan sa pagkadto sa templo kag sa pagsunod sa padugi sang Kasuguan agod makita sang tanan nga indi sia apostata kon tuhoy sa Kasuguan ni Moises. Sanglit ang paghimo niya sini daw nagpalain sang iya kahimtangan kay ginsalakay sia sang akig nga mga tawo, sayop bala ang iya pagpasakop sa sadto nga mga gulang? Indi gid, subong ginapamatud-an sang mabasa naton sa Binuhatan 23:11: “Sa gab-i nga madason ang Ginuo nagtupad sa iya kag nagsiling: ‘Magpakaisog ka, kay subong nga nagpanaksi ka nahanungod sa akon sa Jerusalem, subong man dapat ka magsaksi sa Roma.’ ”
24. Anong dugang pa nga mga bahin sang pagpasakop ang pagahambalan sa masunod nga artikulo?
24 Sa pagkamatuod, ang Kasulatan nagahatag sa aton sing mabaskog nga mga rason nga magpasakop kita kag sing talalupangdon nga mga huwaran sadtong nagpakita sina nga pagpasakop. Sa masunod nga artikulo, binagbinagon naton kon sa anong nanuhaytuhay nga mga bahin nga makapasakop kita kay Jehova nga Dios, ang mga bulig sa paghimo naton sini, kag ang mga padya sini.
Paano Mo Sabton?
◻ Ano nga porma sang independensia ang indi halandumon?
◻ Ano ang gamot nga kabangdanan sang indi pagpasakop?
◻ Bangod sang anong mga rason nga dapat kita magpasakop kay Jehova?
◻ Anong maayong mga huwaran sang diosnon nga pagpasakop ang ginahatag sang Kasulatan?
[Piktyur sa pahina 10]
Si Nimrod, ang una nga nga manuggahom sa tapos sang Anaw nga nagrebelde sa diosnon nga pagpasakop
[Piktyur sa pahina 13]
Si Noe, himpit nga huwaran sang diosnon nga pagpasakop.—Genesis 6:14, 22