Ang Bulig nga mga Aman Nagapabanaag sang Cristianong Gugma

“HIGUGMAA ang bug-os nga paghiliupod sang mga kauturan,” laygay ni apostol Pablo sa iya mga masigka Cristiano. (1 Pedro 2:17) Ina nga gugma nagatabok sa mga dulunan sang rasa, katilingban, kag pungsod, nagahugpong sa katawhan sa matuod nga paghiliutod. Sang nagkinahanglan sa materyal ang unang mga Cristiano, madamo ang ginpahulag sang gugma nga maghatag sing mga amot sa mga apostoles para ipanagtag sa mga nagakinahanglan. Ang rekord nagasiling nga “kalabilugan nila ang tanan nga pagkabutang.”​—⁠Binuhatan 2:​41-45; 4:⁠32.

Ginpadayag ina nga gugma sang gin-agda sang Nagadumala nga Hubon sang mga Saksi ni Jehova, sang talipuspusan sang 1991, ang pila ka sanga sang Watch Tower Society sa Katundan nga Europa sa pag-aman sing pagkaon kag panapton para sa ila nagakinahanglan nga mga kauturan sa Sidlangan nga Europa, lakip ang mga bahin sang anay Unyon Sobyet. Ginahatag namon diri ang mga serye sang mga report halin sa pila sa mga sanga nga nadalahig.

Sweden

Sang Disiembre 5, 1991, ginpadala sa tanan nga 348 ka kongregasyon sa Sweden ang isa ka sulat nga nagapaathag sang kinahanglanon. Maabtik ang sabat. Sa sulod sang pila ka adlaw, ang nahaunang semitreyler naglakbay padulong sa St. Peters­burg, Rusya, nga may karga nga 15 ka tonelada nga harina, mantika, de-lata nga karne sang baka, pulbos nga gatas, kag iban pa. Gindiskarga sang lokal nga mga Saksi ni Jehova ang unod sang trak kag gilayon nga ginpanagtag ang 750 ka pinutos sa mga nagakinahanglan. Sang ulihi, duha pa ka semitreyler ang nagdala sing pagkaon sa Rusya. Sa kabilugan, kapin sa 51.5 ka tonelada ang ginpadala halin sa Sweden.

Ang kahanda sa pagdonar sing mga panapton kag mga sapatos naglabaw sa tanan nga ginapaabot. Ang mga tumpok sang mga pinutos nga panapton madasig nga natipon sa mga Kingdom Hall. Gindonar sang madamong Cristiano ang ila kaugalingon nga mga panapton. Ang iban nagbakal sing bag-o. Ang isa ka utod nga lalaki nagbakal sing lima ka amerikana. Sang nahibal-an sang nakibot nga manugbaligya ang rason, nagdonar sia sing lima pa ka amerikana. Ang isa ka utod nga lalaki nagbakal sing isa ka kahon sang medyas, guwantis, kag bandana. Sang ginpaathag niya ang rason, ang tag-iya nagtanyag sa iya sing 30 ka bag-ong amerikana sa bili nga para sa duha. Ang tag-iya sang mga panapton sa isports nagdonar sing 100 ka paris sang bag-ong sapatos kag botas.

Nian ining tanan nga materyal ginpadala sa sanga para painpainon, pamutson liwat, kag ikarga. Ang mga panapton​—⁠katumbas sa madala sang 40 ka semitreyler⁠—​nagbuta sang daku nga mga lugar sa sanga! Ang mga kauturan nga lalaki kag babayi nagpangabudlay sing sinemana sa pagpain sang panglalaki, pangbabayi, kag pangbata kag sa pagpanulod sini sa mga karton. Kinse ka lainlain nga semitreyler ang gingamit sa pagdala sang mga panapton sa Rusya, Ukraine, kag Estonia.

Ang isa ka utod nga lalaki nga nagmaneho sa isa sang mga trak sang Sosiedad sing walo ka beses pakadto sa anay Unyon Sobyet nagsiling: “Makalilipay gid ang pagbaton sa amon sang mga kauturan sa mga destinasyon. Ginhakos kag ginhalukan nila kami, kag walay sapayan sang ila kapurauton, ginhatagan nila kami sing maayo nga leksion sang Cristianong kaalwan.”

Finland

Walay sapayan sang daku nga pagluya sang patikang, lapnag nga pagkawalay palamugnan, kag mga problema sa pangabuhi sa Finland, daku gid ang kahanda sang mga 18,000 ka taga-Finland nga mga kauturan sa pagbulig sa ila mga kauturan sa anay Unyon Sobyet. Nagpadala sila sing kapin sa 58 ka tonelada nga pagkaon sa 4,850 ka karton sa St. Peters­burg, Estonia, Lat­via, ­Lithuania, kag ­Kaliningrad. Ginpuno man nila ang walay unod nga espasyo sang mga trak sing 12 metros kubikos nga panapton. Mga 25 ka segunda-mano nga salakyan kag van ang gindonar man para gamiton sa hilikuton sang Ginharian.

Ang iban nga mga kahon sang pagkaon nakalab-ot sa isa ka kongregasyon nga may 14 ka manugbantala sa Slanti sa St. Peters­burg. Nagpabutyag sila sing daku nga apresasyon sa isa ka sulat. “May napulo kami ka tigulang nga utod nga babayi sa kongregasyon. Madamo sa amon ang nagamasakit sing grabe kag indi makaagwanta sa paglinya sing inoras agod makakuha sing pagkaon. Apang, ang amon langitnon nga Amay wala maghatag sa amon sing rason nga magluya sing buot sa sining mabudlay nga mga tion kundi nagapuno sang amon mga tagipusuon sing pagkaon kag kalipay. Nagahiwat kami sing 43 ka pagtuon sa Biblia.” Sang nakuha sang isa ka utod nga babayi sa St. Peters­burg ang iya bulig nga pinutos, natandog gid sia amo kon ngaa duha ka oras nga naghibi sia antes niya ini ginbuksan.

Denmark

Sa sining diutay nga pungsod sa salamputan sang Baltic Sea, mga 16,000 ka Saksi ni Jehova ang nagtipon kag nagpadala sa Ukraine sing 19 ka trak nga nagaunod sing 64 ka tonelada nga pagkaon sa 4,200 ka kahon; 4,600 ka kahon sang maayo sing kalidad nga mga panapton; kag 2,269 ka paris nga bag-ong sapatos. Ginpagamit sa sanga sang isa ka utod nga lalaki sa Denmark ang lima ka trak, nga gindonar niya sang ulihi sa mga kauturan sa Ukraine. Sa pagpauli, ang isa sa mga tsuper nagsiling: “Natukiban namon nga ginbalik namon ang kapin pa sa gindala namon. Ang gugma kag espiritu sang pagsakripisyo nga ginpakita sang amon mga kauturan sa Ukraine nagpabakod sing daku sang amon pagtuo.”

Ang mga tsuper dapat mag-andam sa mga kawatan sa dalan sa anay Unyon Sobyet. Mga pila ka adlaw antes mag-agi ang isa sa mga trak halin sa Denmark, isa ka kinawatay ang natabo sa sina nga ruta. Ang lima ka trak nga kumboy nga may dala nga pagkaon halin sa iban nga nagabulig nga organisasyon ginbanggaan sang mga kawatan nga nagagamit sing mga helikopter kag mga sub­machine ­gun. Gin-agaw nila ang tanan nga lima ka trak kag ginbilin ang mga tsuper sa higad-dalan. Walay sapayan sina nga katalagman, ang tanan nga mga suplay halin sa sanga sang Denmark nakalab-ot sa mga kauturan nga wala maano. Sa pagpauli, ginpadala nila sa tsuper ang masunod nga sulat, nga ginsulat nga may daku nga kabudlayan sa Ingles: “Mahal nga mga kauturan nga lalaki kag babayi sa Denmark: Nabaton namon ang inyo bulig. Padyaan kamo ni Jehova.”

Netherlands

Ang sanga sang Netherlands nagpadala sing 52 ka tonelada nga pagkaon sa 2,600 ka pinutos. Gindala ini sa Ukraine sa duha ka magkatuhay nga kumboy. Sa kada tion ang anum ka trak ginbilin kay gindonar ini sang mga kauturan sa Alemanya para sa hilikuton sang Ginharian sa Sidlangan. Ginpadala sang mga kauturan sa Ukraine ang kalabanan nga pagkaon sa Moscow, Siberia, kag sa iban pa nga mga duog diin may daku nga kinahanglanon. Dugang pa, 736 metros kubikos ka panapton kag sapatos ang gindonar sang Olandes nga mga kauturan. Gindala ini sa Lviv sa Ukraine, sa 11 ka trak nga kumboy nga gin-updan sang isa ka pribado nga salakyan.

Pagligad sang malawig nga paglakbay paagi sa Alemanya kag Poland, ang kumboy nakaagi nga wala sing problema sa mga adwana sang ­Ukraine, kag nakalab-ot sa mga ilaya sang Lviv sang alas 3:00 s.a. Ang mga tsuper nagreport: “Sa malip-ot nga tion, nag-abot ang isa ka puwersa sang 140 ka kauturan sa pagdiskarga sa mga trak. Antes magsugod sa pagtrabaho, ining mapainubuson nga mga kauturan nagpakita sang ila pagsalig kay Jehova, nahiusa nga nangamuyo. Sang matapos ang trabaho, nagtipon sila liwat para sa isa ka pangamuyo sang pasalamat kay Jehova. Sa tapos maagom ang pagkamaabiabihon sang lokal nga mga kauturan, nga naghatag sing bugana sa diutay nga yara sa ila, gin-updan nila kami sa mayor nga dalan, diin nangamuyo sila sa higad-dalan antes nila kami ginbayaan.

“Sa malawig nga paglakbay pauli, madamo ang dapat dumdumon​—⁠ang pagkamaabiabihon sang mga kauturan sa Alemanya kag Poland, kag sang mga kauturan sa Lviv; ang ila makusog nga pagtuo kag mapangamuyuon nga panimuot; ang ila pagkamaabiabihon sa pag-aman sing mga dalayunan kag pagkaon samtang sila gid nagapamigado; ang ila pagpakita sing paghiusa kag pagkasuod; kag ang ila pasalamat. Nahunahuna man namon ang amon mga kauturan nga lalaki kag babayi sa amon lugar, nga naghatag sing maalwan gid.”

Switzerland

Ginabuksan sang Swiso nga sanga ang iya report paagi sa pagbalikwat sa Santiago 2:​15, 16: “Kon ang utod nga lalaki ukon babayi hubo kag nakulangan sing kalan-on adlaw-adlaw, kag ang isa sa inyo nagasiling sa ila: ‘Lakat kamo sa paghidait, magpainit-init kag magkalabusog,’ apang wala ninyo sila paghatagi sang mga butang nga kinahanglan sa ila lawas, ano bala ang kapuslanan sini?” Nian ang report nagapadayon: “Nadumduman namon ini nga Kasulatan sang ang Nagadumala nga Hubon sang mga Saksi ni Jehova nag-agda sa amon sa paghatag sing materyal nga bulig sa amon nagakinahanglan nga mga kauturan.”

“Sa gilayon nagsako ang tanan! Sa sulod sang duha lamang ka adlaw, 12 ka tonelada nga pagkaon sa 600 ka pinutos ang ginpadala sa Ukraine kaupod sang tatlo ka trak halin sa Alemanya, nga igadonar sa hilikuton didto. Ang balita nga ang tanan nakaabot nga luwas nagpahalipay sing daku sa amon mga kauturan diri. Samtang, ang mga kongregasyon nagkolekta sing panapton, kag sang ulihi bumaha ang mga karton, mga maleta, kag mga puyo sa amon sanga! Ang mga nagaunod sing panapton sang kabataan naglakip sang pila ka hampanganan halin sa Swiso nga kabataan para sa wala makilal-i nga mga abyan sa malayong Aminhan. Madamo man nga tsokolate ang ginsal-ot sa nagatinangkas nga mga panapton.”

Paano ini tanan ipadala? Ang report nagasiling: “Ang sanga sang Pransya nagbulig sa amon paagi sa pagpadala sing duha ka semitreyler kag apat ka tsuper nga sarang namon magamit. Dugang pa, isa ka trak halin sa amon sanga kag apat pa halin sa lokal nga mga kauturan ang ginkinahanglan sa pagdala sang 72 ka tonelada sa Ukraine.” Ang kumboy, 150 metros kalaba, nakalab-ot nga wala maano sa bodega sang Lviv, diin mga isa ka gatos ka lokal nga mga kauturan ang nagahulat sa pagdiskarga sa mga trak. Ang mga tsuper nagreport nga ang kal-ang sa hambal indi problema bangod ang ila mga nawong nagpakita sing daku nga pagpasalamat.

Austria

Ang mga kauturan sa Austria nagpadala sing 48.5 ka tonelada nga pagkaon, 5,114 ka karton nga panapton, kag 6,700 ka paris nga sapatos sa Lviv kag Uzhgorod sa Ukraine. Nagpadala man sila sing 7 ka tonelada nga pagkaon, 1,418 ka kahon nga panapton, kag 465 ka paris nga sapatos sa Belgrade, Mostar, Osijek, Sarajevo, kag Zagreb sa anay Yugoslavia. Ang report sang sanga nagasiling: “Ginkargahan namon ang 12 ka semitreyler, nga naglakbay sing 34,000 kilometros. Ang kalabanan sinang pagpanghakot ginhimo sang isa ka utod nga lalaki kag sang iya anak nga lalaki nga may pangarga nga negosyo.”

Nahanungod sa gindonar nga panapton, ang report nagapadayon: “Gingamit namon ang isa ka Assembly Hall subong sentro nga bodega. Nag-inabot ang puno nga mga trak, tubtob nga wala na sing mabutangan. Kaangay sang adlaw ni Moises, ang mga tawo ginpunggan sa pagdala sing madamo pa. (Exodo 36:⁠6) Bisan ang iban nga indi mga Saksi ni Jehova nagdonar sing kuwarta, ‘bangod,’ siling nila, ‘sa sining paagi nahibaluan namon nga ang mga tawo nga nagakinahanglan makatigayon sini.’ Nakatigayon man kami sing kinahanglanon nga mga karton gikan sa kalibutanon nga mga kompanya sa walay bayad.” Ang mga kauturan nga lalaki kag babayi nga nagbakibaki kag nagpamutos sang tanan nga mga butang nagaedad sing halin sa 9 anyos tubtob 80 anyos. Gintinguhaan pa gani nila nga iparis ang nagakaigo nga kurbata kag kamisadentro sa tagsa ka amerikana.

Ang report nagasiling: “Ang mga awtoridad sa Austria kag sa mga dulunan nagbulig sing daku sa pagpagamit sang lainlain nga mga salakyan sa pagbulig kag sa paghatag sing kinahanglanon nga mga papeles agod nga madul-ong ang tanan sing mahapos.”

Italya

Halin sa Roma mga 188 ka tonelada nga pagkaon ang ginpadala sa duha ka dalagku nga kumboy nga trak tabok sa Austria, Czecho­slovakia, kag Poland pakadto sa anay Unyon Sobyet. Ang kada grupo nga kumboy naglakip sa anum ka tsuper, isa ka mekaniko, isa ka awto elektrisyan, isa ka manugpatpat, isa ka for­ward­ing agent, isa ka kusinero, isa ka doktor, isa ka lider sang kumboy sa dyip, kag isa ka utod nga may ­camper.

Ang pagkaon ginkuha gikan sa pito ka suplayer. Ang sanga nagareport: “Sang nabalitaan sang amon suplayer ang rason para sa sini, luyag sang iban sa ila makigbahin. Mga isa ka gatos ka kilo nga pasta kag bugas, subong man mga kahon nga pulutsan, ang gindonar sang kalibutanon nga mga suplayer. Ang iban pa nagdonar sing mga ruweda sang trak para sa yelo ukon nagtanyag sa pag-amot sing kuwarta.

“Ang mga kauturan sa Italya nagpasalamat sa sining kahigayunan sa pagbulig. Luyag man sang mga kabataan mag-amot. Ang isa ka singko anyos nga bata nga lalaki nagpadala sing diutay nga amot kag nagalaum sia nga makabakal ini sing ‘isa ka lata sang tuna nga subong kataas sa langit para sa mga kauturan sa Rusya.’ Bangod sang iya mataas nga mga grado sa eskwelahan ang isa ka bata nga babayi nakabaton sing kuwarta gikan sa iya lolo kag lola agod ibakal sing regalo para sa iya mga ginikanan. ‘Apang,’ sulat niya, ‘sang mahibaluan ko nga madamo sang akon mga kauturan ang wala sing tanan nga maayong butang nga makaon kaangay ko, nahunahunaan ko nga ang pinakamaayo nga regalo nga mabakal ko sa akon mga ginikanan amo ang pagbulig sa mga kauturan.’ Ginhulog niya ang daku-daku nga kantidad nga kuwarta sa kahon-alamutan. ‘Kuntani padayon ako nga makakuha sing mataas nga mga grado, agod makapadala ako sing dugang pa nga kuwarta,’ siling niya.” Ang report sang sanga nagahinakop paagi sa pagsiling nga ang mga sulat sang mainit nga pagpasalamat halin sa mga kauturan sa Ukraine, ang madamong mga pulong sang pagpasalamat sang Italyano nga mga kauturan, kag ang matahom nga mga eksperiensia sa paghanda kag pagdala sang mga suplay makatalandog, makapalig-on, kag makapahiusa.

Pagkaon Para sa Linibo ka Delegado

Ang nahaunang internasyonal nga kombension sang mga Saksi ni Jehova sa anay Unyon Sobyet ginhiwat sa Kirov Sta­dium sa St. Peters­burg sa Rusya, sang Hunyo 28-30, 1992. Ining maragtason nga kombension, nga may tema nga “Mga Manugdala sing Kapawa,” gintambungan sang kapin sa 46,200 ka delegado halin sa 28 ka pungsod. Naghatag ini sing isa pa ka kahigayunan nga mapakita ang Cristianong gugma “sa bug-os nga paghiliupod sang mga kauturan.”​—⁠1 Pedro 2:⁠17.

Tonelada nga pagkaon halin sa Denmark, Finland, Sweden, kag iban pa nga mga kadutaan sa Katundan nga Europa ang ginpanghatag nga libre sa linibo ka delegado sa kombension halin sa anay U.⁠S.⁠S.⁠R, agod kaunon sa tion sang kombension. Sang naghalin sila sa kombension pagkatapos sang katapusan nga sesyon, ginpabalunan man sila sing pinutos nga pagkaon para sa ila paglakbay pauli.

Ang mga report nga ginsambit diri nagapakita nga ang paghatag indi isa ka direksion​—⁠pasidlangan​—⁠lamang. May pagbayluhanay. Ang pagkaon kag panapton pasidlangan, huo, apang pakatundan ang dimaisip nga makalilipay nga mga ekspresyon sang gugma kag nagapapagsik sing pagtuo nga mga eksperiensia nga nagapabanaag sang pagbatas kag katutom sang linibo ka sumilimba ni Jehova sa mga dekada sang pag-ipit kag kabudlayan. Busa, naeksperiensiahan nila ang kamatuoran sang ginsiling ni Jesus: “Daku pa ang kalipay sa paghatag sangsa pagbaton.”​—⁠Binuhatan 20:⁠35.

[Diagram/Piktyur sa pahina 21]

1. Halin sa Finland: St. Petersburg, Rusya; Tallinn kag Tartu, Estonia; Riga, Latvia; Vilnius kag Kaunas, Lithuania; Kaliningrad, Rusya; Petrozavodsk, Karelia

2. Halin sa Netherlands: Lviv, Ukraine

3. Halin sa Sweden: St. Petersburg, Rusya; Lviv, Ukraine; Nevinnomyssk, Rusya

4. Halin sa Denmark: St. Petersburg, Rusya; Lviv, Ukraine

5. Halin sa Austria: Lviv, Ukraine; Belgrade, Mostar, Osijek, Sarajevo, Zagreb (sa anay Yugoslavia)

6. Halin sa Switzerland: Lviv, Ukraine

7. Halin sa Italya: Lviv, Ukraine

[Mga piktyur sa pahina 23]

Kinarton nga panapton sa sanga sa Sweden

Pagkarga sing mga bulig

Mga pagkaon sa isa ka pinutos

Bacon kag ham halin sa Denmark

Kumboy nga 11 ka trak kag 1 ka awto

Mga pinutos kag mga maleta sa sanga sa Austria

Pagdiskarga sa trak sa Lviv, Ukraine