Ang mga Saksi ni Jehova sa Bug-os nga Kalibutan—Colombia

ANG Colombia isa ka pinasahi nga pungsod sa ­South Amer­i­ca. Ang kadagatan sang Atlantiko kag Pasipiko lunsay malapit sa baybayon sining napunihan sing bolkan nga pungsod. Ang klima nagabulubag-o halin sa tropiko nga kainit sa kapatagan pakadto sa kabugnaw sang mataas, natabunan sing yelo nga mga pukatod sang Andes Mountains.⁠a

Bisan nga ang Colombia kilala bangod sang bulawan kag mga esmeralda, ang mga tawo amo ang iya labing hamili nga pagkabutang. Sa karon, ginapuno ni Jehova ang iya espirituwal nga balay sing himaya. Ang matahom kag bilidhon nga mga sumilimba nagadugok sa sini sa tanan nga bahin sang duta, lakip sa Colombia.​—⁠Hageo 2:​7.

Ang mga Ehekutibo sa Negosyo Naganyat

Ang bag-ong sanga talatapan sang Watch Tower Society kag ang pasilidad sa pag-imprinta sa Facatativá, 42 kilometros aminhan-katundan sang Bogotá, gindedikar sang Domingo, Nobiembre 1, 1992. Ang paglibot sa sanga may daku nga epekto sa mga bisita. Pagpauli sa pabrika nga ginaobrahan niya, isa ka bisita ang makunyagon nga nagpalig-on sa iya mga manedyer nga duawon kag panilagan ang isa ka organisasyon nga ‘kalatingalahan sa kapisan, kahim-ong, kag katutom sang mga empleyado.’ Sa ila madason nga paglibot, ang mga ehekutibo nagpakita sing hanuot nga interes kag nagpakiana sing madamo nga pamangkot.

Luyag ipadala sining mga ehekutibo ang ila mga superintendente, mga superbisor, kag mga kapatas⁠—⁠sa katunayan, ang ila tanan nga mamumugon⁠—​sa paglibot. Kada semana, nag-iskedyul sila sing halin sa 15 tubtob 25 ka empleyado para sa paglibot tubtob nga ang bug-os nga mamumugon nga 1,300 makapanilag sa kapisan sang organisasyon.

Ginatos sang ila mga mamumugon ang nakalibot sa mga pasilidad sang sanga kag nakatan-aw sang vid­eo nga Jehovah’s Witnesses​—⁠The Organization Behind the Name. Naganyat sa kadakuon sang organisasyon kag sa bug-os kalibutan nga kasangkaron sang pagbantala sang Ginharian nga hilikuton, nahalawhaw sila sa mataas nga teknolohiya nga ginagamit sa pagpalakat sa Sosiedad. Paghalin nila, madamo ang nabatian nga nagsiling nga pamatyag nila daw ila ‘ginbiyaan ang Paraiso pabalik sa magamo nga kalibutan.’

Ang Kamatuoran Nagalab-ot sa Tanan nga Sahi

Ang tanan nga sahi sang mga tawo ginalab-ot sang maayong balita. (1 Timoteo 2:​3, 4) Halimbawa, isa ka anay komposer kag lider sang heavy-metal rock nga banda ang nagbaton sang kamatuoran sang Biblia, naghimo sing mga pagbalhin sa iya kabuhi, kag sa gilayon nangin regular payunir. Sang ulihi gintangdo sia nga ministeryal nga alagad. Pila ka indibiduwal nga mga katapo anay sang subersibo nga mga grupo ang nakatuon sa pagbutang sang ila pagsalig kag paglaum sa Ginharian ni Jehova. Aktibo sila karon nga nadalahig sa pagbantala sang mensahe tuhoy sa isa ka mahidaiton nga bag-ong kalibutan.

Ang mga nagiyan kag mga manugbaligya sang droga nagliso man sa kamatuoran. Isa ka lamharon nga lalaki nga karon isa na ka Saksi ang nagdumala anay sang plantasyon sang droga kag laboratoryo sang co­caine sa kagulangan sa lima ka tuig antes sia mag-untat sa sina nga sahi sang pagkabuhi. Nasapwan niya ang kalipay sa pagtuon kag sa pag-aplikar sang mga prinsipio sang Biblia. Sa isa ka bilangguan ang nasentensiahan nga mga manugpatay-tawo nga napahulag sang isa ka sinsero nga pagtuon sa Biblia ang hanuot nga nagapangamuyo nga patawaron ni Jehova ang ila mga kasal-anan kag batunon sila subong iya mga alagad.

Gani ang tanan nga sahi sang mga tawo nagahulag sa mensahe sang Ginharian. Sa Colombia, kag bisan diin, ginapuno ni Jehova ang iya balay sing himaya.

[Footnote]

[Kahon sa pahina 8]

LARAWAN SANG PUNGSOD

1993 nga Tuig sang Pag-alagad

KATAASON SANG KADAMUON NGA NAGAPANAKSI: 60,854

RATIO: 1 ka Saksi sa 558

TUMALAMBONG SA MEMORYAL: 249,271

PROMEDYO NGA PAYUNIR NGA MGA MANUGBANTALA: 8,487

PROMEDYO NGA PAGTUON SA BIBLIA: 100,927

KADAMUON NGA NABAWTISMUHAN: 5,183

KADAMUON SANG KONGREGASYON: 751

SANGA TALATAPAN: FACATATIVÁ

[Piktyur sa pahina 9]

Mga katapo sang sanga talatapan kag mga misyonero sang 1956

[Piktyur sa pahina 9]

Hitsura sang sanga-talatapan kon tan-awon halin sa ibabaw