Ngaa Ginahugakom sing Kahadlok ang Kalibutan?
SIN-O ang luyag magkabuhi sa kahadlok? Ang kinaandan nga tawo nagahandom sing kalig-unan, nga wala sing nagapamahog sa iya kabuhi ukon pagkabutang. Gani, madamo ang nagahalin sa madamo sing krimen nga mga lugar. Apang, ang mga kabangdanan sang pagkahadlok nagaluntad bisan diin.
Ang mga katalagman gikan sa nuklear nga mga hinganiban kag mga aksidente sa reactor nagapukaw sing kahadlok sang kahapayan para sa katawhan. Ang nagatimbuok nga kasingki nagapasanyog sing kahadlok. Madamo ang nagakahadlok nga ang AIDS basi mangin labing makamamatay nga epidemia sang siglo. Ang paglaglag sa aton palibot amo ang pila sang iban pa nga mga kabangdanan sang kahadlok. May pinasahi gid bala nga kahulugan ini nga mga kahadlok? Kag makalaum gid bala kita sa pagkabuhi sa kalibutan nga wala sing subong nga kahadlok?
Ang Bug-os Kalibutan nga Kahadlok May Kahulugan
Ang lapnag nga kahadlok karon may kahulugan bangod sang gintagna sa Biblia. Sa iya tagna nahanungod sa katapusan nga mga adlaw, ginhatag ni Jesucristo ang mga kahimtangan nga pagatunaan sang kahadlok. Sia nagsiling: “Ang pungsod magatindog batok sa pungsod kag ang ginharian batok sa ginharian, kag may yara kakulang sing pagkaon kag mga linog sa lainlain nga mga duog.” Si Jesus nagpamulong man nahanungod sa “pagdugang sang pagkamalinapason.” Sugod sang 1914, ang dimatupungan nga mga inaway, gutom, linog, kag pagkamalinapason nagresulta sa daku nga kahadlok kag pagkadula sang kabuhi.—Mateo 24:7-14.
Bisan ang mga panimuot sang mga tawo nagaamot sa kahadlok karon. Sa 2 Timoteo 3:1-4, aton mabasa ang matagnaon nga mga pulong ni apostol Pablo: “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo magamahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dibalaan, wala sing kinaugali nga pagpalangga, indi bukas sa bisan ano nga kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, maluib, matig-a sing ulo, nagahabok sa bugal, mahigugmaon sa kinasadya sa baylo sang sa Dios.” Sanglit ginapalibutan kita sina nga mga tawo sa sining katapusan nga mga adlaw, indi katingalahan nga may daku katama nga kahadlok!
Kon Ano ang Mapaabot Sini nga Kalibutan
Ginpaanggid ni Jesus ini nga panag-on sang katapusan nga mga adlaw sa kalibutan sang panahon ni Noe. Sa walay duhaduha, ang kahadlok sadto daku, kay ang maragtason nga rekord sang Biblia nagasiling: “Ang duta nangin dunot sa itululok sang matuod nga Dios kag ang duta napun-an sing kasingki.” Gani, “ang Dios nagsiling kay Noe: ‘Ang katapusan sang tanan nga unod nag-abot sa atubangan nakon, kay ang duta napun-an sing kasingki.’ ” (Genesis 6:11, 13) Yadtong malauton nga kalibutan masingki katama nga ginlaglag ini sang Dios paagi sa tugob-globo nga Anaw. Walay sapayan, bangod sang gugma, gintipigan ni Jehova nga Dios si Noe kag ang iya panimalay.—2 Pedro 2:5.
Busa ano ang mapaabot sang karon masingki nga kalibutan? Ti, ang Dios nagakangil-ad sa masingki nga dipagsapak sa kaayuhan sang iban. Mapamatud-an ini gikan sa mga pinamulong sang salmista: “Si Jehova mismo nagausisa sang matarong subong man sang malauton, kag ang Iya kalag nagadumot sa nagahigugma sa kasingki.” (Salmo 11:5) Ginlaglag ni Jehova ang masingki nga kalibutan sang panahon ni Noe. Gani, nian, indi bala kita dapat magpaabot nga laglagon sang Dios ining kalibutan nga nasit-an sang makapulunaw sa kahadlok nga kasingki?
Si apostol Pedro gin-inspirar sang Dios sa pagpamulong tuhoy sa presensia ni Cristo kag sa pagtagna sang kalamidad para sa karon malauton nga kalibutan. Sia nagsulat: “Sa katapusan nga mga adlaw magaabot ang mga mayubiton nga may pagyubit, nga nagasunod sang ila kaugalingon nga mga kailigbon kag nagasiling: ‘Diin bala ining ginsaad nga presensia niya? Ti, kutob sang pagtulog sang aton mga ginikanan sa kamatayon, ang tanan nagapadayon subong nga amo sila kutob sa ginsuguran sang pagtuga.’ ” Nian gingamit ni Pedro ang tinaga nga “mga langit” sa pagrepresentar sa sistema sang dihimpit nga paggahom sang katawhan kag ang tinaga nga “duta” para sa dimatarong nga tawhanon nga katilingban. “Kay,” siling niya, “suno sa luyag nila, wala nila ginsapak ining kamatuoran, nga may mga langit kutob sa dumaan kag may duta nga ginhuman gikan sa tubig kag bangod sang tubig bangod sang pulong sang Dios; kag paagi sini ang kalibutan nga sadto anay [sang panahon ni Noe] ginlapawan sang tubig nawala. Apang paagi sa amo man nga tinaga ang mga langit kag ang duta nga amo karon gintigana sa kalayo kag ginatipigan nga sa adlaw sang paghukom kag kalaglagan sang mga tawo nga didiosnon.”—2 Pedro 3:3-7.
Sa kaanggid nga panghunahuna, ginpakita ni Pablo nga si Cristo kag ang iya gamhanan nga mga anghel “magatimalus sa mga wala nagakilala sa Dios kag sa mga wala nagatuman sang maayong balita sang aton Ginuong Jesus. Sila magaantos sing hudisyal nga silot nga dayon nga kalaglagan.” (2 Tesalonica 1:6-9) Ang katapusan nga tulun-an sang Biblia nagapamulong tuhoy sa pagtipon sa mga pungsod para sa “inaway sang dakung adlaw sang Dios nga Labing Gamhanan” kag nagapasalig sa aton nga si Jehova ‘magalaglag sang mga nagalaglag sang duta.’—Bugna 11:18; 16:14-16.
Isa ka Tion sa Pagkasadya, Indi sa Pagkahadlok
Sa baylo nga makugmat sa ginatagna sang Biblia para sa sining kalibutan, ang matarong nga mga tawo may rason sa pagkasadya. Sa dili madugay pagalaglagon ni Jehova ining malaut nga kalibutan, apang pagahimuon ini para sa kaayuhan sadtong mga nagahigugma sa pagkamatarong. Ano ang magasunod sa balaan nga paglaglag sa karon nga sistema sang mga butang? Ti, isa ka bag-ong sistema sa idalom sang langitnon nga Ginharian sang Dios, nga gintudlo ni Jesus sa iya mga sumulunod nga ipangamuyo! Sia nagsiling: “Pangamuyo kamo, nian, sing subong sini: ‘Amay namon nga yara sa langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, amo man sa duta.’ ” (Mateo 6:9, 10) Anong mga pagbag-o ang sarang mapaabot kon ang kabubut-on sang Dios pagahimuon sa duta?
Ang inaway kag ang mga kakugmat sini pagadulaon. Ang Salmo 46:9 nagasiling: “Sia [si Jehova nga Dios] nagapatunong sang mga inaway tubtob sa ukbong sang duta. Ginabali niya ang pana kag ginautod niya ang bangkaw; ginasunog niya sa kalayo ang mga kangga [sa inaway].” Nian ang katawhan “magalingkod, ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila.”—Miqueas 4:4.
Ang makamamatay nga mga balatian indi na magapahadlok kag magakutol sang mga kabuhi. Ang balaan nga saad amo: “Wala sing pumuluyo ang magasiling: ‘Nagamasakit ako.’ ” (Isaias 33:24) Daw ano nga rason para sa pagkasadya!
Ang kahadlok may kaangtanan sa krimen kag kasingki mangin butang sang nagligad. Ang Salmo 37:10, 11 nagasaad: “Kay sa diutay pa nga tion, kag ang malauton wala na; kag bisan talupangdon mo sing makugihon ang iya duog, wala na sia didto. Apang ang mga mahagop magapanubli sang duta, kag magakalipay sila sa kabuganaan sang paghidait.”
Paano bayluhan sing matuod nga paghidait kag kalig-unan ang karon nga mga kahadlok? Paagi sa isa ka matarong nga panguluhan—ang Ginharian sang Dios. Nahanungod sa panahon naton, ang Daniel 2:44 nagasiling: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian mismo indi ibilin sa iban nga katawhan. Dugmukon sini kag papason ining tanan nga ginharian, kag ini magapadayon tubtob sa tion nga dinapat-od.” Ang gintangdo nga Hari ni Jehova, nga si Jesucristo, ‘kinahanglan maggahom tubtob nga mabutang sang Dios ang iya tanan nga kaaway sa idalom sang iya mga tiil.’ (1 Corinto 15:25) Pagatumanon sang Isa ka Libo ka Tuig nga Paggahom ni Jesus ang orihinal nga katuyuan sang Dios nga papuy-an sing dayon ang paraiso nga duta sang malipayon nga katawhan.—Lucas 23:43; Bugna 20:6; 21:1-5.
Sa sinang Paraiso nga duta, may yara isa ka maayo nga kahadlok. Ini amo ang “kahadlok kay Jehova.” (Hulubaton 1:7) Sa katunayan, dapat naton tigayunon ini nga kahadlok bisan sa karon, kay ini amo ang tudok nga pagtahod kag kahayanghag nga ginaupdan sang kahadlok nga indi mapahamut-an ang Dios bangod ginaapresyar naton ang iya mahigugmaon nga kalulo kag pagkaayo. Ini nga kahadlok nagakinahanglan sing lubos nga pagsalig kay Jehova kag sing matutom nga pagtuman sa iya.—Salmo 2:11; 115:11.
Ang makakulugmat nga mga hitabo nagatanda sini subong ang katapusan nga mga adlaw. Apang, kon pamatud-an naton ang aton gugma sa Dios, mahimo kita magkasadya sa baylo nga magkahadlok. Ang mga tagna sang Biblia nagapakita nga ang balaan nga paglaglag sa sining kalibutan malapit na. Pagabuslan ini sang ginsaad ni Jehova nga Dios nga bag-ong kalibutan sang pagkamatarong. (2 Pedro 3:13) Sa pagkamatuod, sa idalom sang paggahom sang Dios may yara sa dili madugay isa ka kalibutan nga wala sing dimaayo nga kahadlok.
[Kahon sa pahina 6]
Ang Epekto sang Isa Ka Kopya
SI Tomasz, isa ka taga-Poland nga pamatan-on, may legal nga problema nga nangin kabangdanan sang pagpalagyo niya sa pungsod. Anom ka bulan sia nga nag-uluangkas patabok sa Europa, nagtulog sa mga tolda kag nagtrabaho sing lainlain. Samtang, isa ka pamangkot ang pirme niya ginahunahuna: Ano ang katuyuan sang kabuhi?
Ang pamangkot ni Tomasz nasabat sang ginhatagan sia sing isa ka kopya sang Ang Lalantawan sa Polaco. Ginbasa niya ini sa pila ka bes kag ginbaton nga ini nga magasin nagaunod sang kamatuoran nga madugay na niya ginapangita. Nag-angkas si Tomasz sing 200 kilometros pakadto sa opisina sang Watch Tower Society sa Selters/Taunus, Alemanya. Nag-abot sang Lunes sang gab-i, ginpakita niya ang iya magasin nga Lalantawan kag nagsiling: “Luyag ko nga may isa nga magpaathag sing dugang kon ano ang yari sa sini nga magasin. Ano ang dapat ko himuon?”
Sina nga gab-i, duha ka Saksi ni Jehova ang nakigsugilanon kay Tomasz nahanungod sa katuyuan sang kabuhi, nga nagagamit sang Biblia subong sadsaran sang ila paghambalanay. Nalangkag nga makatuon sing labi pa, adlaw-adlaw nga nagbalik si Tomasz sa sanga talatapan sina nga semana, nagatuon sang Biblia kag sang libro nga Mahimu Ka Mabuhi sing Dayon sa Paraiso sa Duta.
Namat-od si Tomasz sa pagbalik sa Poland, bisan pa mahimo sia nga magaatubang sing mga problema didto. Busa, sang Biernes, apat ka adlaw lamang pagkatapos makakadto sa sanga talatapan sa Selters, si Tomasz naglakbay pauli sa iya tumandok nga pungsod. Gilayon niya nga ginsugdan ang pagtuon upod sa mga Saksi ni Jehova sa Poland. Madasig nga nag-uswag si Tomasz kag makugi nga nagsugod sa pagsugid sa iban nahanungod sa natun-an niya. Sang Oktubre 1993, pagligad lamang sang apat ka bulan sadtong una niya nga pagduaw sa Selters, ginbawtismuhan sia subong isa sa mga Saksi ni Jehova.
Isa lamang ka kopya sang Ang Lalantawan ang nakabulig sa sining pamatan-on sa pag-usisa sa katuyuan sang kabuhi!
[Piktyur sa pahina 7]
Sa idalom sang paggahom sang Ginharian paagi kay Jesucristo, ang kalibutan indi na liwat mahugakom sing kahadlok