“Ang Akon Gota Maluluy-on kag Ang Akon Lulan Mamag-an”
“Itakud ang akon gota sa inyo kag magtuon kamo sa akon.”—MATEO 11:29.
1, 2. (a) Ano ang naeksperiensiahan ninyo sa kabuhi nga nagahatag sa inyo sing kapahuwayan? (b) Ano ang dapat himuon sang isa agod mabaton ang kapahuwayan nga ginsaad ni Jesus?
ANG mabugnaw nga pagpaligo pagkatapos sang mainit kag mapaang nga adlaw, ukon ang mahamuok nga pagtulog sa kagab-ihon pagkatapos sang malawig kag makakalapoy nga paglakbay—baw, daw ano ka makaparepresko! Amo man kon ang mabug-at nga lulan ginakuha ukon ang mga sala kag mga paglapas ginapatawad. (Hulubaton 25:25; Binuhatan 3:19) Ang kapahuwayan nga ginhatag sinang makalilipay nga mga eksperiensia nagapapagsik sa aton, kag nagapalig-on sa aton sa paghimo sing labi pa.
2 Ang tanan nga nagabatyag nga nalulanan kag nalapyo mahimo makakari kay Jesus, kay amo gid sina ang ginsaad niya sa ila—kapahuwayan. Apang, agod makita ang kapahuwayan nga halandumon gid, may isa ka butang nga dapat handa himuon ang isa. “Itakud ang akon gota sa inyo kag magtuon kamo sa akon,” siling ni Jesus, “kag makakita kamo sing kapahuwayan sa inyo mga kalag.” (Mateo 11:29) Ano ining gota? Paano ini nagadala sing kapahuwayan?
Isa ka Maluluy-on nga Gota
3. (a) Anong sahi sang mga gota ang gingamit sang panahon sang Biblia? (b) Anong malaragwayon nga kahulugan ang ginaangot sa gota?
3 Nagapuyo sa nagapanguma nga katilingban, si Jesus kag ang iya mga tagpalamati pamilyar sing maayo sa gota. Ang gota isa ka malaba nga kahoy nga may duha ka kurba nga guab nga ginaplastar sa tangkugo sang duha ka sapat, sa masami baka, agod magtuwangay sila sa pagbutong sang arado, karo, ukon iban pa nga lulan. (1 Samuel 6:7) Ang mga tawo naggamit man sing gota. Simple ini nga mga kahoy nga ginaplastar sa magtimbang nga mga abaga kag ang lulan ginahigot sa pihak kag pihak nga punta. Paagi sa sini, ang mga obrero makasarang sa pagkarga sing mabug-at nga mga lulan. (Jeremias 27:2; 28:10, 13) Bangod sang kaangtanan sini sa mga lulan kag pangabudlay, ang gota masunson ginagamit sing malaragwayon sa Biblia sa pagsimbulo sa pagginahom kag pagkontrol.—Deuteronomio 28:48; 1 Hari 12:4; Binuhatan 15:10.
4. Ano ang ginasimbulo sang gota nga ginatanyag ni Jesus sa sadtong nagakari sa iya?
4 Ano, nian, ang gota nga gin-agda ni Jesus nga itakud sadtong nagakari sa iya para sa kapahuwayan? Dumduma nga sia nagsiling: “Itakud ang akon gota sa inyo kag magtuon kamo sa akon.” (Mateo 11:29) Ang nagatuon isa ka disipulo. Hanti, ang pagtakud sa gota ni Jesus nagakahulugan lamang nga mangin disipulo niya. (Filipos 4:3) Apang, indi lamang ang paghibalo sang iya mga panudlo ang ginakinahanglan sini. Nagakinahanglan ini sing mga buhat nga nagahisanto sa sini—ang paghimo sang hilikuton nga ginhimo niya kag ang pagkabuhi sa paagi nga sia nagkabuhi. (1 Corinto 11:1; 1 Pedro 2:21) Nagakinahanglan ini sing kinabubut-on nga pagpasakop sa iya awtoridad kag sa sadtong gintugyanan niya sing awtoridad. (Efeso 5:21; Hebreo 13:17) Nagakahulugan ini nga mangin isa ka dedikado, bawtismado nga Cristiano, nagabaton sang tanan nga mga pribilehiyo kag mga responsabilidad nga nagaupod sa sina nga dedikasyon. Amo ina ang gota nga ginatanyag ni Jesus sa tanan nga nagakari sa iya para sa kalugpayan kag kapahuwayan. Handa ka bala sa pagbaton sini?—Juan 8:31, 32.
5. Ngaa indi isa ka mapintas nga eksperiensia ang pagtakud sang gota ni Jesus?
5 Makakita sing kapahuwayan paagi sa pagtakud sing gota—wala bala ina nagasumpakilay? Sa katunayan wala, kay si Jesus nagsiling nga ang iya gota “maluluy-on.” Ini nga tinaga nagakahulugan sing malulo, manayanaya, masinulugton. (Mateo 11:30; Lucas 5:39; Roma 2:4; 1 Pedro 2:3) Sanglit isa sia ka propesyonal nga panday, si Jesus mahimo gid nga nakabuhat sing mga arado kag mga gota, kag mahimo nga makahibalo sia magdihon sing husto nga gota agod ang daku nga hilikuton sarang mahimo sing mas masulhay. Mahimo niya butangan sing tela ukon panit ang kurba sang mga gota. Madamo ang ginahimo sing amo sina agod indi malap-ukan, ukon mahapdusan, ang tangkugo. Sa kaanggid nga paagi, ang malaragwayon nga gota nga ginatanyag ni Jesus sa aton “maluluy-on.” Bisan pa nga ang pagkamangin isa ka disipulo niya nagalakip sang pila ka mga obligasyon kag mga responsabilidad, indi ini isa ka mapintas ukon mapiguson nga eksperiensia kundi isa nga makaparepresko. Ang mga sugo sang iya Langitnon nga Amay, nga si Jehova, indi man mabug-at.—Deuteronomio 30:11; 1 Juan 5:3.
6. Ano ang mahimo nga ginahunahuna ni Jesus sang nagsiling sia: “Itakud ang akon gota sa inyo”?
6 May pila pa ka butang nga nagahimo sang gota ni Jesus nga “maluluy-on,” ukon mahapos dalhon. Sang nagsiling sia: “Itakud ang akon gota sa inyo,” mahimo nga ginapatuhuyan niya ang isa sa duha ka butang. Kon ginahunahuna niya ang doble nga gota, kon sayuron, ang sahi nga nagaangot sa duha ka sapat sa pagguyod sang lulan, nian gin-agda niya kita nga magpaidalom sa isa ka gota kaupod niya. Daw ano gid ina nga pagpakamaayo—ang makatuwang si Jesus sa pagguyod sang aton lulan! Sa pihak nga bahin, kon ginahunahuna ni Jesus ang gota nga ginagamit sang kinaandan nga obrero, nian gintanyagan niya kita sing bulig nga paagi sini madala naton ang bisan ano man nga lulan naton sing mas mahapos ukon sing mas maayo. Bisan diin man nga sahi, ang iya gota isa ka tuburan sang matuod nga kapahuwayan bangod ginapasalig niya kita: “Kay ako malulo kag mapainubuson sing tagipusuon.”
7, 8. Anong kasaypanan ang ginahimo sang iban kon nagabatyag sila sing kahuol?
7 Ano, nian, ang dapat naton himuon kon nagabatyag kita nga ang ginadala naton nga lulan sang mga problema sa kabuhi indi na maagwanta kag nga ginahul-an kita sing tuman? Ang iban mahimo magabatyag sing sayop nga ang gota sang pagkamangin disipulo ni Jesucristo tuman kabudlay ukon tuman kadamo sing ginakinahanglan, bisan pa nga ang mga alatipanon sa adlaw-adlaw nga pagkabuhi amo ang nagapabug-at sa ila. Ang iban nga mga indibiduwal sa sina nga kahimtangan nagauntat sa pagtambong sa Cristianong mga miting, ukon nagadulog sila sa pagpakigbahin sa ministeryo, ayhan nagabatyag nga basi makatigayon sila sing kaumpawan. Apang, isa ina ka serioso nga sayop.
8 Ginapasalamatan naton nga ang gota nga ginatanyag ni Jesus “maluluy-on.” Kon wala naton ini ginatakud sing nagakaigo, mahimo ini makapalap-ok. Sa sina nga kaso dapat naton usisaon ang gota sa aton mga abaga. Kon, sa pila ka rason, ang gota gubaon ukon wala matakod sing maayo, ang paggamit sini wala lamang nagakinahanglan sing daku pa nga panikasog sa bahin naton kundi magatuga sing kasakit subong resulta. Sa iban nga hambal, kon ang teokratikong mga hilikuton nagasugod nga daw mabug-at sa aton, dapat naton usisaon kon bala ginahimo naton ini sa husto nga paagi. Ano ang aton motibo sa paghimo sang aton ginahimo? Nasangkapan bala kita sing nagakaigo kon magkadto kita sa mga miting? Nakahanda bala kita sa pisikal kag sa hunahuna kon magguwa kita sa latagon? May yara bala kita suod kag maayo nga kaangtanan sa iban sa kongregasyon? Kag, labaw sa tanan, kamusta ang aton personal nga kaangtanan kay Jehova nga Dios kag sa iya Anak, si Jesucristo?
9. Ngaa ang Cristianong gota indi gid dapat mangin dimadala nga lulan?
9 Kon ginabaton naton sing bug-os tagipusuon ang gota nga ginatanyag ni Jesus kag nagatuon sa paggamit sini sing nagakaigo, wala gid sing rason agod daw indi ini madala nga lulan. Sa katunayan, kon mahanduraw naton ang kahimtangan—si Jesus kaupod naton sa isa ka gota—indi mabudlay para sa aton nga mahangpan kon sin-o gid ang nagadala sang kabug-aton sang lulan. Kaangay ini sa isa ka bata nga nagasandig sa uluyatan sang iya andador, nagahunahuna nga ginatulod niya ini, apang sa katunayan, siempre pa, ang ginikanan amo ang nagahimo sini. Subong isa ka mahigugmaon nga Amay, nakahibalo gid si Jehova nga Dios sang aton mga limitasyon kag mga kaluyahon, kag ginaatipan niya ang aton mga kinahanglanon paagi kay Jesucristo. “Ang Dios magahimuno sing bug-os sang tanan nga kinahanglan ninyo suno sa kamanggaran niya sa himaya paagi kay Cristo Jesus,” siling ni Pablo.—Filipos 4:19; ipaanggid ang Isaias 65:24.
10. Ano ang naagihan sang isa nga nagbaton sang pagkadisipulo sing serioso?
10 Madamong dedikadong mga Cristiano ang nakaapresyar sini paagi sa personal nga eksperiensia. Yara, halimbawa, si Jenny, nga nakasapo nga ang pag-alagad subong auxiliary payunir kada bulan kag ang pagpangabudlay sing bug-os tion sa masako katama nga sekular nga trabaho nagapahuol gid sa iya. Apang, nagabatyag sia nga ang pagpayunir aktuwal nga nagabulig sa iya nga mahuptan ang iya pagkatimbang. Ang pagbulig sa mga tawo nga makatuon sang kamatuoran sang Biblia kag ang makita sila nga nagabalhin sang ila kabuhi agod matigayon ang kahamuot sang Dios—amo ini ang nagahatag sa iya sing labing daku nga kalipay sa iya masako nga pagkabuhi. Bug-os tagipusuon sia nga nagaugyon sa pinamulong sang hulubaton nga nagasiling: “Ang pagpakamaayo ni Jehova—amo ina ang nagapamanggad, kag wala sia nagadugang sing kasubo sa sini.”—Hulubaton 10:22.
Mamag-an nga Lulan
11, 12. Ano ang buot silingon ni Jesus sang nagsiling sia: “Ang akon lulan mamag-an”?
11 Dugang sa pagsaad sa aton sing “maluluy-on” nga gota, si Jesus nagapasalig sa aton: “Ang akon lulan mamag-an.” Ang “maluluy-on” nga gota labi na nga nagapahapos sang hilikuton; kon ang lulan ginapamag-an man, ang hilikuton tunay gid nga makalilipay. Apang, ano ang nahunahuna ni Jesus sa sina nga pinamulong?
12 Binagbinaga kon ano ang pagahimuon sang isa ka mangunguma kon luyag niya bag-uhon ang mga buluhaton sang iya mga sapat, halimbawa halin sa pag-arado sang uma pakadto sa pagguyod sing karo. Kuhaon niya anay ang arado kag nian itakud ang karo. Binuang para sa iya nga itakud ang arado kag karo sa mga sapat. Sa kaanggid, si Jesus wala nagasugo sa mga tawo nga sampawan ang lulan nga ginadala na nila. Nagsiling sia sa iya mga alagad: “Walay suluguon nga makaalagad sa duha ka agalon.” (Lucas 16:13) Busa, si Jesus naghatag sa mga tawo sing pililian. Padayunon bala nila ang pagdala sang ila mabug-at nga lulan, ukon ibutang bala nila ina kag batunon ang iya gintanyag? Si Jesus naghatag sa ila sing mahigugmaon nga insentibo: “Ang akon lulan mamag-an.”
13. Anong lulan ang ginadala sang mga tawo sang adlaw ni Jesus, kag upod ang ano nga resulta?
13 Sang adlaw ni Jesus, ang mga tawo nagahimakas sa idalom sang mabug-at nga lulan nga ginpatuman sa ila sang mapiguson nga Romanong mga gumalahom kag sang pormalistiko, salimpapaw nga relihiosong mga lider. (Mateo 23:23) Sa paninguha nga dulaon ang Romanong lulan, ang iban nga mga tawo nagtilaw sa paghimo sing personal nga mga pagbalhin. Nakigbahin sila sa politikal nga mga panikasog, nga nagdangat lamang sa malaglagon nga katapusan. (Binuhatan 5:36, 37) Ang iban nahuyog sa pagpauswag sang ila kahimtangan paagi sa pagpaduyog sa materyalistikong mga paghimud-os. (Mateo 19:21, 22; Lucas 14:18-20) Sang gintanyagan sila ni Jesus sing paagi nga maumpawan sa kalalangan sang pag-agda sa ila nga mangin mga disipulo, ang tanan indi handa sa pagbaton. Nagapangalag-ag sila sa pagbutang sang lulan nga ila ginadala, bisan pa nga ini mabug-at, kag sa pagkuha sang lulan ni Jesus. (Lucas 9:59-62) Makahalanusbo gid nga kasaypanan!
14. Paano ang mga kabalaka sa kabuhi kag materyal nga mga handum nagapabug-at sa aton?
14 Kon indi kita maghalong, ayhan mahimo naton ang kaanggid nga kasaypanan karon. Bangod nangin mga disipulo kita ni Jesus, nahilway kita gikan sa pagpanikasog sa amo gihapon nga mga tulumuron kag mga kabilihanan kaangay sang ginahimo sang mga tawo sa kalibutan. Bisan dapat gihapon kita maghimakas agod matigayon ang adlaw-adlaw nga mga kinahanglanon, wala naton ginahimo ining mga butang nga sentro sang aton kabuhi. Apang, ang mga kabalaka sa kabuhi kag ang pangbuyok sang materyal nga mga kasulhayan mahimo nga may makusog nga ganyat sa aton. Kon pahanugutan naton ini, inang mga handum mahimo gani nga makalumos sang kamatuoran nga malangkagon naton nga ginbaton. (Mateo 13:22) Mahimo man kita nga mangin masako sing tuman sa pagtuman sinang mga handum sa bagay nga ang aton Cristianong mga responsabilidad mangin makakalapoy nga mga obligasyon nga ginahimo kag ginatapos sing pakulahaw lamang. Indi gid kita makapaabot sing bisan anong kapahuwayan gikan sa aton pag-alagad sa Dios kon ginahimo ini sa sinang espiritu.
15. Anong paandam ang ginhatag ni Jesus nahanungod sa materyal nga mga handum?
15 Ginpakita ni Jesus nga ang pagkabuhi sing kontento matigayon, indi paagi sa pagpanikasog nga maangkon ang tanan naton nga mga luyag, kundi paagi sa pagpat-od sang mas importante nga mga butang sa kabuhi. “Untati ninyo ang pagkabalaka nahanungod sa inyo mga kalag sa kon ano ang inyo kaunon ukon sa kon ano ang inyo imnon, ukon nahanungod sa inyo lawas sa kon ano ang inyo ipanapot,” laygay niya. “Indi bala ang kalag labi pa sa kalan-on kag ang lawas sa panapton?” Nian gintawag niya ang igtalupangod sa mga pispis sa langit kag nagsiling: “Wala sila nagasab-ug ukon nagaani ukon nagatipon sa mga tambobo; apang ginapakaon sila sang inyo langitnon nga Amay.” Nagapatuhoy sa mga lirio sa latagon, sia nagsiling: “Wala sila nagapangabudlay, ukon nagapamurong; apang nagasiling ako sa inyo nga bisan pa si Solomon sa bug-os niya nga himaya wala mapanapti subong sang isa sini sa ila.”—Mateo 6:25-29.
16. Ano ang ginpakita sang eksperiensia nahanungod sa mga epekto sang materyal nga mga paghimud-os?
16 May matun-an bala kita gikan sa sining simple nga halimbawa? Kinaandan na nga eksperiensia nga kon ang isa ka tawo nagapanikasog sing lakas agod mapauswag ang iya pangabuhi, labi pa gid sia nga nagakagumon sa kalibutanon nga mga paghimud-os kag labi pa gid nga nagabug-at ang lulan sa iya mga abaga. Ang kalibutan puno sing mga tawo nga ang ila materyal nga mga kadalag-an nagresulta sa nabungkag nga mga puluy-an, naguba nga pag-asawahay, napierde nga panglawas, kag madamo pa. (Lucas 9:25; 1 Timoteo 6:9, 10) Ang tagdaug sang Nobel nga si Albert Einstein nagsiling anay: “Ang mga pagkabutang, naguwa nga kadalag-an, publisidad, luho—para sa akon pirme ini talamayon. Nagapati ako nga ang simple kag indi bugalon nga pagkabuhi amo ang pinakamaayo para sa tanan.” Nagapalanog lamang ini sang simple nga laygay ni apostol Pablo: “Isa ini ka paagi nga may dakung benepisyo, ining diosnon nga debosyon kaupod sang pagkakontento sa kaugalingon.”—1 Timoteo 6:6.
17. Anong pagkabuhi ang ginarekomendar sang Biblia?
17 May isa ka importante nga bahin nga indi naton dapat pasapayanan. Bisan pa nga “ang simple kag indi bugalon nga pagkabuhi” may madamo nga bentaha, wala ini nagahatag sing pagkakontento. May madamo nga ang ila pagkabuhi simple bangod sang sirkunstansia, apang indi sila kontento kag malipayon. Ang Biblia wala nagalaygay sa aton nga sikwayon ang materyal nga kalipayan kag magkabuhi kaangay sang isa ka ermitanyo. Ang ginapadaku amo ang diosnon nga debosyon, indi ang pagkakontento sa kaugalingon. Kon iupod naton ang duha nga matigayon lamang naton ang “paagi nga may dakung benepisyo.” Anong benepisyo? Sa sina man nga sulat, ginpakita ni Pablo nga yadtong “nagbutang sang ila paglaum, indi sa dimasaligan nga mga manggad, kundi sa Dios,” ang “mahalungon nga nagatigana sa ila kaugalingon sing maayong sadsaran para sa palaabuton, agod nga makapanguyapot sila sing hugot sa kabuhi nga amo ang kabuhi nga totoo.”—1 Timoteo 6:17-19.
18. (a) Paano ang isa mahimo makakita sing matuod nga kapahuwayan? (b) Paano naton dapat tamdon ang mga pagbalhin nga dapat naton himuon?
18 Matigayon naton ang kapahuwayan kon tun-an naton nga ibutang ang aton ginadala nga personal mabug-at nga lulan kag kuhaon ang mamag-an nga lulan nga ginatanyag ni Jesus. Madamo sang nag-organisar liwat sang ila kabuhi agod makapakigbahin sila sing labi pa sa pag-alagad sa Ginharian ang nakasapo sang dalan padulong sa kabuhi nga may kalipay kag pagkakontento. Sa pagkamatuod, kinahanglan ang pagtuo kag kaisog agod mahimo sang isa ina nga buhat, kag mahimo nga may mga sablag nga maagihan. Apang ang Biblia nagapahanumdom sa aton: “Ang nagapanilag sang hangin indi magsab-ug; kag ang nagatulok sa mga gal-um indi mag-ani.” (Manugwali 11:4) Madamong butang ang indi gid man mabudlay sa tion nga nakapamat-od kita nga himuon ini. Ang daw pinakamabudlay nga bahin amo ang pagpamat-od. Mahimo nga ginalapyo naton ang aton kaugalingon paagi sa pagpaninguha ukon sa pagsumpong sa ideya nga batunon ang mabudlay nga hilikuton. Kon ginahanda naton ang aton hunahuna kag batunon ang hangkat, mahimo kita makibot sa paghibalo kon daw ano ini nga pagpakamaayo. Ang salmista naglaygay: “Tilawi kag tan-awa nga si Jehova maayo, O kamo nga katawhan.”—Salmo 34:8; 1 Pedro 1:13.
“Kapahuwayan sa Inyo mga Kalag”
19. (a) Ano ang mapaabot naton samtang ang mga kahimtangan sang kalibutan padayon nga nagausmod? (b) Samtang napaidalom sa gota ni Jesus, sa ano kita ginpasalig?
19 Ginpahanumdom ni apostol Pablo ang nahaunang siglo nga mga disipulo: “Dapat kita magsulod sa ginharian sang Dios paagi sa madamong kapipit-an.” (Binuhatan 14:22) Matuod gihapon ina karon. Samtang ang mga kahimtangan sa kalibutan padayon nga nagausmod, ang mga pag-ipit nga nagaabot sa tanan nga determinado magkabuhi sa pagkamatarong kag diosnon nga debosyon mangin mas daku pa. (2 Timoteo 3:12; Bugna 13:16, 17) Apang, ang aton balatyagon kaangay kay Pablo sang nagsiling sia: “Ginaipit kami sa tagsa ka luyo, apang wala mapiuti nga indi na makagiho; ginaligban kami, apang indi bug-os nga wala sing dalan paguwa; ginahingabot kami, apang wala mapatumbayai; ginapanglampusan, apang wala malaglag.” Ang rason amo nga makasalig kita kay Jesucristo sa paghatag sa aton sing kusog nga labaw sa kinaandan. (2 Corinto 4:7-9) Paagi sa pagbaton sa gota sang pagkadisipulo sing bug-os tagipusuon, maagom naton ang katumanan sang saad ni Jesus: “Makakita kamo sing kapahuwayan sa inyo mga kalag.”—Mateo 11:29.
Mapaathag Mo Bala?
◻ Anong maluluy-on nga gota ang gintanyag ni Jesus?
◻ Ano ang dapat naton himuon kon nagabatyag kita nga ang aton gota nangin mabug-at?
◻ Ano ang buot silingon ni Jesus sang nagsiling sia: “Ang akon lulan mamag-an”?
◻ Paano kita makapat-od nga ang aton lulan nagapabilin nga mamag-an?