Palungon Mo Bala ang Pabilo nga Nagairaw?

GINBANTALA ni Jesucristo ang maayong balita sang Ginharian sang Dios sa tanan nga sahi sang tawo. Madamo sa ila ang ginpigos kag ginluyahan sing buot. Apang ginhatagan sila ni Jesus sing makalilipay nga mensahe. Naluoy sia sa nagaantos nga mga tawo.

Ginpadaku ni Mateo nga manunulat sang Ebanghelyo ang kaluoy ni Jesus paagi sa pagpatalupangod sang tagna nga ginsulat ni Isaias. Nagabalikwat sang mga pinamulong nga gintuman ni Cristo, si Mateo nagsulat: “Wala sing tabun-ak nga basag ang balion niya, kag wala sing lino nga pabilo nga nagairaw nga palungon niya, tubtob magpaguwa sia sing katarungan nga may kadalag-an.” (Mateo 12:20; Isaias 42:⁠3) Ano ang buot silingon sining mga pinamulong, kag paano gintuman ni Jesus ining tagna?

Pag-usisa sa Tagna

Ang tabun-ak kinaandan na nga nagatubo sa katunggan kag indi isa ka mabakod kag malig-on nga tanom. Ang “tabun-ak nga basag” maluya gid. Busa mahimo ini nagarepresentar sa ginapigos ukon nagaantos nga mga tawo kaangay sang tawo nga may naitos nga kamot nga gin-ayo ni Jesus sang Inugpahuway. (Mateo 12:​10-14) Apang ano naman ang matagnaon nga paghinambit sa pabilo sang suga?

Ang kinaandan nga suga sa balay sang unang siglo C.E. amo ang kaangay sang pitsel nga suludlan nga lapok nga may kalaptan. Ang suga masunson nga ginapuno sing lana nga olibo. Ginasuyop sang pabilo nga human sa lino ang lana sa pagpasiga sang kalayo. Sa pagkamatuod, ang ‘pabilo nga nagairaw’ amo ang isa nga malapit na mapalong.

Ginwali ni Jesus ang iya makalulugpay nga mensahe sa madamo nga sing malaragwayon kaangay sang tabun-ak nga basag, nabali kag natumba. Kaangay man sila sang pabilo nga nagairaw bangod ang katapusan nga alipalok sang ila kabuhi halos napalong na. Tunay sila nga ginpigos kag naluyahan sing buot. Apang, wala ginbali ni Jesus ang malaragwayon nga tabun-ak nga basag ukon ginpalong ang simbuliko nga pabilo nga nagairaw. Ang iya mahigugmaon, mapinalanggaon, mainawaon nga mga pulong wala magpaluya kag magpahanusbo sing dugang sa mga tawo nga nagaantos. Sa baylo, ang iya mga komento kag mga pagpakig-angot sa ila may makalilipay nga epekto.​—⁠Mateo 11:​28-30.

Madamo man sa karon ang nagakinahanglan sing kaluoy kag pagpalig-on bangod nagaatubang sila sing makapahanusbo nga mga problema. Bisan ang mga alagad ni Jehova indi pirme mabakod nga mga torre. Kon kaisa ang pila kaangay sang mga pabilo nga nagairaw. Busa ang mga Cristiano dapat mangin makapalig-on​—⁠nagapadabdab sang suga, kon sa aton pa⁠—​busa nagapalig-unay sa isa kag isa.​—⁠Lucas 22:32; Binuhatan 11:⁠23.

Subong mga Cristiano luyag naton mangin makapalig-on. Indi naton pagatinguhaan sing hungod nga paluyahon ang bisan sin-o nga nagapangayo sing espirituwal nga bulig. Sa pagkamatuod, luyag naton ilugon ang halimbawa ni Jesus sa pagpabakod sa iban. (Hebreo 12:​1-3; 1 Pedro 2:21) Ang katunayan nga mahimo naton mabali sing dihungod ang bisan sin-o nga nagapangayo sa aton sing kalig-unan isa gid ka maayong rason agod hunahunaon naton sing maayo kon paano naton ginapakig-angutan ang iban. Pat-od gid nga indi naton luyag ‘palungon ang pabilo nga nagairaw.’ Anong Makasulatanhon nga mga giya ang makabulig sa aton may kaangtanan sini?

Mga Epekto sang Pagmulay

Kon ang isa ka Cristiano ‘makahimo sing sayop nga tikang, yadtong may espirituwal nga mga kalipikasyon dapat magtinguha nga ipasag-uli ina nga tawo sa espiritu sang kalum-ok.’ (Galacia 6:⁠1) Apang, nagakaigo bala nga pangitaan sing sayop ang iban kag himuslan ang tanan nga kahigayunan nga tadlungon sila? Ukon husto bala nga piliton sila sa paghimo sing maayo pa paagi sa pagpalahidlahid nga ang ila karon nga mga panikasog indi nagakaigo, ayhan nagapabatyag sa ila nga nakasala? Wala sing pamatuod nga ginhimo ina ni Jesus. Bisan pa nga tuyo naton nga buligan ang iban agod mag-uswag, yadtong ginamulay sing dimalulo mahimo nga magaluya sa baylo nga mapalig-on. Bisan ang makapalig-on nga kritisismo mahimo nga daw makapaluya kon ginahimo sing sobra. Kon ang labing maayo nga mga panikasog sang mapisan nga Cristiano ginasikway, ayhan magauntat sia sa ulihi kag magasiling, ‘Ngaa pa manikasog?’ Sa pagkamatuod, mahimo sia magauntat sing ­bug-os.

Samtang ang paghatag sing Makasulatanhon nga laygay importante, dapat nga wala ini nagapakilala sa espiritu sang gintangdo nga mga gulang ukon sang iban sa kongregasyon. Ang Cristianong mga miting wala ginahiwat agod lamang maghatag kag magbaton sing laygay. Sa baylo, nagatipon kita sing tingob sing tayuyon sa pagpalig-on kag sa pagpabakod sa isa kag isa agod ang tanan magakalipay sa ila pag-inupdanay kag sa ila sagrado nga pag-alagad sa Dios. (Roma 1:​11, 12; Hebreo 10:​24, 25) Daw ano kaayo kon mahantop naton ang kinatuhayan sa ulot sang serioso nga sayop kag sang pagkadihimpit nga maalamon kag mahigugmaon nga pasapayanan!​—⁠Manugwali 3:​1, 7; Colosas 3:⁠13.

Mas madali batunon sang mga tawo ang pagpalig-on sangsa pagmulay. Sa katunayan, kon ang mga indibiduwal nagabatyag nga ginamulay sing dimakatarunganon, ayhan labi pa gid nga himuon nila ang ila ginamulay nga pagginawi! Apang kon makatarunganon sila nga ginadayaw, nagalig-on sila, kag ginapahulag sila sa pag-uswag. (Hulubaton 12:18) Busa, kaangay ni Jesus, mangin makapalig-on kita kag wala gid ‘nagapalong sang pabilo nga nagairaw.’

Ano Naman ang mga Pagpaanggid?

Ang pagpamati sa maayong mga eksperiensia sang iban nga mga Cristiano makapapagsik katama. Si Jesus mismo nalipay sang nabatian niya ang kadalag-an sang iya mga disipulo sa pagbantala sang mensahe sang Ginharian. (Lucas 10:​17-21) Subong man, kon mabatian naton ang kadalag-an, maayong halimbawa, ukon integridad sang iban sa pagtuo, ginapalig-on kita kag nangin mas determinado nga magpabilin sa aton Cristianong dalanon.

Apang, ano naman kon ang report ginhatag sa paagi nga nagapanugda, ‘Indi ka kaangay sining mga Cristiano, kag dapat mo himuon ang kapin pa sangsa ginahimo mo’? Mahimo bala sugdan sang nagapamati ang isa ka mapagsik nga programa sang pag-uswag? Ayhan labi sia nga malas-ayan kag ayhan magauntat, ilabi na kon ang mga pagpaanggid masunson nga ginahimo ukon ginapabatibati. Mangin kaangay ini sang pagpamangkot sang isa ka ginikanan sa iya anak, ‘Ngaa indi mo pag-ilugon ang imo utod?’ Ina nga komento mahimo nga pagabangdan sang kaakig kag pagluya sing buot, kag wala man nagapauswag sang mas maayo nga pagginawi. Ang mga pagpaanggid may kaanggid man nga mga epekto sa mga hamtong, nagapaakig pa gani sa ila sa mga tawo nga ginpaanggid sa ila.

Indi kita makapaabot nga mahimo sang tanan ang palareho nga kadakuon sang pag-alagad sa Dios. Sa isa sang mga ilustrasyon ni Jesus, ginhatagan sang agalon ang iya mga ulipon sing isa, duha, ukon lima ka pilak nga talanton. Ginhatag ini sa “kada isa suno sa iya kaugalingon nga ikasarang.” Ang duha ka ulipon nga maalamon nga nagpatikang kag nagpadamo sang ila mga talanton gindayaw bangod matutom sila, bisan pa nga lainlain ang mga resulta sang ila binuhatan.​—⁠Mateo 25:​14-30.

Si apostol Pablo nagakaigo nga nagsulat: “Pamatud-an sang tagsatagsa kon ano ang iya kaugalingon nga buhat, kag nian may rason sia sa pagpabugal may kaangtanan sa iya kaugalingon lamang, kag indi kon ipaanggid sa iban nga tawo.” (Galacia 6:⁠4) Kon amo, agod mangin makapalig-on gid sa iban, dapat naton tinguhaan nga likawan ang maghimo sing negatibo nga mga pagpaanggid.

Pila ka Paagi sa Pagpalig-on

Ano ang sarang naton mahimo agod mapalig-on ang ginaluyahan kag malikawan ang ‘pagpalong sa pabilo nga nagairaw’? Ti, ang paghatag sing pagpalig-on indi isa ka butang nga nagasunod sing espesipiko nga pormula. Walay sapayan, ang aton mga pinamulong mahimo nga makapalig-on sa iban kon ginaaplikar naton ang mga prinsipio sang Biblia. Ano ang pila sini?

Mangin mapainubuson. Sa Filipos 2:​3, si Pablo naglaygay sa aton nga ‘dili maghimo sing bisan ano bangod sang pagpakigbais ukon egotismo.’ Sa baylo, dapat kita magpamulong kag maggawi sing mapainubuson. ‘Nga may pagpaubos sa hunahuna dapat naton bilangon ang iban nga mas mataas sa aton.’ Wala magsiling si Pablo nga indi naton paghunahunaon ang aton kaugalingon. Apang, dapat naton kilalahon nga ang tagsa ka tawo mas mataas sa aton sa pila ka paagi. Ang Griegong tinaga nga ginbadbad diri nga “mas mataas” nagapanugda nga ang isa ka tawo “nagalikaw sang iya mga mata gikan sa iya kaugalingon nga mga pribilehiyo, kag maukod nga ginabinagbinag ang mga ikasarang sang iban nga sa sini mas mataas sia.” (New Testament Word Studies, ni John Albert Bengel, Tomo 2, pahina 432) Kon himuon naton ini kag bilangon ang iban nga mas mataas, magapakig-angot kita sa ila sa mapainubuson nga paagi.

Magpakita sing pagtahod. Paagi sa pagpabutyag sang aton kaugalingon sing hanuot, mapaathag naton nga may pagsalig kita sa matutom nga mga masigkatumuluo, nagatamod sa ila subong mga indibiduwal nga maluyag magpahamuot sa Dios. Apang pananglitan nagakinahanglan sila sing espirituwal nga bulig. Nian magbulig kita sa matinahuron kag dungganon nga paagi. Amo sini ang ginsiling ni Pablo: “Sa pagpakita sing dungog sa isa kag isa manguna kamo.”​—⁠Roma 12:⁠10.

Mangin maayo nga manugpamati. Huo, agod mapalig-on yadtong may makapaluya nga mga problema, dapat kita mangin maayong mga manugpamati, indi mga manuglaygay. Sa baylo nga maghatag sing maabtik kag hapaw nga mga panugda, maghinguyang kita sing tion nga ginakinahanglan sa pag-aman sing Makasulatanhon nga mga giya nga makabulig sa karon nga mga kinahanglanon. Kon indi naton mahibaluan kon ano ang isiling, ang pagpanalawsaw sa Biblia magabulig sa aton sa pagpamulong sing malinugpayon kag pabakuron ang iban.

Mangin mahigugmaon. Dapat naton higugmaon yadtong luyag naton palig-unon. Kon ginapadapat sa mga masigkaalagad ni Jehova, ang aton gugma indi lamang pagpanghikot para sa ila labing maayo nga kaayuhan. Dapat ini magadalahig sing hanuot nga balatyagon. Kon may amo kita sina nga gugma sa tanan nga katawhan ni Jehova, ang aton mga pinamulong mangin makapalig-on sing tunay sa ila. Bisan pa nga dapat kita maghatag sing isa ka panugda para sa pag-uswag, indi mahimo nga ang aton isiling pagahangpon sing sayop ukon magatuga sing halit kon ang aton motibo indi lamang ang pagpabutyag sang aton pagtamod kundi ang paghatag sing mahigugmaon nga bulig. Subong sang ginsiling sing nagakaigo ni Pablo, “ang gugma nagapalig-on.”​—⁠1 Corinto 8:1; Filipos 2:4; 1 Pedro 1:⁠22.

Pirme Mangin Makapalig-on

Sa sining ital-ital nga “katapusan nga mga adlaw,” ang katawhan ni Jehova nagaatubang sing madamong pagtilaw. (2 Timoteo 3:​1-5) Indi katingalahan nga kon kaisa nagaantos sila sa daw dulunan sang ila pagbatas. Subong mga alagad ni Jehova, pat-od gid nga indi naton luyag maghambal ukon maghimo sing mga butang nga mangin kabangdanan nga ang bisan sin-o sa aton mga masigkatumuluo magabatyag kaangay sang mga pabilo nga nagairaw nga malapit na mapalong.

Daw ano ka importante, nian, nga magpalig-unay kita sa isa kag isa! Himuon naton ang tanan nga panikasog nga mangin makapalig-on paagi sa pagpaubos kag pagtahod sa naluyahan nga mga masigkasumilimba. Kabay nga mamati kita sing maayo kon magtu-ad sila sa aton kag pirme magtinguha nga buligan sila paagi sa pagpatuhoy sang igtalupangod sa Pulong sang Dios, ang Biblia. Labaw sa tanan, ipakita naton ang gugma, kay ining bunga sang balaan nga espiritu ni Jehova magabulig sa aton sa pagpabakod sa isa kag isa. Kabay nga indi gid kita magpamulong ukon magpanghikot sa bisan anong paagi nga mahimo ‘magpalong sang pabilo nga nagairaw.’