Si Jesus ang Aton Maluluy-on nga Mataas nga Saserdote

1-2. (a) Ngaa ginpadala ni Jehova sa duta ang iya Anak? (b) Ano ang binagbinagon naton sa sini nga artikulo? (Hebreo 5:7-9)

MGA 2,000 ka tuig na ang nagligad, ginpadala ni Jehova nga Dios sa duta ang iya pinakahamili nga Anak. Ngaa? Ang isa ka rason amo nga para hilwayon ang mga tawo sa sala kag kamatayon kag para dulaon ang tanan nga problema nga resulta sang ginhimo ni Satanas. (Juan 3:16; 1 Juan 3:8) Kabalo man si Jehova nga makabulig kay Jesus ang mga maeksperiensiahan niya bilang tawo para mangin isa sia ka maluluy-on nga Mataas nga Saserdote. Kag nangin Mataas nga Saserdote si Jesus pagkatapos sia nabawtismuhan sang 29 C.E.a

² Sa sini nga artikulo, binagbinagon naton kon paano nakabulig kay Jesus ang iya mga naeksperiensiahan diri sa duta nga mangin isa ka maluluy-on nga Mataas nga Saserdote. Importante gid nga maintiendihan naton ini kay makabulig ini sa aton nga indi matahap nga mangamuyo kay Jehova, ilabi na kon nasubuan kita bangod sa aton mga sala ukon kaluyahon.—Basaha ang Hebreo 5:7-9.

NAGKADTO SA DUTA ANG PINALANGGA NGA ANAK SANG DIOS

3-4. Ano nga mga pagbag-o ang naeksperiensiahan ni Jesus sang nagkadto sia sa duta?

³ Madamo sa aton ang nakaeksperiensia sang mga pagbag-o sa aton kabuhi. Halimbawa, posible nagsaylo kita sa iban nga lugar. Gani ginbiyaan naton ang aton nanamian nga balay kag napahilayo kita sa aton pamilya kag mga abyan. Mabudlay gid ini nga pagbag-o. Pero mas mabudlay pa gid ang mga pagbag-o nga naeksperiensiahan ni Jesus. Sia ang pinakauna kag pinakaimportante sa mga anak ni Jehova sa langit. Palangga gid sia ni Jehova, kag pirme sia malipayon kay nagaalagad sia sa “tuo nga kamot” sang Dios. (Sal. 16:11; Hulu. 8:30) Pero, ang Filipos 2:7 nagasiling nga “ginbiyaan niya ang tanan,” ukon ginbiyaan niya ang iya mataas nga posisyon sa langit para mag-istar sa duta upod sa indi perpekto nga mga tawo.

⁴ Binagbinaga man ang nangin kabuhi ni Jesus sa duta sang ginbun-ag sia kag sang bata pa sia. Pigado ang mga ginikanan ni Jesus. Masiling naton ini kay duha lang ka gamay pa nga pispis ang ginhalad nila sa templo pagkatapos sia ginbun-ag. (Lev. 12:8; Luc. 2:24) Sang nabal-an ni Hari Herodes ang parte sa pagkabun-ag ni Jesus, gusto sang hari nga ipapatay sia. Gani, nalagyo pakadto sa Egipto ang pamilya ni Jesus kag nagtener sila didto. (Mat. 2:13, 15) Daku gid ini nga pagbag-o kon ikumparar sa iya kabuhi sa langit.

5. Ano ang nakita ni Jesus sa duta, kag paano nakabulig ang iya mga naeksperiensiahan para mangin isa sia ka maluluy-on nga Mataas nga Saserdote? (Tan-awa man ang piktyur.)

⁵ Sang ari si Jesus sa duta, nakita niya ang pag-antos sang madamo nga tawo. Nabatyagan man niya ang ginabatyag sang mga tawo kon mapatyan sila sang pinalangga. Sigurado gid nga nasubuan sia sang napatay ang iya amay nga si Jose. Sa tion sang pagministeryo ni Jesus, may nakita sia nga mga tawo nga aruon, bulag, indi makalakat, kag mga ginikanan nga nasubuan bangod sa pagkapatay sang ila bata. Naluoy gid sia sa sini nga mga tawo. (Mat. 9:2, 6; 15:30; 20:34; Mar. 1:40, 41; Luc. 7:13) Sang ara si Jesus sa langit, nakita na niya nga nagaantos ang mga tawo. Pero sang nangin tawo sia, mas naintiendihan niya ang ila pag-antos. (Isa. 53:4) Bangod sa mga naeksperiensiahan ni Jesus sa duta, naintiendihan niya ang ginabatyag sang mga tawo sa lainlain nga sitwasyon. Kag pareho sa mga tawo, nakabatyag man si Jesus sang kasakit, kakapoy, kag kasubo.

NAGPAKITA SI JESUS SING SIMPATIYA SA MGA TAWO

6. Ano ang matun-an naton sa tagna ni manalagna Isaias parte sa simpatiya kag kaluoy ni Jesus? (Isaias 42:3)

⁶ Sa tion sang pagministeryo ni Jesus, nagpakita sia sing empatiya sa mga maluya kag sa mga ginhimuan sing malain. Paagi sini, gintuman niya ang tagna. Sa Hebreong Kasulatan, ang mga manggaranon kag mga makusog ginakumparar kon kaisa sa isa ka hardin nga pirme ginabunyagan ukon sa dalagku kag mabakod nga mga kahoy. (Sal. 92:12; Isa. 61:3; Jer. 31:12) Pero ang mga imol kag mga ginapigos ginkumparar sa mga butang nga indi na mapuslan sang iban, pareho sa tabun-ak nga nadugmok kag sa pabilo nga nagapiraw. (Basaha ang Isaias 42:3; Mat. 12:20) Gintuytuyan ni Jehova si manalagna Isaias nga gamiton ini nga mga halimbawa para itagna ang parte sa gugma kag kaluoy nga ipakita ni Jesus sa mga tawo nga ginapakanubo sang iban.

7-8. Paano gintuman ni Jesus ang tagna ni Isaias?

⁷ Ginpakita ni Mateo nga gintuman ni Jesus ining gintagna ni Isaias: “Indi niya pagbalion ang tabun-ak nga nadugmok, kag indi niya pagpalungon ang pabilo nga nagapiraw.” Para sa mga ginapigos, daw pareho sila sa tabun-ak nga nadugmok. Kag para sa mga nadulaan sing paglaum, daw pareho sila sa pabilo nga nagapiraw. Pero naghimo si Jesus sang mga milagro nga nakabulig sa sini nga mga tawo. Nalakip sa ila ang isa ka lalaki nga puno sang aro. Posible nagbatyag ini nga lalaki nga wala na sia sing paglaum nga mag-ayo kag indi na niya makaupod liwat ang iya pamilya kag mga abyan. (Luc. 5:12, 13) Nalakip man sa ila ang isa ka tawo nga bungol kag may diperensia sa paghambal. Posible nagalalain ini nga tawo kon masadya nga nagaistoryahanay ang iban kay indi niya sila mabatian. (Mar. 7:32, 33) Pero, indi lang amo ina.

⁸ Sang panahon ni Jesus, madamo nga Judiyo ang nagapati nga kon may balatian ukon diperensia sa lawas ang isa ka tawo, ginasilutan sia bangod sa iya mga sala ukon sa mga sala sang iya mga ginikanan. (Juan 9:2) Bangod sa sining sala nga pagpati, ginpakanubo sang iban ang mga may balatian ukon diperensia sa lawas. Pero gin-ayo sila ni Jesus, gani natuman ang tagna ni Isaias. Paagi sini, narealisar nila nga nagaulikid sa ila ang Dios. Ano ang matun-an naton sa sini parte sa pagtan-aw sa aton ni Jesus subong?

9. Paano ginapakita sang Hebreo 4:15, 16 nga may simpatiya gid sa indi perpekto nga mga tawo ang aton Mataas nga Saserdote sa langit?

⁹ Basaha ang Hebreo 4:15, 16. Makasalig kita nga pakitaan gid kita pirme ni Jesus sing kahanuklog ukon simpatiya. Ano ang buot silingon sini? Ang Griego nga tinaga nga gin-translate “kahanuklog” nagakahulugan nga ginabatyag man naton ang kasubo kag pag-antos sang iban. Sa Hebreo 10:34, gingamit ni Pablo ang pareho nga Griego nga tinaga para ipakita nga may simpatiya kita sa mga ara sa prisuhan. Kon basahon naton ang parte sa mga milagro ni Jesus para buligan ang mga tawo, makita naton nga naluoy gid sia sa ila. Gin-ayo niya sila indi bangod dapat niya ini himuon, kundi bangod nagaulikid sia sa ila kag gusto niya sila buligan. Halimbawa, sang gin-ayo niya ang lalaki nga may aro, indi man kinahanglan nga tandugon gid niya sia. Pero gintandog sia ni Jesus. Posible nga madamo na nga tinuig nga wala sing may nagtandog sa iya nga isa ka tawo. Sa bahin naman sang tawo nga bungol, gindala sia ni Jesus sa unhan nga malayo sa mga tawo kag didto niya sia gin-ayo. Binagbinaga man ang natabo sang may isa ka mahinulsulon nga babayi nga naghinaw sa tiil ni Jesus paagi sa iya luha kag ginpahiran ini sang iya buhok. Ginpakanubo sang isa ka Fariseo ini nga babayi, pero ginpangapinan sia ni Jesus. (Mat. 8:3; Mar. 7:33; Luc. 7:44) Wala ginlikawan ni Jesus ang mga may diperensia sa lawas ukon ang mga nakahimo sang serioso nga sala. Sa baylo, ginpabatyag niya sa ila nga palangga niya sila kag indi sila dapat matahap sa iya. Gani, makasalig kita nga may simpatiya man si Jesus sa aton.

ILUGA ANG ATON MATAAS NGA SASERDOTE

10. Ano ang mga puede naton gamiton para buligan ang mga bungol kag bulag? (Tan-awa man ang mga piktyur.)

¹⁰ Bilang matutom nga mga sumulunod ni Jesus, ginatinguhaan gid naton nga ilugon sia sa pagpakita sing gugma, simpatiya, kag kaluoy sa iban. (1 Ped. 2:21; 3:8) Wala kita sing ikasarang nga ayuhon ang mga bungol ukon bulag, pero mabuligan naton sila nga magtuon parte kay Jehova kag mangin suod sa iya. Halimbawa, matigayon na sa sobra 100 ka lenguahe sa sign ang aton mga publikasyon nga nabase sa Biblia. Para naman sa mga indi makakita sing maayo ukon bulag, may mga publikasyon kita sa braille sa sobra 60 ka lenguahe. Kag may mga video man nga may audio description sa sobra 100 ka lenguahe. Ginhimo ini tanan para buligan ang mga bungol kag bulag nga mangin suod kay Jehova kag sa iya Anak.

11. Paano ginapakita sang organisasyon ni Jehova ang kaluoy ni Jesus sa tanan nga tawo? (Binuhatan 2:5-7, 33) (Tan-awa man ang mga piktyur.)

¹¹ Madamo gid sing ginahimo ang organisasyon ni Jehova para buligan ang tanan nga tawo. Dumduma nga pagkatapos ginbanhaw si Jesus, ginbubo niya ang balaan nga espiritu sa iya mga disipulo. Ginhimo niya ini para mabatian sang tanan nga tawo nga ara sa kapiestahan sang Pentecostes ang maayong balita sa ‘ila kaugalingon nga lenguahe.’ (Basaha ang Binuhatan 2:5-7, 33.) Bilang pagsunod sa pagpanguna ni Jesus, nagahimo ang organisasyon sang mga publikasyon nga nabase sa Biblia sa sobra 1,000 ka lenguahe. Ang pila sa sini nga mga lenguahe diutay lang gid nga mga tawo ang nagahambal. Ang halimbawa sa sini amo ang pila ka lenguahe sang mga Amerindian sa North kag South America. Pero naghimo ang organisasyon sang mga publikasyon sa sobra 160 sa sini nga mga lenguahe para matun-an nila ang maayong balita. Kag may mga publikasyon man kita sa sobra 20 ka lenguahe sang mga Romany. Linibo na ka tawo nga nagahambal sini nga mga lenguahe ang nagaalagad na kay Jehova subong.

12. Ano pa ang ginahimo sang organisasyon ni Jehova para buligan ang mga tawo?

¹² Magluwas sa pagbulig sa mga tawo nga matun-an ang maayong balita, ginabuligan man sang organisasyon ni Jehova ang mga nahalitan sang kalamidad. Linibo ka boluntaryo ang handa gid pirme magbulig sa ila mga kauturan. Nagaaman man ang organisasyon sang simple nga mga tilipunan nga ginagamit sang mga tawo para tun-an ang parte sa gugma sang Dios sa ila.

MABULIGAN KA SANG ATON MATAAS NGA SASERDOTE

13. Paano kita ginabuligan ni Jesus?

¹³ Bilang aton maayo nga manugbantay, ginasigurado ni Jesus nga maamanan niya kita sang aton espirituwal nga mga kinahanglanon. (Juan 10:14; Efe. 4:7) May mga tion nga posible makabatyag kita nga daw pareho kita sa pabilo nga nagapiraw ukon tabun-ak nga nadugmok. Posible nga grabe ang pagluya sang aton buot bangod may malala kita nga balatian, bangod nakahimo kita sang serioso nga sala, ukon bangod indi maayo ang aton kaangtanan sa isa ka utod. Posible ginapamensar naton pirme ang aton problema kag nabudlayan kita magpokus sa aton paglaum sa palaabuton. Pero, dumduma nga kabalo si Jesus sang imo sitwasyon kag naintiendihan niya ang imo ginabatyag. Kag bangod naluoy sia sa imo, buligan ka gid niya. Halimbawa, kon naluyahan ka, puede niya gamiton ang balaan nga espiritu para pabakuron ka. (Juan 16:7; Tito 3:6) Puede man gamiton ni Jesus ang “mga dulot nga mga lalaki” kag ang imo mga kauturan para palig-unon ka kag buligan.—Efe. 4:8.

14. Ano ang puede naton himuon kon naluyahan kita?

¹⁴ Kon naluyahan ka, dumduma nga si Jesus amo ang aton Mataas nga Saserdote kag may ginahimo sia para sa imo. Dumduma nga ginpadala sia ni Jehova sa duta indi lang para ihatag ang iya kabuhi bilang gawad, kundi para buligan sia nga mas maintiendihan ang mga problema sang indi perpekto nga mga tawo. Kon naluyahan kita bangod sa aton mga sala ukon kaluyahon, handa gid si Jesus nga buligan kita ‘sa tion nga nagakinahanglan kita sang bulig.’—Heb. 4:15, 16.

15. Paano nakabalik sa kongregasyon ang isa nga nagbiya kay Jehova?

¹⁵ Ginagiyahan man ni Jesus ang iya katawhan para buligan ang mga nagbiya kay Jehova nga magbalik sa Iya. (Mat. 18:12, 13) Binagbinaga ang eksperiensia ni Stefano.b Pagligad sang 12 ka tuig pagkatapos sia ginsikway sa kongregasyon, nagdesisyon sia nga mag-attend sa miting. Nagsiling sia: “Nahuya gid ako, pero gusto ko nga mangin bahin liwat sang pamilya ni Jehova. Sang gin-istorya ako sang mga gulang, ginpabatyag nila sa akon nga gusto gid nila nga magbalik ako. May mga tion nga pamatyag ko wala ako sing pulos kag wala na ako sing paglaum. Pero ginpahanumdom sa akon sang mga gulang nga gusto ni Jehova kag ni Jesus nga indi ako mag-untat sa akon pagpanikasog nga makabalik. Sang nakapanumbalik ako, gin-abiabi gid ako kag ang akon pamilya sang bilog nga kongregasyon. Sang ulihi, nag-Bible study ang akon asawa. Subong, nagaalagad kami kay Jehova bilang isa ka pamilya.” Sigurado nga nalipay gid ang aton Mataas nga Saserdote kon ginabuligan sang bilog nga kongregasyon ang mga gusto magbalik kay Jehova.

16. Ngaa nagapasalamat gid kita sa aton maluluy-on nga Mataas nga Saserdote?

¹⁶ Sang ari si Jesus sa duta, madamo nga tawo ang ginbuligan niya sa tion nga kinahanglan gid nila ini. Subong, makasalig gid kita nga buligan niya kita kon kinahanglan naton ang bulig. Kag sa bag-ong kalibutan nga lapit na lang gid mag-abot, buligan niya kita para mangin perpekto kita nga wala na ang epekto sang sala. Nagapasalamat gid kita sa aton Dios nga si Jehova. Palangga gid niya kita kag naluoy gid sia sa aton, gani ginhatag niya ang iya Anak para mangin aton maluluy-on nga Mataas nga Saserdote.