Ginhimo Nila ang Kabubut-on ni Jehova

Si Moises kag si Aaron—Maisugon nga mga Manugbantala sang Pulong sang Dios

HANDURAWA ang danyag: Ang otsenta anyos nga si Moises kag ang iya utod, si Aaron, nagatindog sa atubangan sang pinakagamhanan nga tawo sa duta​—⁠ang Paraon sang Egipto. Sa mga Egiptohanon indi lamang isa ka tiglawas sang mga dios ini nga tawo. Nagapati sila nga sia mismo isa ka dios. Gintamod sia subong ang inkarnasyon ni Horus, ang diosdios nga may ulo sang dapay. Kaupod ni Isis kag ni Osiris, si Horus naghuman sang pangunang trinidad sa tunga sang mga dios kag mga diosa sang Egipto.

Matalupangdan gid sang bisan sin-o nga nagapalapit kay Paraon ang makahaladlok nga ulo sang kobra nga nagaulbo sa tunga sang iya korona. Ginakunokuno nga ining man-ug makabuga sing kalayo kag kalaglagan kay bisan sin-o nga mga kaaway ni Paraon. Karon si Moises kag si Aaron nagatindog sa atubangan sining dios-hari nga may pinasahi nga pangabay​—⁠nga palakton niya ang naulipon nga mga Israelinhon agod makahiwat sila sing kapiestahan sa ila Dios, si Jehova.​—⁠Exodo 5:⁠1.

Gintagna na ni Jehova nga ang tagipusuon ni Paraon mangin matig-a. Busa, wala makibot si Moises kag si Aaron sa iya mabinatukon nga sabat: “Sin-o bala si Jehova, nga magpamati ako sa iya tingog kag magpalakat sang Israel? Wala ako makakilala kay Jehova kag, labot pa, indi ko pagpalakton ang Israel.” (Exodo 4:21; 5:⁠2) Busa, ginhimo ang paghanda para sa isa ka dramatiko nga komprontasyon. Sa masunod nga pag-atubangay, ginpakita ni Moises kag ni Aaron ang makahalawhaw nga pamatuod kay Paraon nga gintiglawas nila ang matuod kag labing gamhanan nga Dios.

Isa ka Milagro ang Natabo

Subong sang ginsugo ni Jehova, si Aaron naghimo sing milagro nga nagpamatuod sang pagkalabaw ni Jehova sa mga dios sang Egipto. Ginhaboy niya ang iya sungkod sa atubangan ni Paraon, kag sa gilayon nangin isa ini ka daku nga man-ug! Naligban sa sining milagro, ginpatawag ni Paraon ang iya nagabuhat sing salamangka nga mga saserdote.a Sa bulig sang mga gahom sang demonyo, nahimo sining mga lalaki ang kaanggid nga butang sa ila kaugalingon nga mga sungkod.

Kon nalipay si Paraon kag ang iya mga saserdote, ini sa makadali lamang. Handurawa ang ila mga nawong sang ginhalunhon sang man-ug ni Aaron ang ila mga man-ug, sing isa-isa! Nakita sang tanan nga yadto didto nga ang mga diosdios sang Egipto indi makatupong sa matuod nga Dios, si Jehova.​—⁠Exodo 7:​8-13.

Apang, bisan pagkatapos sini, ang tagipusuon ni Paraon nagpabilin nga matig-a. Pagkatapos lamang nga nagpadala si Jehova sing napulo ka malaglagon nga kalalat-an sa Egipto nga sang ulihi ginsilingan ni Paraon si Moises kag si Aaron: “Tindog kamo, halin kamo gikan sa tunga sang akon katawhan, kamo kag ang katawhan sang Israel, kag lakat kamo, alagda si Jehova, suno sa ginsiling ninyo.”​—⁠Exodo 12:⁠31.

Mga Leksion Para sa Aton

Ano ang nagbulig kanday Moises kag Aaron nga makapalapit sa gamhanan nga Paraon sang Egipto? Sang primero, si Moises nagpakita sing kakulang sing pagsalig sa iya ikasarang, nagasiling nga “makuli [sia] sa paghambal kag mabug-at sing dila.” Bisan pagkatapos nga ginpasalig nga sakdagon ni Jehova, nakitluoy sia: “Ipadala, palihug, ang iban nga tawo.” Sa iban nga hambal, nakitluoy si Moises nga iban na lang ang ipadala sang Dios. (Exodo 4:​10, 13) Walay sapayan, gingamit ni Jehova ang mahagop nga si Moises, naghatag sa iya sing kaalam kag kusog nga kinahanglanon sa pagtuman sang iya hilikuton.​—⁠Numeros 12:⁠3.

Karon, ang mga alagad ni Jehova nga Dios kag ni Jesucristo nagatuman sang sugo nga ‘himuon nga disipulo ang katawhan sang tanan nga kapungsuran.’ (Mateo 28:​19, 20) Agod mabuhat ang aton bahin sa pagtuman sini nga sugo, dapat naton gamiton sa labing maayo ang Makasulatanhon nga ihibalo kag ang bisan ano man nga mga kinaiya nga ginapanag-iyahan naton. (1 Timoteo 4:​13-16) Sa baylo nga hunahunaon ang aton mga kakulangan, batunon naton nga may pagtuo ang bisan anong hilikuton nga ginhatag sa aton sang Dios. Hanason niya kita kag pabakuron sa paghimo sang iya kabubut-on.​—⁠2 Corinto 3:​5, 6; Filipos 4:⁠13.

Sanglit magaatubang si Moises sing tawhanon kag yawan-on nga pagpamatok, kinahanglan gid niya ang labaw sa tawo nga bulig. Gani, ginpasalig sia ni Jehova: “Tan-awa, ginahimo ko ikaw nga Dios kay Paraon.” (Exodo 7:⁠1) Huo, si Moises may pagsakdag kag awtoridad sang Dios. Upod ang espiritu ni Jehova sa iya, wala sing rason si Moises nga magkahadlok kay Paraon ukon sa mga kaupdanan sinang bugalon nga gumalahom.

Dapat man kita magsalig sa balaan nga espiritu, ukon aktibo nga puwersa ni Jehova, sa pagtuman sang aton ministeryo. (Juan 14:26; 15:​26, 27) Paagi sa pagsakdag sang Dios sarang naton mapalanog ang mga pulong ni David, nga nag-amba: “Sa Dios nagasalig ako. Indi ako magkahadlok. Ano bala ang mahimo sa akon sang tawo?”​—⁠Salmo 56:⁠11.

Sa iya kaluoy wala pagpabay-i ni Jehova si Moises nga nagaisahanon sa iya hilikuton. Sa baylo, ang Dios nagsiling: “Si Aaron nga imo utod mangin imo manalagna. Ipamulong mo ang tanan nga ginasugo ko sa imo; kag si Aaron nga imo utod magapamulong kay Paraon.” (Exodo 7:​1, 2) Daw ano ka mahigugmaon si Jehova nga magapanghikot suno sa kon ano lamang ang makatarunganon nga masarangan ni Moises!

Ang Dios nagaaman sa aton sing isa ka katilingban sang mga masigka-Cristiano nga nagabaton sang hangkat nga mangin mga Saksi ni Jehova, ang Labing Mataas. (1 Pedro 5:⁠9) Busa, walay sapayan sang mga sablag nga mahimo naton masumalang, mangin kaangay kita kay Moises kag kay Aaron​—⁠maisugon nga mga manugbantala sang pulong sang Dios.

[Footnote]

[Retrato sa pahina 25]

Si Moises kag si Aaron maisugon nga nagtiglawas kay Jehova sa atubangan ni Paraon