Pag-alagad Subong mga Mensahero sang Diosnon nga Paghidait
“Daw ano katahom sa mga bukid ang mga tiil . . . sang isa nga nagabantala sing paghidait.”—ISAIAS 52:7.
1, 2. (a) Subong sang gintagna sa Isaias 52:7, anong maayong balita ang dapat ibantala? (b) Ano ang buot silingon sang matagnaon nga mga pinamulong ni Isaias sa bahin sang dumaan nga Israel?
MAY maayong balita nga dapat ibantala! Balita ini tuhoy sa paghidait—sa matuod nga paghidait. Mensahe ini sang kaluwasan nga may kahilabtanan sa Ginharian sang Dios. Si manalagna Isaias nagsulat anay tuhoy sini, kag ang iya pinamulong gintipigan para sa aton sa Isaias 52:7, diin aton mabasa: “Daw ano katahom sa mga bukid ang mga tiil sang isa nga nagadala sing maayong balita, sang isa nga nagabantala sing paghidait, sang isa nga nagadala sing maayong balita tuhoy sa butang nga maayo pa, sang isa nga nagabantala sang kaluwasan, sang isa nga nagasiling sa Sion: ‘Ang imo Dios naghari na!’ ”
2 Gin-inspirar ni Jehova si Isaias nga manalagna niya nga isulat yadto nga mensahe para sa kaayuhan sang dumaan nga Israel kag para sa kaayuhan naton karon. Ano ang buot silingon sini? Sang ginsulat ni Isaias ining mga pinamulong, ang naaminhan nga ginharian sang Israel mahimo nga gindala na sang mga Asiriahanon subong mga tinapok. Sa ulihi, ang mga pumuluyo sang nabagatnan nga ginharian sang Juda pagadalhon man subong mga tinapok sa Babilonia. Mga adlaw yadto sang kasakit kag kagamo sa pungsod bangod ang katawhan nangin dimatinumanon kay Jehova kag busa wala sing paghidait sa Dios. Suno sa ginsiling ni Jehova sa ila, ang ila makasasala nga pagginawi nagpahamulag sa ila kag sa ila Dios. (Isaias 42:24; 59:2-4) Apang, paagi kay Isaias, si Jehova nagtagna nga sa nagakaigo nga tion ang mga gawang sang Babilonia pagabuksan. Ang katawhan sang Dios makabalik na sing hilway sa ila dutang natawhan, agod tukuron didto liwat ang templo ni Jehova. Ang Sion ipasag-uli, kag ang pagsimba sa matuod nga Dios pagahimuon liwat sa Jerusalem.—Isaias 44:28; 52:1, 2.
3. Paano ang saad sang pagpasag-uli sa Israel nangin isa man ka tagna sang paghidait?
3 Ining saad sang kahilwayan isa man ka tagna sang paghidait. Ang pagpabalik sa mga Israelinhon sa duta nga ginhatag ni Jehova sa ila mangin pamatuod sang kaluoy sang Dios kag sang paghinulsol nila. Magapakita ini nga may paghidait sila sa Dios.—Isaias 14:1; 48:17, 18.
“Ang Imo Dios Naghari Na!”
4. (a) Sa anong kahulugan mahimo masiling sang 537 B.C.E. nga ‘si Jehova naghari na’? (b) Paano ginmaniobra ni Jehova ang mga hitabo sa kaayuhan sang iya katawhan sang ulihi nga mga tinuig?
4 Sang ginhimo ni Jehova ining paghilway sang 537 B.C.E., ang Sion nagakaigo nga ginpahibalo: “Ang imo Dios naghari na!” Matuod, si Jehova amo ang “Hari nga dayon.” (Bugna 15:3) Apang ini nga paghilway sa iya katawhan isa ka bag-o nga pagpasundayag sang iya pagkasoberano. Sa talalupangdon nga paagi, ginpakita sini nga ang iya gahom kag awtoridad labaw sangsa labing gamhanan nga tawhanon nga emperyo tubtob sadto nga tion. (Jeremias 51:56, 57) Bangod sang pagpanghikot sang espiritu ni Jehova, ang iban pa nga mga paghimbon batok sa iya katawhan napaslawan. (Ester 9:24, 25) Sa liwat kag liwat si Jehova nagpasilabot sa nanuhaytuhay nga mga paagi agod ang mga hari sang Medo-Persia magapanghikot suno sa katumanan sang iya soberanong kabubut-on. (Zacarias 4:6) Ang makatilingala nga mga hitabo sadto anay ginrekord para sa aton sa mga tulun-an sang Esdras, Nehemias, Hageo, kag Zacarias sa Biblia. Kag makapabakod gid sing pagtuo nga repasuhon ini!
5. Anong importante nga mga hitabo ang ginatudlo sa Isaias 52:13–53:12?
5 Apang, ang natabo sang 537 B.C.E. kag pagkatapos sini umpisa pa lamang. Pagkatapos gid sang tagna sang pagpasag-uli sa kapitulo 52, si Isaias nagsulat nahanungod sa pagkari sang Mesias. (Isaias 52:13–53:12) Paagi sa Mesias, nga amo si Jesucristo, si Jehova magahatag sing mensahe sang kaluwasan kag paghidait nga may daku pa nga kahulugan sangsa natabo sang 537 B.C.E.
Ang Labing Daku nga Mensahero sang Paghidait ni Jehova
6. Sin-o ang labing daku nga mensahero sang paghidait ni Jehova, kag anong hilikuton ang gin-aplikar niya sa iya kaugalingon?
6 Si Jesucristo amo ang labing daku nga mensahero sang paghidait ni Jehova. Sia amo ang Pulong sang Dios, ang personal nga Humalambal ni Jehova. (Juan 1:14) Nahisanto sa sini, mga pila ka tion pagkatapos mabawtismuhan sa Suba sang Jordan, nagtindog si Jesus sa sinagoga sa Nasaret kag ginbasa sing mabaskog ang iya hilikuton gikan sa Isaias kapitulo 61. Gin-athag sadto nga hilikuton nga ang pagpadala sa iya sa pagbantala nagadalahig sang “paghilway” kag “pagpasag-uli,” subong man sang kahigayunan nga kahamut-an ni Jehova. Apang, indi lamang mensahe sang paghidait ang ginbantala ni Jesus. Ginpadala man sia sang Dios sa paghatag sing sadsaran para sa mapinadayunon nga paghidait.—Lucas 4:16-21.
7. Ano ang mga resulta sang pagpakighidait sa Dios nga ginpaposible paagi kay Jesucristo?
7 Sang nabun-ag si Jesus, ang mga anghel nagpakita sa mga manugbantay malapit sa Betlehem, nga nagadayaw sa Dios kag nagasiling: “Himaya sa Dios sa kahitaasan, kag sa duta paghidait sa tunga sang mga tawo nga may maayong kabubut-on.” (Lucas 2:8, 13, 14) Huo, may paghidait para sa mga ginkaluy-an sang Dios bangod nagtuo sila sa aman nga ginhimo niya paagi sa iya Anak. Ano ang kahulugan sina? Nagakahulugan ini nga bisan pa ang mga tawo nabun-ag sa sala, makatigayon sila sing matinlo nga tindog sa Dios, sing isa ka nahamut-an nga kaangtanan upod sa iya. (Roma 5:1) Maagom nila ang nasulod nga kalinong, ang paghidait, nga indi maagom sa iban pa nga paagi. Sa gintalana nga tion sang Dios, ang tanan nga epekto sang sala nga napanubli kay Adan, lakip na ang balatian kag kamatayon, pagadulaon. Wala na sing tawo nga bulag ukon bungol ukon piang. Ang makabalang-aw nga kaluyahon kag makapahanusbo nga mga balatian sa hunahuna pagadulaon sing permanente. Mahimo na magkabuhi sing himpit sing dayon.—Isaias 33:24; Mateo 9:35; Juan 3:16.
8. Kay sin-o ginatanyag ang diosnon nga paghidait?
8 Kay sin-o ginatanyag ang diosnon nga paghidait? Ginatanyag ini sa tanan nga nagatuo kay Jesucristo. Si apostol Pablo nagsulat nga ‘ginpakamaayo sang Dios paagi kay Cristo nga ipasag-uli sa iya kaugalingon ang tanan iban pa nga butang sa pagpakighidait paagi sa dugo nga ginpatulo ni Jesus sa usok sang pag-antos.’ Gindugang sang apostol nga ining pagpasag-uli magalakip sa “mga butang sa langit”—kon sayuron, sa mga mangin masigkamanunubli ni Cristo sa langit. Magalakip man ini sa “mga butang sa duta”—kon sayuron, sa mga ginhatagan sing kahigayunan nga magkabuhi sing dayon sa sining duta kon bug-os na ini nga mangin Paraiso. (Colosas 1:19, 20) Bangod sang paghimulos nila sa balor sang halad ni Jesus kag bangod sang ila tinagipusuon nga pagtuman sa Dios, sila tanan makatigayon sing mainit nga pagpakig-abyan sa Dios.—Ipaanggid ang Santiago 2:22, 23.
9. (a) Ang paghidait sa Dios nagaimpluwensia sang anong iban pa nga mga kaangtanan? (b) Sa tuyo nga dalhon ang mapinadayunon nga paghidait bisan diin, anong awtoridad ang ginhatag ni Jehova sa iya Anak?
9 Importante gid ining paghidait sa Dios! Kon wala sing paghidait sa Dios, wala man sing dayon ukon makahulugan nga paghidait sa bisan anong iban nga kaangtanan. Ang paghidait kay Jehova amo ang sadsaran para sa matuod nga paghidait sa duta. (Isaias 57:19-21) Sing nagakaigo, si Jesucristo amo ang Prinsipe sang Paghidait. (Isaias 9:6) Sa sining isa nga paagi sa iya ang mga tawo sarang makapasag-uli sa Dios, gintugyan man ni Jehova ang awtoridad sa paggahom. (Daniel 7:13, 14) Kag nahanungod sa mga resulta sang prinsipenhon nga paggahom ni Jesus sa katawhan, si Jehova nagsaad: “Sa paghidait wala sing katapusan.”—Isaias 9:7; Salmo 72:7.
10. Paano si Jesus nagpahamtang sing halimbawa sa pagbantala sang mensahe sang paghidait sang Dios?
10 Ang mensahe sang paghidait sang Dios kinahanglan sang tanan nga katawhan. Si Jesus personal nga nagpahamtang sing makugi nga halimbawa sang pagbantala sini. Nagbantala sia sa templo sa Jerusalem, sa kilid sang bukid, sa higad sang dalan, sa isa ka Samariahanon nga babayi sa bubon, kag sa mga puluy-an sang mga tawo. Bisan diin nga may tawo, ginhimuslan ni Jesus ang mga kahigayunan nga mabantala ang nahanungod sa paghidait kag sa Ginharian sang Dios.—Mateo 4:18, 19; 5:1, 2; 9:9; 26:55; Marcos 6:34; Lucas 19:1-10; Juan 4:5-26.
Ginhanas sa Paglakat sa mga Tikang ni Cristo
11. Sa anong hilikuton ginhanas ni Jesus ang iya mga disipulo?
11 Gintudluan ni Jesus ang iya mga disipulo nga ibantala ang mensahe sang paghidait sang Dios. Subong nga si Jesus amo ang “matutom kag matuod nga saksi” ni Jehova, nahangpan nila nga may obligasyon man sila nga magpanaksi. (Bugna 3:14; Isaias 43:10-12) Ginkabig nila si Jesus subong ila lider.
12. Paano ginpakita ni Pablo ang importansia sang pagbantala nga hilikuton?
12 Nangatarungan si apostol Pablo tuhoy sa importansia sang pagbantala nga hilikuton, nga nagasiling: “Ang Kasulatan nagasiling: ‘Wala sing bisan sin-o nga nagatuo sa iya ang mapaslawan.’ ” Buot silingon, wala sing isa nga nagatuo kay Jesucristo subong Pangulo nga Ahente ni Jehova sang kaluwasan ang mapaslawan. Kag ang etniko nga ginhalinan sang isa wala nagahimo kay bisan sin-o nga indi kalipikado, kay si Pablo nagdugang: “Kay wala sing kinatuhayan sa ulot sang Judiyo kag Griego, kay isa lamang ang Ginuo sa tanan, nga manggaranon sa tanan nga nagapanawag sa iya. Kay ‘ang bisan sin-o nga nagatawag sa ngalan ni Jehova maluwas.’ ” (Roma 10:11-13) Apang paano matun-an sang mga tawo ina nga kahigayunan?
13. Ano ang ginkinahanglan agod mabatian sang mga tawo ang maayong balita, kag ano ang reaksion sang unang-siglo nga mga Cristiano sa sadto nga kinahanglanon?
13 Ginhinun-anunan ni Pablo ina nga kinahanglanon paagi sa pagpakiana sing mga pamangkot nga dapat hunahunaon sang tagsa ka alagad ni Jehova. Ang apostol namangkot: “Apang, paano bala ang pagpanawag nila sa iya nga wala nila matuuhi? Kag, paano bala ang pagtuo nila sa iya nga wala nila mabatii? Kag, paano bala ang pagkabati nila kon walay manugwali? Kag, paano bala ang pagwali nila kon indi sila pag-ipadala?” (Roma 10:14, 15) Ang rekord sang unang-siglo nga Cristianismo nagahatag sing maathag nga pamatuod nga ginsunod sang mga lalaki kag mga babayi, bata kag tigulang, ang halimbawa nga ginpahamtang ni Jesucristo kag sang iya mga apostoles. Nangin makugi nga mga manugbantala sila sing maayong balita. Sa pag-ilog kay Jesus, ginbantalaan nila ang mga tawo bisan diin man sila. Bangod indi nila luyag nga may malaktawan, ginhimo nila ang ila ministeryo sa publiko nga mga duog kag sa pamalaybalay.—Binuhatan 17:17; 20:20.
14. Paano nagmatuod nga ang “mga tiil” sang mga nagabantala sang maayong balita “matahom”?
14 Sa pagkamatuod, wala pagbatuna sing maayo sang tanan ang mga Cristianong manugbantala. Apang, ang ginkutlo ni Pablo gikan sa Isaias 52:7 napamatud-an nga matuod. Pagkatapos sang pamangkot, ‘Paano bala ang pagwali nila kon indi sila pag-ipadala?’ nagdugang sia: “Subong sang nasulat na: ‘Daw ano katahom sang mga tiil sang mga nagabantala sang maayong balita sang maayong mga butang!’ ” Wala ginakabig sang kalabanan sa aton karon ang aton mga tiil subong matahom. Gani, nian, ano ang buot silingon sini? Ang mga tiil amo ang kinaandan na nga nagapahulag sa tawo samtang nagalakat sia sa pagbantala sa iban. Ina nga mga tiil nagapakilala gid sa tawo. Kag makapat-od kita nga para sa madamo nga nakabati sing maayong balita gikan sa mga apostoles kag sa iban pa nga unang-siglo nga mga disipulo ni Jesucristo, ining unang mga Cristiano matahom gid nga talan-awon. (Binuhatan 16:13-15) Labaw sa sina, hamili sila sa panulok sang Dios.
15, 16. (a) Paano ginpakita sang unang mga Cristiano nga mga mensahero gid sila sang paghidait? (b) Ano ang makabulig sa aton agod mahimo naton ang aton ministeryo nga kaanggid sa ginhimo sang unang-siglo nga mga Cristiano?
15 Ang mga sumulunod ni Jesus may mensahe sang paghidait, kag gindala nila ini sa mahidaiton nga paagi. Ginhatag ni Jesus sa iya mga disipulo ining instruksion: “Sa bisan diin nga balay nga magsulod kamo siling kamo anay, ‘Kabay nga may paghidait sa sining balay.’ Kag kon may abyan sang paghidait didto, ang inyo paghidait magapabilin sa iya. Apang kon wala, magabalik ini sa imo.” (Lucas 10:5, 6) Ang sha·lohmʹ, ukon “paghidait,” isa ka tradisyunal nga panamyaw sang mga Judiyo. Apang ang instruksion ni Jesus nagalakip sing labaw pa sa sini. Subong “mga embahador nga salili kay Cristo,” ginlaygayan sang iya hinaplas nga mga disipulo ang mga tawo: “Magpasag-uli kamo sa Dios.” (2 Corinto 5:20) Nahisanto sa mga instruksion ni Jesus, ginsugiran nila ang mga tawo tuhoy sa Ginharian sang Dios kag kon ano ang kahulugan sini para sa ila subong mga indibiduwal. Ang mga namati nakabaton sing pagpakamaayo; ang mga nagsikway sang mensahe wala ginpakamaayo.
16 Ginahimo man karon sang mga Saksi ni Jehova ang ila ministeryo sa amo man nga paagi. Ang maayong balita nga ginadala nila sa mga tawo indi ila; iya ini sang Isa nga nagpadala sa ila. Ang ila hilikuton amo ang pagbantala sini. Kon batunon ini sang mga tawo, ginalinya nila ang ila kaugalingon para sa makadalayaw nga mga pagpakamaayo. Kon sikwayon nila ini, ginasikway nila ang pagpakighidait kay Jehova nga Dios kag sa iya Anak, si Jesucristo.—Lucas 10:16.
Mahidaiton sa Magamo nga Kalibutan
17. Bisan kon ginaatubang sang dimatinahuron nga mga tawo, paano kita dapat maggawi, kag ngaa?
17 Ano man ang reaksion sang mga tawo, dapat dumdumon sang mga alagad ni Jehova nga mga mensahero sila sang diosnon nga paghidait. Ang mga tawo sa kalibutan mahimo makigbais sing mainit kag magapakita sing kaakig paagi sa pagmulay ukon pagbuyayaw sa mga nagapaakig sa ila. Ayhan ginhimo ini anay sang pila sa aton. Apang, kon ginsul-ob na naton ang bag-ong personalidad kag indi na bahin sang kalibutan, indi naton pagailugon ang ila mga dalanon. (Efeso 4:23, 24, 31; Santiago 1:19, 20) Walay sapayan sang reaksion sang iban, sundon naton ang laygay: “Kon mahimo, sa masarangan ninyo, magpakighidait sa tanan nga tawo.”—Roma 12:18.
18. Paano kita magasabat kon ang isa ka opisyal sang gobierno indi mahinuklugon sa aton, kag ngaa?
18 Ang aton ministeryo mahimo magdala sa aton kon kaisa sa atubangan sang mga opisyales sang gobierno. Nagapahayag sang ila awtoridad, mahimo nila ‘kita pangayuan’ sing paathag kon ngaa ginahimo naton ang pila ka butang ukon ngaa nagadumili kita sa pagpasilabot sa pila ka hilikuton. Ayhan luyag nila mahibaluan kon ngaa ginabantala naton ang mensahe nga ginadala naton—isa nga nagabuyagyag sa butig nga relihion kag nagasugid sang katapusan sang karon nga sistema sang mga butang. Ang aton pagtahod sa halimbawa nga ginpahamtang ni Cristo magapahulag sa aton sa pagpakita sing kalulo kag tudok nga pagtahod. (1 Pedro 2:23; 3:15) Sa masami, ini nga mga opisyales ginaipit sang mga klero ukon ayhan sang ila mismo mga superyor. Ang malulo nga sabat mahimo magbulig sa ila nga mahangpan nga ang aton hilikuton indi makatalagam sa ila ukon sa paghidait sang komunidad. Ang subong sini nga sabat nagapatubas sing espiritu sang pagtahod, kooperasyon, kag paghidait sa mga nagabaton sini.—Tito 3:1, 2.
19. Sa anong mga hilikuton ang mga Saksi ni Jehova wala gid nagapakigbahin?
19 Ang mga Saksi ni Jehova nakilal-an sa bug-os nga duta subong mga tawo nga wala nagapakigbahin sa pinuyas sang kalibutan. Wala sila nagapasilabot sa mga inaway sang kalibutan tuhoy sa rasa, relihion, ukon politika. (Juan 17:14) Bangod ang Pulong sang Dios nagasugo sa aton nga ‘magpasakop sa superyor nga mga awtoridad,’ wala gid kita nagahunahuna nga makigbahin sa mga buhat sang indi pagsunod sa gobierno bilang dimasingki nga pagpamatok sa mga kasuguan sini. (Roma 13:1) Ang mga Saksi ni Jehova wala gid nagabuylog sa bisan anong hublag nga nagatuyo sa pagpukan sa isa ka panguluhan. Bangod sang mga talaksan nga ginpahamtang ni Jehova para sa iya Cristianong mga alagad, ang ila pagpakigbahin sa bisan anong pagpatulo sing dugo ukon kasingki indi gid mahunahuna! Ang matuod nga mga Cristiano wala lamang nagahambal tuhoy sa paghidait; nagakabuhi sila nahisuno sa mensahe nga ila ginabantala.
20. Tuhoy sa paghidait, ano nga sahi sang rekord ang ginhimo sang Babilonia nga Daku?
20 Kon ipaanggid sa matuod nga mga Cristiano, ang mga nagatiglawas sa relihiosong mga organisasyon sang Cristiandad wala mapamatud-an subong mga mensahero sang paghidait. Ang mga relihion sang Babilonia nga Daku—ang mga iglesia sang Cristiandad kag subong man ang di-Cristiano nga mga relihion—nagtugot, nagsakdag, ukon aktuwal nga nanguna sa mga inaway sang mga pungsod. Ginsugyot man nila ang mga paghingabot kag bisan ang pagpatay sa matutom nga mga alagad ni Jehova. Busa, nahanungod sa Babilonia nga Daku, ang Bugna 18:24 nagasiling: “Sa iya nasapwan ang dugo sang mga manalagna kag sang mga balaan kag sang tanan nga ginpatay sa duta.”
21. Paano nagahulag ang mga may bunayag sing tagipusuon kon makita nila ang kinatuhayan sang pagginawi sang katawhan ni Jehova kag sang mga nagasakdag sang butig nga relihion?
21 Indi kaangay sang mga relihion sang Cristiandad kag sang tanan nabilin nga bahin sang Babilonia nga Daku, ang matuod nga relihion isa ka positibo, nagapahiusa nga puwersa. Sa iya matuod nga mga sumulunod, si Jesucristo nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Isa ina ka gugma nga nagalabaw sa pungsudnon, sosyal, ekonomiko, kag rasyal nga mga dulunan nga nagabahinbahin karon sa tanan nabilin pa nga bahin sang katawhan. Nakapanilag sini, minilyon ka tawo sa bug-os nga duta ang nagasiling sa hinaplas nga mga alagad ni Jehova: “Magaupod kami sa inyo, kay nabatian namon nga ang Dios nagaupod sa inyo.”—Zacarias 8:23.
22. Paano naton dapat tamdon ang pagpanaksi nga hilikuton nga kinahanglan pa nga himuon?
22 Subong katawhan ni Jehova, nalipay kita sing daku sa kon ano ang nahimo na, apang wala pa matapos ang hilikuton. Sa tapos makasab-ug sing binhi kag makultibar ang iya uma, ang isa ka mangunguma wala nagadulog. Padayon sia nga nagapangabudlay ilabi na kon malapit na ang tig-alani. Ang tig-alani nagakinahanglan sing malawig kag daku nga panikasog. Kag karon mismo may daku pa nga pag-ani sa mga sumilimba sang matuod nga Dios sangsa nagligad. Isa ini ka tion sang kalipay. (Isaias 9:3) Matuod, makasumalang kita sing pagpamatok kag di-pagsapak. Subong mga indibiduwal, mahimo kita magapanikasog nga batason ang malubha nga balatian, mabudlay nga mga kahimtangan sa pamilya, ukon mga kabudlayan sa pangabuhi. Apang ang aton gugma kay Jehova nagapahulag sa aton nga magpadayon. Ang mensahe nga gintugyan sa aton sang Dios isa ka mensahe nga dapat mabatian sang mga tawo. Mensahe ini sang paghidait. Sa pagkamatuod, amo ini ang mensahe nga ginbantala mismo ni Jesus—ang maayong balita sang Ginharian sang Dios.
Ano ang Imo Sabat?
◻ Ano ang katumanan sang Isaias 52:7 sa dumaan nga Israel?
◻ Paano napamatud-an si Jesus subong ang labing daku nga mensahero sang paghidait?
◻ Paano ginaangot ni apostol Pablo ang Isaias 52:7 sa hilikuton nga ginapakigbahinan sang mga Cristiano?
◻ Ano ang nalakip agod mangin mga mensahero sang paghidait sa aton adlaw?
[Kapsion sa pahina 13]
Kaangay ni Jesus, ang mga Saksi ni Jehova mga mensahero sang diosnon nga paghidait
[Kapsion sa pahina 15]
Ang mga Saksi ni Jehova nagapabilin nga mahidaiton bisan ano man ang reaksion sang mga tawo sa mensahe sang Ginharian