Isa ka Mas Maayo nga Paagi
NAGAKABALAKA ang mga Saksi ni Jehova tuhoy sa pagkapukan sang espirituwalidad sa kalibutan kag sa imoralidad kag sa walay kapat-uran sa relihion nga nagalapnag sa katilingban. Subong resulta, ginatawag sila kon kaisa nga mga pundamentalista. Apang matuod bala ini? Indi. Bisan pa nga may malig-on sila nga relihioso nga mga panindugan, indi sila mga pundamentalista suno sa ginabaton nga kahulugan sang tinaga. Wala nila ginapilit ang mga lider sa politika agod itib-ong ang isa ka pagtamod, kag wala sila nagahimo sing mga demonstrasyon kag kasingki batok sa mga wala nila ginaugyunan. Nakasapo sila sing mas maayo nga paagi. Ginailog nila ang ila lider nga si Jesucristo.
Kumbinsido ang mga Saksi ni Jehova nga ang relihioso nga kamatuoran nagaluntad, nga makita ini sa Biblia. (Juan 8:32; 17:17) Apang ginatudluan sang Biblia ang mga Cristiano nga mangin mabuot, maayo, malulo, kag makatarunganon—mga kinaiya nga wala nagatugot sa pagkapanatiko. (Galacia 5:22, 23; Filipos 4:5) Sa tulun-an sang Biblia nga Santiago, ginapalig-on ang mga Cristiano nga palambuon “ang kaalam nga gikan sa hitaas,” nga ginalaragway subong “una sa tanan putli, nian mahidaiton, makatarunganon, handa sa pagtuman, puno sang kaluoy kag maayong mga bunga.” Si Santiago nagdugang: “Ginsab-ug ang binhi sang bunga sang pagkamatarong sa mahidaiton nga mga kahimtangan para sa mga nagapakighidait.”—Santiago 3:17, 18.
Ginadumdom sang mga Saksi ni Jehova nga si Jesus nabalaka gid sa kamatuoran. Ginsilingan niya si Poncio Pilato: “Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran.” (Juan 18:37) Walay sapayan nga isa sia ka maisog nga tagsakdag sang kamatuoran, wala niya ginpatuman ang iya mga panindugan sa iban. Sa baylo, gintandog niya ang ila mga hunahuna kag tagipusuon. Nahibal-an niya nga ang iya langitnon nga Amay, nga isa ka “maayo kag matarong” nga Dios, magapamat-od kon paano kag san-o dulaon ang kabutigan kag inhustisya gikan sa nawong sang duta. (Salmo 25:8) Busa, wala niya gintinguhaan nga pukanon yadtong mga wala mag-ugyon sa iya. Sa kabaliskaran, ang ortodokso nga relihioso nga mga lider sang iya adlaw amo ang nagtinguha nga pukanon si Jesus.—Juan 19:5, 6.
Ang mga Saksi ni Jehova may malig-on nga mga panindugan tuhoy sa relihioso nga mga doktrina, kag ginapadayag nila ang maayo nga mga prinsipio sa moral. Kaangay ni apostol Pablo, kumbinsido sila nga may “isa [lamang] ka Ginuo, isa ka pagtuo, isa ka bawtismo.” (Efeso 4:5) Nahibaluan man nila ang mga pulong ni Jesus: “Makitid ang gawang kag masipot ang dalan nga nagapadulong sa kabuhi, kag pila lamang ang nakatultol sa sini.” (Mateo 7:13, 14) Sa gihapon, wala nila ginapilit ang iban nga sundon ang ila pagtuluuhan. Sa baylo, ginailog nila si Pablo kag “nagapakiluoy” sa tanan nga nagahandum nga “magpasag-uli sa Dios.” (2 Corinto 5:20) Amo ini ang mas maayo nga paagi. Paagi ini sang Dios.
Ang relihioso nga pundamentalismo, suno sa karon nga paggamit sa tinaga, tuhay gid. Madamo nga estratehiya ang ginagamit sang mga pundamentalista—lakip ang kasingki—agod ipatuman ang ila mga prinsipio sa katilingban. Sa paghimo sini, nangin importante sila nga bahin sang sistema sa politika. Apang, si Jesus nagsiling nga ang iya mga sumulunod dapat nga “indi bahin sang kalibutan.” (Juan 15:19; 17:16; Santiago 4:4) Nahisanto sa sinang mga pulong, ginahuptan sang mga Saksi ni Jehova ang estrikto nga pagkaneutral sa mga binangig sa politika. Kag, subong sang pagbaton sang pamantalaan sa Italya nga Fuoripagina, “wala [nila] ginapilit ang bisan ano kay bisan sin-o; ang tagsatagsa hilway sa pagbaton ukon sa pagsikway sa ila ginasiling.” Ang resulta? Ang mahidaiton nga mensahe sang Biblia nga dala sang mga Saksi nagaganyat sa tanan nga sahi sang tawo, bisan pa yadtong mga pundamentalista anay.—Isaias 2:2, 3.
Isa ka Kalibutan nga May Maayo nga mga Prinsipio
Nahibaluan sang mga Saksi nga indi malubad sang mga tawo ang mga problema nga ginakabalak-an sang mga pundamentalista. Indi mo mapilit ang tawo nga magpati sa Dios ukon batunon ang imo personal nga mga pagtuluuhan. Ang paghunahuna nga inang mga butang posible nagresulta sa pila sang pinakamakakulugmat nga hitabo sa maragtas, subong sang mga Krusada, mga Inkisisyon sang Edad Media, kag sang “pagkombertir” sa Amerikano nga mga Indian. Apang, kon nagasalig ikaw sa Dios, handa ka nga itugyan sa iya mga kamot ang mga butang.
Suno sa Biblia, may gintalana nga tion ang Dios sa pagpahanugot niya sa katawhan nga lapason ang iya mga kasuguan kag sa amo ginabangdan sang pag-antos kag kasakit. Ina nga tion malapit na matapos. Si Jesus nagagahom na subong Hari sa langitnon nga Ginharian sang Dios, kag sa indi madugay ina nga Ginharian magahulag sa pagdula sa tawhanon nga mga panguluhan kag magabulos sa paggahom sa katawhan adlaw-adlaw. (Mateo 24:3-14; Bugna 11:15, 18) Ang resulta mangin isa ka bug-os kalibutan nga paraiso diin ang paghidait kag pagkamatarong mangin bugana. Sa amo nga tion, wala na sing pagpangduhaduha sa kon paano simbahon ang matuod nga Dios. “Ang mga matarong magapanubli sang duta, kag magapuyo sila diri sing dayon.” (Salmo 37:29) Ang dayon nga mga prinsipio subong sang mahigugmaon nga kalulo, kamatuoran, katarungan, kag pagkaayo magamadinalag-on para sa kaayuhan sang tanan matinumanon nga katawhan.
Nagapaabot sa sinang tion, nagasiling ang salmista sa mabinalaybayon nga paagi: “Ang mahigugmaon nga kaluoy kag ang kamatuoran magakitaay; ang pagkamatarong kag ang paghidait—magahalukay. Ang kamatuoran mismo magaulhot sa duta, kag ang pagkamatarong magatamod gikan sa langit. Si Jehova, sa iya bahin, magahatag man sing maayo, kag ang aton duta magapatubas. Ang pagkamatarong magauna sa iya, kag magahimo sang iya mga tikang nga dalan nga lalaktan.”—Salmo 85:10-13.
Walay sapayan nga indi naton mabag-o ang kalibutan, subong mga indibiduwal mahimo naton mapalambo ang diosnon nga mga prinsipio bisan karon. Sa amo, matinguhaan naton nga mangin amo nga sahi sang katawhan nga luyag sang Dios nga mangin iya mga sumilimba sa sinang bag-o nga kalibutan. Nian mangin isa kita sa mga mahagop nga ginpatuhuyan sang salmista: “Ang mga mahagop magapanubli sang duta, kag magakalipay sila sa kabuganaan sang paghidait.” (Salmo 37:11) Ginasakdag kag ginapakamaayo sang Dios ang mga nagahimo sang iya kabubut-on, kag nagasaad sia sing matahom nga mga butang para sa ila palaabuton. Si apostol Juan nagsiling: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”—1 Juan 2:17.
[Kapsion sa pahina 7]
Ginaagda sang mga Saksi ni Jehova ang tanan nga tun-an ang maayong balita tuhoy sa Ginharian sang Dios
[Picture Credit Line sa pahina 6]
Suga sa pahina 3, 4, 5, kag 6: Printer’s Ornaments/ni Carol Belanger Grafton/Dover Publications, Inc.