Madumduman Mo Bala?

Ginbinagbinag mo bala sing maayo ang ulihi nga mga guwa sang Ang Lalantawan? Kon amo, mawili ka sa pagdumdom sa masunod:

◻ Paano ginasunod sang madamong mag-asawa ang maayo nga halimbawa nanday Aquila kag Priscila?

Sanday Aquila kag Priscila nag-alagad sa pila ka lainlain nga kongregasyon. Kaangay nila, madamong modernong-adlaw nga mga Cristiano ang nagsaylo kon diin daku pa ang kinahanglanon. Nakaagom man sila sing kalipay kag kaayawan gikan sa pagtan-aw sa mga interes sang Ginharian nga nagauswag kag gikan sa pagpalambo sing mainit kag hamili nga Cristianong mga pag-abyanay.​—⁠12/15, pahina 24.

◻ Ano ang pagtamod sang Biblia sa alkoholiko nga mga ilimnon?

Ang pagtamod sang Biblia sa alkoholiko nga ilimnon timbang. Sa isa ka bahin, ang Biblia nagasiling nga ang alak isa ka dulot halin sa Dios. (Salmo 104:​1, 15) Sa pihak naman nga bahin, ginapakamalaut sini ang sobra nga pagpatuyang. (Lucas 21:​34; 1 Timoteo 3:​8; Tito 2:3; 1 Pedro 4:​3)​—⁠12/15, pahina 26.

◻ Ano ang importante nga bahin sang tulun-an nga Hageo sa Biblia? Bisan pa nga ang tulun-an sang Hageo ginahuman sang 38 ka bersikulo lamang, ang ngalan sang Dios ginagamit sing 35 ka beses. Ining tagna kulang sing kabuhi kon ang ngalan nga Jehova ginabuslan sing titulo nga “Ginuo.”​—⁠1/1, pahina 6.

◻ Anong leksion ang matun-an gikan sa mga sala nanday David kag Manases?

Walay sapayan sang pagpatawad ni Jehova kanday David kag Manases, ining mga lalaki​—⁠kag ang Israel upod nila​—⁠dapat mag-antos sang mga resulta sang ila makasasala nga mga buhat. (2 Samuel 12:​11, 12; Jeremias 15:​3-5) Sa kaanggid nga paagi, samtang ginapatawad karon ni Jehova ang mahinulsulon nga mga makasasala, mahimo nga may mga resulta ang ila mga buhat nga indi malikawan.​—⁠1/1, pahina 27.

◻ Sa anong paagi ang ‘mga tiil sang mga nagabantala sang maayong balita’ sang Ginharian sang Dios “matahom”? (Isaias 52:7)

Ang mga tiil amo ang kinaandan nga nagapahulag sa isa samtang nagalakat sia sa pagbantala sa iban. Ina nga mga tiil nagapakilala gid sa tawo. Gani para sa madamo nga nagapamati kag nagahulag sing kalahamut-an sa maayong balita sang Ginharian, ang mga tiil sining mga mensahero matahom gid tan-awon.​—⁠1/15, pahina 13.

◻ Ano ang duha ka hilikuton nga nalakip sa “pagbantala sang maayong balita”? (1 Corinto 9:16)

Una, dapat naton ibantala ang maayong balita sang Ginharian. Ang ikaduha nga bahin sining hilikuton nagahilabot sa pagtudlo sa mga nagapamati sing kalahamut-an sa pagbantala sa Ginharian.​—⁠1/15, pahina 23.

◻ Anong personal nga mga benepisyo ang nagaresulta gikan sa pag-amba sing mga ambahanon sa Ginharian sa mga miting sa kongregasyon?

Ang pag-amba nagahatag sa aton sing kahigayunan nga mapabutyag ang aton mga balatyagon para sa aton Manunuga. (Salmo 149:​1, 3) Ang tinagipusuon nga pag-amba sa kongregasyon makapahamtang sa aton sa nagakaigo nga panghunahuna kag kahimtangan sang tagipusuon para sa masunod nga programa. Magapahulag ini sa aton agod makigbahin sing labi pa sa pagsimba kay Jehova.​—⁠2/1, pahina 28.

◻ San-o ang adlaw sang kamatayon maayo pa sa adlaw sang pagkabun-ag? (Manugwali 7:1)

Ang adlaw sang kamatayon mas maayo pa sa adlaw sang pagkabun-ag sang isa, kon ang isa nakahimo na sing maayong ngalan kay Jehova, nga makabanhaw sa mga matutom nga napatay. (Juan 11:25)​—⁠2/15, pahina 12.

◻ Ngaa ang tulun-an sang Manugwali dapat personal nga makabulig sa aton?

Makabulig ini sa isa sa aton sa pagtadlong sang aton pagtamod sa kabuhi kag sa kon ano ang importante sa aton. (Manugwali 7:​2; 2 Timoteo 3:​16, 17)​—⁠2/15, pahina 16.

◻ Ang mga Saksi ni Jehova mga pundamentalista bala?

Indi. Bisan pa may mabakod sila nga relihiosong mga kombiksion, indi sila mga pundamentalista suno sa kahulugan nga ang tinaga ginagamit. Wala sila nagagamit sing mga demonstrasyon kag kasingki batok sa sadtong wala nila ginaugyunan. Ginailog nila ang ila Lider, si Jesucristo.​—⁠3/1, pahina 6.

◻ Wala makahibalo sang eksakto nga tion sang pagkari ni Jesus agod ipatuman ang pagtimalos sang Dios, ano ang epekto sini sa mga Cristiano?

Nagahupot ini sa mga Cristiano nga magpabilin nga mabinantayon kag nagahatag sa ila sing adlaw-adlaw nga kahigayunan agod pamatud-an nga nagaalagad sila kay Jehova nga may dimakagod nga mga motibo.​—⁠3/1, pahina 13.

◻ Ano ang dapat naton binagbinagon antes idemanda ang isa ka utod nga nagtunto sa aton?

Dapat naton binagbinagon ang posible personal nga mga epekto sa aton, sa iban nga nadalahig, sa kongregasyon, kag sa mga tagaguwa. (1 Corinto 6:7)​—⁠3/15, pahina 22.

◻ Paano matigayon ang matuod nga kalipay?

Ang matuod nga kalipay amo ang kahimtangan sang tagipusuon, pasad sa matuod nga pagtuo kag sa maayong kaangtanan kay Jehova. (Mateo 5:3)​—⁠3/15, pahina 23.

◻ Ano ang dapat himuon sang isa kon ginatangdo nga mangin hurado? Dapat pat-uron sang tagsa ka Cristiano nga ginatangdo nga mangin hurado kon ano nga dalanon ang dapat himuon, pasad sa iya paghangop sa Biblia kag sa iya kaugalingon nga konsiensia. (Galacia 6:5)​—⁠4/1, pahina 29.