Nagakatabo Pa Bala ang Milagruso nga mga Pagpang-ayo?

“BATUNA si Jesus kag magaayo ka!” Ang mga eslogan kaangay sini nagpapati kay Alexandre, isa ka katapo sang Evangelical nga simbahan, nga ang pag-inom sing bulong para sa iya balatian pagpakita sing kakulang sing pagtuo. Nagpati gid sia nga mapaayo sia sang iya pagtuo. Si Benedita, isa ka matutom nga Katoliko, natandog gid sang mabatian niya ang tuhoy sa milagruso nga mga pagpamulong sa santuaryo sang Aparecida do Norte, sa estado sang Saõ Paulo, Brazil. Ginagamit ang pila ka palangadion nga gintudlo sa iya sang iya tiya, nangadi si Benedita kay Our Lady of Aparecida, kay San Anthony, kag sa iban pa nga mga “santo” agod mangayo sing gahom sa pag-ayo sa mga balatianon.

Ang matuod, bisan sa ulihi nga bahin sang ika-20 nga siglo, madamo nga tawo ang nagapati gihapon sa milagruso nga mga pagpang-ayo​—⁠apang ngaa? Ayhan bangod ang iban nalugaw-an sang napaslawan ang mga doktor sa pag-ayo sa balatian, sa kasakit, kag pag-antos sang ila mga mahal sa kabuhi, ilabi na ang ila kabataan. Yadtong may nagabalikbalik nga mga balatian mahimo nagahunahuna nga bangod sang kamahalon sang modernong medisina, wala sing malain kon magpabulong sila paagi sa faith healing. Nakita sang iban sa telebisyon ang nanuhaytuhay nga mga simbahan kag mga indibiduwal nga nagatanyag sing mga bulong sa AIDS, kapung-aw, kanser, pagkabuang, altapresyon, kag madamo pa iban nga balatian. Nagapati man sila sa sinang mga saad ukon wala, mahimo sila magpabulong subong ang katapusan nga solusyon. Ang iban nga nagapati nga ang ila balatian gintuga kuno sang malauton nga mga espiritu mahimo magpati nga ang kinaandan nga bulong kulang sing kusog sa pag-ayo sa ila.

Sa pihak nga bahin, may mga nagapamatok sing mabaskog, nagapakamalaut pa gani sa milagruso nga mga pagpang-ayo sang patay na nga “mga santos” ukon sang buhi nga mga manugbulong. Suno sa Jornal da Tarde, ang imunologo nga si Dráusio Varella nagapati nga ang pagtuo sa milagruso nga pagpang-ayo “nagapakanubo sa pagtuo sang mga wala sing ihibalo kag nalisdan.” Sia nagadugang: “Bangod nagalaum sa mga milagro, mahimo dis-ayrihan sang madamo ang nagakaigo medikal nga pagbulong bangod sining mga malimbungon.” Kag ang The New Encyclopædia Britannica nagapaathag: “Ang dikinaandan nga mga pagpaayo gin-angot anay sa sagrado nga mga duog kag relihioso nga mga rituwal, kag ang medikal nga siensia may huyog sa pagsiling nga ang kabangdanan sini nga sahi sang pagpaayo amo ang kinaandan nga epekto sa hunahuna sang isa ka ideya nga nagapanghikot sa idalom sang maayo nga mga kahimtangan.” Apang, madamo gihapon ang nagapati nga nag-ayo sila paagi sa isa ka milagro. Para sa ila, ini nga pagbulong epektibo!

Nahibaluan sadtong pamilyar sa Biblia nga ginpang-ayo ni Jesucristo ang mga balatianon sa madamo nga okasyon, ginhimo ini paagi sa “gahom sang Dios.” (Lucas 9:​42, 43) Sa amo mahimo nagapalibog sila, ‘nagapanghikot pa bala gihapon ang gahom sang Dios kag nagapahanabo sing milagruso nga mga pagpang-ayo karon?’ Kon amo, ngaa nagakapaslawan ang mga pagpang-ayo? Bangod kulang bala sing pagtuo ang pasyente ukon bangod kulang bala ang iya donasyon? Nagakaigo bala para sa isa ka Cristiano nga magpabulong sing milagruso kon nagaantos sia sing isa ka masakit ukon wala sing bulong nga balatian? Kag mahanabo bala liwat ang wala nagakapaslawan milagruso nga mga pagpamulong kaangay sang ginhimo anay ni Jesus? Ang mga sabat sa sining importante nga mga pamangkot masapwan mo sa masunod nga artikulo.