Ang Kabuhi nga Wala Ko Gid Ginhinulsulan

PANUGIRON NI PAUL OBRIST

Sang 1912, sang anom ako ka tuig, napatay si Nanay sang ginbun-ag niya ang iya ikalima nga bata. Mga duha ka tuig sang ulihi, gin-atipan sang isa ka lamharon nga manug-atipan sing balay nga si Berta Weibel ang amon pamilya. Sang ginpangasawa sia ni Tatay sang masunod nga tuig, nalipay kami nga kabataan nga nakatigayon liwat sing iloy.

NAGAPUYO kami sa Brugg, isa ka magamay nga banwa sa nagahambal sing Aleman nga bahin sang Switzerland. Si Berta isa gid ka Cristiano, kag nanamian gid ako sa iya. Nagtuon sia sing mga publikasyon sang mga Estudyante sang Biblia (mga Saksi ni Jehova) sang 1908, kag ginapaambit niya sa iban ang iya natun-an.

Sang 1915, wala magdugay pagkatapos sang kasal ni Berta kag ni Tatay, nag-upod ako kay Berta sa isa ka pagpasalida sing “Photo-Drama of Creation.” Ining pagpasalida sang International Association of Earnest Bible Students may daku nga epekto sa akon hunahuna kag tagipusuon. Nagdayaw man ang iban nga tumalan-aw. Ang duog-tilipunan sa Brugg puno na kaayo amo nga ginsiraduhan sang mga pulis ang mga ganhaan kag wala na ginpasulod ang dugang nga nag-alabot. Nian madamo ang naghimakas nga makasulod paagi sa bukas nga bintana nga ginbutangan sing hagdanan, kag ang iban nakasulod.

Ang Maayo nga Huwaran ni Nanay

Nagadabdab na sadto ang Inaway Kalibutanon I sa Europa, kag ang mga tawo nahadlok tuhoy sa palaabuton. Sa amo, ang pagpamalaybalay nga dala ang makapaumpaw nga mensahe tuhoy sa Ginharian sang Dios, subong sa ginhimo ni Nanay, isa ka maayo gid nga hilikuton. Kon kaisa ginapaupod niya ako, kag nalipay gid ako sa sini. Sang 1918, ginsimbolohan gid man ni Nanay ang iya dedikasyon kay Jehova nga Dios paagi sa bawtismo sa tubig.

Wala magpasilabot si Tatay sa pagsimba ni Nanay tubtob sa iya pagpabawtismo, apang pagkatapos sadto ginpamatukan na niya si Nanay. Sang isa ka adlaw ginkuha niya ang mga literatura sa Biblia ni Nanay kag ginhaboy niya ini sa kalan. Nakuha ni Nanay ang iya lamang Biblia gikan sa kalayo. Apang makakilibot gid ang masunod niya nga ginhimo. Nagpalapit sia kay Tatay kag ginhakos sia. Wala sia maghupot sing kaakig kay Tatay.

Nakibot gid sa sini, nagkalma si Tatay. Apang, kon kaisa, gulpi lang sia mamatok, kag dapat namon batason ang iya kaakig.

Trabaho kag Espirituwal nga Pag-uswag

Sang 1924, pagkatapos sang tatlo ka tuig nga paghanas subong isa ka hairdresser, naghalin ako sa balay kag nagtrabaho sa nagahambal sing Pranses nga bahin sang Switzerland. Naghatag ini sa akon sing kahigayunan nga pauswagon ang akon ihibalo sa Pranses nga lenguahe. Walay sapayan nga nagsablag ini sa akon pag-uswag sa espirituwal, wala ko gid madula ang akon gugma sa kamatuoran sa Biblia. Gani sang magpauli ako anom ka tuig sang ulihi, nagtambong ako sa mga miting sang Cristianong kongregasyon sa Brugg.

Wala magdugay pagkatapos sadto nagsaylo ako sa Rheinfelden, isa ka magamay nga banwa mga 40 kilometros ang kalayuon. Nagtrabaho ako sa parlor sang akon magulang nga babayi kag padayon nga nag-uswag sa espirituwal paagi sa pagpakig-upod sa magamay nga grupo sang mga Estudyante sang Biblia. Sang isa ka adlaw, sang nagahingapos ang amon pagtuon sa Biblia sa tungatunga sang semana, ang nagadumala nga gulang nga si Utod Soder namangkot: “Sin-o ang luyag makigbahin sa ministeryo sa latagon sa Domingo?” Nagboluntaryo ako, nagalaum nga may upod ako nga magatudlo sa akon kon ano ang himuon.

Pag-abot sang Domingo kag sang nakalab-ot kami sa amon teritoryo, si Utod Soder nagsiling, “Si G. Obrist magapanghikot didto nayon.” Bisan pa nga grabe ang pagkubakuba sang akon dughan, ginduaw ko ang mga tawo sa ila puluy-an kag nakighambal sa ila tuhoy sa Ginharian sang Dios. (Binuhatan 20:20) Kutob sadto, wala gid ako malingkang sa pagbantala nga hilikuton nga ginsiling ni Jesus nga dapat tumanon antes mag-abot ang katapusan sining sistema sang mga butang. (Mateo 24:14) Sang Marso 4, 1934, sang 28 anyos ako, ginsimbolohan ko ang akon dedikasyon kay Jehova nga Dios paagi sa bawtismo sa tubig.

Duha ka tuig sang ulihi nagtrabaho ako subong isa ka hairdresser sa Lugano, isa ka siudad sa nagahambal sing Italyano nga bahin sang Switzerland. Ginsugdan ko gilayon ang pagbantala sing maayong balita didto, bisan pa nga diutay lang ang akon nahibaluan nga Italyano. Walay sapayan, sa akon una nga Domingo sa ministeryo, napahamtang ko ang 20 ka bukleta nga akon dala. Sang ulihi, nakatipon ako sing pila ka interesado nga tawo agod makaporma sing pagtinuon sa Ang Lalantawan. Madamo sa sini ang nabawtismuhan sang ulihi, kag sang Pebrero 1937 nagporma kami sing isa ka kongregasyon sang mga Saksi ni Jehova sa Lugano.

Pagligad sang duha ka bulan, sang Abril 1937, nakabaton ako sing sulat nga nagpabag-o gid sang akon kabuhi. Isa yadto ka imbitasyon nga mag-alagad sa Bethel, subong amo ang pagtawag sa sanga nga mga pasilidad sang mga Saksi ni Jehova sa pungsod. Ginbaton ko gilayon ang imbitasyon​—⁠ang desisyon nga wala ko gid ginhinulsulan. Sa amo ginsugdan ko ang nangin 60-ka-tuig nga karera sa bug-os tion nga ministeryo.

Pag-alagad sa Bethel sa Magamo nga mga Tion

Ang Bethel sa Switzerland sadto nahamtang sa siudad sang Bern, ang kapital sang Switzerland. Nag-imprinta kami didto sing mga libro, mga bukleta, kag mga magasin sa 14 ka lenguahe, kag ginapadala ini sa bug-os nga Europa. Kon kaisa, ginadala ko ang naimprinta nga mga literatura sa estasyunan sang tren paagi sa wheelbarrow, sanglit sadto wala kami pirme sing salakyan nga magamit. Ang akon una nga asaynment sa Bethel amo ang sa Composition Department, diin ginaplastar namon ang mga tingga nga ginagamit sa pag-imprinta. Wala magdugay nagtrabaho ako sa reception desk kag nangin barbero man ako sang pamilya Bethel.

Sang Septiembre 1939, nagdabdab ang Inaway Kalibutanon II, kag ang pagpanalakay sang mga Nazi nagpahadlok sa bug-os nga Europa. Nangin neutral ang Switzerland sa tunga sang nagainaway nga mga pungsod. Sang primero, ginpadayon namon ang amon Cristianong hilikuton nga wala sing sablag. Nian, sang Hulyo 5, 1940, sang alas dos sang hapon, sang didto ako sa akon lamesa sa lobby, may nagpalapit nga sibilyan nga ginaupdan sang isa ka soldado nga nagabitbit sing riple nga may nagaangot nga bayoneta.

“Diin si Zürcher?” singgit sang sibilyan. Si Franz Zürcher amo sadto ang manugtatap sa sanga sa amon pagbantala nga hilikuton sa Switzerland.

“Mahimo ko bala mahibaluan kon sin-o ang nagapangita?” pamangkot ko. Ginliab nila ako gilayon kag gindala sa ibabaw, nagasiling nga dalhon ko sila sa opisina ni Zürcher.

Ginmanduan ang bug-os nga pamilya Bethel​—⁠mga 40 kami sadto​—⁠nga magtipon sa kalan-an. Ginplastar ang apat ka machine gun sa guwa sang tinukod agod hadlukan ang bisan sin-o nga malagyo. Sa sulod, mga 50 ka soldado ang nag-usisa sa tinukod. Baliskad sa ginapaabot, wala sing nakita nga pamatuod nga ang mga Saksi ni Jehova nadalahig sa pagpasanyog sing pagpamatok sa serbisyo militar. Apang, madamo kaayo nga literatura ang ginkonpiskar kag gindala sang lima ka salakyan sang mga soldado.

Sang nangindi kami nga usisaon anay sang mga awtoridad sang gobierno Ang Lalantawan antes ini ibalhag, ginpauntat ang pagbalhag sini sa Switzerland. Nagakahulugan ini nga diutay na lang ang kinahanglan para magtrabaho sa Bethel, kag ginpalig-on ang lamharon nga mga katapo sang pamilya nga magbiya kag mangin mga payunir, subong amo ang pagtawag sa mga Saksi ni Jehova nga nagapakigbahin sa bug-os tion nga pagbantala nga hilikuton.

Pagpayunir sa Tion sang Inaway

Sang Hulyo 1940, nagbalik ako sa nagahambal sing Italyano nga duog sa Switzerland malapit sa Lugano, diin nagpuyo ako antes magpa-Bethel. Ining sarado Katoliko nga teritoryo, nga sadto anay yara man sa idalom sang mabaskog nga impluwensia sang Pasismo, amo ang nangin teritoryo ko sa pagpayunir.

Halos adlaw-adlaw ginapadulog ako sang pulis nga nagasugo nga untatan ko ang akon pagbantala nga hilikuton. Sang isa ka adlaw samtang nagapakighambal ako sa isa ka babayi sa hardin sa ganhaan, ginliab ako sa likod sang isa ka tawo nga nagasibilyan, gindala ako sa salakyan nga patrolya, kag gindala ako sa Lugano. Gintugyan niya ako didto sa pulisiya. Sang gin-usisa ako, ginpaathag ko nga si Jehova nga Dios ang nagsugo sa amon sa pagbantala.

“Diri sa duta, kami ang nagamando,” bugalon nga sabat sang opisyal. “Mahimo magmando ang Dios sa langit!”

Sa tion sang inaway, importante gid nga sundon namon ang laygay ni Jesus nga mangin ‘maalam subong sang mga man-ug kag inosente subong sang mga salampati.’ (Mateo 10:16) Sa amo, ginatago ko ang kalabanan sang akon literatura sa nasulod nga bulsa sang akon kamisadentro. Kag agod mapat-od nga wala sing madula, nagasuksok ako sing halog nga puroy nga hugot sa idalom sang mga tuhod.

Sang ulihi, nakabaton ako sing instruksion nga magsaylo sa nalupyakan sang Engadine, diin padayon ako nga nagalikaw sa mga pulis. Matahom ini nga nalupyakan sa nasidlangan nga Swiss Alps, diin kon tigtulugnaw nalubong ini sa yelo, gani ginpadala sa akon ang akon mga ski agod makakadto ako sa teritoryo.

Ang mainit-init nga mga guwantes kinahanglanon kon nagalakbay paagi sa ski kon tigtulugnaw. Bangod pirme ginagamit, madali nga nagisi ang akon mga guwantes. Nagpasalamat gid ako sang isa ka adlaw nga nakabaton ako sing wala ginapaabot nga pinutos paagi sa koreo nga nagaunod sing ginansilyo nga sweater subong man sing mainit-init nga mga guwantes! Ginhimo ini sang isa ka Cristianong utod nga babayi sa akon anay kongregasyon sa Bern. Bisan sa karon kon madumduman ko ini, mapinasalamaton gid ako.

Madamong Makalilipay nga Pribilehiyo

Sang 1943, nangin maayo ang kahimtangan sa Switzerland, kag gintawag ako liwat agod mag-alagad sa Bethel. Bangod sang pila ka problema sa nagahambal sing Pranses nga kongregasyon sa Lausanne, mga 100 kilometros ang kalayuon, gintugyanan ako nga duawon yadto nga siudad sing regular agod buligan ang mga manugbantala nga matigayon ang nagakaigo nga pagtamod sa organisasyon sang Dios.

Sang ulihi nangin manugtatap sa sirkito ako sa pila ka tion sa tanan nga Pranses nga kongregasyon sa Switzerland. Sa maaga nga bahin sang semana, nagatrabaho ako sa Bethel, apang kon Biernes, Sabado, kag Domingo ginaduaw ko ang lainlain nga kongregasyon kada semana agod mabuligan sila sa espirituwal. Dugang pa, sang naporma ang nagahambal sing Pranses nga kongregasyon sa Bern sang 1960, ako ang nangin nagadumala nga manugtatap. Nag-alagad ako sa sining katungdanan tubtob sang 1970, sang ginsaylo ang Bethel halin sa Bern pakadto sa matahom nga nahamtangan sini karon sa banwa sang Thun.

Nalipay ako nga masapwan ang magamay nga grupo sang nagahambal sing Italyano nga mga Saksi sa Thun, kag nanghikot ako upod sa ila. Sang ulihi naporma ang isa ka kongregasyon, kag ako ang nangin nagadumala nga manugtatap sa sulod sang madamong tinuig tubtob nangin kalipikado ang lamharon nga utod nga mga lalaki sa pag-abaga sina nga katungdanan.

Ginkabig ko nga isa ka makalilipay gid nga pribilehiyo ang pagtambong sa internasyonal nga mga kombension sang katawhan ni Jehova. Halimbawa, sang 1950 ginhiwat ang indi malipatan nga Theocracy’s Increase Assembly sa Yankee Stadium, New York. Ang pagduaw sa bug-os kalibutan nga ulong talatapan sang mga Saksi ni Jehova sa Brooklyn, New York, may daku nga epekto sa akon. Indi ko man malipatan ang pamulongpulong ni Utod Milton G. Henschel sang masunod nga tuig sa Clean Worship Assembly sa London, Inglaterra, nga nagpadaku sa mga pulong ni Jesus, “Nagasiling ako sa inyo, Kon ini sila maghipos, ang mga bato magasinggit.” (Lucas 19:40) Si Utod Henschel namangkot, “Sa banta ninyo kinahanglan pa bala magsinggit ang mga bato?” Maaningal ko pa gihapon ang singgit nga, “Indi!” nga naghalin sa linibo ka mga tingog.

Sang nagkadto ako sa Bethel sang 1937, ang akon amay, nga nakahibalo nga diutay lamang ang amon ginabaton nga galastuhon, may kabalaka nga namangkot, “Anak, paano na lang kon magtigulang ikaw?” Nagsabat ako nga ginakutlo ang mga pulong ni salmista David: “Wala ako makakita nga ang matarong ginpabayaan, ukon ang iya kaliwat nga nagapakilimos sing kalan-on.” (Salmo 37:25) Natuman gid ining mga pulong sa akon.

Nalipay gid ako nga sang nagligad nga kapin sa 80 ka tuig, ginpamana ni Berta Weibel si Tatay kag nga paagi sa iya huwaran kag panuytoy nakilala ko si Jehova kag ang iya mga kinaiya! Walay sapayan nga ginyaguta sia sang iban nga katapo sang pamilya, matutom sia nga nag-alagad kay Jehova tubtob mapatay sia sang 1983. Wala gid sia maghinulsol nga nag-alagad sia sa iya Dios nga si Jehova; kag wala man ako maghinulsol nga nagpabilin nga diminyo kag ginahugod ang akon bug-os nga kabuhi sa pag-alagad kay Jehova.

[Kapsion sa pahina 25]

Sa akon trabaho sa Bethel