Bug-os Kalibutan nga Paghiusa—Paano Ini Magaluntad?
KAANGAY sa gabok nga tinukod nga ginhalitan sang mapinatumbayaon nga mga nagaarkila sa sini, ang presente nga sistema sang kalibutan nagakabagay lamang sa isa ka butang—ang pagguba kag pagtukod liwat. Indi lamang ini isa ka maduhaduhaon nga pagtagna sing kalautan. Suno sa Biblia, amo ini ang lamang matuod nga pagtamod. Ngaa?
Ang mga sadsaran sang kahimusan sang karon nga kalibutan makatalagam. Ang bug-os nga tinukod gin-ut-ut sang mga anay kag saliksik. Ang mga balayan nga salsalon natuktukan. Ang nagasuporta nga mga dingding naghuyang. Ang atop nagkalagupi. Ang mga tubo sang tubig nagatubod. Ang sistema sang elektrisidad may depekto kag makatalagam. Ang walay untat nga paghinisaay kag pag-ilinaway sang mga nagaarkila naghalit sa bug-os nga tinukod. Ang bug-os nga tinukod kag ang palibot sini puno sing mga piste kag mahimo tunaan sang kamatayon ukon sang daku nga kahalitan.
“Nagasaot sa Bibi Sang Kamatayon”
Bangod sang padayon nga mga pagbinangig sa politika, kakagod, pagpanalakay, kag daku nga pagdumtanay sang mga tribo kag etniko, “ang bug-os tawhanon nga rasa,” subong sang ginsiling ni Gwynne Dyer, “nagasaot sa bibi sang kamatayon.” Sa bug-os nga kalibutan, ang determinado nga mga minoridad—mga pressure group, mga nagapakig-away para sa kahilwayan, mga grupo sang kriminal, internasyonal nga mga terorista, kag iban pa—nagahimo sang ila makagod nga mga plano kag daw halos naguba nila ang bisan ano nga posibilidad para sa paghidait sa kalibutan. Kaangay sa magamo nga mga nagaarkila, mahimo nila mapamiserable ang kabuhi sang iban pa.
Apang, suno sa madamo nga komentarista, indi lamang ang nagapamatok nga mga grupo ukon magamo nga mga indibiduwal ang nagaupang sa bug-os kalibutan nga paghiusa. Ang pinakadaku nga sablag amo ang pungsod-estado mismo. Ang independiente nga mga pungsod, siling sang manunulat tuhoy sa inaway nga si S. B. Payne, Jr., nagaluntad sa “isa ka estado sang internasyonal nga anarkiya.” Ginahimo nila ang bisan ano para sa kaayuhan sang ila pungsod, nga may diutay ukon wala sing patugsiling sa iban. Subong resulta, sa bug-os nga maragtas “ang tawo naggahom sa tawo sa iya kasamaran.”—Manugwali 8:9.
Matuod, ang pila ka gobierno sang pungsod daw nagmadinalag-on sa pagpakig-away batok sa inhustisya kag pagpigos sa ila pungsod kag, sa pila ka kasangkaron, sa internasyonal. Kon kaisa nakatukod sila sing internasyonal nga paghiusa sa pila ka kasangkaron. Apang bisan nga ang pila ka pungsod naghiusa sa pagpanghikot batok sa nagapamigos nga pungsod, sa masami yara gihapon ang pangduhaduha nga nagapanghikot sila bangod sang kaugalingon nga interes sa baylo sang matuod nga pag-ulikid. Ang katunayan amo nga ang tawhanon nga mga panguluhan wala sing bug-os, nagapadayon nga solusyon sa indi paghiusa sang bug-os nga kalibutan. Si Gwynne Dyer nagsiling: “Ang ideya nga ang tanan nga pungsod sang kalibutan magabuyluganay agod tapnaon ukon silutan ang pagpamigos sang pila ka makinaugalingon nga pungsod isa ka maayo nga ideya, apang sin-o ang magatudlo kon diin nga pungsod ang nagapamigos, kag sin-o ang magabayad sing bili nga kuwarta kag mga kabuhi nga mahimo kinahanglanon agod mapauntat sia?”
Sa pagkamatuod, ang pagpamigos sang isa ka pungsod batok sa isa posible lamang kon ang kalabanan nga banwahanon sini wala nagapamatok sa sina nga pagpamigos. Sulitsulit nga ginapakita sang maragtas nga indi lamang sa pila ka “makinaugalingon nga pungsod” nga ginsakdag sang mga banwahanon ang ila mga lider, husto man ukon sala. Sa katunayan, ang kalabanan sang pumuluyo sang duta nagahimo sini. Bulag nga ginasunod nila ang “mga kabutigan, tinikal kag propaganda,” subong sang ginsiling sang Time nga magasin, gikan sa madamo nga lider sang politika kag relihion.
Ginpainit sang nasyonalismo ang mga handum sang makatarunganon kag maawaon kuntani nga mga tawo kag ginbangdan ini sang paghimo nila sing makasiligni nga mga krimen batok sa mga lalaki, mga babayi, kag kabataan sang iban nga nasyonalidad. Halimbawa, nahanungod sa Inaway Kalibutanon I, ang istoryador nga si J. M. Roberts nagsiling: “Ang isa sang nagasumpakilay nga kahimtangan sang 1914 amo nga sa tagsa ka pungsod madamo nga tawo, sang tanan nga partido, kredo kag kaliwatan, ang daw makatilingala, nga kinabubut-on kag malipayon nga nag-entra sa inaway.” Nakatuon bala ang mga tawo sang ila leksion kutob sadto? Wala! Ang kalautan sang “bulag nga nasyonalismo,” subong amo ang pagtawag sini sang manunulat nga si Rod Usher, padayon nga nagaguba sing bisan ano nga kahigayunan para sa bug-os kalibutan nga paghiusa.
Mga Puwersa nga Halin sa Guwa Nagapanghikot
Apang, may mas daku pa nga sablag para sa bug-os kalibutan nga paghiusa. Ginabuyagyag sang Biblia nga ang mga puwersa halin sa guwa nagapanghikot. Nakilala sila subong si Satanas nga Yawa kag ang iya mga sumulunod nga mga demonyo. Suno sa Biblia, si Satanas amo “ang dios sining sistema sang mga butang [nga] nagabulag sa painuino sang mga ditumuluo,” agod nga “ang mahimayaon nga maayong balita tuhoy kay Cristo” indi nila mahangpan.—2 Corinto 4:4; Bugna 12:9.
Sa pagkamatuod, wala sini ginahilway ang mga indibiduwal sa salabton sang ila kaugalingon nga mga buhat. Apang ginapaathag sini kon ngaa indi gid mapaluntad sang tawhanon nga panguluhan ang isa ka nahiusa gid nga kalibutan. Tubtob nga nagaluntad si Satanas nga Yawa, pagaimpluwensiahan niya ang mga lalaki kag mga babayi nga palambuon ang ginatawag sang Biblia nga “mga buhat sang unod,” nga nagalakip sa ‘kaawayon, pagpinuyas, kasingkal, kag pagbinahinbahin.’—Galacia 5:19-21.
Bug-os Kalibutan nga Panguluhan
Ano, nian, ang solusyon? Sang nagligad nga mga pito ka gatos ka tuig, ang bantog Italyano nga mamalaybay kag pilosopo nga si Dante nagtudlo sing sabat. Nagsiling sia nga ang bug-os kalibutan nga panguluhan lamang ang makapaluntad sing paghidait kag paghiusa sang katawhan. Para sa madamo nga tawo ang paglaum para sa bisan ano nga porma sang bug-os kalibutan nga panguluhan isa lamang ka dalamguhanon, indi isa ka butang nga masaligan. “Ang bug-os kalibutan nga panguluhan,” hinakop sang ginhinambitan na nga awtor nga si Payne, “imposible sa sining tion sang maragtas.” Ngaa? Bangod ang bisan anong madinalag-on nga bug-os kalibutan nga panguluhan dapat maggarantiya sing duha ka butang nga daw indi gid masarangan sang tawo, nga amo, “dulaon sang isa ka bug-os kalibutan nga panguluhan ang inaway kag nga ang isa ka bug-os kalibutan nga panguluhan indi mangin isa ka bug-os globo nga pagpamigos.”
Pat-od gid nga wala sing tawhanon nga panguluhan ang makahimo sini. Apang, ang Ginharian sang Dios sa paggahom ni Jesucristo, makadula kag magadula sing inaway. (Salmo 46:9, 10; Mateo 6:10) Sa pagkamatuod, dulaon sini ang tanan nga makiawayon. Ginapakita ni manalagna Daniel nga sa katapusan sang gintalana nga tion sang Dios para sa tawhanon nga paggahom sa duta, ang pagginahom sang tawo ‘mangin nabahinbahin’ kaangay sa “salsalon nga nasamo sa lunang nga daga.” (Daniel 2:41-43) Magaresulta ini sa pagbahinbahin sa politika kag dimalikawan nga binangig. Apang, nagasiling si Daniel nga ang Ginharian sang Dios ‘magadugmok kag magapapas sa sining tanan [nasyonalistiko kag wala sing paghiusa] nga ginharian,’ ukon mga panguluhan, kag buslan ini sang iya madugay na ginahulat nga Ginharian sa paggahom ni Jesucristo.—Daniel 2:44.
Wala sing pulos ang pagtuga sing isa ka maayo nga palibot para sa mga tawo kon ang duta padayon nga ginapuy-an sang makatalagam nga mga indibiduwal nga padayon nga nagapamiserable sa kabuhi sang iban. Apang, “ang mga nagahimo sing malaut pagautdon.” (Salmo 37:1, 2, 9, 38; Hulubaton 2:22) Busa, dulaon ni Cristo ang tanan nga nagasikway sing hungod sa mga talaksan sang Dios ukon ang mga nagasuporta sa magamo nga mga awtoridad sang kalibutan. Laglagon niya ang tanan nga nagalaglag sa sining planeta. Ang Dios nagasaad “sa paglaglag sa mga nagalaglag sa duta.”—Bugna 11:18.
Indi ini isa ka bug-os globo nga pagpamigos. Si Jesucristo magapanghikot “bangod sang kamatuoran kag sang pagkamapainubuson kag pagkamatarong” kon painon niya ang maayo gikan sa malain. (Salmo 45:3, 4; Mateo 25:31-33) Indi man ini negatibo lamang kag malaglagon, isa ka pag-abuso sa gahom. Indi! Indi ini kaangay sang pila ka matahom daan nga tinukod nga pagagub-on sang pila ka makagod nga developer sing propiedad. Mangin kaangay ini sa pagguba sing gabok nga tinukod agod paluntaron ang isa ka makalilipay, matinlo nga palibot.
Apang ano naman ang tuhoy sa mga puwersa gikan sa guwa nga gintunaan sinang dipaghiusa sang nagligad? Hilway bala sila sa pagsulod sa sining bag-o nga sistema agod nga ang mga pumuluyo sini magasugod liwat sa pagpanglaglag, nagapakig-away batok sa mga pareho nila nga nagaarkila kag nagapamiserable sa kabuhi sang tanan? Indi gid! Katapusan ini kag bug-os nga pagpahalin kag pagkay-o. “Ang kapipit-an indi magtindog sing makaduha.”—Nahum 1:9.
Ginapaanggid sang Biblia ang bug-os nga paglaglag kay Satanas sa pagsunog sing basura. Nagasiling ini nga “ang Yawa nga nagadaya [sa mga pumuluyo sang duta] gintagbong sa linaw nga kalayo kag asupre.” (Bugna 20:10) Daw ano kabaskog nga paglaragway! Hunahunaa, ang paglaglag nga ginpaanggid indi lamang sa magamay nga sulunugan sing basura nga diutay lang ang unod kundi sa isa ka bug-os nga linaw sang kalayo, nga nagaupos kag nagadula sing tanan nga malaut kag mahigko nga mga butang. Wala sing isa, tawo man ukon demonyo, ang tugutan sa paghimo sing butang nga makatalagam sa bug-os uniberso nga kahim-ong, nga nagalapas sa mga talaksan sang Dios sa maayo kag malain, ukon nga ginatunaan sing kasakit sang ila isigkatawo. Ang tanan nga nagaguba sa paghiusa madula!—Salmo 21:9-11; Sofonias 1:18; 3:8.
Isa ka Nahiusa nga Katawhan Gikan sa Tanan nga Pungsod
Ang mga makalampuwas sa sining daku nga pagtinlo magahuman sa “dakung kadam-an . . . gikan sa tanan nga pungsod kag tribo kag katawhan kag hambal.” (Bugna 7:9) Indi sila pagbahinbahinon bangod sang pagkatuhay sa pungsod kag tribo. Matun-an nila ang magkabuhi sing tingob sa mahidaiton nga paghiusa. (Isaias 2:2-4) Sing labi pa ka makalilipay, pagabuylugan sila sang nagligad nga mga pumuluyo sang duta nga magapuyo liwat sa natinluan nga duta paagi sa mahigugmaon nga aman sang pagkabanhaw.—Juan 5:28, 29.
Luyag mo bala magpuyo sa sinang kalibutan? Ang mga nagahimo lamang sang mga ginapatuman sang Dios ang makapuyo sa sini, kag ang iya mga ginapatuman maathag nga makita sa Biblia. (Juan 17:3; Binuhatan 2:38-42) Ang mga Saksi ni Jehova malipay sa pagbulig sa imo nga matun-an ang mga ginapatuman sang Dios agod matigayon mo ang paglaum sang kabuhi nga dayon sa isa ka nahiusa gid nga kalibutan.
[Kapsion sa pahina 7]
Ang panguluhan sa idalom sang paggahom ni Jesucristo magagarantiya sing isa ka nahiusa nga kalibutan