Paano Mo Maamligan ang Imo mga Anak?

SANG makatapos na sa pagtuon sa eskwelahan malapit sa ila lugar sa sulod sang mga tinuig, si Werner⁠a nagpadayon sa pagtuon upod sa mga 3,000 pa ka pamatan-on sa São Paulo, Brazil. Sa nahauna nga tion, nakita niya ang iya mga kabutho nga nagabaligya kag nagagamit sing droga. Bangod gamayon sing lawas, nangin biktima sia sang ulihi sang nagapakahuya kag nagapangyaguta nga mga sunlog sang mas magulang nga mga estudyante.

Si Eva, nga utod ni Werner, may mga problema man. Bangod luyag niya himuon ang bug-os niya nga masarangan, nagtuon sia sing maayo amo nga nakabatyag sia sing tuman nga pagkalapyo kag pagsalangisag sing isip. Kaangay sang iban nga mga pamatan-on, sanday Werner kag Eva nagakinahanglan sing pisikal kag emosyonal nga pangamlig. Ano nga sahi sang bulig ang ginakinahanglan sang imo mga anak? Paano mo sila ginahanda para sa pagkahamtong? Sa pagkamatuod, ano bala nga buwas-damlag ang luyag mo para sa imo mga anak?

Indi Lang Pagkaon ang Kinahanglan Nila

Hunahunaa anay sa makadali ang problema nga ginaatubang sang mga ginikanan sa pag-amlig sa ila mga anak sa karon. Bangod sang pag-usmod sang kalidad sang pamilya kag paglubha sang kaimulon, labi pa nga nagadamo ang mga bata nga nagalihuliho sa mga kalye sa madamo nga kadutaan. Ang pilit nga pagpatrabaho sa mga bata isa ka resulta sang kapaslawan sa pag-amlig sa mga kabataan gikan sa paghingalit. Ang abuso sa droga nagahalit man sa madamong pamatan-on. Halimbawa, kon ang isa ka taga-Brazil nga tin-edyer magiyan sa droga, madula na ang kalinong sa iya puluy-an. Luwas sa emosyonal nga kahuol nga ginabatyag sang iya mga ginikanan, yara man ang paghimud-os nga gastuhan ang iya pag-ayo, kag ang pagpanukot sa ila balay sang wala kaluoy nga mga manugbaligya sing droga.

Apang, walay sapayan sang mga pag-ipit sa kabuhi, madamong ginikanan ang padayon nga nagahimakas nga maamanan ang ila kabataan indi lamang sing pagkaon, panapton, kag puluy-an kundi sing pangamlig man batok sa kasingki, abuso sa droga, kag iban pa nga mga problema. Dalayawon ini nga panikasog, apang bastante na bala ini? Kamusta naman ang pangamlig batok sa emosyonal kag espirituwal nga kahalitan? Nahangpan sang madamo nga ang madinalag-on nga pagpadaku kag pag-atipan sa mga anak nagalakip sang pag-atubang sa mga hangkat may kaangtanan sa ginapili nga mga abyan kag kalingawan sang ila mga anak. Apang, paano malikawan sang mga ginikanan nga mangin sobra ka mainamligon ukon sobra ka mapahanuguton? Ginaagda namon ikaw nga binagbinagon ang mga sabat nga masapwan sa masunod nga artikulo.

[Footnote]