Pagsimba sa Dios sa Kamatuoran

Agod mahamut-an sang Dios ang pagsimba, dapat ini napasad sa kamatuoran. (Juan 4:23) Ginapakilala sang Biblia ang matuod nga mga sumilimba subong katapo sang “kongregasyon sang Dios nga buhi, ang haligi kag pamakod sang kamatuoran.” (1 Timoteo 3:​15) Ang mga katapo sang kongregasyon sang Dios wala lamang nagapati sa kamatuoran sang Pulong sang Dios kundi nagakabuhi man suno sa sini kag ginapangapinan ini, ginapahibalo ini sa bug-os nga duta.​—⁠Mateo 24:14; Roma 10:​9-​15.

ANG mga Saksi ni Jehova kilala sa ila hilikuton nga pagtudlo sing Biblia, nga ginahimo karon sa kapin sa 200 ka pungsod. Ginatun-an nila ang Biblia kag ginatudlo ini subong amo ang kamatuoran, nga wala ginasimbugan sing nagapaluya nga impluwensia sang tawhanon nga mga pilosopiya. Pamilyar ka bala sa ila pasad sa Biblia nga mga panudlo? Madamo ang nagapangalag-ag nga mamati sa mga Saksi ni Jehova bangod sang negatibo nga impormasyon nga nagalapta batok sa ila. Apang ginaagda ang bunayag sing tagipusuon nga mga tawo nga mamat-od para sa ila kaugalingon kon bala ang ginabantala sang mga Saksi kamatuoran ukon indi. Ining importante nga desisyon indi dapat ipasad sa sugidsugid lamang. Nakabenepisyo sing daku ang madamo nga nagpangusisa sing personal sa mga panudlo sang mga Saksi ni Jehova.

Ang Ihibalo Tuhoy sa Kamatuoran Nagadula sing Kahadlok

Binagbinaga, halimbawa, ang kaso ni Eugenia. Ginpadaku sia sa panimalay nga debotado nga Katoliko. Ang iya amay isa sang mga nag-organisar sang pagbisita sang papa sa Mexico sadtong 1979. Sang magduaw si Eugenia sa iya mga abyan, nasumalang niya ang mga Saksi ni Jehova. Sa bulig nila ginbinagbinag niya sing kapin ka tul-id ang ginasiling sang Biblia. Sia naghinumdom: “Sang primero, hinadlukan ako. Nasapwan ko ang kamatuoran! Apang nagakahulugan ini nga ang kalabanan sang akon una nga ginapatihan sayop. Ang akon pamilya, ang akon mga abyan, ang mga tawo nga akon ginapalangga​—⁠sayop sila tanan. Ginkulbaan ako. Pirme ko ginapamangkot ang akon kaugalingon kon ano ayhan ang mangin reaksion sang akon pamilya tuhoy sa bag-o ko natukiban. Sa pagligad sang tion kag sa bulig ni Jehova, nalandas ko ining daku nga kahadlok. Isa ka adlaw namat-od ako nga magtu-ad sa isa ka abyan sang pamilya, isa ka propesor sa teolohiya. Ginsugiran ko sia sang akon handum nga makita ang kamatuoran. Dayon nagsiling sia, ‘Kon luyag mo mahibaluan ang kamatuoran, pangitaa ang mga Saksi ni Jehova.’ ”

Subong sang ginahadlukan ni Eugenia, ginpalayas sia sang iya pamilya sa ila balay. Apang, padayon sia nga ginbuligan sa espirituwal sang mga Saksi. Sia nagsiling: “Napalig-on ako nga manindugan sa kamatuoran. Narealisar ko nga butang ini nga takus ipakig-away. Ang pag-abiabi nga nabaton ko gikan sa mga Saksi ni Jehova importante gid. Nabatyagan ko ang paghigugma sang Cristianong kongregasyon. Ang pagsuod sa organisasyon sang Dios nagbulig sa akon nga malandas ang kahadlok nga manindugan sa kamatuoran sing isahanon.”

Binagbinaga ang isa pa ka halimbawa. Nagdaku si Sabrina nga naanad nga ang iya pamilya may regular nga paghambalanay tuhoy sa Biblia. Sa katunayan, napalambo nila ang isa ka porma sang ‘relihion sang pamilya.’ Batasan na niya nga makig-upod sa mga katapo sang nagkalainlain nga relihion agod ipadayag ang ila mga sayop. Sang gintanyagan sia sang isa sang mga Saksi ni Jehova sing pagtuon sa Biblia, ginbaton niya ini gilayon sa tuyo nga pamatud-an nga sayop ang ila mga pagpati. Sia naghinumdom: “Sa tapos sang kapin sa isa ka tuig nga pagtuon, hinadlukan ako nga basi madula ko ang ‘akon kamatuoran.’ Mahapos nga napadayag ko ang kabutigan sang madamo nga relihion nga napakig-angutan ko anay, apang indi ini mahapos sa sining tion.”

Bangod sang kahadlok ni Sabrina nag-untat sia sa pagtuon sing Biblia upod sa mga Saksi ni Jehova. Apang nagbatyag sia nga nakulangan sa espirituwal. Namat-od sia nga padayunon ang pagtuon kag ginbaton niya sang ulihi ining bag-o niya nasapwan nga kamatuoran. Nag-uswag si Sabrina tubtob sa punto nga luyag niya ipaambit sa iban ang iya natun-an. Nangabay pa gani sia nga mag-upod sa mga Saksi sa ila pamalaybalay nga ministeryo. Si Sabrina nagpaathag: “Antes ako ginpasugtan nga magbantala upod sa mga Saksi ni Jehova, ginpamangkot ako: ‘Luyag mo gid bala nga mangin isa sang mga Saksi ni Jehova?’ ‘Indi!’ sabat ko. Hinadlukan ako liwat.” Sang ulihi, pagkatapos sang padayon nga pagtambong sa tanan nga miting kag pagpanilag sa katawhan sang Dios kag kon paano nila ginaaplikar ang mga prinsipio sa Biblia, naghinakop si Sabrina nga amo gid ini ang kamatuoran. Ginbawtismuhan sia kag isa na karon ka bug-os tion nga ebanghelisador.

Ngaa Tuhay Gid?

Ang isa mahimo mamangkot, ‘Ngaa ang mga panudlo sang mga Saksi ni Jehova tuhay gid sa iban nga mga relihion?’ Ang pagtan-aw sing makadali sa mga ginapatihan sang mga Saksi magabulig sa imo nga makita nga sila sinsero nga mga Cristiano, maukod nga mga estudyante sang Biblia. Ginapalig-on namon kamo nga tan-awon mismo sa inyo Biblia ang mga teksto sa sumaryo sang ila sadsaran nga mga pagtuluuhan nga yara sa ibabaw.

Paagi sa tul-id pa nga pag-usisa sa mga ginapatihan sang mga Saksi ni Jehova kag kon paano nila ginasunod ang ginatudlo sang Biblia, mahimo ikaw pakamaayuhon sing kahilwayan nga ginahatag sang kamatuoran. (Juan 17:17) Wala sing rason nga mahadlok sa kamatuoran. Dumduma ang saad ni Jesus: “Mahibaluan ninyo ang kamatuoran, kag ang kamatuoran magahilway sa inyo.”​—⁠Juan 8:⁠32.

[Kahon sa pahina 6]

PILA KA SADSARAN NGA PAGTULUUHAN SANG MGA SAKSI NI JEHOVA

◯ Si Jehova amo ang labing gamhanan nga Dios. Ang iya personal nga ngalan makita sing kapin sa 7,000 ka beses sa dumaan nga mga manuskrito sang Biblia.​—⁠Salmo 83:⁠18.

◯ Si Jesucristo amo ang Anak sang Dios, nga nagkari sa duta agod ihatag ang iya kabuhi para sa katawhan. (Juan 3:​16, 17) Ginasunod sang mga Saksi ni Jehova ang mga panudlo ni Jesucristo nga masapwan sa mga Ebanghelyo.

◯ Ang ngalan nga Mga Saksi ni Jehova napasad sa Isaias 43:​10, nga nagasiling: “ ‘Kamo akon mga Saksi,’ siling ni Jehova.”

◯ Ang Ginharian nga ginapangamuyo sang mga tawo sa “Amay Namon” nga pangamuyo isa ka langitnon nga panguluhan nga magadula sa indi madugay sa tanan nga pag-antos kag kasakit sa kalibutan agod paluntaron ang Paraiso nga ginasaad sang Biblia.​—⁠Isaias 9:​6, 7; Daniel 2:​44; Mateo 6:​9, 10; Bugna 21:​3, 4.

◯ Ang tagsatagsa nga nagahimo sing kabubut-on sang Dios may kahigayunan nga matigayon ang mga pagpakamaayo sang Ginharian sing dayon.​—⁠Juan 17:3; 1 Juan 2:​17.

◯ Dapat dihunon sang mga Cristiano ang ila pamatasan suno sa ginasiling sang Biblia. Dapat nila panikasugan nga mangin bunayag, magkabuhi sing matinlo, maayo sing moral nga kabuhi, kag magpakita sing gugma sa ila isigkatawo.​—⁠Mateo 22:39; Juan 13:35; 1 Corinto 6:​9, 10.

[Retrato sa pahina 5]

Ginapakilala sang mga Saksi ni Jehova ang kamatuoran sang Biblia sa mga tawo sa kapin sa 200 ka kadutaan