May Anghel De La Guardia ka Bala?
NAGAPATI ka bala nga may anghel de la guardia ka? Madamo nga tawo ang nagapati nga may anghel de la guardia sila. Nahanungod sina, isa ka babayi sa nakatundan nga Canada ang may pinasahi kuno nga dulot may kaangtanan sa mga anghel. Kon ihatag mo sa iya ang imo bug-os nga ngalan lakip ang $200 (Canadian), buligan niya kuno ikaw nga makapakigsugilanon sa imo anghel de la guardia. Una, nagapamalandong sia paagi sa pagkonsentrar sa kalayo sang kandila. Masunod, may palanan-awon sia diin ang imo anghel nagahatag sa iya sing mensahe nga ipaalinton sa imo. Bilang bonus, ang babayi magahatag sa imo sing drowing sang kon ano ang hitsura sang imo anghel.
Para sa iban, daw kaangay ini sa sugilanon tuhoy sa Pranses nga si Hari Louis IX. Nakabakal kuno sia sing mahal kaayo nga balahibo nga nahulbot sa pakpak ni Miguel Arkanghel. Samtang daw indi makapati sa sina nga sugilanon, madamo ang gilayon nga nagapati sa ginasiling sang babayi nga taga-Canada.
Pagkawili sa mga Anghel
May daku gid nga pagkawili sa mga anghel sining karon nga tinuig. Ang telebisyon kag sine, libro, magasin, kag balasahon nagasugid sa aton tuhoy sa mga anghel nga nagalipay sa mga nagabalatian sing malubha, nagalugpay sa namatyan, nagahatag sing kaalam, kag nagaluwas sa mga indibiduwal gikan sa kamatayon. Sa Estados Unidos, mga 20 milyones ang nagatan-aw sing mga serye sa telebisyon kada semana nga nagalarawan sa pagpasilabot sang anghel sa pangabuhi sang tawo. Ang isa ka balaligyaan sang libro nagalista sing sobra sa 400 ka libro nga tuhoy lamang sa mga anghel.
Isa ka libro sining karon lang ang nagasugid kon paano ginsalbar sang mga anghel de la guardia ang nagapakig-away nga mga soldado. Ang mga sticker sa likod sang awto nagasiling nga ang mga tsuper ginaamligan sang mga anghel de la guardia. Ang mga organisasyon, mga komperensia, kag mga seminar nagapalig-on sang pagtuon sa mga anghel kag nagabulig kuno sa mga tawo nga makakomunikar sa ila.
Si Eileen Freeman nagsulat sing tatlo ka libro tuhoy sa mga anghel kag nagabalhag sing isa ka balasahon nga tuhoy lamang sa ila. Nagsiling sia: “Nagapati ako nga ang mga anghel de la guardia sa Duta subong kadamo sa mga anghel sa langit, isa ka persona nga ang iya katungdanan indi lamang ang dayawon ang Dios sa langit kundi ang atipanon ang mga tawo kag ang iban pa nga mga porma sang kabuhi sa Duta. May isa ka anghel de la guardia nga gintangdo sa kada isa sa aton sang ginpanamkon kita kag nagabantay sa aton sa aton pagtubo sa tiyan, sa aton pagkatawo, sa aton pagkabuhi sa sining kalibutan, tubtob ginaubayan kita sang anghel gikan sa sini nga kalibutan pakadto sa himaya sang langit.” Ginalaragway sini ang popular nga pagpati tuhoy sa mga anghel de la guardia.
Sa sining mahuol kag mabudlay nga mga tion, makalulugpay patihan nga may anghel de la guardia kita, nga ang ila katungdanan amo ang pag-amlig sa aton. Ano ang ginasiling sang Pulong sang Dios, ang Biblia, tuhoy sini? Dapat bala naton tinguhaan nga masugilanon ang mga anghel? Interesado bala sila sa aton mga talaksan sa moral kag relihioso nga mga pagpati? Ano nga bulig ang mapaabot naton sa ila? Ini nga mga pamangkot sabton sa masunod nga artikulo.