Kon Paano Ka Mabuligan sang mga Anghel
GINAPAMATUD-AN sang Pulong sang Dios ang pagluntad sang mga anghel. Ginasugiran kita sini nga may yara minilyon sining espiritu nga mga tinuga. Ang alagad ni Jehova nga Dios nga si Daniel may palanan-awon tuhoy sa langitnon nga mga butang nga nahanungod sini sia nagsulat: “Ang mga linibo sang mga linibo nagaalagad sa [Dios], kag linaksa sa mga linaksa nagatilindog sa atubangan niya.”—Daniel 7:10.
Talupangda nga ang pinamulong ni Daniel wala lamang nagasugid sa aton nga may madamo nga anghel. Nagasugid man ini nga ang mga anghel nagaalagad sa Dios. Mga alagad niya sila. Nahisuno sa sini, ang salmista nag-amba: “Pakamaayuha si Jehova, O kamo nga iya mga anghel, nga gamhanan sa kusog, nga nagatuman sang iya pulong, paagi sa pagpamati sa tingog sang iya pulong. Pakamaayuha si Jehova, tanan kamo nga iya mga kasuldadusan, kamo nga iya mga ministro, nga nagahimo sang iya kabubut-on.”—Salmo 103:20, 21.
Ginapaathag man sang Biblia nga ang mga anghel wala magsugod sa pagkabuhi subong mga tawo sa duta. Gintuga ni Jehova ang mga anghel sa langit antes pa niya gintuga ang duta. Sang ‘ginpasad sang Dios ang duta, ang tanan nga anghel nga anak sang Dios naghugyaw sa kalipay.’—Job 38:4-7.
Ang mga anghel espiritu nga mga tinuga—dimakita, gamhanan, maalam. Sa Biblia, ang Hebreong tinaga nga mal·ʼakhʹ kag ang Griegong termino nga agʹge·los ginabadbad nga “anghel” kon nagapatuhoy sa espiritu nga mga tinuga. Ini nga tinaga mabasa sing halos 400 ka beses sa Biblia. Lunsay sila may isa ka kahulugan, kon sayuron, “mensahero.”
Mga Kahigayunan nga Nakita ang Anghel
Ang mga anghel mga mensahero gid. Ayhan pamilyar ka sa rekord sang Biblia tuhoy sa tion nga nagpakita si anghel Gabriel kay Maria. Nagsiling sia nga bisan pa ulay sia, magaanak sia sing bata nga lalaki nga hingalanan si Jesus. (Lucas 1:26-33) Nagpakita man ang isa ka anghel sa pila ka manugbantay nga didto sa latagon. Nagpahibalo sia: “Natawo sa inyo karon nga adlaw ang Manluluwas, nga si Cristo nga Ginuo.” (Lucas 2:8-11) Subong man, ang mga anghel nagpaalinton sing mensahe kay Hagar, kay Abraham, kay Lot, kay Jacob, kay Moises, kay Gideon, kay Jesus, kag sa iban pa sa rekord sang Biblia.—Genesis 16:7-12; 18:1-5, 10; 19:1-3; 32:24-30; Exodo 3:1, 2; Hukom 6:11-22; Lucas 22:39-43; Hebreo 13:2.
Talalupangdon nga ining tanan nga mensahe nga ginpaalinton sang mga anghel naghisanto sa katumanan sang katuyuan sang Dios kag indi sang mga tawo nga nadalahig. Ang mga anghel nagpakita subong mga tiglawas sang Dios, suno sa iya kabubut-on kag orasan. Wala sila ginpatawag sang mga tawo.
Dapat Bala Kita Mangayo sing Bulig sa mga Anghel?
Nagakaigo bala manawag sa mga anghel sa tion sang kasisit-an? Kon amo, luyag naton mahibaluan ang ngalan sang anghel nga makabulig sing daku sa aton. Gani, ang pila ka komersial nga mga libro nagalista sang kuno mga ngalan sang madamong anghel, lakip na ang ila posisyon, titulo, kag katungdanan. Ang isa ka libro nagalista sang ginatawag sini nga “napulo ka pinakapopular nga mga anghel,” ang “kilala kaayo nga mga anghel sa Nakatundan.” Lakip sa listahan amo ang laygay nga piyungon ang imo mga mata, sambiton sing mahinay ang ngalan sang anghel sing pila ka beses, magginhawa sing madalom, magginhawa sing mahinay, kag “ihanda ang imo kaugalingon sa posible nga pagpakigsugilanon sa ila.”
Sa kabaliskaran, ang Biblia nagahatag sa aton sang ngalan sang duha lamang sang matutom nga mga anghel sang Dios, sanday Miguel kag Gabriel. (Daniel 12:1; Lucas 1:26) Ang rason kon ngaa ginhatag ini nga mga ngalan mahimo nga agod ipakita nga ang kada anghel isa ka pinasahi nga espiritu nga tinuga nga may ngalan, indi lamang enerhiya ukon puwersa.
Talalupangdon man nga wala ginsugid sang pila ka anghel ang ila ngalan sa mga tawo. Sang ginpangabay ni Jacob ang isa ka anghel sa pagsugid sang iya ngalan, wala niya ini ginsugid. (Genesis 32:29) Sang ginpangabay nga ipakilala ang iya kaugalingon, ang anghel nga nagpalapit kay Josue nagsiling lamang nga sia ang “prinsipe sang kasuldadusan ni Jehova.” (Josue 5:14) Sang ginpangabay sang mga ginikanan ni Samson sa isa ka anghel ang iya ngalan, nagsiling sia: “Ngaa bala nagapamangkot ka sang akon ngalan, samtang isa ini nga makatilingala?” (Hukom 13:17, 18) Paagi sa indi paghatag sing listahan sang mga ngalan sang mga anghel, ang Biblia nagaamlig sa aton gikan sa paghatag sa mga anghel sing dinagakaigo nga pagpadungog kag pagsimba. Subong makita pa naton, wala ini nagasugo sa aton nga manawag kita sa ila.
Pagpanawag sa Dios
Ang Biblia nagasugid sa aton sang tanan nga dapat naton mahibaluan nahanungod sa ginahimo sa duog sang mga espiritu. Si apostol Pablo nagsulat: “Ang tanan nga Kasulatan ginbugna sang Dios kag mapuslanon sa pagpanudlo . . . agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.” (2 Timoteo 3:16, 17) Kon luyag sang Dios nga mahibaluan naton ang ngalan sang madamong anghel, ginsugid niya ini kuntani sa iya Pulong, ang Biblia. Kag kon luyag sang Dios nga tudluan kita kon paano makigkomunikar sa mga anghel kag makighambal sa ila sa pangamuyo, ginhatag niya ini kuntani sa Kasulatan.
Sa baylo, si Jesucristo nagtudlo: “Kon ikaw mangamuyo, magsulod sa imo pribado nga hulot kag, pagkatapos matakpan ang imo ganhaan, mangamuyo ka sa imo Amay nga yara sa tago . . . Mangamuyo kamo, nian, sa sining paagi: ‘Amay namon nga yara sa mga langit, pakabalaanon ang imo ngalan.’ ” (Mateo 6:6, 9) Ang Makasulatanhon nga pagtamod amo sini: Indi kita dapat manawag sa mga anghel ukon mangamuyo sa ila, kundi dapat kita mapangamuyuon nga magpalapit sa Manunuga sang mga anghel, ang Dios mismo. Ang iya ngalan indi misteryo, kag indi na kinahanglan ang isa ka bisyonaryo sa pagsugid sini. Bisan pa gintinguhaan anay nga taguon ang ngalan sang Dios, makita ini sa rekord sang Biblia sing kapin sa 7,000 ka beses. Halimbawa, nahanungod sa langitnon nga Amay nga ang salmista nag-amba: “Ikaw, nga ang ngalan si Jehova, ikaw lamang ang Labing Mataas sa bug-os nga duta.”—Salmo 83:18.
Si Jehova may tion pirme sa pagpamati sa aton kon magpalapit kita sing nagakaigo sa iya sa pangamuyo. Ang Biblia nagahatag sini nga pasalig: “Tuhoy kay Jehova, ang iya mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.”—2 Cronica 16:9.
Mga Anghel kag mga Moral
Kabaliskaran sa masunson ginalaragway sang media, ang mga anghel wala nagahukom sa mga tawo. Nagakaigo ina, bangod ang mga anghel indi awtorisado sa paghukom sa mga tawo. Si Jehova amo “ang Hukom sang tanan,” bisan pa nga ‘gintugyan niya ang tanan nga paghukom sa Anak,’ nga si Jesucristo. (Hebreo 12:23; Juan 5:22) Walay sapayan, indi husto hunahunaon nga ang mga anghel wala nagasapak sa kon paano kita nagakabuhi. Si Jesus nagsiling: “May kalipay sa tunga sang mga anghel sang Dios tungod sa isa ka makasasala nga nagahinulsol.”—Lucas 15:10.
Apang, ang mga anghel indi mga miron lamang. Sang una nga panahon, nag-alagad sila subong mga manugpatay, nga nagatuman sang mga paghukom sang Dios. Halimbawa, gingamit sang Dios ang mga anghel batok sa dumaan nga mga Egiptohanon. Suno sa Salmo 78:49, “ginhaboy niya sa ila ang kabangis sang iya kaakig, kasingkal kag kaalipungot kag kalisang, ang guban sang mga anghel nga nagadala sing kapahamakan.” Subong man, ang Biblia nagasugid nga sa isa ka gab-i ginpatay sang isa lang ka anghel ang 185,000 ka soldado sang Asiria.—2 Hari 19:35.
Subong man, sa palaabuton, laglagon sang mga anghel yadtong nagabutang sa katalagman sang kaayuhan sang iban paagi sa indi pagsunod sa matarong nga mga talaksan sang Dios. Si Jesus magakari “kaupod sang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita.”—2 Tesalonica 1:7, 8.
Sa amo, ginapakita sang Kasulatan nga ang matutom nga mga anghel sang Dios pirme nagahimo sang iya kabubut-on paagi sa pagtuman sa iya mga sugo kag sa pagsakdag sa iya matarong nga mga talaksan. Sing maathag, kon luyag naton nga buligan kita sang mga anghel sang Dios, dapat naton hibaluon kon ano ang kabubut-on sang Dios kag maukod nga panikasugan nga himuon ini.
Mga Anghel de la Guardia
Ang mga anghel nagaulikid bala sa mga tawo kag nagaamlig sa ila? Si apostol Pablo nagpamangkot: “Indi bala sila [mga anghel] tanan mga espiritu para mag-alagad sa publiko, nga ginpadala agod mag-alagad sa mga magapanubli sing kaluwasan?” (Hebreo 1:14) Sing maathag, huo ang sabat sa pamangkot ni Pablo.
Bangod wala sila magyaub sa bulawan nga larawan nga ginpatindog ni Hari Nabocodonosor sang Babilonia, ang tatlo ka Hebreo nga sanday Sadrac, Mesac, kag Abednego gintagbong sa ginpainit kaayo nga hurno. Apang, yadtong matutom nga mga alagad sang Dios wala maduktan sang kalayo. Sang gintan-aw sang hari ang hurno, nakita niya ang “apat ka mabukod nga lalaki,” kag nagsiling nga “ang dagway sang ikap-at kaangay sa anak sang mga dios.” (Daniel 3:25) Pila ka tuig sang ulihi, nasapwan ni Daniel ang iya kaugalingon sa lungib sang mga leon bangod sang iya katutom. Nakalampuwas man sia nga wala mahaliti kag nagsiling: “Ang akon Dios nagpadala sang iya anghel kag nagtakop sang baba sang mga leon.”—Daniel 6:22.
Sang gintukod ang kongregasyon sang mga sumulunod ni Cristo sang nahaunang siglo C.E., ang mga anghel nagpakita liwat, naghilway sang mga apostoles sa bilangguan. (Binuhatan 5:17-24; 12:6-12) Kag sang ang kabuhi ni Pablo nabutang sa katalagman sa dagat, ginpasalig sia sang anghel nga makadangat sia sa Roma nga dimahalitan.—Binuhatan 27:13-24.
Ang mga alagad ni Jehova nga Dios karon kumbinsido sing bug-os nga ang dimakita nga angheliko nga mga puwersa sang Dios matuod kag sarang makahatag sing proteksion, subong sang ginhimo nila kay Eliseo kag sa iya suluguon. (2 Hari 6:15-17) Sa pagkamatuod, “ang anghel ni Jehova nagabantay sa palibot sang mga nagakahadlok sa iya, kag ginaluwas niya sila.”—Salmo 34:7; 91:11.
Ang Mensahe nga Ginadala sang mga Anghel
Bisan pa ang mga anghel nabalaka sa kaayuhan sang mga nagaalagad kay Jehova nga Dios, ginapat-od man nila nga mahibaluan sang mga tawo ang tuhoy sa iya kag sa iya katuyuan. Si apostol Juan nagsulat: “Nakita ko ang isa naman ka anghel nga nagalupad sa tunga sang langit, kag may walay katapusan nga maayong balita sia nga ibantala sa mga nagapuyo sa duta, kag sa tagsa ka pungsod kag tribo kag hambal kag katawhan, nga nagasiling sa mabaskog nga tingog: ‘Kahadluki ninyo ang Dios kag hatagi sia sing himaya.’ ”—Bugna 14:6, 7.
Luyag mo bala mahibaluan ang kaundan sining “walay katapusan nga maayong balita”? Kon amo, pamangkuta ang mga Saksi ni Jehova. Malipay sila sa pagsugid sini sa imo.
[Mga retrato sa pahina 7]
Isa ka anghel sa tunga sang langit ang nagabantala sing walay katapusan nga maayong balita. Luyag mo bala mahibaluan ang tuhoy sini?