Paglakat Upod sa Dios—ang Una nga mga Tikang
“Magpalapit kamo sa Dios, kag magapalapit sia sa inyo.”—SANTIAGO 4:8.
1, 2. Ngaa magasiling ka nga ang pag-alagad kay Jehova isa ka daku nga pribilehiyo?
NABILANGGO ang isa ka tawo sing tinuig. Nian ginpatawag sia sa atubangan sang manuggahom sang isa ka pungsod. Madasig ang nagkalatabo. Sa hinali, nasapwan sang bilanggo ang iya kaugalingon nga nagaalagad sa labing gamhanan nga hari sadto sa duta. Ang isa ka bilanggo anay ginbutang sa isa ka posisyon nga may dakung salabton kag tumalagsahon nga dungog. Si Jose—ang tawo nga sang una nakadenahan sa mga tiil—nagalakat karon upod sa hari!—Genesis 41:14, 39-43; Salmo 105:17, 18.
2 Sa karon, may kahigayunan ang mga tawo nga mag-alagad sa isa nga daku pa sa Paraon sang Egipto. Ang Supremo nga Isa sang uniberso nagaagda sa aton tanan nga mag-alagad sa iya. Daw ano ka makapulunaw nga pribilehiyo nga himuon ini kag palambuon ang isa ka suod nga kaangtanan kay Jehova, ang labing gamhanan nga Dios! Sa Kasulatan, ang harianon nga gahom kag pagkadalayawon subong man ang kalinong, katahom, kag kaalikaya ginaangot sa iya. (Ezequiel 1:26-28; Bugna 4:1-3) Ang tanan niya nga pagpakig-angot mahigugmaon. (1 Juan 4:8) Wala gid sia nagabutig. (Numeros 23:19) Kag wala gid ginapaslaw ni Jehova ang mga mainunungon sa iya. (Salmo 18:25) Paagi sa pagsunod sa iya matarong nga mga sugo, makatigayon kita sing makalilipay, may katuyuan nga kabuhi karon, nga ginapaabot ang kabuhi nga walay katapusan. (Juan 17:3) Wala sing tawo nga manuggahom ang nagatanyag sing butang nga mapaanggid sa sini nga mga pagpakamaayo kag mga pribilehiyo.
3. Sa anong paagi si Noe ‘naglakat upod sa matuod nga Dios’?
3 Sang una, ang patriarka nga si Noe namat-od nga magkabuhi nahisanto sa kabubut-on kag katuyuan sang Dios. Tuhoy sa iya, ang Biblia nagasiling: “Si Noe tawo nga matarong. Ginpamatud-an niya ang iya kaugalingon nga walay kasawayan sa iya mga kadungan. Si Noe naglakat upod sa matuod nga Dios.” (Genesis 6:9) Sa pagkamatuod, si Noe wala sa literal maglakat upod kay Jehova, kay wala sing tawo nga “nakakita sa Dios sa bisan ano nga tion.” (Juan 1:18) Sa baylo, si Noe naglakat upod sa Dios bangod ginhimo niya ang ginsugo sang Dios sa iya. Bangod ginhugod ni Noe ang iya kabuhi sa paghimo sang kabubut-on ni Jehova, nakatigayon sia sing mahigugmaon, suod nga kaangtanan sa Labing Gamhanan nga Dios. Kaangay ni Noe, minilyon karon ang ‘nagalakat upod sa Dios’ paagi sa pagkabuhi nahisanto sa laygay kag panudlo ni Jehova. Paano ang isa ka tawo nagasugod sa sini nga dalanon?
Kinahanglanon ang Sibu nga Ihibalo
4. Paano ginatudluan ni Jehova ang iya katawhan?
4 Agod makalakat upod kay Jehova, dapat naton anay makilala sia. Si manalagna Isaias nagtagna: “Mahanabo sa ulihing bahin sang mga adlaw nga ang bukid sang balay ni Jehova tukuron sing malig-on sa putukputukan sang kabukiran, kag pakataason sa ibabaw sang kabakuluran; kag magadugok sa sini ang tanan nga pungsod. Kag madamong tawo ang pat-od nga magalakat kag magasiling: ‘Kari, kamo nga katawhan, kag magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ Kay gikan sa Sion magaguwa ang kasuguan, kag ang pulong ni Jehova gikan sa Jerusalem.” (Isaias 2:2, 3) Huo, makasalig kita nga tudluan ni Jehova ang tanan nga nagatinguha sa paglakat sa iya mga dalanon. Gin-aman ni Jehova ang iya Pulong, ang Biblia, kag ginabuligan niya kita sa paghangop sini. Ang iya isa ka paagi amo ang “matutom kag mainandamon nga ulipon.” (Mateo 24:45-47) Ginagamit ni Jehova ‘ang matutom nga ulipon’ agod maghatag sing espirituwal nga instruksion paagi sa napasad-sa-Biblia nga mga publikasyon, Cristianong mga miting, kag walay bayad nga pagtuon sa Biblia sa puluy-an nga kahimusan. Ginabuligan man sang Dios ang iya katawhan nga mahangpan ang iya Pulong paagi sa iya balaan nga espiritu.—1 Corinto 2:10-16.
5. Ngaa tuman ka hamili ang Makasulatanhon nga kamatuoran?
5 Bisan pa wala naton ginabayaran ang kamatuoran sang Biblia, hamili ini. Samtang ginatun-an naton ang Pulong sang Dios, mahibaluan naton ang tuhoy sa Dios mismo—ang iya ngalan, ang iya personalidad, ang iya katuyuan, kag ang iya pagpakig-angot sa mga tawo. Mahibaluan man naton ang nagahatag-kahilwayan nga mga sabat sa sadsaran nga mga pamangkot sang kabuhi: Ngaa yari kita diri? Ngaa ginatugutan sang Dios ang pag-antos? Ano ang ginatigana sang palaabuton? Ngaa nagatigulang kita kag nagakapatay? May kabuhi pa bala sa tapos sang kamatayon? Dugang pa, mahibaluan naton kon ano ang kabubut-on sang Dios para sa aton, kon sayuron, kon paano kita dapat maglakat agod mapahamut-an naton sia sing bug-os. Mahibaluan naton nga ang iya mga sugo makatarunganon kag mapuslanon gid kon sundon naton. Kon wala ang instruksion sang Dios, indi gid naton mahangpan ining mga butang.
6. Ano nga dalanon ang ginapadayon naton bangod sang sibu nga ihibalo sa Biblia?
6 Ang kamatuoran sang Biblia gamhanan kag nagapahulag sa aton sa pagbag-o sang aton kabuhi. (Hebreo 4:12) Antes naton natun-an ang Kasulatan, nagalakat kita “suno sa sistema sang mga butang sining kalibutan.” (Efeso 2:2) Apang ang sibu nga ihibalo gikan sa Pulong sang Dios tul-id nga nagahimo sing tuhay nga dalanon para sa aton agod ‘makalakat kita sing takus kay Jehova agod pahamut-an sia sing bug-os.” (Colosas 1:10) Daw ano ka makalilipay nga himuon naton ang aton una nga mga tikang sa paglakat upod kay Jehova, ang labing dalayawon nga Persona sa bug-os nga uniberso!—Lucas 11:28.
Duha ka Importante nga Tikang—Dedikasyon kag Bawtismo
7. Samtang ginatun-an naton ang Pulong sang Dios, ano nga kamatuoran tuhoy sa pagdumala sang tawo ang nagaathag?
7 Kon mag-uswag ang aton paghangop sa Biblia, magasugod man kita sa pag-usisa sang mga nagakalatabo sa tawo kag sang aton mismo kabuhi suno sa espirituwal nga kapawa sang Pulong sang Dios. Sa amo, nagaathag ang isa ka importante nga kamatuoran. Ina nga kamatuoran ginpabutyag madugay na ni manalagna Jeremias, nga nagsulat: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Ang mga tawo—kita tanan—nagakinahanglan sing pagtuytoy sang Dios.
8. (a) Ano ang nagapahulag sa mga tawo sa pagdedikar sang ila kaugalingon sa Dios? (b) Ano ang Cristianong dedikasyon?
8 Ang paghangop sa sining importante nga kamatuoran nagapahulag sa aton nga mangayo sing tuytoy kay Jehova. Kag ang gugma sa Dios nagapahulag sa aton nga idedikar ang aton kabuhi sa iya. Ang pagdedikar sa Dios nagakahulugan nga magpalapit kita sa iya paagi sa pangamuyo kag sinsero nga mangako sa iya nga gamiton naton ang aton kabuhi sa pag-alagad sa iya kag sa paglakat sa iya mga dalanon sing matutom. Paagi sa paghimo sini, ginasunod naton ang huwaran ni Jesus, nga nagpresentar sang iya kaugalingon kay Jehova upod ang malig-on nga determinasyon nga tumanon ang kabubut-on sang Dios.—Hebreo 10:7.
9. Ngaa ginadedikar sang mga indibiduwal ang ila kabuhi kay Jehova?
9 Si Jehova nga Dios wala gid nagapilit ukon nagapuwersa kay bisan sin-o nga idedikar niya ang iya kaugalingon sa iya. (Ipaanggid ang 2 Corinto 9:7.) Dugang pa, ang Dios wala nagapaabot kay bisan sin-o nga idedikar ang iya kabuhi sa Iya bangod sang umalagi lamang nga emosyon. Antes bawtismuhan, dapat nga isa na ka disipulo ang isa ka tawo, kag nagakinahanglan ina sing maukod nga panikasog sa pagkuha sing ihibalo. (Mateo 28:19, 20) Nagpakiluoy si Pablo sa mga nabawtismuhan na nga ‘idulot ang ila mga lawas nga isa ka halad nga buhi, balaan, kalahamut-an sa Dios, isa ka sagrado nga pag-alagad lakip ang ila ikasarang sa pagpangatarungan.’ (Roma 12:1) Kita man nagadedikar sang aton kaugalingon kay Jehova nga Dios paagi sa paggamit sang aton ikasarang sa pagpangatarungan. Sa tapos matun-an kon ano ang nadalahig kag makapangatarungan sing mahalungon tuhoy sa sini nga butang, ginadedikar naton ang aton kabuhi sa Dios sing kinabubut-on kag malipayon.—Salmo 110:3.
10. Ano ang kaangtanan sang dedikasyon sa bawtismo?
10 Sa tapos makapalapit sa Dios sing kinaugalingon paagi sa pangamuyo agod ipabutyag ang aton determinasyon nga maglakat sa iya mga dalanon, ginahimo naton ang masunod nga tikang. Ginapahibalo naton sing dayag ang aton dedikasyon paagi sa aton bawtismo sa tubig. Isa ini ka dayag nga pagpahayag nga nanumpa kita nga himuon ang kabubut-on sang Dios. Sa pamuno sang iya ministeryo sa duta, nagpabawtismo si Jesus kay Juan, sa amo nagahatag sa aton sing huwaran. (Mateo 3:13-17) Sang ulihi, ginsugo ni Jesus ang iya mga sumulunod nga maghimo sing mga disipulo kag bawtismuhan sila. Busa, ang dedikasyon kag bawtismo kinahanglanon nga mga tikang para kay bisan sin-o nga nagahandum sa paglakat upod kay Jehova.
11, 12. (a) Paano mapaanggid ang bawtismo sa kasal? (b) Paano ang aton relasyon kay Jehova kaanggid sa relasyon sang mag-asawa?
11 Ang pagdedikar kag pagpabawtismo agod mangin isa ka disipulo ni Jesucristo daw kaanggid sa pagpakasal. Sa madamo nga kadutaan, may pila ka butang nga nagakatabo antes sang adlaw sang kasal. Ang lalaki kag babayi magakit-anay, magakilalahay, kag magahigugmaanay. Masunod amo ang pagsugtanay nga magpakasal. Ang kasal amo ang nagapadayag sang butang nga gindesisyunan sa pribado—ang magpakasal kag dayon magkabuhi subong mag-asawa. Ang kasal amo ang dayag nga tanda sang pamuno sinang pinasahi nga kaangtanan. Ina nga petsa amo ang tanda sang pamuno sang pag-asawahay. Sing kaanggid, ang bawtismo amo ang tanda sang pamuno sang isa ka kabuhi nga nahugod sa paglakat nga may dedikado nga relasyon kay Jehova.
12 Binagbinaga ang isa pa ka kaanggid. Sa tapos sang ila kasal, ang gugma sa tunga sang mag-asawa dapat magdalom kag maghamtong. Agod mangin suod pa sila sa isa kag isa, dapat dimakagod nga magtinguha ang mag-asawa nga huptan kag pabakuron ang ila relasyon. Bisan pa wala kita nagapakasal sa Dios, sa tapos sang aton bawtismo dapat kita magtinguha nga huptan ang isa ka suod nga kaangtanan kay Jehova. Ginatan-aw niya kag ginaapresyar ang aton mga panikasog sa paghimo sang iya kabubut-on kag nagapalapit sia sa aton. “Magpalapit kamo sa Dios,” sulat ni disipulo Santiago, “kag magapalapit sia sa inyo.”—Santiago 4:8.
Paglakat Suno sa mga Tikang ni Jesus
13. Sa paglakat upod sa Dios, kay sin-o huwaran ang dapat naton sundon?
13 Sa paglakat upod kay Jehova, dapat naton sundon ang huwaran ni Jesucristo. Si apostol Pedro nagsulat: “Sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.” (1 Pedro 2:21) Sanglit si Jesus himpit kag kita indi himpit, indi naton masunod sing bug-os ang iya huwaran. Walay sapayan, ginapaabot ni Jehova nga himuon naton ang aton labing masarangan. Binagbinagon naton ang lima ka bahin sang kabuhi kag ministeryo ni Jesus nga dapat tinguhaan nga ilugon sang dedikado nga mga Cristiano.
14. Ano ang nadalahig sa paghibalo sang Pulong sang Dios?
14 Si Jesus may sibu kag tul-id nga ihibalo tuhoy sa Pulong sang Dios. Sa tion sang iya ministeryo, si Jesus masunson nga nagbalikwat gikan sa Hebreong Kasulatan. (Lucas 4:4, 8) Sa pagkamatuod, ang malaut nga relihiosong mga lider sadtong mga adlaw nagbalikwat man gikan sa Kasulatan. (Mateo 22:23, 24) Ang kinatuhayan amo nga nahangpan ni Jesus kon ano ang buot silingon sang Kasulatan, kag gin-aplikar niya ini sa iya kabuhi. Nahibaluan niya indi lamang ang kahulugan sang Kasuguan kundi ang katuyuan man sini. Samtang ginasunod naton ang huwaran ni Cristo, dapat man kita magtinguha nga mahangpan ang Pulong sang Dios, ginahangop ang kahulugan, ukon katuyuan sini. Paagi sa paghimo sini, mangin mga manugpangabudlay kita nga nahamut-an sang Dios nga may ikasarang sa ‘paggamit sing matadlong sang pulong sang kamatuoran.’—2 Timoteo 2:15.
15. Paano si Jesus nagpakita sing huwaran sa pagpakighambal tuhoy sa Dios?
15 Si Cristo Jesus nakighambal sa iban tuhoy sa iya langitnon nga Amay. Wala gintago ni Jesus ang iya ihibalo tuhoy sa Pulong sang Dios. Bisan gani ang iya mga kaaway nagtawag sa iya nga “Manunudlo,” bangod bisan diin man sia nagkadto nakighambal sia sa iban tuhoy kay Jehova kag sa Iya mga katuyuan. (Mateo 12:38) Si Jesus dayag nga nagbantala sa templo, sa mga sinagoga, sa mga siudad, kag sa kaumhan. (Marcos 1:39; Lucas 8:1; Juan 18:20) Nagpanudlo sia nga may kaawa kag kaayo, nagapakita sing gugma sa mga tawo nga iya ginbuligan. (Mateo 4:23) Ang mga nagasunod sa huwaran ni Jesus nagapangita man sing madamo nga duog kag mga paagi agod tudluan ang iban tuhoy kay Jehova nga Dios kag sa iya dalayawon nga mga katuyuan.
16. Daw ano ka suod ang kaangtanan ni Jesus sa iya mga masigkasumilimba kay Jehova?
16 Si Jesus nagbatyag sing kasuod sa iban nga nagsimba kay Jehova. Samtang nagapakighambal si Jesus sa kadam-an sang isa ka okasyon, ang iya iloy kag ang iya ditumuluo nga mga utod nag-abot agod makighambal sa iya. Ang rekord sang Biblia nagasiling: “May nagsiling sa iya: ‘Yari karon! Ang imo iloy kag ang imo mga utod nagatindog sa guwa, nga nagahimulat sa pagpakighambal sa imo.’ Bilang sabat, nagsiling sia sa isa nga nagasugid sa iya: ‘Sin-o ang akon iloy, kag sin-o ang akon mga utod?’ Kag sang gin-untay niya ang iya kamot nayon sa iya mga disipulo, sia nagsiling: ‘Yari karon! Ang akon iloy kag ang akon mga utod! Kay ang bisan sin-o nga maghimo sang kabubut-on sang akon Amay nga yara sa langit, sia amo ang akon utod nga lalaki, kag utod nga babayi, kag iloy.’ ” (Mateo 12:47-50) Wala ini nagakahulugan nga ginsikway ni Jesus ang iya pamilya, kay ang masunod nga mga natabo nagapamatuod nga wala niya paghimua ini. (Juan 19:25-27) Apang, ginapadaku sini nga rekord ang gugma ni Jesus para sa iya mga masigkatumuluo. Sa karon man, ang mga nagalakat upod sa Dios nagahimulat sa pagpakig-upod sa iban nga mga alagad ni Jehova kag nagahigugma sa ila sing tinagipusuon.—1 Pedro 4:8.
17. Ano ang ginbatyag ni Jesus tuhoy sa paghimo sang kabubut-on sang iya langitnon nga Amay, kag paano ini dapat mag-apektar sa aton?
17 Paagi sa paghimo sang kabubut-on sang Dios, si Jesus nagpakita sing gugma sa iya langitnon nga Amay. Si Jesus nagtuman kay Jehova sa tanan nga butang. Sia nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Si Cristo nagsiling man: “Pirme ko ginahimo ang mga butang nga kalahamut-an sa [Dios].” (Juan 8:29) Daku gid ang paghigugma ni Jesus sa iya langitnon nga Amay amo kon ngaa “nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.” (Filipos 2:8) Gani man, ginpakamaayo ni Jehova si Jesus, ginbayaw sia sa isa ka posisyon sang awtoridad kag dungog nga ikaduha lamang kay Jehova mismo. (Filipos 2:9-11) Kaangay ni Jesus, ginapakita naton ang aton gugma sa Dios paagi sa pagtuman sang iya mga sugo kag paghimo sang iya kabubut-on.—1 Juan 5:3.
18. Sa anong paagi nagpakita si Jesus sing huwaran tuhoy sa pangamuyo?
18 Si Jesus isa ka tawo nga mapinangamuyuon. Nangamuyo sia sang ginbawtismuhan sia. (Lucas 3:21) Antes pilion ang iya 12 ka apostoles, nangamuyo sia sa bug-os nga gab-i. (Lucas 6:12, 13) Gintudluan niya ang iya mga disipulo kon paano mangamuyo. (Lucas 11:1-4) Sang gab-i antes sia mapatay, nangamuyo sia para sa iya mga disipulo kag upod sa ila. (Juan 17:1-26) Ang pangamuyo isa ka importante nga bahin sang kabuhi ni Jesus, kag dapat amo man sa aton kabuhi, kay mga sumulunod niya kita. Isa gid ka kadungganan ang makighambal sa Bug-os Uniberso nga Soberano paagi sa pangamuyo! Dugang pa, ginasabat ni Jehova ang mga pangamuyo, kay si Juan nagsulat: “Ini amo ang pagsalig naton sa iya, nga, bisan ano man nga butang ang pangayuon naton suno sa iya kabubut-on, nagapamati sia sa aton. Dugang pa, kon nahibaluan naton nga nagapamati sia sa aton nahanungod sa bisan ano nga ginapangayo naton, nahibaluan naton nga matigayon naton ang mga butang nga ginpangayo kay ginpangayo naton ini sa iya.”—1 Juan 5:14, 15.
19. (a) Anong mga kinaiya ni Jesus ang dapat naton ilugon? (b) Sa anong mga paagi nagabenepisyo kita gikan sa pagtuon sa kabuhi kag ministeryo ni Jesus?
19 Madamo ang matun-an naton gikan sa maid-id nga pag-usisa sa kabuhi kag ministeryo ni Jesucristo sa duta! Binagbinaga ang mga kinaiya nga iya ginpakita: gugma, kaawa, kaayo, kabakod, pagkabalanse, pagkamakatarunganon, pagkamapainubuson, kaisog, kag pagkadimakagod. Samtang nagadugang ang aton ihibalo tuhoy kay Jesus, nagadaku man ang aton handum nga mangin matutom nga mga sumulunod niya. Ang ihibalo tuhoy kay Jesus labi pa nga nagapasuod man sa aton kay Jehova. Kay man, si Jesus amo ang himpit nga larawan sang iya langitnon nga Amay. Tuman gid sia kasuod kay Jehova nga nakasiling sia: “Sia nga nakakita sa akon nakakita man sa Amay.”—Juan 14:9.
Magsalig sa Dios sa Pagsakdag sa Imo
20. Paano kita makatigayon sing kompiansa sa paglakat upod kay Jehova?
20 Kon ang kabataan nagatuon pa lang sa paglakat, ang ila mga tikang indi malig-on. Paano sila nagatuon sa paglakat nga may kompiansa? Paagi lamang sa pag-ensayo kag pagbatas. Ti, ang mga nagalakat upod kay Jehova nagatinguha sa paglakat nga may kompiansa, kag padayon. Nagakinahanglan man ini sing tion kag pagbatas. Ginpatalupangod ni Pablo ang importansia sang pagbatas sa paglakat upod sa Dios sang magsulat sia: “Sa katapusan, mga kauturan, nagapangabay kag nagalaygay kami sa inyo paagi kay Ginuong Jesus, nga kon paano ninyo ginbaton ang instruksion gikan sa amon tuhoy sa kon paano kamo dapat maglakat kag magpahamuot sa Dios, subong sang inyo paglakat, nga padayon ninyo nga himuon ini sing labi kag labi pa.”—1 Tesalonica 4:1.
21. Samtang nagalakat kita upod kay Jehova, anong mga pagpakamaayo ang matigayon naton?
21 Kon bug-os ang aton debosyon sa Dios, buligan niya kita nga magpadayon sa paglakat upod sa iya. (Isaias 40:29-31) Ang kalibutan karon wala sing butang nga matanyag nga mapaanggid sa mga pagpakamaayo nga iya ginahatag sa mga nagalakat sa iya mga dalanon. Sia ‘ang Isa nga nagatudlo sa aton sa kapuslanan, ang Isa nga nagatuytoy sa aton sa dalanon nga laktan naton. Kag kon mamati lamang kita sa iya mga sugo, ang aton paghidait mangin subong sang suba, kag ang aton pagkamatarong mangin subong sang mga balod sang dagat.’ (Isaias 48:17, 18) Paagi sa pagbaton sa imbitasyon nga maglakat upod sa Dios kag paagi sa paghimo sini sing matutom, matigayon naton ang paghidait upod sa iya tubtob sa walay katubtuban.
Paano Mo Sabton?
◻ Ngaa isa ka kadungganan ang paglakat upod sa matuod nga Dios?
◻ Ngaa ang pagtuon, dedikasyon, kag bawtismo una nga mga tikang sa paglakat upod kay Jehova?
◻ Paano naton masunod ang mga tikang ni Jesus?
◻ Paano naton nahibaluan nga sakdagon kita ni Jehova samtang nagalakat kita upod sa iya?
[Mga retrato sa pahina 13]
Ang pagtuon, dedikasyon, kag bawtismo amo ang mga tikang nga kinahanglanon sa paglakat upod sa Dios