Madamo ang Nagapangangkon nga May Pagtuo

“DALAYAWON gid si Jesus! Tumalagsahon gid sia!” tuaw sang isa ka relihiosa nga babayi sa Brazil. Sa pagkamatuod, indi gid mapanghiwala ang gahom sang ngalan ni Jesus. Sa bug-os nga maragtas, handa mag-antos kag manginmatay para sa iya ang mga tawo.

Sanday apostol Pedro kag Juan nagbantala ‘pasad sa ngalan ni Jesus’ sa Jerusalem. Bangod sini, gindakop sila kag ginbunal. Apang “naghalin sila sa atubangan sang Sanhedrin, nga nagakalipay bangod naisipan sila nga takus nga pakahuy-an tungod sa iya ngalan.”​—⁠Binuhatan 5:​28, 41.

Gintahod sang isa pa ka Cristiano sang unang-siglo nga si Antipas ang ngalan ni Jesus. Sa katapusan nga tulun-an sang Biblia, ang Bugna, ginpatuhuyan sia ni Jesus subong “akon saksi, ang isa nga matutom, nga ginpatay sa tupad ninyo, diin nagapuyo si Satanas.” (Bugna 2:13) Upod sa iban pa nga mga Cristiano sa Pergamo, wala ginpanghiwala ni Antipas ang iya pagtuo kay Cristo. Nagpabilin nga matutom si Antipas sa ngalan ni Jesus bisan kabuhi pa niya ang nataya!

Pagligad sang mga tunga sa siglo, sadtong 155 C.E., nag-atubang sing amo man nga pagtilaw ang isa ka nagapangangkon nga Cristiano nga si Policarpio sang ginsugo sia nga pakalainon si Cristo. Sia nagsabat: “Kawaluan kag anom ka tuig nga nagaalagad ako sa Iya, kag wala Sia sing nahimo nga malain sa akon. Paano ko mapasipalahan ang akon Hari nga nagluwas sa akon?” Bangod wala niya ginpanghiwala si Cristo, ginsunog si Policarpio sa usok.

Ang mga apostoles, si Antipas, kag ang iban pa handa nga pat-inan sang kamatayon ang ila pagpanaksi tuhoy kay Cristo! Kamusta naman ang mga tawo karon?

Ang Ngalan ni Jesus Karon

Ang ngalan ni Jesus padayon nga nagapukaw sing mabaskog nga mga emosyon. Sa Latin Amerika, ang kadamuon sang relihion nga nagapangangkon nga nagatuo kay Jesus pinakamataas sining karon lang nga mga dekada. Bisan ang pinakagamay nga mga minuro may Pentecostal nga simbahan. Sa amo man nga tion, nagadugang ang impluwensia sa politika sining mga simbahan. Halimbawa, sa Kongreso kag Senado sang Brazil, 31 ka palangakuan ang ginauyatan sang mga katapo sini nga mga simbahan.

Si Jesus amo man ang sentro sang bag-ong relihioso nga organisasyon sa Estados Unidos. Ginatawag sang mga sumulunod sini ang ila kaugalingon nga mga Manugtuman sing Pangako. Ginreport sang Time nga magasin sang 1997 nga ang tumalambong sa ila mga miting nagdamo halin sa 4,200 sang 1991 tubtob sa 1.1 milyones sang 1996. Ang isa sang mga kalantahon sini nagasiling: “O kadalag-an kay Jesus, ang akon Manluluwas nga dayon.”

Apang, indi tanan nga ginhimo sa ngalan ni Jesus nangin dungganon. Madamo nga inaway ang gin-away sa iya ngalan. Ang mga Judiyo ginmasaker, ang mga pagano ginpamatay, ang mga nagapamatok ginpaantos, ginpangkumpol, kag ginsunog sa usok​—⁠tanan sa ngalan ni Jesus. Kag sang nagligad lang, ang pagnegosyo sa ebanghelismo nangin lapnag. Ini tanan isa ka tiko kag makangilil-ad nga paggamit sa ngalan ni Jesus kag sa kahulugan gid sini!

Dugang pa, nagapautwas ini sing pila ka pamangkot: Ano ang nadalahig sa pagtuo sa ngalan ni Jesus? Kag ano ang pagtamod sang mga Saksi ni Jehova tuhoy sini? Sabton sang masunod nga artikulo ining mga pamangkot.