Mga Pamangkot Gikan sa mga Bumalasa

Madamo nga Saksi ni Jehova ang nagasaulog sing anibersaryo sang kasal. Ang kaadlawan (birthday) isa ka anibersaryo sang imo pagkatawo. Gani ngaa ginasaulog ang mga anibersaryo sang kasal apang indi ang mga anibersaryo sang kaadlawan?

Ang matuod, indi kinahanglan nga saulugon ang bisan diin sini. Apang, wala nagakahulugan nga pareho ang kahulugan sining duha ukon nga tamdon sang mga Cristiano ang una (mga anibersaryo sang kasal) sing subong sa pagtamod nila sa mga selebrasyon sang kaadlawan.

Subong nahinambitan na, masiling nga anibersaryo ining duha kay ang “anibersaryo” amo ‘ang tuigan nga pagsukat sang petsa sang isa ka hitabo.’ Mahimo nga anibersaryo ini sang bisan ano nga hitabo​—⁠ang adlaw nga naaksidente ka sa awto, sang nakita mo ang eklipse sang bulan, sang nag-swimming ka upod sa imo pamilya, kag iban pa. Maathag nga wala ginahimo sang mga Cristiano ang tanan nga “anibersaryo” nga isa ka pinasahi nga adlaw ukon nagahiwat sing sinalusalo sa pagsaulog sini. Dapat binagbinagon sang isa ang mga bahin sang isa ka okasyon kag mamat-od kon ano ang nagakaigo.

Halimbawa, espesipiko nga ginsugo sang Dios ang mga Israelinhon nga saulugon kada tuig ang adlaw sang paglabay sang iya anghel sa mga balay sang Israelinhon sa Egipto kag ang resulta nga exodo ukon pagguwa sang iya katawhan sang 1513 B.C.E. (Exodo 12:14) Sang ginsaulog sang mga Judiyo, lakip ni Jesus, ang anibersaryo sadto nga hitabo, isa yadto ka pagtuman sa sugo sang Dios, kag wala nila ini ginhimo nga may sinalusalo ukon pagregalo. Gintamod man sang mga Judiyo ang pagdedikar liwat sa templo subong isa ka pinasahi nga anibersaryo. Bisan pa ang pagsaulog sining maragtason nga hitabo wala ginsugo sang Biblia, ginapahangop sang Juan 10:​22, 23 nga wala ini ginpakalain ni Jesus. Kag pinasahi nga nagatipon ang mga Cristiano sa anibersaryo sang kamatayon ni Jesus. Sa pagkamatuod, ginahimo ini bilang pagtuman sa maathag nga sugo nga masapwan sa Pulong sang Dios.​—⁠Lucas 22:​19, 20.

Ano naman ang tuhoy sa mga anibersaryo sang kasal? Sa pila ka pungsod kinaandan nga ginasaulog sang bana kag asawa ang anibersaryo sang ila pag-asawahay, isa ka kahimusan gikan sa Dios. (Genesis 2:​18-​24; Mateo 19:​4-6) Sa pagkamatuod, wala ginapakalain sang Biblia ang pag-asawahay. Si Jesus nagkadto sa isa ka kasal kag gindugangan niya ang kalipay sang okasyon.​—⁠Juan 2:​1-11.

Busa, indi mangin makatilingala kon ang mag-asawa maghinguyang sing tion sa anibersaryo sang ila kasal agod handurawon liwat ang kalipay sadto nga okasyon kag ang ila pamat-od nga magtinguha agod magmadinalag-on subong mag-asawa. Sila na ang mamat-od kon bala saulugon nila ining makalilipay nga okasyon sing pribado, nga sila lamang nga duha, ukon saulugon nila ini upod sa pila ka paryente ukon suod nga mga abyan. Ang okasyon indi dapat paghimuon nga isa ka balibad para sa isa ka daku sosyal nga pagtinipon. Sa sini nga okasyon luyag sang mga Cristiano nga tuytuyan sang mga prinsipio nga naaplikar sa tagsa ka adlaw sang ila kabuhi. Gani isa ka personal nga butang kon bala saulugon sang isa ang anibersaryo sang kasal ukon indi.​—⁠Roma 13:​13, 14.

Apang, kamusta naman ang pagsaulog sa kaadlawan? May mabasa bala kita sa Biblia nahanungod sini nga anibersaryo?

Bueno, sang maaga nga bahin sini nga siglo, matuod nga ang mga Estudyante sang Biblia, subong amo ang pagkilala anay sa mga Saksi ni Jehova, nagsaulog sing mga kaadlawan. Madamo sa ila ang may gamay nga mga libro nga ginatawag Daily Heavenly Manna. Nagaunod ini sing isa ka teksto sang Biblia para sa tagsa ka adlaw, kag madamo nga Cristiano ang nagapatapik sing gamay nga retrato sa mga pahina nga katumbas sa kaadlawan sang ila kaupod nga mga Estudyante sang Biblia. Subong man, ang The Watch Tower sang Pebrero 15, 1909, nag-asoy nga sa isa ka kombension sa Jacksonville, Florida, E.U.A., si Utod Russell nga presidente anay sang Sosiedad, gindapit pakadto sa plataporma. Ngaa? Ginhatagan sia sing sorpresa nga regalo para sa iya kaadlawan nga pila ka kahon sang kabugaw, mga pinya, kag mga kahil. Nagahatag ini sa aton sing ideya tuhoy sa nagligad. Sadto man nga tion, dumduma nga nagasaulog man ang mga Estudyante sang Biblia sing Disiembre 25 subong anibersaryo sang pagkatawo ni Jesus, ukon kaadlawan. Kinabatasan pa gani sadto nga may panihapon para sa Krismas sa talatapan sa Brooklyn.

Sa pagkamatuod, sugod sadto ang katawhan sang Dios nagtubo sa espirituwal sa madamo nga bahin. Sang katuigan 1920, bangod sang nagdugang nga kapawa sang kamatuoran nahangpan nila ang masunod:

Si Jesus wala matawo sang Disiembre 25, isa ka petsa nga ginaangot sa pagano nga relihion. Ang Biblia nagasugo sa aton nga saulugon ang petsa sang kamatayon ni Jesus, indi ang anibersaryo sang iya pagkatawo ukon ni bisan sin-o. Ang paghimo sini nagahisanto sa Manugwali 7:​1 kag sa katunayan nga ang kaulihian sang kabuhi sang isa ka matutom nga tawo mas importante sangsa adlaw nga natawo sia. Wala sing rekord sa Biblia nga may matutom nga alagad nga nagsaulog sang iya kaadlawan. Ginrekord sini ang pagsaulog sing kaadlawan sang mga pagano, ginaangot ining mga okasyon sa mapintas nga mga buhat. Hibaluon naton ang tuhoy sa sadtong mga anibersaryo sang kaadlawan.

Ang una amo ang kaadlawan sang Paraon sang mga adlaw ni Jose. (Genesis 40:​20-​23) Nahanungod sini, ang artikulo tuhoy sa mga kaadlawan sa Encyclopædia of Religion and Ethics ni Hasting nagasiling: “Ang kinabatasan nga pagsaulog sa adlaw sang pagkatawo naangot, sa porma sini, sa pagdumdom sing tion, kag, sa kaundan sini, sa pila ka dumaan nga mga prinsipio sa relihion.” Sang ulihi, ginkutlo sang insiklopedia ang Egiptologo nga si Sir J. Gardner Wilkinson, nga nagsulat: “Ginahatagan sing daku nga importansia sang tagsa ka Egiptohanon ang adlaw, kag bisan gani ang oras sang iya pagkatawo; kag mahimo nga, subong sa Persia, ang kada indibiduwal nagsaulog sang iya kaadlawan nga may daku nga kasadyahan, ginaabiabi ang iya mga abyan paagi sa tanan nga kalingawan sang katilingban, kag sing espesyal nga mga kalan-on.”

Ang isa pa ka pagsaulog sing kaadlawan nga ginhinambitan sa Biblia amo ang iya ni Herodes, nga sa amo ginpugutan sing ulo si Juan Bautista. (Mateo 14:​6-10) Ang The International Standard Bible Encyclopedia (1979 nga edisyon) nagapahangop: “Ang mga Griego sang wala pa ang Helenismo nagsaulog sing mga kaadlawan sang mga diosdios kag sang kilala nga mga tawo. Ang G[rieg]o nga genéthlia nagapatuhoy sa sining selebrasyon, samtang ang genésia nagakahulugan sing isa ka selebrasyon sa pagsaulog sing kaadlawan sang isa ka importante patay nga indibiduwal. Sa 2 Mac[abeo] 6:7 mabasa naton ang tuhoy sa bulanan nga genéthlia ni Antiochus IV, diin ang mga Judiyo ginpilit sa ‘pagpakigbahin sa mga halad.’ . . . Sang ginsaulog ni Herod ang iya kaadlawan ginhimo niya ini suno sa isa ka Helenistiko nga kinabatasan; wala sing pamatuod nga ginasaulog ang mga kaadlawan sa Israel antes sang Helenistiko nga mga tion.”

Matuod, wala ginahatagan sing daku gid nga importansia sang mga Cristiano karon ang mga ginhalinan kag posible nga mga kaangtanan sang tanan nga mga buhat ukon kinabatasan sa dumaan nga mga relihion, apang wala man nila ginapasapayanan ang ginasambit sa Pulong sang Dios may kaangtanan sa sini. Lakip sa sini amo nga ang lamang nga pagsaulog sang kaadlawan nga narekord sa Biblia iya sang mga pagano kag naangot sa mapintas nga mga buhat. Busa, maathag nga indi maayo ang pagtamod sang Biblia sa pagsaulog sing kaadlawan, isa ka katunayan nga wala ginapasapayanan sang sinsero nga mga Cristiano.

Busa, bisan pa isa gid ka personal nga butang kon bala saulugon sang mga Cristiano ang anibersaryo sang ila kasal, may yara maayong mga rason kon ngaa ginalikawan sang hamtong nga mga Cristiano ang pagsaulog sing mga kaadlawan.