2000—Isa ka Pinasahi nga Tuig?

MAY pinasahi bala nga butang tuhoy sa tuig 2000? Masami nga ginatamod ini sang mga tawo nga nagapuyo sa Nakatundan nga kadutaan subong una nga tuig sang ikatlo nga milenyo. Ginahimo karon ang daku nga mga paghanda sa pagsaulog sini. Ginatakod ang dalagku elektroniko nga mga relo agod isipon ang mga segundos tubtob sa pagpamanagbanag sang bag-o nga milenyo. Ginaorganisar ang pinasahi nga mga binayle sa Bisperas sang Bag-ong Tuig. Ang mga kamiseta nga may mga islogan tuhoy sa katapusan-sang-milenyo ginabaligya sa mga balaligyaan sa magagmay nga mga banwa subong man sa balaklan nga mga mall sa dalagku nga mga siudad.

Ang mga simbahan, dalagku kag magagmay, magabuylog sa isa ka tuig nga selebrasyon. Sa maaga nga bahin sa masunod nga tuig, si Papa Juan Paulo II ginapaabot nga maglakbay pa Israel agod pangunahan ang mga Romano Katoliko sa ginatawag nga “ika-50 nga anibersaryo nga selebrasyon sang Iglesia Katolika Romana sa milenyo.” Ginabulubanta nga halin sa duha ka milyon kag tunga tubtob sa anom ka milyon ka turista, halin sa mga debotado tubtob sa mga usisero lamang, ang nagaplano nga magkadto sa Israel sa masunod nga tuig.

Ngaa madamo nga tawo ang nagaplano nga magkadto sa Israel? Nagahambal para sa papa, si Roger Cardinal Etchegaray, isa ka opisyal sa Batikano, nagsiling: “Ang tuig 2000 isa ka selebrasyon tuhoy kay Cristo kag sa iya kabuhi sa sining pungsod. Busa natural lamang nga ang Papa magakadto diri.” Paano naangot ang tuig 2000 kay Cristo? Kinaandan nga ginahunahuna nga ang tuig 2000 nagatanda sing eksakto sa 2,000 ka tuig kutob sang pagkatawo ni Cristo. Apang amo gid bala? Tan-awon naton.

Ang tuig 2000 labi pa gani ka talalupangdon sa mga katapo sang pila ka relihioso nga mga grupo. Kumbinsido sila nga sa masunod nga tuig, magabalik si Jesus sa Bukid sang mga Olivo kag ang inaway sang Armagedon, nga ginsambit sa tulun-an sang Bugna, mahanabo sa nalupyakan sang Megiddo. (Bugna 16:14-16) Sa pagpaabot sining mga hitabo, ginapamaligya sang ginatos ka pumuluyo sang Estados Unidos ang ila mga puluy-an kag ang kalabanan sang ila pagkabutang kag nagasalaylo sila sa Israel. Agod makabenepisyo ang bisan sin-o nga indi makabiya sang ila puluy-an, nangako kuno ang isa ka bantog nga ebanghelisador sa Estados Unidos nga ang pagbalik ni Jesus ipalayag sa telebisyon—sing de-kolor!

Sa Nakatundan nga mga pungsod, labi nga nagadamo ang mga plano sa pag-abot sang ikatlo nga milenyo. Apang, ang mga tawo sa iban nga pungsod nagapadayon sa ila kinaandan nga pagsinalayo. Ining mga tawo—ang kadamuan sang populasyon sang kalibutan—wala nagapati nga si Jesus nga Nazaretnon amo ang Mesias. Wala man nila ginabaton sing bug-os ang B.C.-A.D. nga estilo sang pagpetsa.a Halimbawa, ginagamit sang madamo nga Muslim ang ila kaugalingon nga kalendaryo, nga suno sa sini ang masunod nga tuig mangin 1420—indi 2000. Ginaisip sang mga Muslim ang mga tuig kutob sa petsa nga nalagyo si Muḥammad halin sa Mecca pakadto sa Medina. Sa kabilugan, mga 40 ka nanuhaytuhay nga kalendaryo ang ginagamit sang mga tawo sa bug-os nga kalibutan.

Importante bala ang tuig 2000 para sa mga Cristiano? Ang Enero 1, 2000, isa gid bala ka adlaw nga may pinasahi nga kahulugan? Ining mga pamangkot pagasabton sa masunod nga artikulo.

[Footnote]