Mangin Suod sa Dios

Kon Magbataon Liwat ang mga Tigulang

SIN-O bala sa aton ang gusto magtigulang—kurinot ang panit, dulom ang mata, bungol, kag nagakurogkurog ang tuhod? Mahimo mamangkot ka, ‘Ngaa gintuga pa kita sang Dios nga maeksperiensiahan ang pagkapamatan-on kag sa ulihi magtigulang man lang?’ Ang matuod, indi amo sini ang katuyuan sang Dios sa aton. Sa baylo, katuyuan niya nga indi kita magtigulang! Talupangda ang mga ginsiling kay Job, nga mabasa sa Job 33:24, 25.

Si Job isa ka matutom nga tawo nga ginahigugma ni Jehova. Wala kahibalo si Job nga ginaduhaduhaan ni Satanas ang iya katutom. Nagaalagad kuno si Job sa Dios bangod may maiyaiyahon sia nga handum. Pero nagasalig si Jehova kay Job, kag may gahom Sia nga dulaon ang kahalitan. Gani, gintugutan niya si Satanas nga tilawan si Job. “Ginsakit [ni Satanas] si Job sing tama nga hubag kutub sa dapadapa sang iya tiil tubtub sa iya alimpudwan.” (Job 2:7) Ginaut-ot sang mga ulod ang unod ni Job, kag ang iya panit nagakugan, nagaitom, kag nagakataktak. (Job 7:5; 30:17, 30) Maimadyin mo bala ang pag-antos ni Job? Pero, nagpabilin sia nga matutom, nga nagasiling: “Tubtub nga mapatay ako indi ko pag-isikway gikan sa akon ang akon pagkatadlong.”—Job 27:5.

Pero, nakahimo si Job sing mabug-at nga sala. Sang abi niya mapatay na sia, nasobrahan sia sa pagdayaw sa iya kaugalingon, nga “ginpakamatarung niya ang iya kaugalingon sang sa Dios.” (Job 32:2) Gintadlong sang Dios si Job paagi kay Elihu. Pero ginsugiran man sia ni Elihu sang maayo nga mensahe halin sa Dios: “Luwasa sia [si Job] gikan sa pagpanaug sa Boho, nakakita ako sing gawad; ang iya unud manginlinghud pa sang sa bata; nagabalik sia sa mga adlaw sang iya pagkapamatan-on.” (Job 33:24, 25) Nalugpayan gid sa sini si Job. Indi na sia mag-antos asta mapatay. Kon maghinulsol sia, malipay ang Dios nga batunon ang iya gawad kag dulaon ang iya mga kahalitan.a

Mapainubuson nga ginbaton ni Job ang pagtadlong, kag naghinulsol sia. (Job 42:6) Ginbaton ni Jehova ang iya gawad kag gintabunan sini ang iya sala amo nga ginpasag-uli sia kag ginpadyaan sang Dios. “Ginpakamaayo sang GINOO ang ulihi nga bahin sang kabuhi ni Job sobra pa sang sa una.” (Job 42:12-17, Ang Pulong sang Dios, APD) Hunahunaa ang kaumpawan ni Job sang nalakip sa iya mga pagpakamaayo ang pag-ayo sang iya makangilil-ad nga balatian kag ang iya unod daw ‘nanginlinghud pa sang sa bata’!

Ang gawad nga ginbaton sang Dios para kay Job limitado lamang, kay indi pa sia perpekto kag napatay sang ulihi. Pero, may mas maayo kita nga gawad. Mahigugmaon nga ginhatag ni Jehova ang iya Anak, si Jesus, bilang gawad para sa aton. (Mateo 20:28; Juan 3:16) Ang tanan nga magatuo sa sina nga gawad may paglaum nga mabuhi sing walay katapusan sa paraiso nga duta. Sa sinang nagapakari nga bag-ong kalibutan, indi na pagtugutan sang Dios nga magtigulang ang mga matutom. Ngaa indi mo pagtun-an sing dugang pa kon ano ang himuon para makita mo ang tion nga ang unod sang mga tigulang “manginlinghud pa sang sa bata”?

Bahin sang Biblia nga Mahimo Basahon sa Abril:

◼ Job 16-37

[Nota]