Mga Problema sang mga Babayi
“Kon makita ko ang pagtratar sa mga babayi, indi ko gid gusto nga mangin isa sa ila.”—ZAHRA, 15 ANYOS, ginkuha sa magasin nga GEO, French nga edisyon.
GINAPAKITA sang ginsiling sang dalagita sa tuo ang masubo nga kamatuoran—sa bilog nga kalibutan, apektado sang kasingki kag diskriminasyon ang bilog nga kabuhi sang mga babayi. Binagbinaga ini nga mga report.
Diskriminasyon. Sa Asia, mas gusto sang kalabanan nga ginikanan ang mga bata nga lalaki. Ginabulubanta sang report sang UN sang 2011 nga sa sina nga lugar, halos 134 milyones ka babayi ang napatay bangod sa aborsion, pagpatay sang lapsag, kag pagpatumbaya.
Edukasyon. Sa bilog nga kalibutan, 66 porsiento sang mga wala nakalab-ot sing apat ka tuig ang ineskwelahan mga babayi.
Seksuwal nga pag-abuso. Masobra 2.6 bilyones ka babayi ang nagaistar sa mga pungsod nga ang paglugos sa kaugalingon nga asawa wala ginakabig nga krimen.
Panglawas. Sa nagauswag nga mga pungsod, sa halos kada duha ka minuto, may isa ka babayi nga nagakapatay bangod sang komplikasyon sa pagbusong ukon pagbata kay kulang sa pag-atipan sang mga doktor.
Kinamatarong sa propiedad. Bisan pa ang mga babayi ang nagakultibar sang sobra sa katunga sang uma sa bilog nga kalibutan, sa madamo nga pungsod wala sila sing kinamatarong nga makapanag-iya ukon makapanubli sang duta.
Ngaa gindingot sa mga babayi ini nga mga kinamatarong? Ang pila ka kultura nagasunod sa mga pagpati kag kinabatasan sang mga relihion nga nagasakdag ukon nagapakamatarong pa gani sa pag-abuso kag kapintas sa mga babayi. Ang pamantalaan sa Pransia nagsambit sa abogado nga taga-India nga si Chandra Rami Chopra nga nagsiling: “Ang tanan nga kasuguan sang relihion may pagkaanggid: Ginasuportahan nila ang diskriminasyon sa mga babayi.”
Amo man bala sini ang imo pagtamod? Sa banta mo ginapakanubo bala sang Biblia ang mga babayi, pareho sa ginapakita sang iban nga libro sang relihion? Para sa iban, daw amo sina ang ginapakita sang pila ka teksto sa Biblia. Pero ano gid bala ang pagtamod sang Dios sang Biblia sa ila? Bisan pa nga sensitibo ini nga isyu, ang mahalungon kag tampad nga pagbinagbinag sa ginasiling sang Biblia makabulig sa aton nga mahibaluan ang sabat.