TOPIKO SA KOBER | SIN-O ANG MGA SAKSI NI JEHOVA?
Ano nga Sahi sang mga Tawo ang mga Saksi ni Jehova?
Isa kami ka internasyonal nga organisasyon nga wala sing kaangtanan sa iban nga relihion. Bisan pa ang amon ulong talatapan yara sa Estados Unidos, ang kalabanan nga Saksi ni Jehova nagaistar sa iban nga pungsod. Ang matuod, mga walo ka milyon kami nga nagatudlo sing Biblia sa mga tawo sa sobra 230 ka kadutaan. Ginahimo namon ini bilang pagtuman sa ginsiling ni Jesus: “Ining maayong balita sang Ginharian ibantala sa bug-os nga duta subong panaksi sa tanan nga pungsod.”—Mateo 24:14.
Bisan diin man kami nagaistar, ginatuman gid namon ang kasuguan. Pero ginapanikasugan namon nga magpabilin nga neutral sa pulitika. Ginahimo namon ini kay ginasunod namon ang ginsiling ni Jesus sa mga Cristiano nga mangin “indi bahin sang kalibutan.” Gani wala kami nagapakigbahin sa mga kasuayon kag hilikuton sang pulitika ukon nagasakdag sa inaway. (Juan 15:19; 17:16) Ang matuod, sang Bug-os Kalibutan nga Inaway II, ang mga Saksi ni Jehova ginpriso, ginpaantos, kag sobra pa sa sini ang ginhimo sa ila, bangod indi sila magkompromiso sang ila neutralidad. Ang obispo sadto nga German nagsulat: “May kinamatarong gid sila sa pagsiling nga sila lang ang pinakadaku nga grupo sang mga nagapamatok sa pagpasakop sa Third Reich bangod sang ila konsiensia.”
“[Ang mga Saksi ni Jehova] may mabakod nga prinsipio sa moralidad. Puede naton ibutang ining indi maiyaiyahon nga mga tawo bisan sa pinakamataas nga katungdanan sa pulitika—pero indi gid naton sila mapilit nga batunon ini. . . . Nagapasakop sila sa mga awtoridad sang gobierno pero nagapati sila nga ang Ginharian sang Dios lamang ang makasolbar sang tanan nga problema sang tawo.”—Nová Svoboda nga pamantalaan, Czech Republic.
Pero wala namon ginapain ang amon kaugalingon. Nangamuyo si Jesus sa Dios tuhoy sa iya mga sumulunod: “Wala ako nagapangabay nga kuhaon mo sila sa kalibutan.” (Juan 17:15) Gani makita ninyo kami nga nagatrabaho, nagapamalaklon, kag nagaeskwela sa mga eskwelahan.