TOPIKO SA KOBER | KON ANG ISA KA PINALANGGA MAPATAY

Sala Bala nga Magpangasubo?

Nagmasakit ka na bala? Ayhan nag-ayo ka dayon, gani nalipatan mo na ini. Indi amo sina ang kasubo kon namatyan ka. “Indi gid madula sing bug-os ang kasubo,” siling ni Dr. Alan Wolfelt sa iya libro nga Healing a Spouse’s Grieving Heart. Pero nagsiling pa sia: “Sa pagligad sang tion kag sa bulig sang iban, magahaganhagan ang imo kasubo.”

Bilang halimbawa, binagbinaga ang reaksion sang patriarka nga si Abraham sang napatay ang iya asawa. Ang Biblia nagasiling nga “naglalaw kag naghibi si Abraham tungod kay Sara.” Ang ekspresyon nga “naglalaw” nagapahangop nga madugay nadula ang iya nga kasubo.a Ang isa pa ka halimbawa amo si Jacob, nga ginpapati nga ang iya anak nga si Jose ginpatay sang mabangis nga sapat. Nangasubo sia “sa sulod sang madamo nga adlaw,” kag indi sia malugpayan sang iya pamilya. Pagligad sang pila ka tuig, nagakalisod sia gihapon sa kamatayon ni Jose.—Genesis 23:2; 37:34, 35; 42:36; 45:28.

Si Abraham nga nagahibi sa tupad sang bangkay ni Sara — Nasubuan gid si Abraham sang napatay ang iya pinalangga nga si Sara

Sa karon, madamo man ang nagalalaw bangod sang kamatayon sang isa nga suod sa ila. Binagbinaga ang masunod nga duha ka halimbawa.

“Napatay ang akon bana nga si Robert sang Hulyo 9, 2008. Ang tanan nga adlaw daw pareho lang sang adlaw nga naaksidente sia kag napatay. Kada tapos pamahaw, antes sia magkadto sa iya obra, nagahalok sia sa akon, nagahakos, kag nagasiling ‘I love you.’ Bisan anom na ka tuig ang nagligad, nasakitan ako gihapon. Sa banta ko, indi gid madula ang akon kasubo sa pagkapatay ni Rob.”—Gail, 60 anyos.
“Bisan pa sobra na 18 ka tuig nga napatay ang akon pinalangga nga asawa, nahidlaw gihapon ako sa iya kag nasubuan. Kon may makita ako nga matahom nga talan-awon sa palibot, madumduman ko sia, kag ginahunahuna ko nga manamian gid sia kuntani sang akon nakita.”—Etienne, 84 anyos.

Maathag nga ang kasakit kag ang madugay madula nga kasubo natural lang sa isa nga namatyan. Lainlain ang paagi sang pagpangasubo sang kada tawo, kag indi gid maalamon nga hukman ang reaksion sang mga tawo sa trahedya. Likawan man naton nga pakalainon ang aton kaugalingon kon daw sobra ang aton pagpangasubo. Paano naton malandas ang kasubo?

a Nangasubo man sing malawig ang anak ni Abraham nga si Isaac. Subong sang mabasa naton sa “Iluga ang Ila Pagtuo” nga artikulo sa sini nga isyu, nagapangasubo gihapon si Isaac bisan pa tatlo ka tuig na nga napatay ang iya iloy nga si Sara.—Genesis 24:67.