Bugna—Mga Tanhaga nga Ginbuyagyag
1 Ang tulun-an sang Bugna madugay na nga isa ka tanhaga. Apang ang impormasyon sa Bugna wala gintuyo nga magpabilin nga tanhaga sing dayon. Bahin ini sang Pulong sang Dios nga dapat naton mahangpan. (2 Tim. 3:16, 17) Sing makalilipay, subong nga gingamit ni Jehova si Juan sa pagpaalinton sining mga palanan-awon sa mga masigka-Cristiano, ginagamit man niya karon ang “matutom nga ulipon” sa pagbuyagyag sang kahulugan sining makakulunyag nga tagna.—Mat. 24:45-47; Bug. 1:1-3.
2 Ang Tanyag sa Marso: Ang libro nga Revelation—Its Grand Climax at Hand! naghatag gid sing kasanag sa katawhan sang Dios. Apang ngaa makawiwili ini sa mga tawo sa inyo teritoryo? Bangod nagahinun-anon ini sang mga nagakatabo sa sining katapusan nga mga adlaw. Indi bala nga ang mahunahunaon nga mga tawo interesado sa palaabuton subong sang ginpahayag sang Dios? Luwas sa paglaragway sa mga paghukom sang Dios, nagahatag man ini sing mga saad tuhoy sa dalayawon nga mga pagpakamaayo sa palaabuton.—Bug. 21:1-5.
3 Ang Revelation bala tuman kadalom agod mahangpan sang publiko? Ayhan nabudlayan ang iban sa sini. Ang isa ka tawo nagsiling: “Ining impormasyon mabudlay. Apang makawiwili ini. Naluyagan ko ini.” Ang isa ka ministro nagsiling: “Wala pa ako sing nahibaluan ukon nabasa nga subong ka makakulunyag kag matinuuron sangsa sini nga libro!” Ang isa ka tawo nga nabasa ang libro sa wala pa isa ka semana nagkomento: “Karon ang akon mga mata nagmuklat gid sa kamatuoran. Luyag ko bag-uhon ang akon bug-os nga kabuhi.” Sing maathag, madamo ang nakasapo sing kalipay samtang ginabasa nila ang Bugna nga tulun-an sa Biblia nga may paghangop sa una nga tion kag ginasugdan nga tumanon ang mga pinamulong sini.
4 Irekomendar ang Revelation nga Libro sa Iban: Sa Marso, mapagsik nga itanyag ang Revelation nga libro sa iban. Isugid sa mga maluyag magbasa sini nga tandaan nila ang mga bahin sang libro nga wala nila mahangpi, kag sa pagbalik mo, hambalan ninyo ining mga punto. Nagahatag ini sing dugang nga rason para sa isa ka pagduaw liwat.
5 Dugang sa pamalaybalay nga ministeryo, dipormal nga natanyag sing madinalag-on sang madamo ang Revelation nga libro sa ila mga paryente, mga kilala, kag mga abyan sa negosyo. Ipaathag kon paano ka personal nga nakabenepisyo gikan sa buhi nga mga laragway, sa mabuligon nga mga tsart, kag sa iban pa nga mga bulig sa pagpanudlo sa libro. Mahimo ini magapalig-on sa iban nga usisaon ang tulun-an sang Bugna.
6 Daw ano nga pribilehiyo nga mahibaluan ang palaabuton nga mga hitabo subong sang ginpahayag sa tulun-an sang Bugna! Gintugyanan sina nga ihibalo, malangkagon naton nga isugid ang kahulugan sang Pulong sang Dios sa mga magapamati. Samtang ginahimo naton ini, ginalauman naton nga madamo pa ang magabuylog sa aton sa paghimo sang kabubut-on sang aton Manunuga.—Bug. 4:11.