Pagkooperar sa Aton Konduktor sang Pagtinuon sa Libro sang Kongregasyon
1 Ang Pagtinuon sa Libro sang Kongregasyon may yara importante nga papel sa pagpauswag sang aton mga ikasarang subong mga ministro. Ang mga grupo hungod nga ginahuptan nga diutay agod palig-unon ang mainit, kaangay sang pamilya nga palibot para sa pagtuon sang Biblia. Ang personal nga pagpalig-on kag igtalupangod madali nga matigayon paagi sa kahimusan sang pagtinuon sa libro. Paano kita makakooperar sing bug-os sa konduktor kag makabenepisyo gikan sa sining maayo nga aman?
2 Makugi nga Bahin sa Ministeryo sa Latagon: Ang isa sang pinakaimportante nga salabton sang konduktor sa pagtinuon sa libro amo ang pagbulig sa tagsatagsa sa grupo nga makigbahin sing makugi sa ministeryo. Nahanungod sini, ang Aton Ministeryo nga libro nagapahanumdom sa aton sa pahina 44 nga “ang pagkatayuyon, pagkakugi kag kapagsik nga ginapakita niya sa hilikuton sa latagon mapabanaag sa mga manugbantala.” Masakdag mo bala sing tayuyon ang mga miting antes mag-alagad sa latagon? Ang imo paghimo sini pagapasalamatan sing daku sang inyo konduktor sa pagtinuon sa libro kag sang iban pa nga mga manugbantala.
3 Ang mga miting antes mag-alagad sa latagon ginahimos sa kombeniente nga mga duog agod ang tanan makapakigbahin sing makugi sa pagbantala nga hilikuton. Samtang ginabinagbinag ang lokal nga mga kahimtangan, ang tagsa ka grupo maluyag sa pagsugod sing temprano sa ministeryo.
4 Luyag mo bala magpabulig sa pila ka bahin sang ministeryo? Ayhan ang inyo konduktor sa pagtinuon makahimos nga updan ka sang isa ka sangkol nga manugbantala. Sa katapusan sang bulan, pat-ura nga ihatag ang imo report sing maaga. Pasalamatan sang konduktor sa pagtinuon sa libro kag sang sekretaryo ang imo kooperasyon sa sini man.—Ipaanggid ang Lucas 16:10.
5 Kon ang Manugtatap sa Pag-alagad Nagaduaw sa Grupo: Ang manugtatap sa pag-alagad masunson nga nagaduaw sa isa ka grupo sang pagtinuon sa libro kada bulan. Pamatii sing maayo ang 15-minutos nga pamulongpulong nga ihatag niya pagkatapos sang pagtinuon sa libro, kay nagahatag ini sing espesipiko nga laygay sa grupo kon paano mag-uswag sa lainlain nga mga bahin sang pagbantala nga hilikuton. Ang manugtatap sa pag-alagad nalangkag man mag-upod sa grupo sang pagtinuon sa libro sa talipuspusan sang semana. Pat-ura nga himuslan ining pinasahi nga aman agod makabenepisyo kamo gikan sa iya eksperiensia kag ikasarang sa latagon.
6 Ang aton personal nga halimbawa sang kooperasyon kag ang aton kahanda sa pagbulig sa mga indi eksperiensiado magabulig sa pagtuga sing mainit, mainabyanon nga palibot sa Pagtinuon sa Libro sang Kongregasyon samtang “nagabuhat kita sing maayo ayon sa tanan nga tawo, kag labi na gid sa mga tagapanimalay sang pagtuo.”—Gal. 6:10.