Magpili sing Nagakaigo nga mga Punto nga Mahambalan
1 Ano ang himuon naton agod palig-unon ang mga tawo nga basahon Ang Lalantawan kag Magmata! sing regular? Kinahanglan nga may makawiwili kita nga mga punto nga mahambalan kon nagarekomendar sang mga magasin sa iban. Kon kilala na naton sing maayo ang mga tawo sa aton teritoryo kag ginahunahuna sila kon nagabasa kita sing mga magasin, makapangita kita sing mga punto nga mahambalan nga makabuyok sang ila interes.
2 Sa iban nga mga lugar ang mga tawo mahimo nga palareho sing ginhalinan, nga labi nga nagapahapos matandaan ang pila ka punto nga magawili sa kalabanan. Apang sa iban nga mga lugar, makasalapo kita sing mga tawo halin sa madamong lainlain nga ginhalinan. Kon may ginahunahuna kita nga pila ka punto nga mahambalan, sarang kita makapili sing isa nga nagakaigo gid sa tagsa ka tawo nga masugilanon naton. Halimbawa, sa tagsa ka guwa sang Magmata! may isa ka artikulo nga ginsulat ilabi na para sa mga pamatan-on. Masunson nga luyag sang mga lalaki ang “Pagbantay sa Kalibutan,” ukon ang sientipiko nga mga artikulo nga seksion, samtang luyag sang mga ginang sa puluy-an ang mga artikulo nahanungod sa pamilya. Magmahantupon kon nagapili sing mga punto nga mahambalan.
3 Indi sa gilayon pagtagua ang daan nga mga guwa sang magasin kon mabaton mo ang mga bag-o. Masami nga ginapakita sang isa ka utod nga lalaki ang tatlo ukon apat ka guwa sang Ang Lalantawan kag Magmata! sa tagbalay kag ginapapili sia sing isa nga luyag niya mabasa.
4 Madamong tawo nga bisan pa nga may interes sa kamatuoran, wala mag-uswag tubtob sa punto nga magbaton sing isa ka pagtuon sa Biblia. Apang ang ila interes sarang mapalambo kon may isa nga nagaduaw sing tayuyon nga dala ang tagsa ka bag-ong guwa sang mga magasin. Huo, ang matutom nga pagdul-ong sang mga magasin sa isa ka ruta sang magasin nagpahulag sa mga tawo nga magpasugot sa ulihi nga magtuon sang Biblia sing regular.
5 Paagi sa pirme nga paggamit sang nagakaigo nga mga punto nga mahambalan, mapahulag naton ang iban sa pagbasa sang mga magasin kag ayhan mabuligan sila sa paglakat sa dalan padulong sa kabuhi. (Mat. 7:14) Kon binagbinagon naton sing maayo ining importante nga butang, makasalig kita sa pagpakamaayo ni Jehova.