Paggamit sing mga Tract sa Pagpatubas sing Mapuslanon nga mga Resulta
1 Ang modernong-adlaw nga organisasyon ni Jehova may maragtas sang madinalag-on nga paggamit sing mga tract. Ang ngalan mismo sang aton legal nga korporasyon, ang Watch Tower Bible and Tract Society, nagapakita nga ang mga tract may importante nga bahin sa pagpalapnag sang maayong balita. Kutob sang 1881 tubtob sang 1918, kapin sa 300 milyones ka tract ang ginpanagtag sang katawhan ni Jehova. Madamo sa nagkalabilin sang mga kauturan ni Cristo sa sining panag-on ang una nga ginpakilala sa kamatuoran paagi sa sining unang mga tract.
2 Sang 1987 ginpadaku liwat ang paggamit sing magagmay nga mga tract sang ginpaguwa ang apat ka maduagon nga tract nga natigayon kutob sadto. Ginpahibalo sa 1992 “Manugdala sing Kapawa” nga Distrito nga Kombension nga ining serye sang mga tract padakuon upod ang dugang nga apat pa ka maduagon kag nagapahunahuna nga mga tract. Ini amo ang Paglipay Para sa Napung-awan, Magkalipay sa Pagkabuhi Subong Pamilya, Sin-o Gid ang Nagagahom sa Kalibutan? kag Ini Bala nga Kalibutan Makalampuwas? Ginagamit bala ninyo ining walo tanan ka tract sa pagpatubas sing mapuslanon nga mga resulta sa inyo ministeryo?
3 May maayo nga mga resulta gikan sa epektibo nga paggamit sang mga tract. Kinahanglan nga mangin pamilyar kita sa kada isa sini. Halimbawa, nabasa na bala ninyo ini sing maayo sa paghibalo kon ano ang ginahambalan sang kada isa? Nahunahuna na bala ninyo kon sa ano nga sari sang tawo makagalanyat ang tagsa ka tract? Ang inyo pagpamilyar sing maayo sa tagsa ka tract magapabakud sang inyo pagsalig nga magamit ini sa pamalaybalay nga hilikuton subong man sa madamong sitwasyon diin makapanaksi kamo sing dipormal.
4 Gamita sa Pamalaybalay nga Ministeryo: Ang isa ka manugtatap sa sirkito nagasulat: “Nakatigayon ako sing daku nga kadalag-an paagi sa pagsugod sang akon kalabanan nga mga paghambalanay nga nagagamit sing tract.” Natilawan na bala ninyo ini nga paagi? Ngaa indi paggamiton ang mga tract subong paagi sa pagsugod sang inyo paghambalanay? Sa walo ka tract, kita karon may walo ka makapulukaw nga mga introduksion nga mapilian. Ang tagsa ka tract nagahatag sa aton sing kahigayunan nga makasugod sing pagtuon sa Biblia sa nahauna nga pagduaw ukon sa pagduaw liwat.
5 May iban pa nga mga kahigayunan nga magamit ang mga tract. Samtang nagapakigsugilanon sa ganhaan, mahimo ninyo mahibaluan nga bag-o lang sia namatyan sing isa ka hinigugma ukon nga may nagamasakit sa ila pamilya. Ang mga tawo nga nagabatyag sing daku nga kasubo ukon nagapanikasog nga malandas ang madugay na nga mga kabudlayan masami nga nagapalambo sing negatibo nga mga balatyagon kag ginapung-awan. Daw ano ka mahigugmaon nga ipaambit ang makapalig-on nga mensahe nga masapwan sa tract nga Paglipay Para sa Napung-awan! Mahimo ninyo mahibaluan nga bag-o lang sia ginbulagan ukon nga nadula niya ang iya palamugnan. Ina nga mga eksperiensia makasulubo gid kag daku nga problema sa pamilya. Gamita ang mga pamangkot sa pahina 2 sang tract nga Magkalipay sa Pagkabuhi Subong Pamilya: “Ngaa ang mga pamilya sa karon ginatublag sang mabug-at nga mga problema? Paano kita magkalipay sa pagkabuhi subong pamilya?” Ayhan amo gid ini ang mga pamangkot nga ginahunahuna niya. Bisan pa indi sa gilayon makita ang interes, posible nga basahon niya sa ulihi ang tract.—Manugw. 11:6.
6 Sa iban nga mga kongregasyon ang teritoryo masunson nga ginapangabudlayan, kag madamo nga tawo ang may mga literatura na naton. Paagi sa paggamit sa mga tract, kahigayunan naton nga mahambalan ang pila ka butang nga makawiwili sa mga tagbalay, ginapahambal sila, kag ginapahunahuna sila nahanungod sa paglaum sa Ginharian. Magtanum sing pamangkot sa ila hunahuna nga sarang mahambalan sa ulihi nga tion. Magduaw liwat, kag palambua ini nga interes sing dugang pa. Sa ulihi masugdan naton sa ila ang pagtuon nga nagagamit sing isa ka brosyur ukon isa ka libro nga yara na sa ila.
7 Gamita ang mga Tract sing Dipormal: Kon ang mga tract madali makuha—sa aton bulsa, kahita, ukon bag sa pagpanaksi—sarang naton ini magamit sa madamong lainlain nga okasyon, kon diin may mga tawo. Gamita ini samtang nagapamalaklon, nagalakbay, ukon nagapakigsugilanon sa mga paryente ukon mga bisita. Ang mga tract nagahatag sa aton sing kahigayunan nga makapanaksi sa malip-ot. Ang tract isa ka butang nga indi makapagumon sa tawo kundi prangka kag mataktika. Ginabaton ini sa gilayon sangsa libro ukon mga magasin, sanglit indi tuman kadamo ang basahon.
8 Mangin alisto sa mga kahigayunan nga matanyag ang mga tract sing dipormal sa eskwelahan ukon sa inyo ulubrahan, sa mga restawran, sa gasolinahan, kag iban pa. Sang ulupdan niya ang iya lola sa doktor, ginpat-od sang utod nga babayi nga magdala sing pila ka tract. Sa opisina sang doktor, nasugilanon niya ang isa ka manugbata nga iloy. Pagkatapos mapakita ang tract nga Kabuhi sa Mahidaiton nga Bag-ong Kalibutan sa babayi, ang utod namangkot: “Luyag mo bala padakuon ang imo anak sa isa ka kalibutan nga kaangay sang ginalaragway diri?” Nasundan niya ina nga paghambalanay paagi sa pagduaw sa balay sang babayi. Nagdul-ong ini sa pila ka regular nga pagduaw liwat.
9 Sarang Masugdan ang mga Pagtuon sa Biblia Paagi sa mga Tract: Ang isa ka manugtatap sa sirkito nagreport nga ang kongregasyon nga ginduaw niya nakasugod sing 64 ka pagtuon sa Biblia sa puluy-an sa isa ka semana paagi sa paggamit sa mga tract sa nahauna nga pagtamyaw sa tagbalay.
10 Natilawan na bala ninyo ang magtanyag sing pagtuon sa Biblia sa nahauna nga pagduaw sa pamalaybalay? Paagi sa paggamit sa tract, mahimo ninyo mapasundayag sa malip-ot kon paano himuon ang pagtuon. Ginhimo ini sang isa ka utod nga babayi nga nagagamit sing tract nga Kabuhi sa Mahidaiton nga Bag-ong Kalibutan. Nagatudlo sa laragway, ginpamangkot niya ang tagbalay kon ginahunahuna bala niya nga mangin kaangay gid sina ang aton duta. Pagkatapos makasabat ang tagbalay, gin-agda sia sang utod nga basahon ang 2 Pedro 3:13 kag Isaias 65:17, nga ginapadaku sa tract. Nian ang utod nagsiling: “Ining mga saad indi lamang damgo ukon pantasya kundi ginsaad sa Pulong sang Dios, ang Biblia.” Nian ginhimos niya nga padayunon ang paghambalanay sa masunod nga semana. Sa masunod nga pagduaw, madamudamo sa mga pamangkot sang babayi ang ginsabat kag ang libro nga Mahimu Ka Mabuhi sing Dayon sa Paraiso sa Duta ginbilin. Isa ka pagtuon sa Biblia ang nangin resulta.
11 Isa bala ikaw nga bag-o lang nabawtismuhan ukon ayhan isa ka dibawtismado nga manugbantala nga nagakuha pa lang sing eksperiensia sa imo ministeryo? Kon amo, mahimo mo palapitan ang mga mas eksperiensiado kag mangayo sa ila sing mga panugda kon paano gamiton ang mga tract sa teritoryo sang inyo kongregasyon. May madamo kita nga halimbawa sa Biblia sadtong nakabaton sing pagpalig-on kag panuytoy gikan sa mga hamtong sa pagtuo.—Binu. 18:24-27; 1 Cor. 4:17.
12 Ang konduktor sa Pagtinuon sa Libro sang Kongregasyon makabulig ilabi na sa paghimo sing mga kahimusan para sa iban nga buligan kamo sa paggamit sa mga tract sing epektibo. Salabton sang mga ginikanan nga buligan ang ila kabataan nga mag-uswag sa pagbantala nga hilikuton. Ang isa ka lamharon nga Saksi ginhanas sang iya mga ginikanan sa pagtanyag sing tract nga Kabuhi sa Mahidaiton nga Bag-ong Kalibutan. Samtang nagaupod sa iya iloy sa isa ka pagtuon sa Biblia, gintanyag niya ang isa ka tract sa bana sang interesado. Nagdayaw gid ang bana nga ang isa ka bata may subong sina kakusog nga relihiosong pagtuo. Nanamian gid sia sa nabasa niya sa tract. Kada magbalik ang bata nga babayi upod sang iya iloy, ginasugid niya ang isa ka kasulatan ukon sugilanon sa Biblia nga ginhanda niya ilabi na para sa bana. Ang bana nagabasa karon sing regular sang mga magasin, nagpakita sing interes sa Revelation Climax nga libro, kag nagtambong sa pila ka miting. Ini tanan bangod sang paghinguyang sing tion sang mga ginikanan nga himuon ang ila mga salabton nga tudluan ang ila anak nga babayi sa paggamit sing maayo sang mga tract.
13 Gamita ang Aton Bag-ong mga Tract sing Epektibo: Sa paggamit sa tract nga Ini Bala nga Kalibutan Makalampuwas? mapakilala mo ang imo kaugalingon kag masugdan ang inyo paghambalanay paagi sa pagsiling: “Maayong aga. Ginasugilanon namon ang mga tawo nahanungod sa kalidad sang kabuhi sa karon. Sa banta mo magauswag bala ang kalidad sang kabuhi, ukon padayon bala ini nga magausmod? [Pasabta sia.] Nagahunahuna ang iban nga ang nagakatabo karon sa kalibutan katumanan sang tagna sang Biblia kag nga ang katapusan sang kalibutan malapit na. Ano sa banta mo?” Pagkatapos makasabat ang tagbalay, itanyag ang tract kag ipatalupangod ang tatlo ka pamangkot sa ikaduhang parapo. Nian padayuna ang pagkasunodsunod sa tract sa pagpakita kon paano anay nalaglag ang kalibutan kag nga ang karon malaglag man. Sa paghinakop sang pagduaw, maghimos sing isa pa ka pagduaw sa pagbinagbinag sang pamatuod sang Biblia nga ang katapusan sang kalibutan malapit na.
14 Madamong beses nga nasapwan naton ang aton kaugalingon sa kahimtangan nga mapaambit ang mensahe sang Ginharian sa iban sa makadali lang, kaangay sa ulubrahan ukon sa eskwelahan. Sa inyo ulubrahan, mahimo magautwas ang paghambalanay tuhoy sa ulihi nga balita nahanungod sa gobierno. Mahimo kamo makaugyon nga walay sapayan sang tanan nga mga panikasog nga ginahimo sang mga lider nga ayhan may maayo sing tinutuyo, ang kalibutan nag-antos sing daku sa bug-os nga maragtas. Nian patuhuyi ang parapo sa ubos sa pahina 2 sang tract nga Sin-o Gid ang Nagagahom sa Kalibutan? Basaha ang tatlo ka nagapahunahuna nga pamangkot. Kon wala sing tion para sa malip-ot nga paghambalanay, hatagi ang (mga) tawo sing tract kag maghimos nga hambalan ining mga pamangkot sa iban nga oras ukon lugar.
15 Subong mga indibiduwal kag mga pamilya, maghinguyang sing tion sa pagbinagbinag kon paano itanyag ang tagsa sining lainlain nga tract. Maghiwat sing mga sesyon sa pag-ensayo. Paano ninyo magamit ang mga tract upod sa iban pa nga literatura nga ginagamit sa pag-alagad sa latagon para sa bulan? Ano ang imo mga kaladtuan diin madala mo ang pila ka tract? May masugilanon ka bala karon nga semana nga makabenepisyo gikan sa suno sa tion nga mensahe nga ginahatag sining mga tract?
16 Ang hanuot nga gugma kay Jehova kag kabalaka sa mga tawo nagapahulag sa aton nga himuon ang aton tanan nga masarangan sa pagpahibalo sang maayong balita. Luyag buligan sang isa ka bata nga lalaki, nga siete anyos, ang iya tupad-balay nga makasulod sa bag-ong sistema, gani ginhatagan niya sia sing tract, kag isa ka pagtuon sa Biblia ang nasugdan. Simple katama! Apang ginaapresyar gid bala naton ining simple nga paagi sa aton ministeryo? Sa masunod nga tion nga nagabilin kita sing tract sa isa ka tawo, mahimo man ini magadul-ong sa pagtuon sa Biblia. Kon ginagamit naton sing maayo ang mga tract sa pagbantala sang maayong balita sang Ginharian, makapat-od kita sa pagtigayon sing mapuslanon nga mga resulta.