Pangitaa Anay ang Ginharian sang Dios​—Paagi sa Pirme nga Pagdulot sang mga Halad sang Pagdayaw

¹ Ang mga nagapangita anay sang Ginharian pirme nga nagahambal tuhoy kay Jehova kag sa iya Ginharian. (Sal. 145:​11-13) Madamo sang kahigayunan nga makahambal tuhoy sa maayong balita adlaw-adlaw. (Sal. 96:2) Ang salmista nagsiling: “Magadayaw kami sa Dios sa bug-os nga adlaw.” (Sal. 44:8) Kon amo man sina ang aton ginabatyag, mangin mapagsik kita sa pagpakigbahin sa ministeryo sang Ginharian sing regular.

² Si Jehova wala magtukod sang espesipiko nga mga kasuguan sa kon daw ano kadamo nga tion ang dapat naton ihinguyang sa ministeryo, apang ginapalig-on niya kita nga dayawon sia “pirme.” (Heb. 13:15) Kon ginatugot sang aton mga kahimtangan, dapat naton himuon nga tulumuron ang maghinguyang sang pila ka tion sa pagdayaw kay Jehova kada semana. Ang mga nagahimo na sini mahimo makaalagad subong auxiliary payunir sa tion kag tion ukon sing regular. Ang iban nga nagaalagad na subong mga auxiliary payunir mahimo makapalista subong mga regular payunir.

³ Posible bala sa aton nga mapauswag ang aton halad sang pagdayaw? Ang kakugi ginapahulag sang apresasyon. Ang personal nga pagtuon sa Pulong sang Dios nagapalambo sang apresasyon. Ang mga miting sa Kongregasyon nagapahulag sa aton nga ipabutyag ina nga apresasyon sa praktikal nga mga paagi. Ang suod nga kaangtanan sa iban nga makugi nga mga dumalayaw sarang ‘makapukaw sa aton sa maayong mga buhat.’ (Heb. 10:24) Paagi sa bug-os nga paghimulos sa sining mga aman, mahimo naton mapauswag ang aton halad sang pagdayaw.

⁴ Ang manalagna nga si Ana nagpahamtang sing maayo nga halimbawa sa pag-alagad kay Jehova. Walay sapayan sang 84 anyos nga pangidaron, ‘wala gid sia makapalya sa templo, nga nagahimo sing balaan nga pag-alagad sa adlaw kag gab-i.’ (Luc. 2:37) Ang iya bug-os kalag nga pagpakigbahin sa mga hilikuton sa kongregasyon nagahatag sing pagpalig-on sa aton karon.

⁵ Si Pablo nagpanugda nga yadtong mga “mabakod dapat magdala sang mga kaluyahon sang mga maluya.” (Roma 15:1) Sing kaanggid may pila sa inyo kongregasyon nga makapanginpulos sa inyo maluluy-on nga pagbulig kag pagpalig-on. Ayhan ang isa ka manugbantala nagakinahanglan sing transportasyon ukon sang isa nga maobrahan. Mahimo nga ginaproblema sang iban ang pagluya sing buot, kag mahimo ka makaaman sing makapalig-on nga pagsakdag agod mapasag-uli ang kakugi sang isa sa pag-alagad sa Ginharian.​—1 Tes. 5:14.

⁶ Imposible sambiton ang tanan nga butang nga nahimo na kag pagahimuon pa ni Jehova para sa aton. Wala sing paagi nga mabayaran naton sia sa sining mga pagpakamaayo. Busa may makusog nga mga rason para sa ‘tanan nga nagakabuhi sa pagdayaw kay Jehova!’​—Sal. 150:6.