Mga Pagpakamaayo Gikan sa Pagpangabudlay Upod sa Iban
1 Nagapati bala kamo nga may yara maagom nga mga benepisyo sa pagpangabudlay upod sa iban sa ministeryo? Si Jesus nagapati. Bisan pa bugana ang alanyon kag pila lamang ang mga mangangani, ginpadala niya sa latagon ang 70 ka disipulo “sing tagduhaduha.” Daw ano ka makalilipay nga tion ang natigayon nila tanan sa pagbantala sa “tagsa ka siudad kag duog nga iya kadtuan”!—Luc. 10:1, 17; Mat. 9:37.
2 Makapapagsik ang mangabudlay upod sa iban. Ang pila sa aton mahuluy-on kag nabudlayan makigsugilanon sa mga dumuluong. Kon kita may kaupod, magahatag ini sa aton sing pagsalig nga mapamulong ang Pulong sang Dios sing masidla. Kon kita may kaupod, mas mahapos para sa aton ang paghimo sang hilikuton sa paagi nga kita ginhanas. (Hulu. 27:17) Ang maalamon nga tawo nagsiling: “Ang duha maayo pa sa isa.”—Manugw. 4:9.
3 Ang pagpangabudlay upod sa lainlain nga mga manugbantala kag mga payunir maayo. Ang mga kaupdanan ni apostol Pablo sa pag-alagad naglakip kanday Bernabe, Silas, Timoteo, kag Juan Marcos, kag naagom nila ang madamong pagpakamaayo samtang nagbantala nga magkaupod. Amo man sa karon. Nakapangabudlay na bala kamo upod sa isa nga madugay na sa kamatuoran? Sa tapos mapanilagan ang iya kalantip sa pagpanaksi, mahimo nga nakapulot kamo sing pila ka maayong ideya nga nakabulig sa inyo pag-uswag. Nakaupod na bala ninyo ang mga manugbantala nga bag-uhan pa lamang? Nian mahimo nga napaambit ninyo ang inyo natun-an kag sa amo nabuligan sila nga mangin mas epektibo kag makasapo sing daku pa nga kalipay sa ministeryo.
4 Nagadumala bala kamo sa karon sing isa ka pagtuon sa Biblia? Kon amo, ngaa indi pag-agdahon ang isa sa mga gulang ukon ang manugtatap sa sirkito nga mag-upod sa inyo? Mapuslanon para sa aton mga estudyante sa Biblia nga makilala sing maayo ang mga manugtatap. Kon nagapangalag-ag kamo sa pagdumala sing pagtuon sa atubangan sang isa ka gulang, mahimo nga handa sia nga dumalahan ini kag pabay-an kamo nga makapanilag. Pagkatapos, mangayo sa iya sing mga panugda sa kon paano ninyo mabuligan ang estudyante sa pag-uswag sing mas madasig.
5 Mangin isa ka makapalig-on nga kaupod kon nagapangabudlay upod sa iban. Mangin positibo sa inyo mga komento nahanungod sa teritoryo. Indi magkutsokutso nahanungod sa iban ukon magreklamo nahanungod sa mga kahimusan sang kongregasyon. Hupti ang inyo hunahuna nga nasentro sa ministeryo kag sa mga pagpakamaayo gikan kay Jehova. Sa amo, kamo kag ang inyo mga kaupdanan magapauli nga napapagsik sa espirituwal.
6 Mahimo nga bangod sang inyo mga sirkunstansia mabudlay para sa inyo ang magpangabudlay sing tayuyon kaupod sang iban. Walay sapayan, kon masarangan ninyo, ngaa indi pagtinguhaan nga makahinguyang sing pila ka tion agod makapangabudlay upod sa isa pa ka manugbantala? Lunsay kamo pakamaayuhon!—Roma 1:11, 12.